TOLUMỌYE 37
Fịrị Má Sịlị Gbelemọ Yọmị Bible Gbaa Wẹrị Emi Egberi Bị
Fịrị anịghakpọ sịlị gbelemọ bụụdọọnye ị́ gbele dẹ a? Angọ gbalị bá Jehovah kpọ karịmụ yọmị zụa ifieama bụụdọọnye akị wó pịrị mịnị. Anịa Bible baratụa wó pịrị mụ ye gbaa wẹrị emi.
1. Fịrị wẹnị gbelemọ yọmị Bible teeki gbaa ma o?
Ọkpọnanaowei omịnị fịrị wẹnị angọ gbalị kị dọụ wẹrị emi. Bible gbaa mị “yelaa dẹịn yebị . . . Kịmịawọụ anị wẹnị mịnị fịrị bọọ pọwẹị nana.” (Ecclesiastes 2:24) Jehovah benebene fịrị esiingha. Anị duonị angọtụa fịrịwẹnị mịnị kịmịsẹ Jehovah kị mịẹ pọwẹịmọ mịnị.
Fịrị wẹnị yelaa emi. Anịa bịsẹ ye pebi iné Jehovah karị mịnị yọ tịẹmọ kụmọ. (John 6:27) Omịnị Jehovah karị yọ ka kị bọlọụ daa dẹ ifiesẹ, Ọkpọnanaowei Jehovah wó dọụ emi yebosẹ mịẹ wó pịrị mịnị.
2. Omịnị tebara ka kị sịlị diimọ agbẹị emi a o?
“Sịlị kịmị kekere mịnị,” bara Bible mọ gbaa wẹrị emi kpọ, sịlị bẹtịbị laa gesii pọwẹị akị wó pịrịmụ bara Bible mọ gbaagha. (Ecclesiastes 7:12) Bible gbaa mịnị yọsẹ, omịnị “bei tịẹkiri nana wẹrị emi yebo tọrụkẹrị” dá sịlị tarị kụmọ. (Hebrews 13:5 goo.) Wó nanaye wó tọrụkẹrị emi ifiesẹ, omịnị laa opu sịlị nana dọụ inyenrinbụọ datịẹmọ, bá laa agbẹịgha saa-ama kpọ ghọ sụọgha fa. (Proverbs 22:7) Kịmị laa wó lẹlẹmọ mú agbẹịgha fọụ kpọ yọụgha fa.
3. Omịnị tebara ka kị sịlị kọn ebimịẹ mịnị a o?
Jehovah ebimịẹ Ọkpọnanaowei, anị duonị Jehovah kị diimịẹ dọụ mịnị kịmịsẹ “bara fini, ebimịẹ dọụ.” (1 Timothy 6:18) Omịnị baratụa itu bolou mọ má zini otu mọ pịrị mịnị ifiesẹ, omịnị ebi bara ka kị wó nana wẹrị emi sịlịbo akị fịrị wẹnị mịnị. Anịa baratụa wó mọ Jehovah karị emi otumọ kị pịrị dẹịn emi. Jehovah wó mịẹ mịnị ebi bẹtịbị diitụagha, anịa omịnị wó ebimịẹ mịnị tuu kị diitụa dẹịn mịnị. Omịnị adụdụ duo ebimịẹ kịmịotu pịrị mịnị ifiesẹ, omịnị Jehovah mịẹ bolouịmbẹlẹ mịnị.—Acts 20:35 goo.
EBIBARA TUUDỌỤ
Nanaye tọrụkẹrị bá wẹnị mịnị fịrị akị agbẹị bara wẹrị bolou bọọ emi arerebo dọụ ẹrị.
4. Iné fịrị wẹnị mịnị bara bị akị Jehovah tokoni
Wó mọ Jehovah mọ nana wẹrị emi ikie bị wó akị fịrịwẹnị mịnị bara gbele agbẹị emi. VIDIO farị dá, biibịbịmọ kẹrị ẹrẹtei.
Vidio bolou mị Jason wo fịrịyọ bọọ inyenrin bara bị, teeki iné angọ ghọ sụọ dẹịn ma o?
Jason tebara ka kị wo fịrị bị mịẹ ma o?
Colossians 3:23, 24 goo dá, bei biibịbị kẹrị ẹrẹtei:
Tetuu kị duonị wó akị fịrịyọ bọọ inyenrin mịnị bara bị yelaa emi a o?
Fịrị yelaa emi. Anịa pebi dá, wó fịrị bị diidụbamọ Ọkpọnanaowei karịmụ yọ dẹịn kụmọ
5. Nanaye tọrụkẹrị inyenrinbụọ bị arere emi
Biin kịmịama sịlị dọụ kụrọmọ mịnị. Bible gbaa yebị dii. Bodá wó 1 Timothy 6:6-8 goo dá, bei biibịbị kẹrị ẹrẹtei:
Omịnị tebara kị mịẹ kị gbaa ma o?
Omịnị biinyeama kị nanagha kpọ, laa bolouịmbẹlẹ a paa emi. VIDIO farị dá, biibịbịmọ kẹrị ẹrẹtei.
Biinyeama kị nanagha kpọ, teeki bei warịbolou-otumọ mịẹ pọwẹị mịnị a?
Kanghaba ị́mịnị biin sịlị nana dẹ, anịa mọkpọ dọụ kụrọmọ mịnị a? Jesus tọnmọdịaye akị bolou bọọ emi akpotu bi mịẹ gaan wẹrị emi. Luke 12:15-21 goo dá, bei biibịbị kẹrị ẹrẹtei:
Ị́mịnị Jesus tọnmọdịaye duo teeki tolumọ akị ma o? —Gooyọ 15 dii.
Proverbs 10:22 má 1 Timothy 6:10 goo dá diitụa. Má bei biibịbịmọ kẹrị ẹrẹtei:
Jehovah mọ ebi ikie kẹrịmụ yọ mọ má biin nanayeama nanamụ yọ mọ, teeki yelaa dẹịn emi a o? Tetuu o?
Sịlị nana kụrọmọ dọụ bolou bi te akpotuama k’emi o?
6. Jehovah wó dọụ emi yemọ mịẹ mịnị
Jehovah karị mịnị bị, fịrị fa bá sịlị fa dadiye wó laa a paa emi. VIDIO farị dá omịnị laa bei dadiye daatịẹmọ a paa emi bara dii, má biibịbịmọ kẹrị ẹrẹtei.
Vidio mị, bịnaowei bị te dadiye kọọ sụọ ma o?
Bịnaowei bị teeki mịẹ wẹrị wo peibolou kụrọmọ ma o?
Matthew 6:25-34 goo dá, bei biibịbị kẹrị ẹrẹtei:
Jehovah teeki kii koromọ ụ karị mịnị kịmịbo pịrị wẹrị emi a o?
ZỤA KỊMỊAMA GBAA MỊNỊ: “Kụrọ fịrị kị ị mọ wẹnị angọ gbalị mịnị duonị, ịmịnị laa wikimọsẹ yetolumọ yọ a múgha fa.”
Te Bible yọkị baratụa ị́ pịrị wẹrị Jehovah karị yọmị ebidẹịn emi bara nimi ma o?
KỊLỌỌBARA
Ebi fịrị wẹnị bá sịlị nana seigha, anịa bei yebo bụọmọ iné Jehovah karị mịnị yọ seimọ kụmọ.
Waị diitụa
Teeki baratụa wó pịrị wẹrị fịrị akị agbẹị bara wẹrị a paa emi a o?
Nanaye tọrụkẹrị inyenrinbụọ tebara ka kị baratụa ị́ pịrị a paa emi a o?
Ị́mịnị tebara ka kị Jehovah gbaa wẹrị emi ye bọọ eti nana wẹrị emi bara mịẹdịa mịnị a o?
DIITỤA
Bible sịlị gbelemọ yọ bọọ gbaa wẹrị emi egberi dọụ ẹrị.
Wó nana wẹrị emi yebo akị Ọkpọnanaowei tokoni mụ bara dọụ ẹrị.
Gamble tein bolou bi akpotu emi a o?
Kẹnị kịmị gamble tein má furutimi. Baratụa ụ pịrị wẹrị bei inyenrinbụọmọ dẹịnmọ yebi dii.
“I Was Passionate About Racehorses” (The Watchtower, November 1, 2011)