Ọkpọnanaowei Wó Yalịyalị Tẹmẹmị Akị Tuuduo-otubo Pịrịmị

Jesus agọnọ a múwẹrị oia dein bụọ ifiemị, Ọkpọnanaowei paakị wó yalịyalị tẹmẹmị akị wó tuuduo-otubo pịrịmị. Anị erein bị Pentecost 33 C.E. Bịsẹ erein mị biin kịmịama bẹbẹyọ bẹbẹyọ duo Jerusalem a oge-tei yọ a bomị. Jesus tuuduo-otubo 120 timi-timi yaị kẹnị agọnọ-warị bolou a bẹnịịtimi mị. Vurudu bị kẹnị tamamaaye paamị. Kẹrịịmịnị fẹnị mọ lei-emi ye tuuduo-otu tịbịbo a gbanaịnwẹrị ásẹẹ bẹbẹ bẹẹlị-ama fiemị. Kụrọ kimé paadaba fiemịnị afọrụ mọ lei-emi fiepọụn, warịma fiemị.

Zịnị ama duo Jerusalem a bo-emi otubo bịsẹ fiepọụn naawẹrị, baịn warịbolou bọọ paamịnị ye dii yọ a múmị. Jesus tuuduo-otubo bẹbẹ bẹẹlị-ama fiemịnị bara ámọ ẹrị ifiemị, ámịnị angọbọụmị. Anịduonị ámịnị gbaamị: ‘Mị Galilee kịmịama kị tọn, ámịnị tebara kị mịẹtimi laa wo bẹẹlịbo fiemịnị a o?’

Ámịnị bịsẹbara gbaa ifiemị, Peter mọ kọọ fịrịmọpaa-otubo paabo bọlọụ anga bọọ tịẹmị. Peter Jesus fịị bara mọ bá Jehovah waị fịịyọ duo ụ tịịnseri bara mọ gbaa kịmịbo pịrịmị. Peter gbaamị: ‘Bei tịẹkiri bị, Jesus agọnọ bọọ Ọkpọnanaowei ama-bara anga k’emi. Ómịnị wó kikoromọwẹrị yalịyalị tẹmẹ kpọ akị wo pịrịdẹ. Ámịnị anịkị duonị mị tamamaayebo naa bá ẹrịmịnị.’

Peter gbaa yebo kịmịbo gbele kụrọmọmị. Anịduonị ámịnị ụ biimị: “Omịnị teeki mịẹ agbẹị-emi a o?” Ómịnị gbaa á pịrịmị: ‘Ánị mịẹmịnị seibo a barasindá Jesus ẹrẹ bọọ benibile. Bịsẹbara á mọ mịẹdaba, ámịnị kpọ yalịyalị tẹmẹ laa akịmịnị.’ Bịsẹ erein bị 3,000 timi-timi kịmịama benibilemị. Bịsẹ ifie duomú mị, Christtuuduo-otubo Jerusalem bọọ biin bọlọụ-bọlọụ ka múmị. Ọkpọnanaowei yạlịyalị tẹmẹ mị baratụa fịrịmọpaa-otubo pịrị duonị, ámịnị laa biin itu-ama mịẹpaamọ-wẹrị, Jesus gbaa á pịrị yebo akị Christtuuduo-otubo tolumọmị.