Gesii Christtuuduo-otu Lelei Mụ Bara Mị

Biin kịmịama Christtuuduo-otuama bara ka kị angọ tịịn mịnị. Anịa bei kịmịbosẹ kpékẹnị peibolou nanagha, má inyenrinbụọbo kpọ dịẹdịẹ k’emi. Anị dounị omịnị tebara ka kị gesii Christtuuduo-otumọ nimi mịnị a o?

1. Christtuuduo-otu te otuama o?

Christtuuduo-otu, amịnị Jesus Christ kị daa mịẹ mịnị. (Acts 11:26 goo.) Amịnị tebara ka kị christtuuduo-otu bara mịẹpaamọ mịnị a o? Jesus gbaa mị: “Amịnị ine gbaa egberibo kẹrị inyenrin daba, amịnị ine gesii tuuduo-otuama.” (John 8:31) Gesii Christtuuduo-otu wo tolumọ bara kị dii mịẹ mịnị. Jesus ifiemọsẹ Bible kị duo egberigbaa mị. Wó tuuduo-otumọ kpọ bịsẹ bara kị mịẹ mịnị.—Luke 24:27 goo.

2. Gesii Christtuuduo-otu tebara ka kị tarị mịẹdịa mịnị a o?

Jesus gbaa wo tuuduo-otumọ pịrị mị: “Zọzọ tarị, ịmịnị a tarị bara bị.” (John 15:12) Jesus tebara ka kị wo tuuduo-otumọ tarị wẹrị emi bara mịẹdịa ma o? Jesus ifie mịẹpaamọ wẹrị wo tuuduo-otubo mọ timi, a kụrọmọ, baratụa a pịrị, má fịị a pịrị mị. (1 John 3:16) Bịsẹ kpékẹnị bara bị, Christtuuduo-otu kpọ gesii tarị mịẹdịa agbẹị emi. Amịnị anị inyenrinbụọbo mọ má mịẹ mịnị yebo mọ akị zọzọ tarị wẹrị emi bara mịẹ gaan paamọ mịnị.

3. Christtuuduo-otu angọ tụa te fịrị kị wẹnị mịnị a o?

Jesus fịrị akị wo tuuduo-otumọ pịrị mị. “Omịnị Ọkpọnanaowei Daabọụ egberi gbaa fịrị akị a pịrị mị.” (Luke 9:2) Bọlọụ Christtuuduo-otumọ, kịmịama emi yọ, kịmịotu warịama má karị warị kpọ a mú egberi gbaa mị. (Acts 5:42; 17:17 goo.) Gesii Christtuuduo-otu kpọ bei tịẹkiri mị Bible gesii egberibo gbaa kịmịotu emi yọmọsẹ kị laa mịnị. Amịnị zịnị otu tarị wẹrị emi duonị, angọ tụa ifie mịẹpaamọ Bible bọọ emi ukiemọye egberi gbaa kịmịotu kụrọmọ mịnị.—Mark 12:31.

EBIBARA TUUDỌỤ

4. Amịnị Bible gbaa egberibo a tuudọụ mị

Christtuuduo-otu akị angọ tịịn mịnị otubo, biin kịmịama Bible gesii nimigha. VIDIO farị dá, bei biibịbị kẹrị ẹrẹtei.

VIDIO: Kịmị-ama Gesii Karịbụọ Seimọ Bara Bị (5:11)

• Christuuduo-otu akị angọ tịịn wẹrị emi otumọ te ụwọụ ka Christ tolumọ yemọ akị zịnịotu tolumọgha o?

Jesus Bible bọlọụ kị duo kịmịotu tolumọ mị. John 18:37 goo dá, bei biibịbị kẹrị ẹrẹtei:

• Jesus gbaa bara mị, omịnị tebara ka kị “gesii bọọ emi Christtuuduo-otu mọ lelei mịnị a o”?

5. Amịnị gesii gbaa zịnịotu pịrị mị

Jesus naa agọnọ ghọ múgha ifie mị, akị wo tuuduo-otumọ pịrị fịrị bị bei erein kpọ emi. Matthew 28:19, 20 má Acts 1:8 goo dá, bei biibịbị kẹrị ẹrẹtei:

• Bei egberi gbaa fịrị mị, gbaa teyọ kọọ laa mịnị a o? Má gbaatimi te ifie kị laa mịnị a o?

6. Amịnị anị gbaa mịnị bara kị kẹrị inyenrin paamọ mịnị

Teeki baratụa Tom pịrị wẹrị, gesii Christtuuduo-otu dọụ ẹrị dẹ bara nimi ma o? VIDIO farị dá, bei biibịbịmọ kẹrị ẹrẹtei.

VIDIO: Ịmịnị Bá Karịbụọ Egberi A Fa (5:20)

• Vidio mịẹdịa bara mị, teeki Tom mịẹ karịbụọ a barasin ma o?

• Teeki baratụa ụ pịrị wẹrị gesii Christtuuduo-otu dọụ ẹrị dẹ bara nimi ma o?

Mịẹdịaye bi ebi akị bịbị a gbaa egberi dẹịn emi. Matthew 7:21 goo dá, bei biibịbị kẹrị ẹrẹtei:

• Christtuuduo-otu akị angọ tịịn yọ mọ má Christtuuduo-otu bara inyenrin paamọ yọ mọ, —teeki yelaa Jesus pịrị dẹịn emi a o?

7. Bei kịmịbo zọzọ tarị mị

Christtuuduo-kịmị kọkọ fịị zịnị Christtuuduo-kịmị pịrị dẹ a? VIDIO farị dá, bei biibịbịmọ kẹrị ẹrẹtei.

VIDIO: Omịnị Wo Ụndụ Paamọ Mị (2:55)

• Vidio mịẹdịa bara mị, tetuu ki duonị Lloyd fị akị Bịnaowei Johansson pịrị dọụ ma o?

• Omịnị Christtuuduo kịmị bara mịẹpaamọ ma?

• Christtuuduo-otu tebara ka kị zịnị ibe otu dii agbẹị emi a o?

• Sụụ ifie kpọ, amịnị teeki mịẹ agbẹị emi a o?

KỊLỌỌBARA

Gesii Christtuuduo-otu Bible tolumọ yemọ daa wẹnị mịnị, adụdụsẹ akị tarị mịẹdịa mịnị, má Bible gesii egberi kpọ gbaa mịnị.

Waị diitụa

• Gesii Christtuuduo-otu peibolou bị teeki a sẹsẹrẹị emi a o?

• Te inyenrinbụọama kị gesii Christtuuduo-otu lelei bị a o?

• Gesii Christtuuduo-otu te fịrị kị wẹnị mịnị a o?

DIITỤA

Kịmịama nị angọ tụa Jesus Christ tolumọyebo mọ má wo mịẹ bara mọ daa mịẹ mịnị otumọ tolumọ nimi.

Jehovah Iseriotu —Omịnị Te Otuama O? 1:13

Kẹnị ikpé karịbụọ ghọ mútimi owei bo “gesii nimi bara dii.”

“They Used the Bible to Answer Every Question!” (The Watchtower, April 1, 2014)

Christtuuduo-otu baratụa zọzọ pịrị mịnị bara dọụ ẹrị.

Vurudu Akpotu Paa Daba Baratụa Wo Bịnaotumọ Pịrị Mịnị—Dọlọyọ 3:57

Bọlọụ Christtuuduo-otu mọ má bei tịẹkiri Christtuuduo-otu mọ Jesus gbaa bara inyenrin paamọ mịnị bara dọụ ẹrị.

“What Are the Marks of True Christianity?” (The Watchtower, March 1, 2012)