Jehovah Iseriotu Gesii Christtuuduo-otu A O?

Wó pei wẹrị emi bara mị, omịnị gesii Christtuduo-otu. Tetuu a o? Wó wẹrị zụa yeama diitụa. Peibolou, ẹrẹ́, bá tarị.

1. Jehovah Iseriotu tolumọ emi yebo te yọ kị duo bo ma o?

Jesus gbaa mị: “[Ọkpọnanaowei] egberi bị gesii emi.” (John 17:17) Jesus mịẹ bara bị, Jehovah Iseriotu tolumọ mịnị yebo kpọ Bible kị duo bo emi. Omịnị kẹnịsụọmọ laa bei ye mịẹ beinmọ dẹ bara wó mọ dii. Gbaa maba 1870 kụraị bị, zụa kịmịama gbelei wẹrị Bible tolumọ wẹrị emi yeama diitụa mị. Anị dọụ ẹrị yebo churchotu tolumọ mịnị yebo mọ kẹnịsụọmọgha, amịnị peibolou akị Bible tolumọ yebo ka tụa wẹrị emị. Amịnị koro anị dọụ ẹrị yebo gbaa kịmịama pịrị mị.a

2. Tetuu kị duonị omịnị Jehovah Iseriotu akị ọngọ tịịn mịnị a o?

Jehovah ụ karị mịnị otubo akị wo iseriotu kị tịịn mị, tuubị amịnị wo gesii kị gbaa paamọ mịnị. (Hebrews 11:4–12:1) Bible bolou mị, Jehovah, gbaa ụ karị mịnị kịmịbo pịrị mị: “Amịnị ine iseriotuama.” (Isaiah 43:10 goo.) Bible, Jesus akị “Peibolou Nana Iseriowei” kị tịịn wẹrị emi. (Revelation 1:5) Anị duonị, 1931 kụraị mị omịnị Jehovah Iseriotu akị ọngọ tịịn mị. Omịnị bolouịmbẹlẹ bara ka kị bei ẹrẹ fị mịnị.

3. Jehovah Iseriotu tebara ka kị Jesus tarị bị daa mịẹ mịnị a o?

Jesus wo warị otubo tarị bara ka kị wo tuuduo-otubo tarị mị. (Mark 3:35 goo.) Bịsẹ kpékẹnị bara mị, ọkpọyọrẹị bọọ emi Jehovah Iseriotubosẹ, kẹnị warị-otu ka paa dẹ. Anị kị duonị, omịnị bịnaotu akị zọzọ tịịn mịnị. (Philemon 1, 2) “Tarị akị bịna-otubosẹ a nana” gbaa oloko kpọ omịnị mọ dii wẹnị mịnị. (1 Peter 2:17) Jehovah Iseriotu biin ụwọụama kọọ bei tarị bị mịẹdịa mịnị. Gbaa maba, akpotu wó bịnaotu laa daba omịnị baratụa a pịrị mịnị.

EBIBARA TUUDỌỤ

4. Wó tolumọ mịnị yebo Bible kị duo bo emi

Bible bọọ emi gesii bị, gaan dẹịn mịnị bara kị Jehovah mọ gbaa mị. Daniel 12:4 goo bá footnote kpọ dii dá, bei biibịbị kẹrị ẹrẹtei:

• Ọkpọnanaowei kịmịbo Bible tolumọ bọlọụ a mú mịnị mị, teeki “biin kụrọmọ” mịnị a o?

Charles Russell mọ, zụa kịmịama mọ koro Bible tolumọ bara bị dii. VIDIO farị dá, bei biibịbị kẹrị ẹrẹtei.

VIDIO: Bible Bọọ Emi Gesii Mị Waị Dọụ Ẹrị Mị (7:45)

• Vidio mị, Charles Russell, bá ụ mọ mọ́ Bible Tolumọtimi otubo, tebara ka kị Bible tolumọye bi mịẹtimi ma o?

Ị́ kpọ nimi ma?

Omịnị zụa ifieama, wó tolumọ mịnị yemọ dei mịnị. Tetuu a o? Ụraụ paa daba, kịmị dọlọ dọlọ yọbosẹ ẹrị gaan mịnị bara bị, Ọkpọnanaowei kpọ dọlọ dọlọ ka kị wo Egberi mịẹ gaan kịmịotu pịrị mịnị. (Proverbs 4:18 goo.) Bible mị deigha, anịa wó nimiye mị ebi bọlọụ bara dẹịn daba, wó tolumọ mịnị yemọ kpọ dei mịnị.

5. Omịnị Jehovah Iseriotu bara kị inyenrin mịnị

VIDIO: Wó Emi Bara Mịẹ Gaan Wẹrị Emi Ẹrẹ́ (2:40)

• Tetuu kị duonị Jehovah Iseriotu ẹrẹ́ mị wó agbẹị emi a o?

Jehovah tetuu kị duonị iseriotu nana wẹrị emi a o? Tuubị, amịnị Jehovah kị Ọkpọnanaowei bara mịẹ paamọ mịnị. Kịmịama biin ikpé egberiama ka kị Ọkpọnanaowei ẹrẹ gbaịnmọ dẹ, wó mamụ kẹrị ẹrẹtei.

Mịẹ-tịẹmọ wẹrị emi ye akị Ọkpọnanaowei karị kpọ seigha bara kị zụa karịbụọ otuama mọ tolumọ mịnị. Wó Leviticus 26:1 goo dá, bei biibịbịmọ kẹrị ẹrẹtei:

• Jehovah tebara ka kị bei yebo diimọ wẹrị emi a? Ị́mịnị bá tebara ka kị a diimọ agbẹị emi a o?

Zụa karịbụọ tịbị-otuama Jesus kị Ọkpọnanaowei bara kị tolumọ mịnị. Wó John 20:17 goo dá, bei biibịbịmọ kẹrị ẹrẹtei:

• Ọkpọnanaowei mọ Jesus mọ kẹnị kịmị a? Ị́mịnị bá tebara kị tọn ma?

• Jehovah wo Iseriotubo fịrịmọ wẹrị wo emi bara mọ má Jesus emi bara gbaa yọbị, tebara ka kị ị́ gbele ma o?

6. Omịnị zọzọ tarị emi

Bible Christtuuduo-otumọ akị kịmị tọbọụ ọngọ kị tọnmọ wẹrị emi. 1 Corinthians 12:25, 26 goo dá, bei biibịbịmọ kẹrị ẹrẹtei:

• Kịmịama Christtuuduo-otu ụyamọ mịnị aba, kọ Christtuuduo-otubo tebara kị mịẹ agbẹị emi a o?

• Jehovah Iseriotu zọzọ a nana wẹrị emi tarị mị, ị́mịnị teeki gbaa tụa a paa emi a o?

Ọkpọyọrẹị bọọ emi Jehovah Iseriotubo kẹnị ụbọ kị yelaa kpọ, kọọ otubo ifie famọgha bara ka kị baratụa a pịrị mịnị. Kẹnị mịẹdịaye dii, VIDIO farị. Má kirianga bọọ emi biibịbịmọ kẹrị ẹrẹtei.

VIDIO: Kụrọ Kimé Haiti Ibe Ghọ Paa Mị (5:29)

• Jehovah Iseriotu akị bo yebo tebara ka kị anị zọzọ tarị emi bara mịẹdịa ma o?

KỊLỌỌBARA

Jehovah Iseriotubo gesii Christtuuduo-otuama. Omịnị ọkpọyọrẹịsẹ kẹnị sụọmọ wẹrị, wó tolumọ emi yebo Bible ka emi, bá omịnị Ọkpọnanaowei gesii emi bara gbaa paamọ mịnị.

Waị diitụa

• Omịnị tetuu kị duonị Jehovah Iseriotu akị angọ tịịn wẹrị emi a o?

• Omịnị tebara ka kị zọzọ mọ inyenrin mịnị a o?

• Jehovah Iseriotubo gesii Christtuuduo-otu bara ị́ mọ tọn ma?

DIITỤA

Wó mịẹ bụọmọ dẹ yemọ dii.

Jehovah Iseriotu —Peibolou Mịẹdịa Mịnị, Part 1: Bo Tụkpa Ẹrị Mị (1:00:53)

Jehovah Iseriotu ikpé tolumọ yemọ mịẹ gaan mị. Kẹnị mịẹdịaye dii.

Ọkpọnanaowei Kịmịmọ Wó Ẹrẹ́ Tokoni Mịnị (7:08)

Jehovah Iseriotu gbelemọ yọmị, iné nana wẹrị emi biibịbịmọ paraịbịbịmọ dọụ ẹrị.

“Frequently Asked Questions About Jehovah’s Witnesses” (web page)

Stephen zini yọ duobo-otu ẹrị dọụgha duonị, opu bara ka kị anị ụyamọ mị. Jehovah Iseriotu bolou bọọ Stephen ịkịọụ dei yebi dọụ ẹrị.

“My Life Was Going From Bad to Worse” (The Watchtower, July 1, 2015)