Goomịnị-otu Biimịnị Biibịbịbo

Te otu kị “sẹlẹ wẹrịemi angel-otubo” a o 1Timothy 5:21 gbaa bara diidaba?

Fịrịmọpaaowei Paul gẹẹ akị wó timitimi itukosuowei Timothy yarịmị: “Ọkpọnanaowei mọ Christ Jesus mọ bá sẹlẹ wẹrịemi angel-otubo mọ tọrụyọ bọọ ịmịnị kụrọ akị ị́ pịrịdẹ, bei gbaa wẹrịemi yebo kị dimịẹ, kẹnịanga kpọ pougha bara ka kị ụgụlapẹlẹ, zụa otu didụbamọ bá zụa otu diseimọ bara mịẹkụmọ.”—1Tim. 5:21.

Omịnị bọlọụ, sẹlẹ wẹrịemi angel-otubo ikpudu bọọ sụọgha otubo kẹrị ẹrẹteimịnị Gaan baramị, bei sẹlẹ wẹrịemi angel-otubo 144,000 otubogha. Paul gẹẹ Timothy pịrị ifiemị, agọnọ amúmịnị Christtuuduo-otubo fịịyọduoseri agọnọ amúmịnị ifiemị naa lagha. Fịrịmọpaa-otubo mọ bá agọnọ amúmịnị otubo mọ naa tẹmẹ angọ nanawẹrị agọnọ amúgha duonị, ámịnị kị bịsẹ “sẹlẹ wẹrịemi angel-otubo” wo mọ gbaa a fa.—1Cor. 15:​50-54; 1Thess. 4:​13-17; 1John 3:2.

Bịsẹ “sẹlẹ wẹrịemi angel-otubo” akị Noah opu-beni ifiema bei kiriogbo ma bo angelbo kpọ bịmọgha. Bịsẹ angelbo Satan anga ka sụọwẹrị bo seitẹmẹ-ama paawẹrị, Jesus pịrị duomị. (Gen. 6:2; Luke 8:​30, 31; 2Pet. 2:4) Bei bọlọụmị, Jesus Christ kọn á gbein dụụfaa ogugu ka tụa kaịwẹrị kụraị kẹnị ogịzị baịmịnị, bịsẹ ifie bụọdaba á mọ Satan mọ báasiinmịnị.—Jude 6; Rev. 20:​1-3, 10.

Biin peibolou nana wẹrịemi angel- otuama k’emi. (Heb. 12:​22, 23) Ásẹsẹ kị kpekẹnị ifie kẹnị fịrịpaa wẹnịmịnị bara wo mọ iroro agbẹịgha. (Rev. 14:​17, 18) Wo ukie wẹrịemi aba, kẹnị ifie Jehovah kẹnị angel kị fịrịmọwẹrị 185,000 Assyria sụụ otuama báamị. (2Ki. 19:35) Jehovah zụa angel-otuama kị sẹlẹwẹrị “[Jesus] Dáabụọ duo kịmị mịẹ adalaimịnị yebo mọ bá sei mịẹmịnị otubosẹ seriisiinmịnị.” (Matt. 13:​39-41) Zụa angel-otuama “sẹlẹ akị wẹrịemi kịmịbo bẹnịmọwẹrị” agọnọ a múmịnị. (Matt. 24:31) Bá mọkpọ gbaa zụa angel-otuama pịrịwẹrị ‘wo wẹnịmịnị fịrịbosẹ ditụamịnị.’—Ps. 91:11; Matt. 18:10; Matthew 4:11; Luke 22:43 kpọ kọn tua dii.

Kaanghaba 1Timothy 5:21 gbaa wẹriemi “Sẹlẹ wẹrịemi angel-otubo,” bẹbẹ yelaa fịrịama kị wẹnịmịnị. Bịsẹ gooyọ didaba, Paul itukosuotubo ebi bara akị á pịrị wẹrịemi fịrịbo wẹnị, bá itu bolou bọọ emị otubo kpọ itukosuotubo didụbamọ bara gbaa wẹrịemi. Itukosuotubo ánị fịrịbo wẹnịmịnị ifiesẹ “kẹnị-anga kpọ pougha” bara mọ bá kpaa ebibara ye-irorogha timi iroro tọn anịghakpọ ụgulapẹlẹ fịrịwẹnị kụmọ bara gbaamị. Itukosuotubo Paul tolumọbịbị kẹrịakị agbẹị-emi yelaa tuu emi, ámịnị “Ọkpọnanaowei mọ Christ Jesus mọ bá sẹlẹ wẹrịemi angel-otubo” mọ tọrụyọ ka fịrịwẹnị ánị bịnaotubo pịrịmịnị. Gaan baramị, itu gbelemọ yọbị bẹbẹ-bẹbẹ fịrịama ka kị angel otubo pịrị wẹrịemi, gbaamaba, zụa yaị itu kekeremịnị, zịnị yaị egberigbaa fịrị kị ditụamịnị, zụa ba akị fịrịwẹnịmịnị bara kị gbaa Jehovah pịrịmịnị.—Matt. 18:10; Rev. 14:6.