EGBERITỊBỊ 3
DUMA 35 “Make Sure of the More Important Things”
Jehovah Mịẹ Pọwẹị Nanamụ Iroroama Kị Tọn
“Jehovah esiinmịnị yọ kị kịlịkịlị nimiye, bá Yalịyalịdẹịn Owei nimimụ yọ kị ye asụọtuu nimi.”—PROV. 9:10.
TOLUMỌ DỌỤMỊNỊ YEBO
Bei egberitịbịmị omịnị nimiye, ye asụọtuu nimi, bá ye leleipẹlẹ inyenrinbụọ kọn kịlịkịlị iroroama tọn angọ pịrịmụ bara kị kẹrị ẹrẹteimịnị.
1. Wosẹ te kụrọ fịrị kị nana wẹrịemi a o?
EREINBOSẸ omịnị iroro tọn angọ pịrịmịnị. Zụa tọnmịnị iroroama bọụbọụ k’emi, gbaamaba pekei fịmụ fịyaị bá bụnụ agbẹị-emi ifie tọn angọ pịrịmụ yọbị kụrọgha. Anịa zụa iroroama kụrọ fa k’emi. Gbaamaba bei irorobo wo angọ dọọnyọ, wo pọwẹị nanamụ yọ, wo tarị wẹrịemi otu, anịghakpọ wo Jehovah karịmịnị yọ gbele emịaba kụrọ wo pịrị kpọ paaemi. Wo tọnmịnị irorobo arere mịẹpaamọ wo angọ mọ wo warịbolou mọ pịrị kị wo mọ dọụmịnị. Yelaadẹịn yebị, Jehovah pọwẹịtimi kị wo mọ dọụmịnị.—Rom. 12:1, 2.
2. Te yeama kị baratụa ị́ pịrịwẹrị ebi iroro tọnmịnị a o?
2 Ị́mịnị laa kịlịkịlị iroro tọn dọụmịnị ifiesẹ, (1) ebibara tuudọụ, (2) Jehovah kọn bịsẹ ye dimọ wẹrịemi bara kẹrị iroro, bá (3) ebibara bịsẹ ye mịẹmu bẹbẹ ụwọụbọ kpọ ditụa. Bei egberitịbịmị omịnị mị tara yebo kẹrị ẹrẹteimịnị. Bịsẹ yọbị baratụa wo pịrịwẹrị ebibara wo ye leleipẹlẹ kụrọ mịẹ ebimọ dẹịnmụ bara kpọ wo mọ kẹrị ẹrẹteimịnị.— Prov. 2:11.
EBIBARA TUUDỌỤ
3. Teekị duonị ebibara tuudọụ dekị iroro tọn agbẹị-emi a o? Tọnmọdịaye gbaa.
3 Bọlọụ mịẹ agbẹị-emi yemị ebibara tuudọụ. Tetuu kị duonị tuudọụmụ yọkị yelaadẹịn emi o? Iroro dii, kịmị angọ dọọnmịnị duonị mú dọọnzụọ owei laadaba, dọọnzụọ ọweimị ebibara ụbọ dọọnmịnị ye kpọ nimigha anịghakpọ biibịbị kpọ biigha timi ụbọ dọọn zụọmịnị a o? Benebene. Bịsẹ bara kị ị́ kpọ ebi iroro tọn dọụmịnịsẹ bọlọụ ebibara bịsẹ ye gbelemọ yọ ma tuudọụ. Ebi dọọnzụọ owei bọlọụ ebibara dọọn nimi bá dọọn mịẹpaamọ yebo kpọ nimidẹ kị kọrọ dọọn zụọmịnị. Ị́mịnị tebara ka kị ụ dimịẹmịnị a o?
4. Proverbs 18:13 didaba, teeki baratụa ị́ pịrịwẹrị ebibara tuudọụmịnị a o? (Foto kpọ dii.)
4 Biibịbịama biimịnị yọmị baratụa ị́ pịrịwẹrị ebibara tuudọụmịnị. Gbaamaba kịmị ị́ tịịn oge teiyọ a mú dọụmịnị aba, ị́ múmịnị a o? Ị́mịnị ebibara oge mịẹ dọụmịnị yọ mọ, ba akị oge tei dọụmịnị yebo mọ nimigha ifiesẹ, ị́mịnị bei biibịbịbo bii a paaemi: “Tẹ yọkị oge tei dọụmịnị a? Dụba tebara kị laaemi a? Te ụbọ kị tịbị a timi oge mịẹmịnị a? Te otuama kị oge ma bomịnị a? Tẹ zoruama kị mịẹmịnị a? kụrọ wuruama ka kị kịmịbo pịrị boumịnị a?” bei biibịbịbo biiwẹrị parụbịbị nanadaba, baratụa ị́ pịrịwẹrị kịlịkịlị iroro tọnmịnị.—Proverbs 18:13 goo.
Biibịbịama bii (Gooyọ 4 dii)a
5. Ị́mịnị yebo nimidaba mọkpọ teeki mịẹ agbẹị-emi a o?
5 Oge bolou ma sụọemi yebo ị́ mọ nimisiin daba, mamụkaramọ yebị paamụ bara kẹrị iroro. Gbaamaba, Bible gbaa egberibo didụbamọgha kịmịama kị oge ma bomịnị, anịghakpọ kịmịsẹ laabara-laabara ka kị kụrọ wuru bou, bá mịẹ agbẹịgha yeama mịẹmụ bara ị́ mọ nịmịdaba, teeki ị́ mọ mịẹmịnị a o? (1Pet. 4:3) Bịsẹ yọ bụọmọ kpọ, oge tei dọụmịnị ifiemị yetolumọyọ anịghakpọ egberigbaayọ a múmụ ifie gbele-emi a? Bei yebosẹ ị́ mọ akị tụa iroro daba, baratụa ị́ pịrịwẹrị ebi iroro tọnmịnị. Anịa, Ị́mịnị yebị nimidaba mọkpọ zịnị mịẹmụye emi, angọ bii Jehovah tebara ka kị bei yebị dimọ wẹrịemi a o?—Prov. 2:6.
JEHOVAH KỌN BỊSẸ YE DIMỌ WẸRỊEMI BARA KA KỊ YEBỊ DII
6. James 1:5 didaba, tetuu kị duonị omịnị Jehovah baratụapịrịye bii agbẹị-emi a o?
6 Ye a suuotuu nimimụ kụrọ kọn Jehovah bara duo bii. Jehovah baratụa wo pịrịwẹrị wó dọụ yebo nimi dọụmịnị. Anịduonị, ómịnị kịlịkịlị-nimiye kọn wo pịrịmụ bara gbaa wẹrịemi. Bịsẹ kịlịkịlị-nimiye bị, Jehovah “kịmị mịẹ bụzegha bara ka kị barafinimọ kịmịsẹ pịrịmịnị.”—James 1:5 goo.
7. Ị́mịnị tebara kị mịẹwẹrị Jehovah akị yebị dịmọ wẹrịemi bara nimimịnị a o? Tọnmọdịaye gbaa.
7 Jehovah baratụapịrịye ị́ mọ tẹẹ siindaba, etipoutimi Jehovah iné tẹẹbịbị paraịmụ bara dii. Gbaamaba: ị́mịnị yọụpaa zịnị yọ a mútimi ụwọụ bụọdaba, ị́mịnị yọ bọọ inyenrinmịnị otubo bii a paaemi. Ụbọ naa ị́ parụghaba ị́ wẹnị yọ duo sẹrịmịnị a? Benebene. Ị́mịnị ebibara ụ peiwẹrị wó gbaa bara kị diwẹnịmịnị. Bịsẹ bara kị, ị́mịnị Jehovah baratụapịrịye bii daba, angọtụa Bible duo iné iroromịnịye parụ wẹriemi yọama tolumọ angọ pịrị. Gbaamaba, bịsẹ oge tei yọbị á mú anighakpọ mụgha fa iroro ị mọ tọn dọụmịnị aba, bei egberi gbele-emi Bible yọama ditụa, anị, wuru boukẹrị oge-ama, sei ikie otuama, bá Jehovah Daabụọ kọn bọlọụdaamụ yọkị yelaa dẹịn-emi Bible yọama dii angọ pịrị.—Matt. 6:33; Rom. 13:13; 1Cor. 15:33.
8. Zịnịotu baratụapịrịye í mọ dọụmịnị ifiesẹ, teeki ị́ mọ mịẹ agbẹị-emi a o? (Foto kpọ dii.)
8 Mọkpọ, zụa ifieama zịnị kịmịama baratụa ị́ pịrịwẹrị iné dọụmịnị ye nimi kpọ paaemi. Gesii bọọ kasụọdẹ otu baratụa ị́ pịrị a paaemi. Mọabịkpọ, iné bẹtịbị ye asụọtuu dọụmịnị yọbị biin arereama mịẹpaamọ ị́ pịrịmịnị. Wo funbo ebibara ka kị baratụa ị́ pịrịmịnị, gbaamaba Research Guide for Jehovah’s Witnesses bá Scriptures for Christian Living. Ị́mịnị Jehovah mịẹ pọwẹị nanamụ iroro kị tọn dọụmịnị kị duonị tuudọụmịnị. Bịsẹ yọ barakụmọ.
Jehovah ye dimọ wẹrịemi bara kẹrị iroro (Gooyọ 8 dii)b
9. Omịnị teeki mịẹwẹrị Jehovah mịẹ pọwẹị nanamịnị a o? (Ephesians 5:17)
9 Omịnị tebara kị mịẹwẹrị wo tọnmịnị irorobo Jehovah mịẹ pọwẹị nanamịnị a o? Bọlọụ mịẹmụ yebị, omịnị ebibara Jehovah nimimịnị. Bible gbaa amọ, “Yalịyalịdẹịn Owei nimimụ yọ kị ye asụọtuu nimi.” (Prov. 9:10) Gbẹsịmị, ye asụọtuu nimimụ yọbị, Jehovah tarị bá golu wó wẹrịemi yebo mọ, ebi inyenrinbụọbo mọ, bá wó kikoromọdẹ yebo nimimịnị yọkị duobomịnị. Iné angọ bii, ‘ine Jehovah nimidẹ baramị, ịmịnị te iroroama kị tọn angọ pịrịwẹrị Jehovah mịẹ pọwẹị a paaemi a o?’—Ephesians 5:17 goo.
10. Tetuu kị duonị Bible olokobo kị yelaa warịbolou anịghakpọ kịmịawọụ olokobo dẹịn-emi a o?
10 Zụa ifieama, Jehovah mịẹ pọwẹị nanamụ yọ duonị, omịnị wo mọ mọ́ naịn-emi otu mịẹ boloukọnmịnị. Gbaamaba, zụa daụ mọ yin mọ otu ánị ere awọụbo mú pẹrẹ yei nana, ụbọmị tẹmẹanga bọọ tịẹkụrọgha kị gbaa kpọ seigha bara kị iroromịnị, ánị tọnmịnị barasẹ biin sịlịama akị tọbọụma gbẹẹ nanamụ yọ kị yelaadẹịn emi. Kọkọ, ánị ere awọụbo sịlịnana bá pọwẹị pọwẹị timi kị á mọ dọụmịnị. Anịa te ụbọ kị tẹmẹanga bọọ baratụa ánị tọbọụma pịrịmịnị a o? Jehovah tebara ka kị yebị dimọ wẹrịemi a o? Parụbịbịmị Matthew 6:33 k’emi. Bịsẹ yọmị, Christtuuduo-otu ifiebosẹ “Daabụọ ka kị bọlọụdaa” bara kị gbaa wẹrịemi. Omịnị wo daụ mọ yin mọ bá amabo emi otubo didụbamọ wẹrịemi kị gbaa kpọ, Jehovah mịẹ pọwẹị nanamụ yọkị yelaadẹịn emi.
EBIBARA PAAMỌ YEBO KẸRỊ IRORO
11. Philippians 1:9, 10 didaba, te inyenrinbụọ kị baratua ị́ pịrịwẹrị ebibara paamọ yebo kẹrị iroro a paaemi a o?
11 Ị́mịnị Bible duo iné tọnmịnị irorobo ditụa siindaba, akị mịẹ a paaemi bẹbẹ ụwọụbọ ditụadá ebibara kẹrị iroro. (Philippians 1:9, 10 goo; “full discernment” study note dii.) Ye leleipẹlẹ inyenrinbụọ kị baratụa ị́ pịrịwẹrị iné tọnmịnị irorobo paamọ bara nimimịnị. Zụa ifieama iroro tọnmịnị yọmị bọụbọụ k’emi. Tonmịnị irorobosẹ kị bọụbọụ emi bara gbaagha. Ye leleipẹlẹ inyenrinbụọ kị baratụa wo pịrịwẹrị bọụbọụgha ifieama kpọ ebi iroro tọn angọ pịrịmịnị.
12-13. Wẹnịmụ fịrị gbelemọ yọbị, ye-leleipẹlẹ inyenrinbụọmị tebara ka baratụa ị́ pịrịwẹrị ebi iroro tọn angọ pịrị a paaemi a o?
12 Wo wẹrị iroro dii, ị́mịnị sịlị nanawẹrị warị gbalịmọ yọ duonị fịrị dọụmịnị, maa fịrị ị́ mọ ẹrịdẹ. Ị́mịnị fịrịbo emibara, fịrị wẹnịmụ bara, fịrị wẹnịmụ yọbị alaemi bara, bá fịrị gbelemọ zịnị yeama a tuudọụ siindaba, maa fịrịbosẹ Christtuuduo kịmị wẹnị a paaemi. Kaanghaba ị́mịnị kẹnị fịrị tarị dẹịn-emi tuubị gbẹẹ bị dụba dẹịn-emi. Bịsẹ bara kị gbaa kpọ, zịnị ditụa agbẹị-emi yeama emi.
13 Gbaamaba, bei fịrịbo iné yetolumọyọ amú yọ gbele a paaemi a? Bei fịrịbo iné warị-otubo mọ timi bá baratụa á pịrịwẹrị Jehovah mọ naịnmụ ifiemị akị a paaemi a? Bei biibịbịbo baratụa ị́ pịrịwẹrị, mẹnịanga yeama kọn bọlọụdagha fa, ị́ mịẹwẹrị “yelaadẹịn yebo” anị iné Jehovah karịmịnị yọ mọ bá iné warị-otubo dọụ wẹrịemi yebo mọ kọn bọlọụdaamịnị. Ị́ bịsẹ bara mịẹdaba Jehovah tarịama akị ị́ pịrịmịnị.
14. Ye-leleipẹlẹ inyenrinbụọ mọ tarị mọ tebara ka kị baratụa wo pịrịwẹrị zịnịotu mịẹ adalaịgha fa o?
14 Omịnị “kịmịotu mịẹ adalaị” dọụgha, ye-leleipẹlẹ inyenrinbụọ kị baratụa wo pịrịwẹrị wo tonmịnị irorobo zịnịotu gbele a paaemi bara kẹrị iroromịnị. (Phil. 1:10) Omịnị wo betịbị angọ gbelemọ iroroama tọnmịnị ifie kpọ ye-leleipẹlẹ inyenrinbụọ nanamụ yomị yelaaemi, gbaamaba wo angọ tọlọmọ dọụmịnị bara mọ wo tụabịdẹ sẹlẹ angọ pịrịmịnị ifie kpọ, omịnị ye-leleipẹlẹ inyenrinbụọ dọụ wẹrịemi. Gbaamaba, omịnị kẹnị tụabịdẹ anịghakpọ kẹnị angọ tọlọmọmịnị bara dịsẹ kpọ paaemi, anịa bịsẹ yebo itu bọọ emi bịnaotubo anịghakpọ tiri otubo a bụụdọọnmịnị aba, tebara kị wo mọ mịẹmịnị a o? Ye-leleipẹlẹ inyenrinbụọ kị baratụa wọ pịrịwẹrị wo sẹlẹ wẹrịemi bịdẹ apaabị zịnịotu gbele-emi bara nimiwẹrị á didụbamọmịnị. Tarị wo dịnẹmọ wẹrị “zịnịotu” dịsẹyọ kọn bọlọụdaa bá agbẹị bara ka kị inyenrinmịnị. (1Cor. 10:23, 24, 32; 1Tim. 2:9, 10) Bịsẹ yọbị baratụa wo pịrịwẹrị wo tọnmịnị irorobo kịmịotu didụbamọ bá á tarịemi bara mịẹdịamịnị.
15. Ị́mịnị iroro tọn dọụmịnị aba teeki mịẹ agbẹị-emi a o?
15 Ị́mịnị yelaa iroro kị tọnmịnịaba, akị tọn bara mịẹ beinmọmụ bara kpọ tụa iroro. Jesus gbaa wo pịrịmị “fịrị bọọ sụọmụ sịlị biri kpọ nimi.” (Luke 14:28) Anịduonị ifie mọ, akị fịrị wẹnịmụ yebo mọ, bá iné angọtụa fịrị wẹnịmụ barasẹ iroro. Zụa ifieama, tọn iroro mịẹ beinmọmụ yọ duonị, iné warị otubo duo baratụapịrịye bii kpọ seigha. Ebibara iroro tọnmịnị yọmị tebara ka kị yelaaemi a o? Bịsẹ yọbị baratụa ị́ pịrịwẹrị, iné tọn iroromị dei agbẹị yọama emiaba laa dei a paadẹ. Bá ị́mịnị iné warị-otubo ebi tolumọyebo peimịnị aba, ámịnị baratụa ị́ pịrịwẹrị iné tọnmịnị irorobo mịẹ beinmọmịnị.—Prov. 15:22.
PỤỌSỊ-PỤỌSỊ PAAMỌ IRORO KỊ TỌN
16. Teeki baratụa ị́ pịrịwẹrị pụọsị-pụọsị iroroama tọnmịnị a o? (“Kịlịkịlị Iroroama Tọnmụ Baramị” ekpedi dii)
16 Bei egberitịbịmị gbaa wẹrịemi yebo ị́ mọ dimịẹ daba, ímịnị laa kịlịkịlị iroroama tọn angọ pịrịmịnị. Beị egberibo baratụa ị́ pịrịwẹrị Jehovah mịẹ pọwẹị nanamụ iroroama tọnmịnị. Jehovah tẹẹdá baratụa ị́ pịrịwẹrị pụọsị-pụọsị paamọ iroroama tọnpẹlẹ.
17. Gbẹsị teekị baratụa ị́ pịrịwẹrị ebi iroroama tọnmịnị a o?
17 Bụọdẹ ifiebị iné tọn ịrorobo pụọsị-pụọsị bara kị paawẹrị kpọ, ukie kịlịkịlị iroro tọnmịnị yọmị iné nimiye duo bogha, anịa Jehovah pịrịmịnị kịlịkịlị-nimiye kị duo bomịnị. Ómịnị kị gesii nimiye, ye asụọtuu nimi, bá ye-leleipẹlẹ kụrọ pịrịmịnị. Bei tara yebo kị kịlịkịlị nimiye bolou bọọ emi. (Prov. 2:1-5) Jehovah baratụa ị́ pịrịwẹrị ụ mịẹ pọwẹị nanamụ iroroama tọnmịnị.—Ps. 23:2, 3.
DUMA 28 Gaining Jehovah’s Friendship
a FOTOBO EMIBARAM: Asịyaịpesi-otuama oge tei tịịnbịbị nanamị, ánị phone kị duobo á laamị, ámịnị egberi kẹrị ẹrẹteimịnị.
b FOTOMỊ EMIBARAMỊ: Kẹnị ụbọ oge bọọ mú anịghakpọ múgha fa bara tọn angọ pịrị dọụmịnị duonị tuudọụmịnị.