Messiah Bomịnị Bara John Mọ Gbaamị

Zechariah mọ Elizabeth mọ kị John ziimị. John bo sọụdụba ifiemị, ómịnị bụrụ-owei ka paamị. Jehovah, John fịrịmọwẹrị Messiah bomịnị bara gbaa kịmịotu pịrịmị. John karịwarịbo mọ amabo mọ a mú egberigbaagha. Ómịnị bou ka mú egberi gbaamị. Kịmịotu Jerusalem mọ bá Judea bọọ emi amabosẹ duobowẹrị John pịrị tolumọmị. Ámịnị Ọkpọnanaowei dọụbara mịẹ dọụmịnịaba ámịnị ánị mịẹmịnị seibo a barasin bara John mọ gbaa á pịrịmị. Ámịnị John gbaa egberibo peisin ifiemị, ámịnị boloudeimị. Anịduonị John Jordan Tọrụma á kọn benibilemọmị.

John biin yeama nanagha. Nama-ozun bọọ emi tamabo ka kị wó bịdẹ mịẹwẹrịmị. Bá ịkpaịkpaị mọ bọụn anịghakpọ tabaị kị ómịnị mọ fịtimi mị. Biin kịmịama John emibara nimi dọụtimi mị. Angọserimọmịnị Pharisee-otubo mọ Sadducee-otubo mọ kpọ bo John laamị. John gbaa á pịrịmị: ‘Ámịnị ánị inyenrinbụọbo dei bá boloudei. Ámịnị Abraham awọụama duonị, ámịnị yelaa kọọ otubo dẹịn-emi bara tọn kụmọ. Ámịnị Abraham awọụama kị gbaa kpọ, ámịnị Ọkpọnanaowei awọụamagha.’

Biin kịmịama bo John laawẹrị ụ biimị: ‘Omịnị tebara ka kị Ọkpọnanaowei mịẹ pọwẹịmọ a paaemi a o?’ John gbaa Jew-otubo pịrịmị: ‘Ị́mịnị maa bịdẹ nana wẹrịemisẹ, kẹnị akị nanagha ụbọ pịrị.’ John bịsẹ bara gbaa tuumị ị́ mọ nimi mị? Wó tuuduo-otubo Ọkpọnanaowei dọụbara mịẹ dọụmịnịsẹ, ámịnị kịmịotu tarị agbẹị-emi bara ámịnị mọ nimi kị John mọ dọụmị.

John gbaa tịbịsaa-bii otubo pịrịmị: ‘Gesii egberi kị gbaa, kịmị-nini kụmọ.’ Ómịnị gbaa soldier-otubo pịrịmị: ‘Agbẹịgha bara kọn sịlị akị kụmọ anịghakpọ ikpe kụmọ.’

Ịkịankụn-otubo mọ Levite-otubo mọ kpọ bo John laawẹrị ụ biimị: ‘Ị́mịnị tebara k’emi kịmị a o? Kịmịsẹ iné emibara nimi dọụmịnị.’ John gbaa á pịrịmị: ‘Isaiah bụrụwẹrị baramị, ịmịnị kị bou duo ẹrẹmịnị, ịmịnị baratụa kịmịotu pịrịwẹrị bo Jehovah karịmịnị.’

John akị á tolumọtimi yebo á kụrọmọmị. Biin kịmịama John kị Messiah bara kị tọnmị. Anịa ómịnị gbaa á pịrịmị: ‘Dụba ị dẹịn kịmị bomịnị. Ịmịnị dụba akị wó agbakabo siin kpọ laagha. Ịmịnị beni ka kịmịotu bilemọmịnị, anịa ómịnị yalịyalị tẹmẹ ka kịmịotu bilemọ mịnị.’