Jesus Saul Sẹlẹmị

Saul Rome-owei, anịa Tarsus ama ka ụ ziimị. Saul Pharisee kịmị, ómịnị ebibara Jew-otu Olokobo nimiwẹrịmị bá Christtuuduo-otubo kpọ golutimi mị. Ómịnị Christtuuduo-otu warịbo a múwẹrị á kẹrị ikoliwarị a kaịtimi mị. Kịmịama Stephen gbein-baa ifiemị, ómịnị kpọ yọ bọọ timi mị.

Anịa Jerusalem bọọ emi Christtuuduo-otubo bẹtịbị kẹrịkaịtimi yọbị wó a biribeingha. Anịduonị, tịbị ịkịankụn-owei bị ụ fịrịmọ Damascus a múdá Christtuuduo-otubo kẹrịkaị bara Saul mọ gbaamị. Saul mú ama mọ naịn ifiemị, kẹnị tụkpa kẹrịkụrọmọ wó tọrụbo a sụọmị. Anịduonị ómịnị kiri bọọ koromị. Ómịnị kẹnị okolo naamị, okolo bị gbaamị: ‘Saul, tetuu kị duonị ị́mịnị ine ụyamọmịnị a o?’ Saul ụ biimị: ‘Ị́mịnị bá te ụbọ a?’ Ụbọ parụmị: ‘Ịmịnị Jesus. Ị́ mú Damascus laadaba, ị́mịnị iné mịẹmụ ye nimi mịnị.’ Bịsẹ tịẹkiri bị, Saul tọrụbo baanmị. Anịduonị, kịmị kị wó barabo kẹrịwẹrị baratụa ụ pịrị wẹnị mú Damascus laamị.

Kẹnị peiboloutụa Christtuuduo-owei Damascus a timi mị. Bịsẹ owei ẹrẹ bị Ananias. Jesus bụnụgha-dawaị a gbaa ụ pịrịmị: ‘Straight tịịnmịnị ụwọụ bọọ Judas warị bọọ mú Saul laa.’ Ananias gbaa Jesus pịrịmị: ‘Nanaowei, Ịmịnị anị owei nimi ebimọ wẹrịemi! Ómịnị iné tuuduo-otubo kẹrị ikoliwarị a kaịmịnị!’ Anịa Jesus gbaa ụ pịrịmị: ‘Mú ụ laa. Ịmịnị Saul sẹlẹdẹ, ómịnị ebiegberi gbaa biin ibeama laamịnị.’

Anịduonị, Ananias Saul dọụ ẹrịwẹrị gbaa ụ pịrịmị: ‘Bịnaowei, Saul, Jesus ị fịrịmọ iné tọrụbo fini yọ ka boemi.’ Bịsẹ tịẹkiri mị, Saul tọrụbo finiimị. Ómịnị Jesus emibara tolumọ nimiwẹrị Jesus tuuduo-owei a paamị. Ómịnị benibilesin ifiemị, ómịnị kọọ Christtuuduo-otubo mọ kẹnịsụọmọ karịwarị bọọ kịmịotu tolumọmị. Saul, Jesus emibara mị akị kịmịotu tolumọtimi Jew-otubo pịrị ẹrị ifiemị, á mịẹ angọbọụ bara ị́ mọ tọn a? Ámịnị gbaamị: ‘Mị Jesus tuuduo-otubo kẹrịkaịtimi owei mị a?’

Saul tara kụraị akị Damascus a egberigbaamị. Jew-otubo Saul golu kụrọmọmị. Anịduonị, ámịnị ụ baamụ iroro tọnmị. Bịnaotubo Jew-otubo tọntimi iroro naa ifiemị, ámịnị baratụa Saul pịrịwẹrị baịn ama duoseriimị. Ámịnị u kọn kana a tụawẹrị fanụ-akpakpa opoló duo ụ kọn iyerimọmị.

Saul Jerusalem laa ifiemị, ómịnị bịsẹ yọma emi Christtuuduo-otubo mọ kẹnịsụọmọ Jehovah karị dọụmị. Anịa ámịnị wó esiintimi mị. Anịduonị, Barnabas baratụa Saul pịrịmị. Ómịnị Saul mọ mú fịrịmọpaa-otubo laawẹrị Saul boloudeidẹ bara gbaa á pịrịmị. Ámịnị Barnabas gbaa egberi peiwẹrị ụ kẹrị-akịmị. Saul angọtụawẹrị, Jerusalem bọọ timi itu mọ kẹnịsụọmọ ebiegberi gbaamị. Timi kẹnị ifie laamị, Paul ẹrẹ kị ómịnị mọ fịmị.