Jehovah Sei Bụọmọmịnị Inyenrinbụọ Mị—Akị Ị́ Gbele-emi Bara Mị

1. Tetuu kị duonị kịmịtọbọụ kịmị bụọmọdẹ bara nimimụ yọbị kụrọemi a o?

“ỊMỊNỊ Ị́ BỤỌMỌDẸ.” Bei egberibị kịmị gbele fa k’emị. Anịa ị́mịnị ẹrẹ anịghakpọ ye mịẹ kịmị dọọnmọ wẹrị, ụbọmị ị́ bụọmọ daba, ị mịẹ pọwẹịmịnị! Anịa “Ịmịnị ị́ bụọmọdẹ” gbaa egberi mị tekẹ wo tuu a o? Ánị maa kịmị waị zọzọnaadẹ bara kị ụbọ mọ gbaamịnị a? Anịghakpọ ómịnị ba bịsẹ egberi naa dọụgha kị duonị bịsẹ bara gbaamịnị a? Kịmịawọụ kịmị bụọmọmịnị bara mị, biin yeama kị sọụemi.

2. Bible tebara ka kị Jehovah sei bụọmọ bara bọọ tuugbaa ma o? (Footnote kpọ dii.)

² Jehovah kịmị bụọmọmịnị bara mọ kịmịtọbọụ ye mọ bẹbẹ paa kụrọmọ emi. Kịmịtọbọụ laa Jehovah sei bụọmịnị bara bụọmọgha fa. Psalm fun gẹẹowei Jehovah gbelemọ yọmị gbaa mị: “Ị́mịnị gesii bara ka kị sei bụọmọmịnị, anịkị kịmịsẹ ị́ didụbamọ mịnị.”a (Ps. 130:4) Kọkọ Jehovah “gesii bara ka kị sei bụọmọmịnị.” Gesii bara akị seibụọmọmịnị yọmị, Jehovah kị ebidẹịn mịẹdịaye mịẹ wose dịa wẹrịemi. Bible bị, Hebrew bẹẹlị akị gẹẹ otubo, Jehovah akị sei bụọmọmịnị bara tọnmọtimi ifiemị, amịnị zụa egberi ụngbọama akị Jehovah kịmị bụọmọmịnị bara tọnmọ paamọ mị. Ámịnị benebene bịsẹ egberi ụngbọbo kọn kịmịtọbọụ sei bụọmọmịnị bara tọnmọgha.

3. Jehovah sei bụọmọmịnị bara mọ wo sei bụọmọmịnị bara mọ tebara ka kị bẹbẹ paaemi emi a o? (Isaiah 55:6, 7)

³ Jehovah kịmị mịẹ sei bụọmọ daba, ụbọ seibosẹ kị kụọ siinmịnị. Ụbọ bị Jehovah mọ nana wẹrịemi ebi ikie kpọ mịẹ tịẹmọ mịnị. Jehovah ifiebosẹ barafinimọ wẹrị beinmọ beinmọ bara wo seibo akị wo bụọmọmịnị yọmị kọkọ wo angọ duo suomị.—Isaiah 55:6, 7 goo.

4. Jehovah tebara ka kị baratụa wo pịrịwẹrị gesii bara akị sei bụọmọmịnị bara bọọ sụọtuu nimi ma o?

⁴ Jehovah sei bụọmọmịnị bara mọ kịmịawọụ ye mọ bẹbẹ paaemi aba, omịnị tebara kị mịẹtimi Jehovah sei bụọmọmịnị bara bọọ sụọtuu nimi mịnị a o? Jehovah tọnmọdịa-yeama ka kị baratụa wo pịrịwẹrị suotụụ nimi mị. Bei egberitibị bị, omịnị Jehovah sei buọmọmịnị yọ gbelemọ tọnmọdịa-yeama zụa ditụa mịnị. Bei tọnmọdịa-yebo baratụa wo pịrịwẹrị Jehovah sei kọnsịịnmịnị bara mọ, bá waị ụ mọ mọ́ ebi ikie-otuama a paamọ bara mọ dọụ erị mịnị. Bei tọnmọdịa-yebo wo mọ tolumọmịnị bị, Jehovah akị wo bụọmọdẹ bara mịẹdịamịnị biin ụwọụbo, wo mọ erị mịnị. Bịsẹ yọbị baratụa wo pịrịwẹrị tọrụkẹrịyọ akị wọ tarịnana agọnọ daụ bọọ nana dẹịn mịnị.

JEHOVAH SEIBO KỌNSIINMỊNỊ

5. Jehovah wo seibo kọnsiin daba teeki paamịnị a o?

⁵ Bible, wo mịẹmịnị seibo akị oku sibe yeama kị tọnmọ wẹrịemi. Wo mịẹdẹ seibo gbelemọ yobị Pẹrẹowei David gbaa mị: “Ine seibo ine tibi bọọ dụbadẹ; oku sibe yeama bara k’emi, ịmịnị nimi sibegha.” (Ps. 38:4) Anịa sei mịẹ kịmị boloudei daba, Jehovah bịsẹ ụbọ seibo kọnsiin mịnị. (Ps. 25:18; 32:5) Hebrew bẹẹlị mị akị “kọnsiin” a tuugbaa bara mị anị “serimọ agọnọ ámú” anịghakpọ “sibẹ” kị bịmọ wẹrịemi. Gbaamaba, kụrọ kimi baratụa zịnị kịmị pịrịwẹrị ụbọ apele bọọ emi oku ye sibe bara kị Jehovah kpọ wo seibo kọn wo apele duo sibemịnị.

6. Jehovah wo bụọmọdẹ seibo sibe teyo ka múmịnị a o?

⁶ Zịnị tọnmọdịaye mọkpọ emi, Jehovah wo seibo sibe múmịnị yọbị gbaa wo pịrị wẹrịemi. Psalm 103:12 gbaa wo pịrị mị: “Ụraụ duo paamịnị anga mọ, bá sụọfamịnị anga mọ alaemi bara kị, ómịnị wo seibo sibe alayọ amú wẹrịdẹ.” Ụraụ duo paamịnị anga mọ bá sụọfamịnị anga mọ alaemi, bei maa yọbo benebene gbeleigha. Gbaamịnị egberisẹ, Jehovah wo seibo sibe alaa kụromọ emi yọ kọọ wẹrịmịnị, omịnị laa Jehovah á wẹrịmịnị yọbị iroro paamọgha fa. Jehovah kọkọ beinmọ beinmọ bara ka kị wo bụọmọmịnị bara kị gbaa wo pịrịmịnị!

7. Jehovah tebara ka kị wo seibo mịẹmịnị bara kị Bible mọ gbaa ma o? (Micah 7:18, 19)

⁷ Jehovah wo seibo kọn wo bụọmọ daba, ómịnị ba benebene akị adụdụ ghọ gbaịn bara mịẹgha. Pẹrẹowei Hezekiah Jehovah gbelemọ yọmị gẹẹ mị: “Ị́mịnị ine seibosẹ kọn iné toun a wẹrịdẹ.” Anịghakpọ footnote gbaa bara mị, “ị́mịnị in seibosẹ akị iné tọrụyọ duo seridẹ.” (Isa. 38:9, 17; ftn.) Gbaamịnị barasẹ Jehovah boloudeidẹ otubo bụọmọ daba ba benebene bịsẹ seibo kẹrị ukiegha fa. Bei egberi akị zịnị bara gbaa kpọ paaemi, anị: “Iné mịẹ bara didaba, ịmịnị benebene [ine seibo] mịẹgha bara kị paamị.” Jehovah mọkpọ zịnị tọnmọdịaye akị mị egberi gbaamị, anị Micah 7:18, 19. (Goo.) Mị Bible yọ gbaa bara mị, Jehovah wo seibo akị olomu abadị kọọ tangbeimịnị bara kị tọnmọ wẹrịemi. Oruseri ifiemị, kịmị ye akị olomu abadị amú tangbei daba bịsẹ yebị faa kị fadẹ, ba laa akịgha fa.

8. Teeki wo mọ tolumọdẹ a o?

⁸ Bei tọnmọdịa-yebosẹ, Jehovah wo seibo bụọmọ daba, ómịni wo oku sibe ye kị kọnsiinmịnị, ba benebene bịsẹ seibo ukiegha fa bara kị mịẹdịamịnị. Kọkọ, David gbaa bara k’emi, “Bolouịmbẹlẹ Jehovah ánị mịẹdẹ seibo kọnsiin bá terifamọdẹ otubo laa; Bolouịmbẹle Jehovah ba wó seibo kẹrị ukiegha kịmị laa.” (Rom. 4:7, 8) Gesii bara akị sei bụọmọmịnị yọmị bịsẹ bara k’emi!

JEHOVAH SEI KỤỌSERIMỊNỊ

9. Jehovah te tọnmọdịaye ka kị baratụa wo pịrịwẹrị ómịnị beinmọ beinmọ bara ka kị sei bụọmọmịnị bara nimi ma o?

⁹ Jehovah mọkpọ zịnị tọnmọdịa-yeama akị baratụa wo pịrịwẹrị wo sei bụọmọmịnị yọ bọọ tọrụkẹrịyọ nana dẹịn mị. Jesus kụn ịkịan duonị boloudeidẹ otubo seibosẹ Jehovah mọ kụọserimịnị. Bible akị tọnmọ bara mị, Jehovah, kịmị bịdẹ poumịnị bara ka kị seibo pọụmịnị bá wanlaamịnị bara kị gbaamịnị. Bịsẹ bara mịẹ daba sei mịẹ kịmị bị waị bo yalịyalị kị paamịnị. (Ps. 51:7; Isa. 4:4; Jer. 33:8) Bei egberi gbelemọ yọbị Jehovah gbaamị: “Ánị seibo kwekwe bara k’emi kpọ, a mịẹ bo snow bara kị pịna mịnị; ánị seibo kwekwe bịdẹ bara k’emi kpọ, amịnị waịbo pịna kụrọmọ wool bara kị dei mịnị.” (Isa. 1:18) Kwekwe-emi ye, pịna bịdẹ gbele daba pọụ a seifa k’emi. Anịa, Jehovah bei tọnmọdịaye duotolu bị wo seibo akị bịdẹ pou bara pọụ pịnamọ mịnị bara gbaadẹ.

10. Jehovah tebara ka kị wó sei bụọmọ yọmị dụba mú laaemi bara tọnmọ wo dịa wẹrịemi a o?

¹⁰ Wo tolumọ bụọmọdẹ egberitịbị mị gbaa amọ, wo seibo saa bara k’emi. (Matt. 6:12; Luke 11:4) Anịduonị omịnị sei mịẹ Jehovah a bụọdẹ ifiesẹ, wo saá mị dụba kị dụba dẹịnmịnị. Omịni opu saa ka kị Jehovah bara bọọ fịdẹ! Anịa Jehovah wo bụọmọdẹ daba, ómịnị wo tịbị bọọtimi saabosẹ kọnsiindẹ bara k’emi. Jehovah waị wo bụọmọdẹ seibo ukie wẹrị akị wo bara ma biigha fa. Bei tọnmọdịaye mị kọkọ mịẹgaan wo dịadẹ bara mị, Jehovah wo bụọmọ daba wọ mịẹ bo peree kị paamịnị!

11. Wo seibo kụọseridẹ bible mọ gbaa bị, teeki bịmọ wẹrịemi a o? (Acts 3:19)

¹¹ Jehovah wo seibo kọnsiin daba, mọkpọ zịnị ye mịẹmịnị, omịnị a kụọ serimịnị. (Acts 3:19 goo.) Kịmị iné fị wẹrịemi saa akị fun a gẹẹ koromowẹrị, timi bo kẹnị ifie laabị ba gbẹẹkụmọ bara gbaa daba, ụbọmị fungẹẹ-gbịsa akị yobị pumịnị, anịa fị wẹrịemi sịlị bịrịmị mọkpọ gaan timi kịmị pịrị erị kpọ paaemi. Anịa kụọseridẹ ifiesẹ, ba bịsẹ bara timigha fa. Omịnị oruseri ifie otubo akị fungẹẹ-benị mịẹtimi bara mị a sụọtuu nimi daba, baratụa wo pịrịwẹrị bei tọnmọdịaye bọọ sụọtuu nimi mịnị, bịsẹ fungẹẹ-beni mị kọn fun gẹẹ daba, alaghatimi viin famịnị. Kịmị laa bosu bịdẹ kọn gẹẹ wẹrịemi yebo kụọserịị a paatimi mị. Anịduonị fị wẹrịemi saa “kụọserii” daba, kịmị ba benebene saa mị ẹrịgha fa. Saa kpọ benebene fatimi bara kị paadẹ. Jehovah wo seibo kọnsiin daba, ómịnị mọkpọ á kụọserimịnị. Wo bịsẹ yọ nimi yọmị wo mịẹ pọwẹịmọ ka mị!—Ps. 51:9.

12. Omịnị te ka kị obudu tọnmọdịaye duo tolumọ akị ma o?

¹² Jehovah mọkpọ zịnị ụwọụ akị wó beinmọ beinmọ bara sei bụọmịnị bara tọnmọdịa wẹrịemi. Jehovah gbaamị: “Ịmịnị obudu ye kụọserimịnị bara ka kị ánị mịẹkiri yebo kụọserịị mịnị, bá bọlọụ ẹrịgha obudu ye terifamọmịnị bara ka kị ánị seibo terifamọmịnị.” (Isa. 44:22) Jehovah sei bụọmọ daba, ómịnị akị obudu ka sọwẹị famọmịnị bara k’emi. Anịkị kịmị ba benebene ẹrịgha fa.

13. Jehovah wo seibo kọn wo bụọmọ daba, bịsẹ yọmị tebara ka kị wo mịẹmịnị a?

¹³ Bei tọnmọdịa-yebosẹ tebara ka kị wo gbele ma o? Jehovah wo mịẹ sei akị wo bụọmọ daba, omịnị ifiebosẹ Jehovah mọkpọ bịsẹ sei mị akị wo kẹrị ugula sụọmụ bara iroro kụmọ. Jesus Christ kụn ịkịan mị, wo seibosẹ kọnsiindẹ. Ịmịnị bịsẹ sei bị naa benebene mịẹgha bara kị paadẹ. Anịduonị omịnị wo mịẹmịnị seibo a barasin daba, Jehovah gesii bara ka kị wo bụọmọmịnị.

JEHOVAH WAỊ Ụ MỌ MỌ́ NANAWẸRỊ IKIE BỊ MỊẸ EBIMỌDẸ

14. Tetuu kị duonị omịnị eti akị Jehovah sei bụọmọmịnị yọmị a tụa agbẹị-emi a o? (fotobo kpọ dii.)

¹⁴ Jehovah gesii bara kọn wo bụọmọmịnị yọkị baratụa wo pịrịwẹrị bo Jehovah ikieotuama a paamịnị, bá baratụa wo pịrịwẹrị suusụọgha fa. Jehovah wo seibo akị wo bụọmọ daba mọkpọ kpọ bịsẹ ye duonị boloukọn wo pịrịmịnị ba wo ụyamọ mọ malafakụmọ. Jehovah benebene bịsẹ bara fa. Jehovah kọkọ wo bụọmọdẹ eti wo mọ nana agbẹị-emi a? Jehovah gbaa bụrụowei Jeremiah pịrịwẹrị gẹẹmị: “Ịmịnị ánị mịẹkiriyebo kọn á bụọmọ mịnị, ịmịnị ba benebene ánị seimị ukiegha fa.” (Jer. 31:34) Bei egberibo gbelemo yọbị, fịrịmọpaaowei Paul kpọ gẹẹmị: “Ịmịnị ba benebene ánị seibo kọn ịkịọụ a wẹrịgha fa.” (Heb. 8:12) Bei gbaa egberi bị teeki wo tuu a o?

15. Jehovah tebara ka kị ba wo seibo ukiegha bara mịẹmịnị a o?

¹⁵ Bible mị, ye “ukie” egberi ụngbọ mị paa kịmị ye barawẹrị waị yemị ukịe anịghakpọ kẹrị iroro bara bẹtịbị kị bịmọgha. Anịa, kịmị gbaawẹrị fịrị wẹnịmịnị bara kpọ bịmọ wẹrịemi. Jesus mọ kẹnịyọ a kaịwẹrị furuowei mị gbaa Jesus pịrị mị: “Jesus, ị́ mú iné daabụọ laadaba ine ukie.” (Luke 23:42, 43) Kịmị bị Jesus paa wó ukie bara gbaagha, anịa ye mịe ụ pịrịmụ bara kị gbaamịnị. Jesus akị ụ parụ bara didaba, ómịnị fịyọduo waị furuowei tịịnserimụ bara kị mịẹgaan mị. Anịduonị, Jehovah ba wo seibo ukiegha fa gbaamịnị egberi mị, Jehovah kọn wo bụọmọdẹ seibo akị bọlọụ laadaba waị wo ụyamọgha fa bara kị gbaamịnị.

16. Bible tebara ka kị gesii bara akị sei bụọmọmịnị yọ duo bo wo laamịnị peree mị tọnmọ wẹrịemi a o?

¹⁶ Jehovah wo seibo kọn wo bụọmọdẹ ifiesẹ wo mịẹ peree nana mịnị, Bible ba zịnị tọnmọdiaye akị bei egberi mịẹgaan wo pịrị wẹrịemi. Sei bolou kị wo zii duonị, omịnị “sei omoni-otuama” ka paaemi. Anịa Jehovah wo bụọmọdẹ duonị wo “mịẹ akị sei bara-bolou duo pereedẹ.” Anịduonị wo Jehovah kule ka mị. (Rom. 6:17, 18; Rev. 1:5) Gesii mị, Jehovah wo seibo kọn wo bụọmọmịnị yọbị wo mịẹ omoni-bolou duo pereedẹ bara kị paadẹ. Bịsẹ yọmị wo mịẹ pọweị nanamịnị.

17. Sei bụọmọ yọmị tebara ka kị dọọn zụọmịnị a o? (Isaiah 53:5)

¹⁷ Isaiah 53:5 goo. Kunumọ tọnmọdiaye bị, Bible kịmịsẹ akị kụrọ dọọn nana wẹrịemi kịmịama bara kị tọnmọ mị. Jehovah wó tọbọụ Jesus parụbụọmọ ịkịan duo wo seibo serisiin yọbị, Jehovah bịsẹ dọọn zụọdẹ. (1Pet. 2:24) Omịnị sei mịẹ daba wo mọ Jehovah mọ nana wẹrịemị ikie kị seimọmịnị, omịnị bo tẹmẹ-anga dọọn nanadẹ. Anịa parụbụọmọ ịkịan mị baratụa wo pịrịwẹrị waị Jehovah mọ naịndẹ. Kụrọ dọọn nanawẹrị kịmị, waị angọ kụrọ daba pọwẹịmịnị bara kị, Jehovah wo tẹmẹ-anga dọọn zụọwẹrị omịnị waị ụ mọ mọ́ ebi ikieotu a paa daba, wo mịẹ pọwẹị kụrọmịnị.

JEHOVAH SEI BỤỌMỌMỊNỊ YỌBỊ AKỊ WO GBELE EMI BARA BỊ

18. Jehovah akị sei bụọmọmịnị bara mịẹgaan wẹrịemi tọnmọdịayebo wo mọ ditụa siindẹ bị, teeki wo mọ tolumọ akị ma o? (“Jehovah Kọn Wo Bụọmọmịnị Bara Mị” ekpedi kpọ dii)

¹⁸ Jehovah sei bụọmọmịnị bara gbelemọ yobị, wo ditụadẹ tọnmọdịa-yebosẹ teeki wo mọ tolumọ akịdẹ a o? Jehovah wo bụọmọdẹ ifiesẹ, ómịnị beinmọ beinmọ bara ka kị wo bụọmọdẹ bá waị bịsẹ seibo kẹrị irorowẹrị akị wo ụyamọgha fa. Bei ye kị baratụa wo pịrịwẹrị wo Ọkpọnanaowei Jehovah mọ ebi ikie kẹrịmịnị. Bịsẹ kpeikẹnị bara mị, gesii bara akị sei bụọmọmịnị yọmị Jehovah ki duo bo wa laaemi dịẹpịrịye. Mị dịẹpịrịye mị, wo laamọ agbẹịgha ebi. Anịa Jehovah barafinimọ daụ, bá wo tarị wẹrịemi kị duonị wo bụọmọmịnị.—Rom. 3:24.

19. (a) teekị wo tọrụkẹrị agbẹị-emi a o? (Romans 4:8) (b) Barịị egberitịbị mị teeki wo mọ tolumọmịnị a o?

¹⁹ Romans 4:8 goo. Jehovah wo mịẹ seibo kọn wo bụọmọmịnị yọmị, kọkọ wo mịẹ pọwẹịmọmịnị! (Ps. 130:4) Anịa, Jehovah wo bụọmọ wo mọ dọụmịnịsẹ wo kpọ kẹnị yelaa fịrị nana wẹrịemi. Jesus gbaa mị: “Ámịnị ye mịẹ á dọọnmọdẹ kịmịbo bụọmọghasẹ, ánị agọnọ Daụ kpọ á bụọmọgha fa.” (Matt. 6:14, 15) Anịduonị, omịnị Jehovah dimịẹ wẹrị zịnịotu bụọmọ agbẹị-emi. Omịnị tebara ka kị Jehovah dimịẹ mịnị a o? Barịị egberitịbị mị wo mịẹmụ bara gbaa wo pịrị mịnị.