Adam Mọ Eve Mọ Ọkpọnanaowei Gbaaye Peigha

Kẹnị erein, Eve bẹtịbị emi ifiemị, kẹnị seiye anịghakpọ dawaịn a mọ mọ́ ẹrẹmị. Ụ gbaamị: ‘Kọkọ Ọkpọnanaowei ị́ bụọmọ wẹrị tịn-beinyaịbosẹ fịgha fa?’ Eve gbaamị: ‘Tịn-beinyaịbosẹ omịnị mọ fị a paaemi, anịa kẹnị bẹtịbị kị fị a paagha. Omịnị bịsẹ tịn-beinyaị fị daba, omịnị fịị mịnị.’ Seiye gbaamị: ‘Ị́mịnị fịịgha fa. Ị́mịnị tịn-beinyaị fị daba, Ọkpọnanaowei bara kị paa mịnị.’ Ụ gbaaye mị kọkọ kịrịị-emi? Kịrịịgha, ikpé egberi kị ómịnị mọ gbaamị. Mọabịkpọ Eve wó gbaaye peimị. Eve tịn-beinyaị dimịnị mị, tịn-beinyaị fị a dịsẹ kụrọmọdẹịnmị. Anịduonị, Eve tịn-beinyaị fị wẹrị zụa akị Adam pịrịmị. Ámịnị Ọkpọnanaowei gbaaye peighaba, ámịnị fịịmụ bara Adam mọ nimi wẹrịmị. Mọabịkpọ Adam tịn-beinyaị fịmị.

Bịsẹ erein bị, Jehovah Adam mọ Eve mọ ẹrẹmị. Ámịnị wó gbaaye peigha tuumị, Jehovah mọ akị á biimị. Eve akị seiye anịghakpọ dawaịn kị gbaịnmọmị, Adam bá Eve kị gbaịnmọmị. Adam mọ Eve mọ wó gbaaye peigha duonị, Jehovah Eden fanụ-kiri bọọ á duopaamọmị. Ámịnị benebene waị Eden duosụọgha fa yọ duonị, Jehovah angel-ama mọ bá fẹnị-kẹrịmịnị agbọdọ mọ akị bọlọụ bọọ tịẹmọmị.

Jehovah ụyapẹlẹ akị ikpé owei pịrịmụ bara gbaamị. Seiye kị gbẹsị Eve mọ ẹrẹ bara fa. Seiye-ama laa ẹrẹmụ bara Jehovah mọ kọn á tẹmẹgha. Kẹnị sei angel kị Eve lẹlẹmọ dọụtimi kị duonị, seiye mịẹ wẹrị ẹrẹmị. Satan mọ Devil mọ kị bịsẹ angel ẹrẹmị. Jehovah mị bọlọụma Satan baá mịnị, anịkị ómịnị bá laa kịmịotu lẹlẹmọ wẹrị seiye mịẹgha fa.