Israel-otu Bọlọụ Pẹrẹmị

Jehovah ụgụlapẹlẹ-otuama ka kị Israel-otubo daatimimị, anịa Jehovah pẹrẹ akị á pịrị bara ámịnị mọ gbaamị. Ámịnị gbaa Samuel pịrịmị: ‘Wo mọ naịn emi ibebosẹ pẹrẹama emi. Wo kpọ wo daamụ pẹrẹ kị dọụ wẹrịemi.’ Bei yebị kịrịịgha bara Samuel mọ iroromị, anịduonị ómịnị tẹẹ Jehovah pịrịmị. Jehovah gbaa ụ pịrịmị: ‘Ámịnị ị́ diseimọgha, ịmịnị kị diseimọmịnị. Gbaa á pịrị ámịnị pẹrẹ nana mịnị, anịa pẹrẹ bị ánị bara duo biin yeama biimịnị.’ Israel-otubo gbaamị: ‘Bịsẹbara kị paa kpọ, ese fa. Omịnị wo daamụ pẹrẹ kị dọụ wẹrịemi!’

Saul tịịnmịnị owei kị bọlọụ pẹrẹ sụọmụ bara Jehovah mọ gbaa Samuel pịrịmị. Saul Ramah a mú Samuel diiyọ a mú ifiemị, Samuel pulou akị Saul tịbị deinmọwẹrị wó akị pẹrẹ tụamị.

Bịsẹ yọ bụọdẹmị Samuel Israel-otubo tịịn bẹnịmọwẹrị ánị aya pẹrẹ bị akị á dịamị. Anịa ámịnị Saul ẹrịgha. Tuubị ị́ mọ nimimị? Saul akpa-ama ovurubo ka sọwẹị-timimị. Ámịnị ụ dọụ paamọ bomị ụ kọn kịmịbo ovuru bọọ tịẹmọmị. Saul danghaịn kịmịsẹ dẹịnmi, má ebi kụrọmọmị. Samuel gbaa á pịrịmị: ‘Bei Jehovah sẹlẹdẹ owei bị.’ Kịmịbo gịamị: ‘Pẹrẹ sụọtimi ụndụ!’

Saul bọlọụ Pẹrẹ a sụọ ifiebị, Samuel gbaa egberi kị peiwẹrị Jehovah dọụbara mịẹtimimị. Anịa ómịnị deimị. Gbaamaba, pẹrẹbị ịkịan-kụn agbẹịgha wẹrịmị. Kẹnị ifie, Saul timi ụ koru bara Samuel mọ gbaamị. Anịa Samuel kịalị bogha duonị, Saul timi Samuel korugha bẹtịbị ịkịan-kụnmị. Samuel tebara kị mịẹ ma o? Samuel gbaa ụ pịrịmị: ‘Ị́mịnị Jehovah gbaabara kị mịẹ agbẹịtimimị.’ Saul wó mịẹkiri ye duo ye tolumọ akị ma o?

Bịsẹ yọ bụọdẹmị, Saul Amalek-otubo mọ sụụ yọ a múmị, ama bọọ emi kịmịbosẹ baasiin bara Samuel mọ gbaa Saul pịrịmị. Anịa Saul Pẹrẹ-owei Agag baagha. Jehovah gbaa Samuel pịrịmị: ‘Saul in’a barasiindẹ, bá ine gbaa egberi peigha.’ Yebị Samuel mịẹ pọwẹịmọgha, ómịnị gbaa Saul pịrịmị: ‘Ị́mịnị ba Jehovah dọụbara mịẹgha duonị, ómịnị zịnị pẹrẹ kọn ị́ deimịnị.’ Samuel waị múmịnịmị, Saul wó bịdẹ kpụnwẹrị Samuel bịdẹbị kaịnmị. Samuel gbaa Saul pịrịmị: ‘Jehovah daabụọ kọn iné bara duo seridẹ.’ Jehovah daabụọ bị akị wó tarịemi bá wó dọụbara mịẹmịnị kịmị kị pịrịmịnị.