TOLUMỌYE 55
Baratụa Iné Emi Itu Bi Pịrị
Akpọyọrẹịsẹ, ịpamụ dẹịn emi kịmịama kị, pọwẹịtimi ọgịzị dẹịn emi ituama a timi Jehovah karị mịnị. A naa mịnị tolumọyebo a mịẹ pọwẹị mịnị bá amịnị biin ụwọụama kọn baratụa itu pịrị mịnị. Iné emi itu mị, ị́ kpọ bịsẹ pọwẹị nanawẹrị emi?
1. Ị́mịnị te ụwọụama ka kị iné nanawẹrị emi ifie mọ bá kụrọ mọ kọn baratụa iné itu pịrị a paa emi a o?
Wó kịmịsẹ laa baratụa itu pịrị a paa emi. Gbaamaba, kosudẹ otu anịghakpọ dọọn warị a koro emi otu iné itu bọọ emi aba, ị́ laa baratụa a pịrị wẹrị yetolumọyọ a bo a paa emi a? Anịghakpọ ị́ laa baratụa a pịrị wẹrị anị warị fịrịbo wẹnị, fọụpa bá zịnị yeama mịẹ a paa emi? (James 1:27 goo.) Omịnị angọ paamọ wẹrị Kingdom Hall tọlọmọ a paa emi. Kịmị wó penimọ wẹrị bei yebo mịẹgha. Omịnị Jehovah mọ wó bịnaotubo mọ tarị wẹrị emi kị duonị, “bẹtịbị [wó angọ] paamọ mịnị.”—Psalm 110:3.
Benibiledẹ Jehovah Iseriotubosẹ laa zịnị ụwọụama kọn baratụa itu pịrị a paa emi. Bible gbaa bara mịẹ mịnị bịnaoweibo, laa baratụa itu-kosuotu pịrị mịnị kịmịama anịghakpọ itu-kosuotu a paa mịnị. Bịnaoweibo mọ bịnaerebo mọ laa ụwọụpẹlẹ-otu a paa wẹrị baratụa itu pịrị egberigbaa fịrị wẹnị a paa emi. Zụa Jehovah Iseriotuama baratụa Kingdom Hall kẹrị mịnị yọama mú fịrịwẹnị mịnị bá bịnaotu dọụ wẹrị emi yọama kpọ a mú mịnị.
2. Omịnị tebara ka kị wó nanawẹrị emi yebo kọn baratụa itu pịrị mịnị a o?
Omịnị laa “[wó] nanawẹrị emi yelaa yebo kọn Jehovah dụbamọ” a paa emi. (Proverbs 3:9) Sịlị mọ, wó nanawẹrị emi yebo mọ kọn otuoye mịẹ wẹrị, baratụa wó itu mọ, bá egberigbaa fịrị mọ pịrị mịnị yọmị wó mịẹ pọwẹị mịnị. (2 Corinthians 9:7 goo.) Wó otuo mịnị yebo baratụa akị disaster relief kpọ pịrị mịnị. Biin kịmịama ifiebosẹ “ye gbaịn” wẹrị otuoye mịẹ mịnị. (1 Corinthians 16:2 goo.) Omịnị laa otuoye akị Kingdom Hall bọọ emi ekpedibo anịghakpọ intanẹtị bọọ donate.jw.org a tụa a paa emi. Omịnị wó nana yebo kọn Jehovah tarị wẹrị emi bara mịẹdịa a paa emi, anị fomuun nẹ Jehovah akị wó pịrịdẹ ye.
EBIBARA TUUDỌỤ
Ị́mịnị kpọ laa baratụa itu pịrị a paa emi ụwọụama dọụ ẹrị.
3. Wó nanawẹrị emi yebo akị baratụa a paa emi
Jehovah mọ Jesus mọ pọwẹị bara kọn ye dịẹpaamọ mịnị kịmịbo tarị emi. Gbaamaba, yei fịịdẹ erema, sịlị nanagha kị gbaa kpọ, laa otuoye akị Jehovah pịrị mịnị yọmị, Jesus tọrụkẹrị mị. Luke 21:1-4 goo da, bei biibịbịmọ kẹrị ẹrẹtei:
Omịnị biin sịlịama otuo de kị Jehovah tọrụkẹrị mịnị a o?
Omịnị adụdụ duo bo bara kọn ye otuo daba, Jehovah mọ Jesus mọ mịẹ pọwẹị mịnị a o?
Wẹrị wó otuo mịnị yebo kọn mịẹ mịnị yebo dii, VIDIO farị. Má bei biibịbị kẹrị ẹrẹtei.
Wó otuo mịnị yebo tebara ka kị baratụa akpọ bọọ emi itubosẹ pịrị mịnị a o?
4. Omịnị angọ paamọ baratụa a paaemi
Bible ifie mị, Jehovah karịtimi otubo angọtụa karịwarị tọlọmọ mị. Amịnị sịlị otuwoye bẹtịbị mịẹgha. 2 Chronicles 34:9-11 goo da, bei biibịbị kẹrị ẹrẹtei:
Isreal-otubo tebara ka kị Jehovah warị tọlọmọ tim’ma o?
Jehovah Iseriotu, Isreal-otubo diimịẹ mịnị bara dii, VIDIO farị. Má bei biibịbị kẹrị ẹrẹtei.
Tetuu kị duonị Kingdom Hall kekeremụ yọmị yelaa emi a o?
Ị́mịnị te ụwọụama ka kị baratụa a paa emi a o?
5. Bịnaoweibo laa angọ paamọ wẹrị itu bọọ biin fịrị wẹnị a paa emi
Bible kụrọmọye akị Christtuuduo mịnị oweibosẹ pịrị wẹrị emi, amịnị angọ paamọ baratụaye mịẹpaamọ itu piri. Wẹrị kẹnị mịẹdịaye dii, VIDIO farị. Má biibịbịbo paraị.
Ryan tebara kị mịẹ wẹrị laa ebibara kọn baratụa itu pịrị ma o?
Bible mị, itu-kosuotubo mọ, bá baratụa a pịrị mịnị otubo mọ nana agbẹị emi inyenrinbụọama gbaa wẹrị emi. Wẹrị 1 Timothy 3:1-13 goo da, bei biibịbịmọ kẹrị ẹrẹtei:
Baratụa itu kosuotu pịrị mịnị kịmị bá itu-kosuowei a paa dọụ mịnị binaowei tebara kị timi agbẹị emi a o?
Anị warịbolou-otubo tebara kị timi agbẹị emi a o?—Gooyọ 4 má 11 dii.
Bịnaoweibo angọtụa bei inyenrinbụọbo nana daba, te arereama kị itu laa a paa emi a o?
KỊMỊ BII A PAA EMI: “Jehovah Iseriotubo kpọ tebara kị mịẹtimi sịlị nana wẹrị anị fịrịbosẹ wẹnị mịnị a o?”
Teeki ị́ mọ gbaa a paa emi a o?
KỊLỌỌBARA
Omịnị wó ifie, kụrọ bá nana yebo kọn baratụa itu pịrị mịnị yọmị, opu bara ka kị Jehovah mịẹ pọwẹị mịnị.
Waị diitụa
Ịmịnị te ụwọụama ka kị iné nanawẹrị emi ifie mọ bá kụrọ mọ koṇ baratụa itu pịrị a paa emi a o?
Omịnị tebara ka kị wó nanawẹrị emi yebo kọn baratụa itu pịrị mịnị a o?
Ị́mịnị te ụwọụama ka ki baratụa itu pịrị dọụ mịnị a o?
DIITỤA
Ọkpọnanaowei karị mịnị kịmịbo bá tithe gbẹẹgha tuu dii.
Bible zụa fịrịama akị benibiledẹ owei-otu pịrịwẹrị emi. Anịa benibiledẹ ere-otu bịsẹ fịrịbo wẹnị a paaemi a?
“Understanding Headship in the Congregation” (The Watchtower, February 2021)
Zụa boloukụrọ Jehovah Iseriotuama, wó funbo saị akị a mọ mọ́ kẹnị peibolou nanawẹrị emi otu pịrị mịnị bara dii.
Wó akị sịlị nana wẹrị wó fịrịbo wẹnị mịnị bara mọ, zịnị karịbụọama akị sịlị nana mịnị bara mọ bẹbẹ paa emi bara dọụ ẹrị.
“How Is the Work of Jehovah’s Witnesses Financed?” (Web article)