TOLUMỌYE 10

Jehovah Iseriotu Yetolumọyọbo Tebara Ka Kị Baratụa Ị́ Pịrị Mịnị A O?

Printed Edition

Jehovah Iseriotu ị́ tịịn anị yetolumọyọ a mú dẹ a o? Ị́mịnị naa kẹnị ifie kpọ múgha aba, iné mú mịnị bọlọụ ifie mị, ị́mịnị bụọze kpọ paa emi. Ị́mịnị iroro a paa emi: ‘Teeki yetolumọyọ bọọ paa mịnị a o? Yetolumọyọmọ tetuu kị duonị yelaa emi a o? Tetuu kị duonị ịmịnị mú agbẹị emi a o?’ Bei egberitịbị mị, yetolumọyọ a mú mị, baratụa ị́ pịrị mịnị bara, bá ị́ mịẹ Ọkpọnanaowei mọ naịn mịnị bara, ị́ mọ tolumọ mịnị.

1. Omịnị tetuu kị duonị kẹnịsụọmọ yetolumọ agbẹị emi a o?

Kẹnị Bible fun gẹẹ-owei omịnị bẹnịị yetolumọ agbẹị emi tuu gbaa mị: “Ịmịnị itu bolou bọọ Jehovah tokoni mịnị.” (Psalm 26:12) Bịsẹ kpekẹnị bara bị Jehovah Iseriotu kpọ bolouịmbẹlẹ timi gbelei yetolumọ mịnị. Akpọyọrọịsẹ, amịnị wiki ovurumọsẹ gbelei wẹrị Ọkpọnanaowei tokoni, numu tuun, bá tẹẹbịbị mịẹ mịnị. Kụraịbosẹ amịnị bẹnịị-ama kpọ a mú mịnị.

2. Wó yetolumọyọmọ ị́ mọ duo teeki tolumọ akị mịnị a o?

Wó yetolumọyọmọ, omịnị Ọkpọnanaowei egberi kị tolumọ mịnị, “Bible bị akị gaan bara tuu gbaa mịnị.” (Nehemiah 8:8 goo.) Ị́mịnị bo daba, ị́ kpọ laa Jehovah mọ má wo ebi inyenrinbụọbo mọ tolumọ mịnị. Omịnị ị́ tarị emi bara ị́ mọ nimi mịnị yọmị, ị́ mịẹ ụ mọ mọ́ naịn dẹịn mịnị. Omịnị baratụa ị́ pịrị dọọ ebi ụndụ nana mịnị bara kpọ, ị́ mọ nimi mịnị.—Isaiah 48:17, 18.

3. Yetolumọyọ bọọ emi otumọ tebara ka kị baratụa ị́ pịrị mịnị a o?

Jehovah gbaa amọ “omịnị tọrụ tụa zọzọ dii anị kị wó laa zọzọ tarị má ebi fịrị-ama wẹnị dẹ, wó kẹnị a gbele mụ yọ gbeinmọ koromọ kụmọ.” (Hebrews 10:24, 25) Wó yetolumọyọ bị, gesii bara zọzọ tarị emi má Ọkpọnanaowei nimi dọụ emi kịmịama ị́ mọ ẹrị mịnị. Amịnị Bible duo zọzọ kụrọmọ mịnị bara ị́ mọ dọụ ẹrị mịnị. (Romans 1:11, 12 goo.) Ị́mịnị laa taa mọ yei mọ otu, má naa yei anịaghakpọ ere nanagha otumọ ẹrẹtei mịnị. Bei tuumọ kị duonị Jehovah omịnị ifiemọsẹ kẹnị a gbele yetolumọ dọụ emi!

EBIBARA TUUDỌỤ

Mú Jehovah Iseriotu yetolumọ mịnị bara mọ bá anị yetolumọyọmọ yelaa emi tuu dii.

4. Jehovah Iseriotu yetolumọ yọmọ

Bọlọụ kụraị sọnran-sii ifie mị, Christtuuduo-otu ifiemọsẹ kẹnị a gbelei Jehovah karị timi mị. (Romans 16:3-5) Colossians 3:16 goo dá, bei biibịbị kẹrị ẹrẹtei:

Bọlọụ kụraị sọnran-sii Christtuuduo-otubo, tebara ka kị Jehovah karị timi ma o?

Bei tịẹkiri kpọ Jehovah Iseriotu ifiemọsẹ anị Karịwarị bọọ gbelei Ọkpọnanaowei karị mịnị. Wó akị yetolumọ mịnị bara bị, ị́ mọ nimi dọụ emi sẹ, VIDIO farị. Má, itu yetolumọ mịnị bara photo dii dá bei biibịbịmọ paraị.

VIDIO: Teeki Amananaoweidaabụọ Warị Bọghọ Paa emo? (2:12)

Wó yetolumọ mịnị bara mọ bá Colossians 3:16 gbaa bara bị, tebara ka kị lei emi a o?
Ị́mịnị foto mọ má vidio mọ dii bị, wó yetolumọ mịnị bara gbelemọ yọmị, te zịnị ye kị iné angọ ghọ sụọ dẹịn ma o?

2 Corinthians 9:7 goo da, bei biibịbịmọ paraị:

Jehovah Iseriotu yetolumọyọmọ tetuu kị duonị kịmị sịlị gbẹẹgha o?

Bible akị ị́ tolumọ mịnị ụbọ mọ gbelei barịị wiki Bible tolumọye diitụa.

Wó yetolumọ mịnị bara mị, te ịkọkị kị iné angọ a sụọ dẹịn emi a o?

Ị́ kpọ nimi ma?

Bei yọbị jw.org, ị́mịnị wó yetolumọ mịnị ifie mọ má yọ mọ dọụ arị a paa emi.

Collage: Yetolumọyọ bọọ emi ifie, yetolumọ emi ifie, má yetolumọ siin dẹ ifie. Foto A duo mú D kị bịsẹ yọ mịẹdịa wẹrị emi.

A. Jehovah Iseri-owei yetolumọ warị bọọ Bible duo egberi kẹrị ẹrẹ mịnị.

(A) Wó yetolumọyọ bị ẹrẹ-egberiama, mịẹdịayeama, bá vidioama kpọ emi. Omịnị numu tuun má tẹẹbịbị ka kị tolumọye fini má kunumọ mịnị
Yetolumọyọ mị, zụa ịkọkịama, egberi pei mịnị otu kpọ laa fomuun nana wẹrị biibịbị parụ mịnị
Omịnị kịmị sẹlẹgha—warịbolou-otu, naa yei anịghakpọ ere nanagha-otu, kosu-otu, má kala-awọụ kpọ bo a paa emi
Omịnị wó yetolumọyọ bọọ sịlị akịgha

5. Angọ tụa yetolumọyọ a mú

Wẹrị Jesus warị bolou-otu mịẹ ye diitụa. Kụraịbosẹ amịnị Nazareth duo wẹnị Jerusalem a mú bẹnị mụ yọ duonị, amịnị 60 mile-ama akị ogun-ama duo wẹnị timi mị. Luke 2:39-42 goo dá, bei biibịbịmọ akị ẹrẹtei:

Wẹnị Jerusalem ghọ mú fịrị bị, kụrọ Jesus warịbolou-otubo pịrị ma?
Tetuu kị duonị yetolumọyọ a mú mụ yọbị, ị́mịnị angọ tụa yọ dọụ wẹrị emi a o?
Angọ tụa bolou mị, arere emi bara ị́ mọ tọn mị? Tetuu a o?

Collage: Joseph, Mary, Jesus má bịnabọ mọ angọtọlọmọ wẹrị yọụpaa dọụ mịnị. 1. Joseph akpa-ama akị ekịdịkịdị angọnọ a saị mịnị, Mary bá fiyaị-ama kị bẹnịmọ mịnị. 2. Map bị Nazareth duo Jerusalem ghọ mú mịnị ụwọụ kị dịa wẹrị emi.

Bible gbaa amọ kẹnị gbelei Jehovah karị mị yelaa emi. Hebrews 10:24, 25 goo dá, bei biibịbịmọ kẹrị ẹrẹtei:

Tetuu kị duonị omịnị ifiemọsẹ yetolumọyọ mú agbẹị emi a o?

ZỤA KỊMỊAMA GBAA MỊNỊ: “Zịnị-otumọ gbelei yetolumọgha kpọ seigha. Bẹtịbị warị a timi Bible tolumọ kpọ ebi emi.”

Te Bible yọ anịghakpọ mịẹdịaye kị, Jehovah dọụ emi ye mịẹ gaan ma o?

KỊLỌỌBARA

Yetolumọyọ mú mịnị yọmị, baratụa ị́ pịrị Jehovah nimi dẹịn, ị́ mọ ụ mọ mọ́ ikie mịẹ palịị dẹịn, bá fomuun akị ị́ pịrị wẹrị laa zịnị-otu mọ kẹnịsụọmọ ụ karị mịnị.