EGBERITỊBỊ 44
DUMA 33 Throw Your Burden on Jehovah
Kịrịịgha Ụgụlapẹlẹye Inemụ Barabị
“Sei bụọmọwẹrị ị́ dẹịnmọ kụmọ, anịa ebi ka kị sei dẹịnmọ.” —ROM. 12:21.
TOLUMỌ DỌỤMỊNỊ YEBO
Kịmịotu agbẹịgha bara akị ị́ mọ mọ́ inyenrindaba, ị́mịnị akpotu mịẹpaamọgha bara, dọọ mịẹpaamọ mụ bara kị wo mọ tolumọmịnị.
1-2. Kịmịama tebara ka kị agbẹịgha bara kọn wo mọ inyenrin a paaemi a o?
JESUS kẹnị kabụ tụamị, bịsẹ kabụmị, kẹnị yei fịịdẹ ere ụgụlapẹlẹ-owei bị kịrịị ụgụlapẹlẹ á pịrị kị dọụtimi duonị, ámịnị barịị barịị mú ụgụlapẹlẹ-owei tẹẹmị. Kịrịịgha ụgụlapẹlẹ inyenrinbụọ mị Jesus tuuduo-otubo ifie kpọ a paa kụrọmọtimi duonị, bịsẹ kabụbị ebi bara ka kị á gbelemị. (Luke 18:1-5) Kịrịịgha ụgụlapẹlẹ inyenrinbụọ wo ifie kpọ a paamịnị, anịduonị bei kabụbị yelaa wo kpọ pịrịemi.
2 Mị akpọmị, ine ibe kị yelaa dẹịn-emi, ịmịnị kị yelaa dẹịn-emi, bá kịmị penimọ inyenrinbụọ kpọ kụrọ fa k’emi. Anịduonị kịmị kịrịịgha bara kọn ụgụlapẹlẹ wo pịrịdaba wo mịẹ tamamagha. (Eccl. 5:8) Anịa Itu mị, wo bịna-ụbọ agbẹịgha bara akị wo mọ inyenrinmụ bara omịnị mọ tọngha; anịa zụa ifieama bịsẹ bara paamịnị. Bịsẹ bara kị paa kpọ, wo bịnaotubo ịkịsatụa wo ụyamọ dọụmịnị kị duonị bịsẹ bara mịẹmịnị bara fa. Ámịnị kpọ yalịgha kị duonị bịsẹ bara paamịnị. Anịa, kịmịotu agbẹịgha bara akị Jesus mọ inyenrin ifiemị, ómịnị inemị. Omịnị kpọ wó mịẹ bara duo yetolumọ akị a paaemi. Omịnị etipou inyenrinbụọ mịẹ wo penimọmịnị otubo kpọ dịamịnị aba, mịẹ wo bịnaotubo kpọ dịa agbẹị-emi! Itu bolou bọọ emi bịna kịmị anịghakpọ tiri kịmị agbẹịgha bara akị wo mọ mọ́ inyenrindaba tebara ka kị Jehovah gbelemịnị a o?
3. Jehovah karịmịnị otubo kịrịịgha ụgụlapẹlẹye duonị ụyafịmịnị yọmị ụ gbelemịnị a, bá tetuu a o?
3 Kịmịotu akị wo mọ inyenrinmịnị baramị ebibara ka kị Jehovah gbelemịnị. “Jehovah kịrịị ụgụlapẹlẹ inyenrinbụọ tarị wẹrịemi.” (Ps. 37:28) Bei bọlọụbị, Jehovah “ifie famọgha bara ka kị . . . kịrịị ụgụlapẹlẹmịnị” bara Jesus mọ gbaa wo pịrị wẹrịemi. (Luke 18:7, 8) Alaghatimi Jehovah wo mịẹ dọọn naamịnị yebosẹ kọnsiin mịnị, bá kịrịịgha ụgụlapẹlẹ inyenrinbụọ kpọ kọnsiinmịnị.—Ps. 72:1, 2.
4. Kịrịịgha ụgụlapẹlẹye gbelemọ yọmị Jehovah teeki mịẹ wo pịrịdẹ a o?
4 Omịnị Jehovah kịrịịgha ụgụlapẹlẹ inyenrinbụọ akị kiriogbo bọọ serisiinmụ ifie kị korumịnị. Anịa bei tịẹkirimị Jehovah baratụa wo pịrịwẹrị inemịnị. (2Pet. 3:13) Kịmị agbẹịgha bara akị wo mọ inyenrindaba, Jehovah wo mịẹ agbẹị-emi bara akị wo tolumọdẹ. Jehovah, wó tọbọụ Jesus kpọ duo mịẹmụ bara kọn wo dịadẹ. Jesus ebi mịẹdịaye ka paa wo pịrịemi. Jehovah Bible kpọ duo wo mịẹ agbẹị-emi bara kọn wo tolumọdẹ.
KỊRỊỊGHA ỤGỤLAPẸLẸYE Ị́ GBELEDABA KỊLỊKỊLỊ INYENRINBỤỌ MỊẸDỊA
5. Kịmị agbẹịgha bara akị wo mịẹdaba, tetuu kị duonị omịnị kịlịkịlị inyenrinbụọ kị mịẹdịa agbẹị-emi a o?
5 Kịmị agbẹịgha bara akị wo mịẹdaba, wo dọọn kụrọmọmịnị. (Eccl. 7:7) Peibolou nana otuama kpọ dọọn kụrọmọmị, gbaamaba, Job mọ Habakkuk mọ kpọ dọọn kụrọmọmị. (Job 6:2, 3; Hab. 1:1-3) Bịsẹ bara ye wo paamọdaba, wo dọọn kụrọmọmịnị, anịa omịnị kịlịkịlị inyenrinbụọ kị mịẹdịa agbẹị-emi, anịkị omịnị ba ayẹbẹ ye mịẹgha fa.
6. Absalom mịẹ yebị te ka kị wo tolumọ ma o? (Foto kpọ dii.)
6 Kịmị agbẹịgha bara kọn wo mịẹ anịghakpọ wo tarị wẹrịemi kịmị mịẹdaba, omịnị kpọ waị ụbọ mịẹ akị dịsẹmịnị. Anịa omịnị bịsẹ bara iroro agbẹịgha. Omịnị bịsẹ bara mịẹdaba, yemị sei bọlọụ dẹịn a paaemi. Pẹrẹowei David tọbọụ, Absalom, mịẹ yebị kẹrị iroro. Wo bịnaowei Amnon wo bịna-araụ Tamar kẹrị-bụnụ ifiemị, yebị ụ dọọn kụrọmọmị. Moses oloko didaba, Amnon baa agbẹị-emi. (Lev. 20:17) Absalom kọkọ boloukọn agbẹị-emi, bịsẹ bara kị gbaa kpọ, omịnị Amnon baamụ kụrọ nanagha.—2Sam. 13:20-23, 28, 29.
Absalom bịnaraụ Tamar kịmị mọ penimọ bụnụ ifiemị, ómịnị angọ kẹrị a paagha (Gooyọ 6 dii)
7. Kịrịịgha ụgụlapẹlẹ inyenrinbụọ tebara ka kị psalm fun gẹẹ-owei gbele ma o?
7 Kẹnịye kpọ agbẹịgha yeama kọn wo mịẹmịnị otubo laagha bara paadaba, kịrịịye mịẹmịnị yọbị arere fa bara wo mọ iroro a paaemi. Psalm fun gẹẹ-owei bolousei otu kịrịịye mịẹmịnị otu ụyamọmịnị bara ẹrịmị, bá bolousei otubo kị mọkpọ bọlọụ bụọmịnị bara kpọ ụ mọ ẹrịmị. Anịduonị ụ gbaamị, “akpọbị ifiebosẹ bọụbọụ akị bei bolousei otubo kị pịrịmịnị.” (Ps. 73:12) Bei yebo ẹrịmịnị yọbị ụ mịẹ pọwẹịgha duonị, Jehovah karịmịnị yọmị kẹnị arere kpọ fa tamanaịnyọ ómịnị mọ nanamị, anịduonị ómịnị gbaamị: “Yebị ị mọ kẹrị iroromịnị ifiesẹ, bụụdọọnye ka paa ị pịrịmị.” (Ps. 73:14, 16) Ómịnị mọkpọ gbaamị: “Dọlọ kị kọọmị ịmịnị agbẹịgha bara wẹnịmụ timimị; ine wẹnịbụọbo ememelemụ timimị.” (Ps. 73:2) Bei paa yebị bịnaowei Alberto kpọ paamọmị.
8. Kịrịịgha ụgụlapẹlẹ tebara ka kị kẹnị bịnaowei gbele ma o?
8 Alberto itu bọọ sịlịama furu bara á mọ kọn ụ gbaịnmọmị. Bịsẹ ye duonị, ómịnị ba itukosuowei kpọ a paagha, bá ómịnị sịlị furubara naadẹ bịnaotubosẹ ba ụ didụbamọgha. Anịduonị, Alberto gbaamị: “Ịmịnị bolouịmbẹlẹ angọ pịrịgha.” Ómịnị tẹmẹ-anga bọọ suusụọmị, bá yetolumọyọ kpọ a múgha timi sọrọn kụraị laamị. Bei paa yemị, kịmị agbẹịgha bara ka kị wo mọ mọ́ inyenrin kpọ, omịnị kịlịkịlị nimiye mịẹdịamụ yọmị yelaa-emi bara ka kị wo tolumọmịnị.
JESUS DIMỊẸ
9. Kịmịotu te yeama ka kị Jesus mịẹ ma o, Jesus ba tebara kị mịẹ ma o? (Foto kpọ dii.)
9 Kịrịịgha ụgụlapẹlẹye wo paamọdaba Jesus ebi mịẹdịaye ka paa wo pịrịemi. Jesus warịbolou otubo mọ bá zịnị otuama mọ agbẹịgha bara akị ụ mọ mọ́ inyenrin bara kẹrị iroro dii. Ụ mọ gesii bọọ fa bịnaotubo ómịnị nọmụmịnị bara kị gbaamị, ómịnị seitẹmẹ mọ kị ye mịẹmịnị bara kị karịbụọ tịbị-otubo mọ gbaamị, Rome sụụotubo wó ụyamọ bá ụ baamị. (Mark 3:21, 22; 14:55; 15:16-20, 35-37) Anịa, kịmịotu agbẹịgha bara ka kị Jesus mọ inyenrin kpọ, ómịnị inemị bá bara kpọ waịgha. Omịnị te ka kị wó mịẹdịaye duo tolumọ akị ma o?
Kịmị agbẹịgha bara akị wo mọ inyenrindaba Jesus mịẹbara dimịẹ, Jesus ebi mịẹdịaye ka paaemi (Gooyọ 9-10 dii)
10. Kịmịama agbẹịgha bara akị Jesus mọ inyenrin ifiebị, ómịnị teeki mịẹ ma o? (1Peter 2:21-23)
10 Wo wẹrị 1Peter 2:21-23 goo.a Kịmịama agbẹịgha bara ka kị ụgụlapẹlẹ wo pịrị kpọ Jesus ebi mịẹdịaye ka paa wo pịrịemi. Ómịnị ẹrẹ agbẹị-emi ifie mọ bá ẹrẹ agbẹịgha ifie mọ nimimị. (Matt. 26:62-64) Kịmịotu ekpe egberiama akị ụ gbaịnmọ kpọ ómịnị bẹbẹ finigha. (Matt. 11:19) Ómịnị ba ẹrẹ kị ẹrẹ kpọ ómịnị wó ụyamọmịnị kịmịbo werigha bá ánị esisimọgha. Jesus angọ kẹrịyọ nanamị, tuubị “ómịnị wó ụndụsẹ akị kịrịị ụgụlapẹlẹmịnị owei bara ka tụamị.” Kịmịotu akị ụ mọ mọ́ inyenrintimi baramị Jehovah mọ ẹrẹmịnị yọkị yelaa Jesus pịrị dẹịnmị. Agbẹị ifie laadaba Jehovah kịrịịgha ụgụlapẹlẹ inyenrinbụọ kọnsiinmụ bara Jesus mọ nimi wẹrịemi.
11. Omịnị tebara ka kị angọdii ẹrẹ a paaemi a o? (Fotobo kpọ dii.)
11 Kịmịama agbẹịgha bara kọn wo mọ mọ́ inyenrin kpọ omịnị Jesus dimịẹ a paaemi. Zụa agbẹịgha inyenrinbụọama dụbagha, anịduonị omịnị bẹbẹfini ẹrẹgha kpọ seigha. Wo ẹrẹtụagha yọmị baratụa wo pịrịmịnị. (Eccl. 3:7; Jas. 1:19, 20) Zụa ifieama, akpotu bolouemi kịmị zụọbụọmọmụ yọ duonị ẹre a paaemi, bá gesii gbelemọ ikpe egberiama naadaba ẹrẹ kpọ seigha. (Acts 6:1, 2) Mọabịkpọ, omịnị bọụbọụ bá didụbamọ bara ka kị ẹrẹ.—1Pet. 3:15.b
Kịmịama agbẹịgha bara akị wo mọ inyenrindaba, omịnị Jesus dimịẹdá ẹrẹmụ ifie bá ẹrẹmụ egberi nimipẹlẹ (Gooyọ 11-12 dii)
12. Omịnị tebara ka kị wo ụndụsẹ kọn “kịrịị ụgụlapẹlẹmịni owei” bara ma tụa a paaemi a o?
12 Omịnị kpọ Jesus dimịẹ dá wo “ụndụsẹ akị kịrịị ụgụlapẹlẹmịnị owei bara ka tụa.” Kịmịama agbẹịgha bara ka kị wo mọ inyenrin kpọ, Jehovah paamịnị yebosẹ ẹrịmịnị bara wo mọ nimi wẹrịemi. Omịnị Jehovah yebosẹ ẹrịmịnị bara nimi yọbị baratụa wo pịrịwẹrị inemịnị. Jehovah agbẹị ifie laadaba yebosẹ kẹrịmọ-tịẹmọmịnị eti omịnị mọ nanadaba, baratụa wo pịrịwẹrị boloukọn bá ye akị ịkịọụ a gbaịn inyenrinbụọ kpọ dátịẹmọmịnị. Bịsẹ sei inyenrinbụọbo wo dịnẹmọ sei mịẹ, wo nana wẹrịemi pọwẹị kọnsiin, bá wo mọ Jehovah mọ ikie kpọ seimọ a paaemi.—Ps. 37:8.
13. Kịmịotu agbẹịgha bara akị wo mịẹ daba, teeki baratụa wo pịrịwẹrị ine a paaemi a o?
13 Wo nimi wẹrịemi barabị, omịnị laa Jesus mịẹ yebosẹ mịẹgha fa. Zụa ifieama, omịnị zụa yeama ẹrẹ anịghakpọ mịẹ bụọmọdẹ kị, omịnị wo mịẹ yebị mịẹ agbẹịgha bara iroromịnị. (Jas. 3:2) Zụa ifieama kịmịama agbẹịgha bara akị wo mọ inyenrin daba, yemị wo dọọntimi alaa ifie kị laamịnị. Bịsẹ bara ye ị́ paamọmịnị aba, Jehovah ị́ paamọmịnị ye bọọ sụọtuu nimi wẹrịemi bara nimi. Jesus kpọ ị́ paamọmịnị ye ma sụọtuu nimi wẹrịemi, tuubị kịmịotu agbẹịgha bara akị ụ kpọ mịẹmị. (Heb. 4:15, 16) Jesus mịẹdịaye bụọmọ kpọ, Jehovah Bible bọọ baratụa wo pịrịwẹrị agbẹịgha inyenrinbụọama inemụ yeama mịẹpaamọ wẹrịemi. Wo wẹrị Romans fun duo baratụa wo pịrịmụ maa yeama ditụa.
“BOLOUKỌNMỤ YỌMỊ WẸRỊ Ụ PỊRỊ”
14. Teeki “boloukọnmụ yọmị wẹrị ụ pịrị” tuu bị a o? (Romans 12:19)
14 Romans 12:19 goo. Fịrịmọpaa-owei Paul, Christtuoduo-otubo ánị “boloukọnmụ yọmị wẹrị ụ pịrị” bara kị gbaamị. Paul te ụbọ kị bẹmọtimi ma o? Bei Bible yọbị akị Jehovah kị bẹmọtimimị. Omịnị Jehovah bụọmọ wẹrị, wó dọụ ifie bá wó dọụbara akị kịrịịgha ụgụla kẹrịpẹlẹmịnị ifiesẹ, omịnị boloukọnmụ yọmị wẹrị Jehovah kị pịrịmịnị. Kịmịotu agbẹịgha bara kọn John tịịnmịnị bịnaowei mọ inyenrin ifiemị, ụ gbaamị: “Ịmịnị barawaị dọụmị, anịa Romans 12:19 baratụa ị pịrịwẹrị inetimi Jehovah korumọ yọmị yelaadẹịn-emi bara nimimị.”
15. Tetuu kị duonị omịnị etipoutimi Jehovah koru agbẹịemi a o?
15 Omịnị etipoutimi Jehovah kụrọmịnị yọmị arere emi. Omịnị etipoutimi Jehovah korụmịnịsẹ, omịnị wo bẹtịbị ịkịọụ akị bụụdọọnyeama kẹrịpẹlẹtimi akpotu a sụọmụ yọ kpọ dẹịnmọmịnị. Jehovah baratụa wo pịrịmịnị. Ụ gbaamị, ‘kịrịịgha bara akị pẹlẹ wẹrịemi ụgụlamị wẹrị ị pịrị, ịmịnị agbẹị-emi baramị akị yebo mịẹmịnị.’ Jehovah gbaa mị: “Ịmịnị waị á gbẹẹmịnị.” Omịnị bịsẹ egberi pei wẹrịemisẹ, omịnị wo bụụdọọnyebosẹ bụọmọ ụ pịrịmịnị, Jehovah yebosẹ mịẹ ebimọmụ eti wo mọ nanamịnị. Bịsẹ etipou yọ kị baratụa John bụọdẹ gooyọ bọọ wo gbaawẹrị owei, pịrịmị. John gbaamị, “Ịmịnị etipoutimi Jehovah koru wẹrịemisẹ, Jehovah yebosẹ mịẹ ebimọmụ bara ị mọ nimi wẹrịemi.”
“IFIEBOSẸ EBI KA KỊ SEI DẸỊNMỌ”
16-17. Tẹẹbịbị tebara ka kị baratụa wo pịrịwẹrị ifiebosẹ ebi ka kị sei dẹịnmọ a paaemi a o? (Romans 12:21)
16 Romans 12:21 goo. Christtuuduo-otu “ifiebosẹ ebi ka kị sei dẹịnmọ” bara Paul mọ kọn á kụrọmọmị. Jesus Ogun Agọnọ Bọọ Tolumọyebo kọn kịmịbo pịrịtimi ifiemị, ómịnị gbaamị: “Ifiebosẹ ánị egiren-otubo tarị bá tẹẹ á penimọmịnị otubo pịrị.” (Matt. 5:44) Jesus kpọ bịsẹ bara kị mịẹmị. Kaanghaba, wo kpọ Rome sụụdọụ-otubo Jesus ụyamọ bá ụ kaịtimi ifiemị, yemị Jesus dọọn kụrọmọ barabị wo mọ kẹrị irorodẹ kpọ paaemi. Anịa omịnị Jesus fịị ụyabo a sụọtuu nimisiin a paagha.
17 Jesus ụya bolou k’emi kị gbaa kpọ, wó peibolou kẹrị kụrọmọmị. Ómịnị ụ penimọmịnị otubo baamụ kụrọ kpọ nana wẹrịemi kị gbaa kpọ, ómịnị tẹẹ á pịrịmị: “Ị Daụ, akị á bụọmọ, ámịnị ánị mịẹmịnịye ghọ sụọtuu nimigha.” (Luke 23:34) Omịnị kpọ tẹẹ wo penimọmịnị otubo pịrịdaba, wo mịẹ dọọ adụdụ nana, wo boloukọn yọ kpọ dẹịnmọ bá ebitọrụ kpọ kọn á diimịnị.
18. Tẹẹbịbị tebara ka kị baratụa Alberto mọ John mọ pịrịwẹrị ine ma o?
18 Tẹẹbịbị kị baratụa bei egberitịbị bọọ tịịn wẹrịemi bịnaotubo pịrịwẹrị kịrịịgha ụgụlapẹlẹye inemị. Alberto gbaamị: “Ịmịnị tẹẹ ine ụyamọtimi kịmịbo pịrịmị. Jehovah baratụa á pịrịdá ámịnị ánị sei iroroyebo a barasiinmọ bara ị mọ tẹẹmị.” Kịmị mịẹ bolouịmbẹlẹmọ yọbị, mị tịẹkirimị Alberto peibolou nana bara ka kị Jehovah karịmịnị. John gbaamị: “Biin ifiema, ịmịnị tẹẹ ị mịẹ boloukọntimi bịnaowei pịrịmị. Bịsẹ tẹẹbịbịbo baratụa ị pịrịwẹrị boloukọn ụ pịrịtimi yọ dẹịnmọmị bá ebitoru kpọ kọn ụ diimị. Bá bịsẹ tẹẹbịbịbo ị mịẹ dọọ adụdụ kpọ nanamị.”
19. Omịnị ifiebosẹ teeki mịẹtimi dụụ laa agbẹị-emi a o? (1Peter 3:8, 9)
19 Omịnị mị Satan akpọ k’emi ifiesẹ, kịmịama agbẹịgha bara akị wo mọ inyenrinmịnị. Omịnị bọlọụ a timi wo korumịnị ụyabo nimigha kị gbaa kpọ paabara paabara, Jehovah baratụa wo pịrịwẹrị inemụ bara tẹẹ. Jesus akị agbeịgha bara kọn ụ mịẹ otubo mọ inyenrin bara dimịẹ, bá Bible ma gbaa wẹrịemi bara kpọ dimịẹ. Omịnị bịsẹ bara dimịẹdaba, Jehovah tarịama kọn wo pịrịmụ bara wo mọ nimi wẹrịemi.—1Peter 3:8, 9 goo.
DUMA 38 He Will Make You Strong
a Fịrịmọpaa-owei Peter, 1Peter tịbịyọ 2 mọ 3 mọ kịmịama agbẹịgha bara akị bọlọụ kụraị sọransii Christtuuduo-otubo mọ inyenrin bara ka tuugbaa wẹrịemi. Gesii bọọ fa yei otubo akị ánị gesii kẹrịakịdẹ erebo ụyamọtimi bara kpọ a tuugbaa wẹrịemi.—1Pet. 2:18-20; 3:1-6, 8, 9.