Jesus Te Ụbọ A O?

Akpọ paasẹ oroupa dẹịn otubo Jesus kpọ kẹnị kịmị. Mọabịkpọ, biin kịmịama Jesus arị bẹtịbị kị nimi wẹrị emi, amịnị ebibara ụ nimigha, má biin kịmịama bẹbẹ bara ka kị Jesus diimọ wẹrị emi. Bible mị tebara kị gbaa ma o?

1. Jesus Te ụbọ a o?

Jesus agọnọ ghọ inyenrin mịnị kụrọ angel. Ọkpọnanaowei Jehovah bọlọụ Jesus kị tẹmẹ dẹkị kọ yebosẹ tẹmẹ mị. Bei tuu kị duonị, “tẹmẹ yebosẹ bọlọụ tọbọụ” akị ụ tịịn wẹrị emi. (Colossians 1:15) Bible Jesus akị Ọkpọnanaowei “kpé kẹnị Tọbọụ” tịịn wẹrị emi, tuubị Jehovah bẹtịbị kị Jesus tẹmẹ mị. (John 3:16) Jesus wo Daụ, Jehovah mọ, kẹnịsụọmọ wẹrị akpọ bọọ emi kọ yebosẹ tẹmẹ mị. (Proverbs 8:30 goo.) Jesus pẹlẹgha bara Jehovah mọ naịn ikie kẹrị mị. Jesus, Ọkpọnanaowei bịbị ẹrẹ-owei, “omịnị kị Egberi bị,” omịnị Ọkpọnanaowei egberibo mọ má tolumọbịbịmọ gbaa paamọ mịnị.—John 1:14.

2. Jesus tetuu kị duonị kịrịogbo bọọ bo ma o?

Jehovah tamamaa fịrị wẹnị mị, 2,000 kụraị-ama bụọdẹ ifie mị. Omịnị wo yalịyalị tẹmẹ bị akị agọnọ duo Jesus ụndụ akị naa owei nimigha ere-tọbọụ Mary biri bolou a tụa mị. Jesus bei bara ka kị kiriogbo bọọ bo kịmị tọbọụ a paa mị. (Luke 1:34, 35 goo.) Jehovah Jesus fịrịmọ akị bei kiriogbo ghọ bo Messiah, anịghakpọ Christ a paa, má kịmị-awọụama zụọ yọ ghọ bo mị.a Messiah gbelemọ yọbị Bible gbaa bụrụ egberibosẹ Jesus kị Messiah bara mịẹ gaan mị, bei baratụa kịmịama pịrị nimi amọ Jesus kị “Christ bị, Ọkpọnanaowei Tọbọụ bị.”—Matthew 16:16.

3. Bei tịẹkiri bị Jesus teyọ k’emi a o?

Jesus fịịdẹ mị, Jehovah wo akị angel-owei bara tịịn serimọ agọnọ mú mị. Mú ọgọnọ laa dẹ bị, “Ọkpọnanaowei wo akị serii kụrọmọ kasị a petimi mị.” (Philippians 2:9) Mị tịẹkiri mị, Jesus kụrọ dẹịn angel-owei a paa dẹ. Jehovah bẹtịbị kị kụrọ nana Jesus dẹịn emi.

4. Jesus Ọkpọnanaoweigha

Bible gbaa bara mị, angel-otumọsẹ Jesus kị kụrọ dẹịn emi kị gbaa kpọ, Ọkpọnanaowei Jehovah dụba ụ dẹịn emi. Omịnị tetuu kị duonị bịsẹ bara gbaa mịnị a o? VIDIO farị dá, Jesus mọ Ọkpọnanaowei mọ bẹbẹ paa emi bara Bible mọ gbaa wẹrị emi bara dii.

VIDIO: Jesus Christ Ọkpọnanaowei a o? (3:22)

Kirianga bọọ emi Bible yọbo baratụa wó pịrị wẹrị Ọkpọnanaowei mọ, Jesus mọ bẹbẹ paa emi bara nimi mịnị. Bible yọbo goo dá, kirianga bọọ emi biibịbịmọ kẹrị ẹrẹtei.

Luke 1:30-32 goo.

• Angel-owei mị, Jesus mọ “Serii Dẹịn” Ọkpọnanaowei Jehovah mọ gbelemọ yọbị teeki gbaa ma o?

Matthew 3:16, 17 goo.

• Jesus benibile ifie mị, okolo agọnọ duo teeki gbaa ma o?

• Te ụbọ okolo bara kị ị́ mọ tọn ma o?

John 14:28 goo.

• Tọbọụ mọ daụ mọ yọ ghọ emi aba, te ụbọ kị okosu a, má te ụbọ kị kụrọ nana dẹịn emi a o? Daụ, anịghakpọ tọbọụ mị a?

• Jesus, Jehovah akị wo Daụ tịịn yọmị te ka kị wó tolumọ ma o?

John 12:49 goo.

• Jesus wo Daụ ụ mọ mọ́ kẹnị bara k’emi bara iroro ma o? Ị́ tebara kị tọn ma?

5. Te yeama kị Jesus Messiah bara mịẹ gaan ma o?

VIDIO: Jesus Bụrụ Egberiama Mịẹ Beinmọ Mị (3:03)

Mị Bible bụrụ egberịbo goo dá, kirianga bọọ emi biibịbịmọ kẹrị ẹrẹtei:

Micah 5:2 goo dá Messiah zii mụ yọ dọụ ẹrẹ.b

• Jesus zii ifie bi bei bụrụ egberi paabein ma? —Matthew 2:1.

Psalm 34:20 má Zechariah 12:10 goo dá, Messiah fịị mụ bara gbaa wẹrị emi bụrụ egberibo dii.

• Bei bụrụ egberimọ paabein ma? —John 19:33-37.

• Jesus arii kị tụa wẹrị bụrụ egberibo mịẹ beinmọ ma?

• Jesus gbelemọ yọmị, bei yebi teeki gbaa ị́ pịrị mịnị a o?

KỊLỌỌBARA

Jesus kụrọ angel-owei. Omịnị kị Messiah bá Ọkpọnanaowei Tọbọụ.

Waị diitụa

• Tetuu kị duonị Jesus kị “tẹmẹ yebosẹ bọlọụ” bara gbaa ma o?

• Jesus agọnọ a teeki mịẹ dẹ kị kiriogbo bọọ bo ma o?

• Wó tebara kị mịẹ timi Jesus kị Messiah bara nimi ma o?

DIITỤA

Mọkpọ ebibara Jesus kị Messiah bara tolumọ nimi.

“Do Messianic Prophecies Prove That Jesus Was the Messiah?” (Web article)

Bible gbaa bara bị, Ọkpọnanaowei kịmị-awọụ zii mịnị bara ka kị Jesus zii ma? Tuu dọụ.

“Why Is Jesus Called the Son of God?” (Web article)

Tara kịmị kị Ọkpọnanaowei mịẹ wẹrị emi tolumọ yebi Bible duo bogha tuu dọụ ẹrị.

“Is Jesus God?” (The Watchtower, April 1, 2009)

Jesus emi bara bị akị Bible duo tolumọ yọbị kẹnị ere ụndụ dei bara bị goo.

“A Jewish Woman Explains Why She Reexamined Her Faith” (Awake!, May 2013)