Jehovah Sei Bụọmọmịnị Inyenrinbụọ Mị—Wo Tọrụkẹrị Agbẹị-emi Tuumị

1-2. Wo mọ paragraph 1 bọọ tịịn wẹrịemị asịyaịpesi mọ tebara ka kị lei-emi o?

WẸRỊ kẹrị iroro dii! Kẹnị asịyaịpesi pẹrẹ daụ mọ yin mọ kị pịrị zii wẹrịemi. Anịa kẹnịbaị erein wó daụ mọ yin mọ accident a sụọwẹrị fịmị. Paa yemị ụ dọọn kụrọmọ mị. Anịa bịsẹyọ bẹtịbịgha. Ụ daụ mọ yin mọ ánị nanawẹrị sịlịbosẹ fịsiindẹ bá biin saa-ama kpọ fị koromọ wẹrịemi. Anịduonị ụ daụ mọ yin mọ nanawẹrị ebi yebosẹ kẹnị kpọ ụ laagha bara kị paadẹ. Ámịnị biin saa-ama kị fị wó tịbị bọọ gbanadẹ, bá saa bii otubo kpọ bo ánị sịlịbo biimịnị. Saabo dụbaemi duonị, ómịnị laa gbẹẹsiingha fa.

² Wo paamọmịnị yebo kpọ bịsẹ asịyaịpesi paamọ yebo bara k’emi. Wo bọlọụ daụ mọ yin mọ otubo, Adam mọ Eve mọ, ebi paradise bolou kọọ inyenrintimi mị. Bá sei kpọ ánị angọ bọọ fa timimị. (Gen. 1:27; 2:7-9) Ámịnị inyenrintimi bẹseri bẹseri kị laamụ timimị. Anịa yebosẹ deimị. Adam mọ Eve mọ sei mịẹmị. Ánị mịẹ sei duonị Jehovah á duo Eden fanịbolou duo paamọmị. Ámịnị ba laa inyenrintimi bẹseri bẹseri laagha fa. Ámịnị te ye kị bụọmọ ánị naa ziigha awọụbo pịrị ma o? Bible mọ kị gbaamị: “Sei kẹnị kịmị [Adam] duotolu kị duo akpọsẹ duo sụọmị, fịị bá sei kị duo bomị, anịduonị fịị wasaị kịmịsẹ laasiindẹ, tuumị kịmịsẹ sei mịẹdẹ.” (Rom. 5:12) Adam sei bẹtịbị kị bụọmọ wo pịrị wẹrịemi, sei ba fịị kị kọn bomị. Adam duobo seimị, omịnị laa gbẹẹsiingha fa saa bara k’emi.—Ps. 49:8.

3. Wo seibo tebara ka kị “saa” mọ lei-emi a o?

³ Jesus wo seibo kọn “saa-ama” kị tọnmọ wẹrịemi (Matt. 6:12; Luke 11:4) Omịnị sei mịẹ daba, Jehovah bara a saafịdẹ bara k’emi. Sei gbẹẹ mị fịị. Anịduonị Jehovah ụwọụ mịẹpaamọ wẹrị wo seibo gbẹẹgha wẹrị a, omịnị wo ụndụbo ka kị seibo gbẹẹ mọ timi mị, omịnị fịyọduo-waịseri bomụ ukiemọye kpọ nanaghamụ timi mị.—Rom. 6:7, 23.

4. (a) Omịnị baratụapiriye nanagha wẹrị a, teeki kịmịawọụ paamọmụ timi ma o? (Psalm 49:7-9) (b) Bible tebara ka kị “sei” emi bara bọọ tuugbaa ma o? (“Sei” ekpedi dii.)

⁴ Omịnị laa bẹtịbị, waị Adam mọ Eve mọ tangbeidẹ yebo nanaghamụ timi mị. (Psalm 49:7-9 goo.) Jehovah baratụa wo pịrịdẹ kị duonị, omịnị fịyọduo-waịseribo mịnị ukiemọye kpọ nanadẹ. Jehovah bịsẹ bara mịẹgha wẹrị a, omịnị bo namabo bara kị paamụ timi mị, fịị daba fadẹ bara kị paamọ timi mị.—Eccl. 3:19; 2Pet. 2:12.

5. Wo tarịnana daụ tebara ka kị wo seibo gbẹẹ wo pịrị ma o? (Bọlọụ foto dii.)

⁵ Wẹrị waị wo kẹrị ẹrẹteidẹ asịyaịpesi paamọye kẹrị iroro dii, kẹnị pẹrẹ kịmị bo wó saabosẹ gbẹẹ ụ pịrị dọụmịnị aba, ụ mịẹ pọwẹịgha fa? Mị asịyaịpesi mị pọwẹịtimi bịsẹ baratụapịrịyẹ kẹrịakịmịnị. Bịsẹ bara kị, wo tarịnana Ọkpọnanaowei, Jehovah kẹnị dịẹpịrịye akị wo pịrịdẹ. Bịsẹ dịẹpịrịye bị, Adam duobo wo laaemi saa mị gbẹẹ a paadẹ. Jesus bị bara gbaa mị: “Ọkpọnanaowei akpọ tarị wẹrịemi kị duonị wo kpei-kpei kẹnị tọbọụ fịrịmọ bo fịị wo pịrịmị, anịkị peibolou akị wo atụadẹ kịmịsẹ ba gbeingọgọlọ bolou a sụọgha fa anịa fagha fagha ụndụ kị nana mịnị.” (John 3:16) Bịsẹ dịẹpịrịye kị baratụa wo pịrịwẹrị omịnị bo Jehovah ikieotu a paamọ fomuun nanadẹ.

6. Te Bible egberi ụngbọama kị wo mọ kẹrị ẹrẹtei dọụmịnị a, bá tetuu a?

⁶ Omịnị tebara kị mịẹtimi bei yelaa dịẹpịrịye duo arere nana a paaemi a o? Mị biibịbị parụ mụ yọmị, omịnị Bible duo zụa egberi ụngbọ-ama kẹrị ẹrẹtei mịnị. Bịsẹ egberi ụngbọbo, anị waị zọzọnaa, sei kọnsiin, dọụ mịẹpaamọ, parụ bụọmọ ịkịan, zụọbụọmọ, bá kịrịịye mịẹ otuama kọn wo tịịndẹ. Bei egberitịbị mị, Bible akị bei egberi ụngbọbo tuugbaa wẹrịemi bara bị wo mọ kẹrị ẹrẹtei mịnị. Wo bei yebo ẹrẹteimịnị ifiebị, omịnị Jehovah mịẹ wo pịrịdẹ yebo tọrụkẹrịyọ nana dẹịn mịnị.

MỊẸMỤYE: BO JEHOVAH MỌ WAỊ ZỌZỌNAA

7. (a) Adam mọ Eve mọ mọkpọ teeki tangbei ma o? (b) Omịnị Adam mọ Eve mọ kị pịrị zii duonị, omịnị teeki dọụ kụrọmọ wẹrịemi a o? (Romans 5:10, 11)

⁷ Adam mọ Eve mọ sei mịẹ duonị, ámịnị bá laa inyenrintimi bẹseri bẹseri laagha. Ámịnị bo Jehovah egiren-otu ka paadẹ. Adam mọ Eve mọ naa sei mịẹgha ifiemị, ámịnị Okpọnanaowei warịbolou kịmịama ka paatimi mị. (Luke 3:38) Anịa, ánị gbaa naagha yọ duonị, Jehovah á duomị, bịsẹ ifie bụọdẹ kị ámịnị koro awọụ ziimị. (Gen. 3:23, 24; 4:1) Adam mọ Eve mọ kị wo zii duonị, omịnị Jehovah mọ waị zọzọnaa agbẹị-emị. Omịnị ba Jehovah egiren-otu a paa dọụgha, wó ikieotu ka paa dọụmịnị. (Romans 5:10, 11 goo.) Gbaamịnị barasẹ, omịnị angọtụạdá Jehovah mọ ebi ikieotu a paa. Kẹnị tuudọụ fun gbaa amọ, Greek bẹẹlị mị akị “zọzọnaa” tuugbaa bara mị “egiren ka timi waị ikie a paadẹ.” Kịmị mịẹ tamamaa yọbị, Jehovah kị bei ye mịẹpaamọ mị. Te ụwọụ a o?

AKỊ MỊẸMU BARA BỊ: SEI KỌNSIIN ỤWỌỤ MỊẸPAAMỌ MỊ

8. Teeki (a) sei kọnsiin ụwọu mị a o? (b) dọụ mịẹpaamọ ye a o?

⁸ Kịmịawọụ waị Adam tangbeidẹ yebo nanaghamụ yọ duonị Jehovah Adam tangbeidẹ yebo mọ kẹnị bara emi ye mịẹpaamọ mị. Bịsẹ ye ka kị sei kọnsiin ụwọụ tịịnmịnị. Gbaamaba Jehovah ebi ye kọn seidẹ anịghakpọ tangbeidẹ ye deimị. Anịduonị kịmịawọụ waị bo ụ mọ mọ́ ikieotu a paamọ fomuun nanamị. Greek bẹẹlị bọọ gẹẹ wẹrịemi Bible funbo wo mọ didaba, Jehovah mịẹpaamọ wẹrịemi sei kọnsiin ụwọụ mị kọn dọụ mịẹpaamọ ye kị tịịn wẹrịemi. (Rom. 3:25) Dọụ mịẹpaamọ ye gbaa daba, akị mịẹwẹrị wo mọ Jehovah mọ ovuru bọọ dọọ mịẹpaamọ ye kị gbaamịnị.

9. Jehovah Israel-otu seibo bụọmọmụ yọ duonị teeki mịẹ ma o?

⁹ Jehovah Israel otubo bụọmọ ụ mọ mọ́ naịn dọụmịnị duonị, ómịnị baratụa á pịrịwẹrị tịẹkiri bị laa ánị seibo akị á bụọmọ a paaemi ụwọụ mịẹpaamọ mị. Israel otubo kụraịbosẹ kẹnị erein sei kọnsiin oge teitimi mị. Bịsẹ Sei Kọnsiin Erein laadaba, tịbị ịkịankụn-owei mị, nama-ama akị ịkịankụn Israel ibesẹ pịrị mịnị. Anịa, nama ụndụ yelaa kịmị-tọbọụ ụndụ laagha duonị, nama akị ịkịankụn yọmị laa Israel-otu seibosẹ serisiin a paagha. Bịsẹ bara kị gbaa kpọ Israel kịmị boloudei wẹrị Jehovah dọụ wẹrịemi ịkịanbo kụn daba, Jehovah peree bara ka kị bịsẹ ụbọ bụọmọmịnị. (Heb. 10:1-4) Bịsẹ yọ kị bụọmọ kpọ, Sei Kọnsiin Erein ma kụnmịnị ịkịanbo mọ, bá ifiebosẹ kụntimi sei bụọmọ ịkịanbo mọ, ye ka kị Israel-otubo ụkịẹmọtimi mị. Ámịnị kọkọ sei mịẹmịnị kịmịama, bá beinmọ beinmọ bara akị ánị seibo kọnsiinmụ ye dọụ wẹrịemi bara ka kị ánị ukiemọ mị.

10. Jehovah beinmọ beinmọ bara kọn kịmịawọụ seibosẹ bụọmọmụ yọ duonị teeki mịẹ ma o?

¹⁰ Jehovah beinmọ beinmọ bara kịmịawọụ seibosẹ kọnsiinmụ ụwọụ mịẹpaamọ mị. Jehovah, wó tarịdẹịn Tọbọụ fịrịmọ bomị, bịsẹ tọbọụ mị “wó angọ kọn kẹnị ifie ịkịankụn wẹrị biin kịmịama sei-ama kọnsiin mị.” (Heb. 9:28) Jesus “wó ụndụ ka kị parụbụọmọ ịkịan kụn biin kịmịama pịrị mị.” (Matt. 20:28) Parụbụọmọ ịkịan ba te ye a o?

AKỊ GBẸẸMỤ YEMỊ: PARỤBỤỌMỌ ỊKỊAN MỊ

11. (a) Bible gbaa bara didaba, teeki parụbụọmọ ịkịan a o? (b) Te ụbọ kị laa gbẹẹ a paaemi a o?

¹¹ Bible gbaa bara mị, parụbụọmọ ịkịan ka kị wo seibo kọnsiin mị, bá wo mịẹ Jehovah mọ waị zọzọnaa mị.a Jehovah tọrụyọ mị, parụbụọmọ ịkịan ka kị Adam mọ Eve mọ tangbeidẹ ebi yebo gbẹẹ a paaemi. Tetuu a o? Kẹrị ukie, Adam mọ Eve mọ yalịyalị ụndụ kị tangbei mị, anịduonị ámịnị ba nimi inyenrintimi bẹseri bẹseri laagha. Anịa wosẹ waị Adam mọ Eve mọ tangbeidẹ yebo nana dọụmịnịsẹ, bịsẹ tangbeidẹ yebo mọ gbasịị-emi ye ka kị gbẹẹ a paaemi. (1Tim. 2:6) Anịduonị, owei-laadẹ kịmị nẹ (1) sei angọ a fa; (2) laa kiriogbo bọọ inyenrintimi bẹseri bẹseri laa a paaemi; (3) kịmị kpọ ụ penimọgha bara wó ụndụ kọn ịkịankụn wo pịrị mịnị ụbọ kị laa mị saa gbẹẹ wo pịrị a paaemi.

12. Tetuu kị duonị Jesus kị laa parụbụọmọ ịkịan kụn ma o?

¹² Jesus laa parụbụọmọ ịkịan kụn tara tuu-ama wo mọ dii. (1) Ómịnị sei angọ a fa—“ómịnị kẹnị sei kpọ mịẹgha.” (1Pet. 2:22) (2) Jesus sei angọ a fa duonị, laa kiriogbo bọọ inyenrintimi bẹseri bẹseri laamụ kụrọ nana wẹrịemi. Bá, (3) Kịmị kpọ ụ penimọgha bara ka kị fịị wo pịrịwẹrị fagha fagha ụndụ mịẹpaamọ wo pịrịmị. (Heb. 10:9, 10) Adam bọlọụ ifiemi, sei angọ a fatimi mị, bịsẹ bara kị Jesus kpọ sei mịẹgha duonị, sei angọ a fa. (1Cor. 15:45) Anịkị duonị Jesus laa wó fịị kọn Adam mịẹpaamọ seibo kọnsiin mị, bá Adam tangbeidẹ yebo kpọ gbẹẹ mị. (Rom. 5:19) Jesus bịsẹ mịẹye kị duonị bo “fatu Adam” a paamị. Anịa Jesus wó angọ kọn “kẹnị ifie” ịkịankụndẹ duonị, zịnị yalịyalị kịmị mọkpọ bọ Adam tangbeidẹ yebo gbẹẹmụ tuu ba fa.—Heb. 7:27; 10:12.

13. Sei kọnsiin ụwọụ mọ parụbụọmọ ịkịan mọ tebara ka kị bẹbẹ paaemi a o?

¹³ Sei kọnsiin ụwọụ mọ, parụbụọmọ ịkịan mọ tebara ka kị bẹbẹ paaemi a o? Jehovah akị sei kọnsiin bara mị, ómịnị ụwọụ mịẹpaamọ wẹrị kịmịawọụ bo ụ mọ mọ́ zọzọnaa mị. Anịa ye gbẹẹdẹ kị bei ụwọụ mịẹpaamọ mị, bịsẹ gbẹẹ ye ka kị parụbụọmo ịkịan bị tịịnmịnị. Bịsẹ gbẹẹ yemị anị Jesus sei gbelegha asịịn mị.—Eph. 1:7; Heb. 9:14.

KUNUMỌ BỊ JEHOVAH SEI MỌ FỊỊ MỌ DUO WO ZỤỌDẸ BÁ KỊRỊỊYE MỊẸ OTUAMA KỌN WO TỊỊNDẸ

14. Omịnị teeki kẹrị ẹrẹtei dọụmịnị a, bá tetuu a?

¹⁴ Ọkpọnanaowei sei kọnsiinmụ ụwọụ mịẹpaamọ yọ duonị te arereama kị paadẹ a o? Bible mị bẹbẹ egberi ụngbọama ka kị arerebo gbaa wo pịrị wẹrịemi. Zụa ifieama mị egberi ụngbọbo kẹnị a paamịnị. Anịa, bịsẹ bara kị gbaa kpọ bei egberi ụngbọbosẹ Jehovah akị sei kọnsiinmụ yọ duonị mịẹ yebo kị gbaa wo pịrị mịnị. Omịnị maa egberi ụngbọama ditụa mịnị. Bei egberibo baratụa wo pịrịwẹrị ebibara Jehovah sei kọnsiin yọ duo nanamịnị arerebo nimi mịnị.

15-16. (a) Bible mị Jehovah “sei mọ fịị mọ duo kịmịawọụ zụọbụọmọdẹ” gbaa egberi mị teeki wo tuu a o? (b) Bịsẹ egberi mị tebara ka kị wo gbele ma o?

¹⁵ Jehovah sei mọ fịị mọ duo kịmịawọụ zụọbụọmọdẹ bara Bible mọ gbaa bị, akị Jesus parụbụọmọ ịkịan duonị, ánị mịẹdẹ seibo bụọmọ bá sei mọ fii mọ bara-bolou duo pereedẹ yọ kị bịmọ wẹrịemi. Bei egberi gbelemọ yobị fịrịmọpaaowei Paul bara kị gbaamị: “ámịnị, ánị kosu daụ-otubo bụọmọ á pịrịdẹ afẹn inyenrinbụọ duo zụọbụọmọye nana yọmị, seimịnị yeama, silver mọ gold mọ duo bogha. Anịa Christ yelaa, ịlọlị gbelegha bá ịgẹnị-teingha anịna mọ leịemi asịịn ka kị á parụbụọmọ mị.”—1Pet. 1:18, 19; ftn.

¹⁶ Parụbụọmọ ịkịan duonị, omịnị sei mọ fịị mọ bara duo peree a paadẹ. (Rom. 5:21) Jesus wó yelaa ụndụ ka kị ịkịan kụn wẹrị sei mọ fịị mọ duo wo zụọbụọmọ yọmị, omịnị Jehovah mọ Jesus mọ kụlẹ ka mị.—1Cor. 15:22.

17-18. (a) Kịrịịye mịẹ otuama kọn wo tịịndẹ gbaa egberi mị, teeki wo tuu a o? (b) Jehovah bịsẹ bara akị wo tịịn yọmị te arereama kị mịẹpaamọ wo pịrịdẹ a o?

¹⁷ Jehovah kịrịịye mịẹ otuama kọn wo tịịndẹ. Gbaamịnị yọmị, wọ mịẹkiridẹ yebosẹ kọn wo bụọmọdẹ, wo seibosẹ kwọ seridẹ. Anịa bịsẹ bara kị gbaa kpọ, Jehovah benebene kịrịị ụgụla pẹlẹmụ yọmị gbein koromọgha fa. Jehovah, kịmị sei mịẹmụ yọmị a barapougha, bá Jehovah kọkọ kịrịịye mịẹ otuama kọn wo tịịn agbẹị-emi kị duonị, akị wo tiịịn bara kpọ paagha. Anịa, omịnị peibolou akị Jehovah mịẹpaamọdẹ wẹrị sei kọnsiin ụwọụ mọ bá Jesus parụbụọmọ ịkịan mọ a tụa daba, Jehovah wo seibosẹ akị wo bụọmọ mịnị.—Rom. 3:24; Gal. 2:16.

¹⁸ Jehovah kịrịịye mịẹ otuama kọn wo tịịn daba te arereama kị emi a o? Kịrịịye mịẹ otuama kọn agọnọ a mú Jesus mọ daamụ otubo tịịndẹ, ba Ọkpọnanaowei awọụama kpọ akị á tịịndẹ. (Titus 3:7; 1John 3:1) Ánị seibosẹ kọn á bụọmọdẹ. Ámịnị naa benebene sei mịẹgha kịmịama bara kị paadẹ, anịduonị ámịnị daabụọ bị daamụ fomuun nanadẹ. (Rom. 8:1, 2, 30) Bịsẹ yọ bụọmọ kpọ, kiriogbo bọọ inyenrintimi bẹseri bẹseri laamụ ukiemọye nana wẹrịemi otubo kpọ kọn kịrịịye mịẹ otuama tịịndẹ bá Ọkpọnanawei ikieotuama kpọ akị á tịịndẹ. (Jas. 2:21-23) Armageddon sụụ duo tẹịmụ kịmịbo, ba benebene fịgha fomuun nana mịnị. (John 11:26) “Kịrịịye mịẹ otubo” mọ “kịrịịye mịẹgha otubo” mọ fịyọduo-waịseribo mịnị. (Acts 24:15; John 5:28, 29) Kunumọ mị, bei kiriogbo bị Jehovah gbaayọnaa otubosẹ “Ọkpọnanaowei awọụbo nana wẹrịemi geleku peree kị nana mịnị.” (Rom. 8:21) Wosẹ powẹịtimi beinmọ beinmọ bara waị bo Ọkpọnanaowei mọ zọzọnaamụ ifie kị korumịnị. Mị ebi mị, sei konsiin yọ kị duo bo wosẹ laa mịnị!

19. Jehovah mịẹ wo pịrị ebi mị tebara ka kị wo ụndụbo dei ma o? (“Wo gbele emi bara mi” ekpedi dii)

¹⁹ Gbẹsị mị, omịnị kpọ bịsẹ daụ mọ yin mọ fịdẹ tọbọụ bara kị timi mị, wó nanawẹrị yebosẹ faa siin mị, wosẹ bá nimi gbẹẹgha fa saa bolou a sụọmị. Jehovah baratụa wo pịrị yọmị, omịnị u kule ka mị. Jehovah sei kọnsiin ụwọụ mọ, parụbụọmọ ịkịan mọ akị baratụa wo pịrịdẹ. Anịduonị, omịnị peibolou akị Jesus Christ ghọ tụa daba, omịnị sei mọ fịị mọ duo peree mịnị. Jehovah wo seibo kọn wo bụọmọdẹ, omịnị naa benebene sei mịẹgha bara kị paadẹ. Yelaa deịn yebị, omịnị waị wo tarịnana agọnọ Daụ, Jehovah mọ ebi ikieotuama a paa mịnị.

20. Omịnị barịị egberitịbị mị teeki kẹrị eṛẹteimịnị a o?

²⁰ Omịnị, Jehovah mọ Jesus mọ mịẹ wo pịrịdẹ yebo kẹrị iroromịnị bị, yebị kọkọ wo gbele kụrọmọmịnị, anịduonị omịnị ebibara tọrụkẹrịyọ mịẹdịamịnị. (2Cor. 5:15) Ámịnị baratụa wo pịrịgha wẹrị a, omịnị kẹnị ukiemọye kpọ nanaghamụ timi mị! Anịa Jehovah sei bụọmọ yọmị tebara ka kị wo kẹnị ụbọ kẹnị ụbọ gbele emi a o? Barịị egberitịbị bị omịnị bei biibịbị kẹrị ẹrẹteimịnị.