Jehovah Ị́ Bụọmọdẹ Eti Nana

1-2. Omịnị boloudei daba tebara kị paa wo pịrịmịnị a o? (bolou kpọ dii.)

IBE-DAAOWEI David wó mịẹ seibo duonị bolouịmbẹlẹgha. (Ps. 40:12; 51:​3, superscription) Bịsẹbara kị gbaa kpọ ómịnị gesii bara boloudeibị Jehovah ụ bụọmọmị. (2Sam. 12:13) Anịduonị Jehovah sei mịẹ kịmị bụọmọdaba, bịsẹ ụbọmị peree adụdụ nanamịnị bara David mọ nimimị.—Ps. 32:1.

² Jehovah dieneni mịẹ wo dịa daba, wo kpọ David bara peree nanamịnị. Omịnị sei mịẹ daba, kụrọ seiama kị mịẹ kpọ, gesii bara boloudei, wo seibo gbaa paamọ bá angọtụa bịsẹ sei mịẹgha ifiesẹ, Jehovah wo bụọmọmịnị bara wo mọ nimi yọmị wo kụrọmọmịnị. (Prov. 28:13; Acts 26:20; 1John 1:9) Bịsẹ yọ bụọmọ kpọ Jehovah wo bụọmọdaba, omịnị naa bịsẹ sei mịẹgha wẹrị bara kị paamịnị, bịsẹyo nimi yọ kpọ opu kụrọmọye ka paa wo pịrị-emi!—Ezek. 33:16.

3-4. Kẹnị bịnaraụ benibiledẹ mị te iroroye kị nana ma o, bá mị egberitịbịmị omịnị teeki kẹrị ẹrẹtei dọụmịnị a o?

³ Zụa ifieama Jehovah wo bụọmọdẹ eti nanamụ yọmị kụrọ wo pịrị kpọ paaemi. Wo wẹrị Jennifer paamọ ye ditụa, gesii ka a ziimị. Amịnị sọụ dụbamịnịbị sọwẹịtimi sei yeama mịẹmị. Zụa kụraịama bụọbị, amịnị waị Jehovah dọụ bowẹrị benibilemị. Á gbaa amọ: “Bụọdẹ ifiebị ịmịnị nanaye tarị, agbẹịgha zọzọ anga inyenrinbụọ nana, wuru bou kụrọmọ bá boloukọn kụrọmọ bara kị inyenrintimimị. Ịmịnị bụọmọye kọn Jehovah bara ma bii ifiemị, ómịnị ị bụọmọdẹ bara ị mọ nimi wẹrịemi, anịa ine adụdụmị mọkpọ Jehovah ị bụọmọdẹ eti nanamụ yọmị kụrọ ị pịrịmị.”

⁴ Ị́ kpọ zụa ifieama iné adụdụmị Jehovah ị́ bụọmọdẹ eti nanamụ yọmị, kurọ ị pịrịmịnị a? Ukie Jehovah ị́ kpọ David bara, ómịnị ị́ bụọmọdẹ eti nana kị dọụmịnị. Bei egberitịbịmị omịnị Jehovah wo bụọmọdẹ eti nanamụ yọmị yelaa-emi tuu mọ bá bịsẹ eti nanamụ bara mọ kẹrị ẹrẹteimịnị .

JEHOVAH WO BỤỌMỌDẸ ETỊ NANAMỤ YỌMỊ TETUU KỊ DUONỊ YELAA-EMI A O?

5. Satan omịnị teeki iroro kị dọụmịnị a o? Paaye gbaa.

⁵ Jehovah wo bụomọdẹ eti wo mọ nana daba, baratụa wo pịrịwẹrị Satan pịdẹyebo a korosụọgha fa. Ukie Satan wo kụrọyọsẹ mịẹwẹrị wo Jehovah karịmịnị yọ tịẹmọ dọụmịnị. Anịduonị ómịnị wo mịẹwẹrị Jehovah wo mịẹdẹ seibo kọn wo bụọmọgha fa bara iroro kị dọụmịnị. Wẹrị Corinth itumị agbẹịgha zọzọ anga inyenrinbụọ nanawẹrị kịmị kọn itu duo kọnsiin kịmị paamọ ye kẹrị iroro. (1Cor. 5:​1, 5, 13) Bei bịnaoweimị boloudeidẹ kị gbaa kpọ, ụ bụọmọ bá ụ kẹrịakịmụ yọmị Satan mọ mịẹkụrọmọ bịnaotubo pịrịmị. Bịsẹ kpekẹnị baramị bei kịmịbị Jehovah benebene wó mịẹdẹ seibo kọn ụ bụọmọgha fa bara iroro kị Satan mọ dọụmị. Satan mọkpọ bịsẹ bara ka kị kịmịotu lẹlẹmọmịnị, anịa “Omịnị wó kọn bomịnị ụwọubosẹ nimi wẹrịemi”—2Cor. 2:​5-11.

6. Jehovah naa mọkpọ wo mịẹdẹ seibo kọn wo bụọmọgha bara wo mọ iroromịnị ifiesẹ, omịnị teeki mịẹ agbẹị-emi a o?

⁶ Jehovah wo bụọmọdẹ eti nana daba, wo mịẹ peree adụdụ nanamịnị. Omịnị sei mịẹdẹ ifiesẹ, wo adụdụmị wo a bụụdọọnmịnị. (Ps. 51:17) Bịsẹ barabị ebi-emi, wo sei mọ ebi mọ ye-iroro ịkịọụmị baratụa wo pịrị sei mịẹdẹ bara nimi, bá dei a paaemi. (2Cor. 7:​10, 11) Anịa, omịnị boloudeidẹ kpọ, wo mịẹ sei duonị omịnị ba bolouịmbẹlẹgha timi alaa ifie laadaba, wo dịnẹmọ wẹrị ba Jehovah karịgha kpọ paaemi. Anịa omịnị Jehovah kọkọ wo bụọmọdẹ eti nana daba, baratụa wo pịrịwẹrị bịsẹ sei iroroyebo kọnsiin wẹrị olomu pọwẹị, peree ịkịọụ nana bá Jehovah dọụbara kọn ụ karị a paaemi. (Col. 1:​10, 11; 2Tim. 1:3) Anịa teeki baratụa wo pịrị Jehovah wo bụọmọdẹ eti nana a paaemi a o?

TEEKI BARATỤA WO PỊRỊWẸRỊ JEHOVAH WO BỤỌMỌDẸ ETI NANAMỊNỊ A O?

7-8. Jehovah, ómịnị tebara k’emi bara kị gbaa Moses pịrị ma o, bá bịsẹ yọmị te eti ka kị wo pịrị ma o? (Exodus 34:​6, 7)

⁷ Jehovah kọn wó angọ gbaa wẹrịemi bara kẹrị iroro. Jehovah Sinai ogun agọnọ mị gbaa Moses pịrị egberi kẹrị ukie.a (Exodus 34:​6, 7 goo.) Jehovah biin ebi inyenrinbụọama kị nana wẹrịemi, anịa ómịnị wó angọ kọn “dieneni nana bá sei bụọmọmịnị Ọkpọnanaowei” kị tọnmọmị. Jehovah bịsẹ bara k’emi aba, ụ kaṛịmịnị kịmị sei mịẹwẹrị boloude daba, ómịnị bịsẹ ụbọ bụọmọgha fa bara wo mo tọṇmị? Ómịnị bụọmọmịnị! Ómịnị bụọmọgha ifiesẹ, ómịnị dieneni nanagha bá adụdụ kụrọ-emi Ọkpọnanaowei ka paadẹ, anịa Jehovah benebene bịsẹ bara fa.

⁸ Jehovah ekpegha duonị, ómịnị wó nimi mịẹgha ye gbaagha fa. (Ps. 31:5) Anịduonị ómịnị ye gbaa daba, omịnị eti akị tụa agbẹị-emi. Jehovah iné mịẹdẹ seibo kọn ị́ bụọmọdẹ eti nanamụ yọmị kụrọ ị́ pịrịmịnị ifiesẹ, angọ bii: ‘Ịmịnị kpọ Jehovah kọkọ dieneni nana bá kịmị bụọmịnị duonị, boloudeidẹ kịmịsẹ bụọmọmịnị bara pei wẹrịemi.’ Ị́ pei wẹrịemi aba, Jehovah kọkọ ị́ bụọmọdẹ eti nana.

9. Wo seibo kọnsiindẹ gbaa egberimi teeki wo tuu a o? (Psalm 32:5)

⁹ Jehovah Bible gẹẹ otubo duo wó kịmị bụọmọ inyenrinbụọ gbaa wẹrịemi bara kẹrị iroro. Wo wẹrị David Jehovah kịmị bụọmọ inyenrinbụọ kọn Bible ma gbaa wẹrịemi bara ditụa. (Psalm 32:5 goo.) David gbaa amọ “Ị́mịnị ine seibosẹ kọnsiindẹ.” Hebrew bẹẹlịmị akị “kọnsiin” gẹẹ wẹrịemi egberimị, akị “serimọ agọnọ a mú,” anịghakpọ “sibe” kị bẹmọ wẹrịemi. Anịduonị Jehovah, David mịẹ seibo kọn ụ bụọmọ ifiemị gbaamịnị barasẹ, Jehovah a serii agọnọ a mú bá kọn tangbei bara kị paadẹ. (Ps. 32:​2-4) Wo kpọ wo mịẹdẹ seibo duo boloudei daba, David bara peree nanamịnị, wo sibewẹrị oku yemị Jehovah mọ serii tangbeidẹ.

10-11. Jehovah ifiebosẹ kịmị bụọmọmụ bara kọn angọ tọlọmọ wẹrịemi gbaa egberịmị te ka kị wo tolumọ ma o? (Psalm 86:5)

¹⁰ Psalm 86:5 goo. David Jehovah gbelemọ yọmị gbaa amọ Jehovah “ifiebosẹ kịmị bụọmọmụ bara kọn angọ tọlọmọ wẹrịemi.” Kẹnị Bible gbelemọ fun bịsẹ gooyọ gbelemọ yọmị gbaa amọ: “[Ómịnị] ‘kịmị bụọmọmịnị owei’ anị ‘wó emi baramị.’” Tetuu kị duonị Jehovah bịsẹ bara emi a o? Barịị gooyọmị gbaamị: “Ị́mịnị kpẹkpẹrẹẹ tarị mịẹ akị ị́ tarị wẹrịemi otubosẹ dịamịnị.” Bụọdẹ egberitịbịmị wo tolumọdẹ baramị, kpẹkpẹrẹẹ tarị kị ụ dinẹmọwẹrị ifiebosẹ ụ karịmịnị otubo mọ naịn-timimịnị. Bịsẹ kpẹkpẹrẹẹ tarị kị ụ dịnẹmọwẹrị peree bara kọn sei mịẹdẹ otu bụọmọmịnị. (Isa. 55:​7, ftn.) Jehovah ị́ bụọmọdẹ eti nanamụ yọmị kụrọ ị́ pịrịmịnịaba, angọ bii: ‘Jehovah kịmị bụọmọmịnị daụ anịduonị ómịnị ifie famọgha bara ụ tẹẹmịnị otubosẹ bụọmọmịnị eti ị́mọ nana wẹrịemi? Ị́ nana wẹrịemisẹ Jehovah ị́ kpọ bụọmọmịnị eti nana.

¹¹ Jehovah wo emibarasẹ nimi wẹrịemi yọmị kụrọmọye kọn wo pịrịmịnị. (Ps. 139:​1, 2) Psalm funmị David zịnị yọ kpọ Jehovah wo emibara bọọ sụọtuu nimi wẹrịemi bara mịẹgaan wẹrịemi, bịsẹ yọmị baratụa wo pịrịwẹrị Jehovah wo bụọmọdẹ eti nanamịnị.

JEHOVAH UKIE WẸRỊEMI YE BARAFA KỤMỌ

12-13. Psalm 103:14 mị Jehovah wo gbelemọ yọbị te kị ukie wẹrịemi a o, bịsẹ yọ ba ụ dịnẹmọ wẹrị teeki mịẹmịnị a o?

¹² Psalm 103:14 goo. David gbaa amọ Jehovah “omịnị atọụ bara ukie wẹrịemi.” David bịsẹ egberi kọn Jehovah ifiebosẹ kịmị bụọmọmụ bara kọn angọ tọlọmọ wẹrịemị tuumị gbaa wẹrịemi, omịnị sei mịẹmịnị bara Jehovah mọ nimi wẹrịemi. Wo wẹrị bei yebị a sụọtuu-nimimụ yọ duonị David gbaa egberi ditụa.

¹³ David gbaa amọ Jehovah wo “emibarasẹ nimi wẹrịemi.” Ómịnị “kiri bọọ emi atọụ” kị duo Adam tẹmẹmị. Jehovah nimi wẹrịemi, sei gbelegha kịmịawọụ kpọ fịyaị fị, koro bụnụ, ẹmbasara bá zịnị yeama mịẹdẹ kị laa inyenrintimi a paaemi. (Gen. 2:7) Anịa Adam mọ Eve mọ sei mịẹ bụọmọdẹ bị, kịmịawọụ zịnị ụwọụ akị atọụ bara paadẹ. Wosẹ Adam mọ Eve mọ awọụama duonị, sei wo angọ duo sụọdẹ, omịnị ifiebosẹ sei yeama kị wo ịkịọụ ma sụọmịnị. Jehovah bịsẹ yọ nimi wẹrịemi, bá David gbaa barabị, Jehovah “ukie wẹrịemi.” Jehovah ukie wẹrịemi bara David mọ gbaabị, ụ gbaamịnị barasẹ Jehovah omịnị sei angọ emi bara nimi wẹrịemi, anịduonị omịnị mịẹkiri wẹrị boloudei daba, Jehovah dieneni nana bara ka kị wo bụọmomịnị.—Ps. 78:​38, 39.

14. (a) Jehovah kịmị bụọmọ yọmị olomụ tebara kị laa-emi bara kị David mọ gbaa ma o? (Psalm 103:12) (b) Jehovah David seibo akị ụ bụọmọ yọmị te ka kị wo tolumọ ma o? (“Jehovah Kịmị Bụọmọ Daba Tebara Ka Kị Barafamịnị A O” ekpedi dii.)

¹⁴ Jehovah kịmị bụọmọ daba olomu tebara kị laamịnị a o? (Psalm 103:12 goo.) David Jehovah akị kịmị bụọmọmịnị bara gbaamị, ómịnị mọ kị gbaamị: “Ụraụ duo paamịnị anga mọ bá sụọfamịnị anga mọ alaa-emi bara kị ómịnị wo seibo sibe alaa yọ a múmịnị.” Gbaamịnị barasẹ, ụraụ duo paamịnị anga mọ alaadẹịn yọmị anị ụraụ duo sụọfamịnị angamị, bei maa yọbo benebene gbeleigha. Anịa Jehovah sei bụọmọmịnị yọ gbelemọ yọmị kẹnị fun gbaa amọ,“Jehovah wo seibo kọn alaayọ a wẹrịmịnị duonị, omịnị benebene ba bịsẹ seimị dọlọ kpọ erịgha fa, fụrụ kpọ naagha fa, bá ukie kpọ ukiegha fa.” Bei egberibị teekị gbaa wo pịrịmịnị a o? Jehovah bịsẹ seimị ukie wẹrị kọn wo ụyamọgha fa.—Ezek. 18:​21, 22; Acts 3:19.

15. Wo mịẹ bụọmọdẹ seibo mọkpọ timi wo adụdụ ma bụụdọọnmịnị aba, teeki wo mọ mịẹmịnị a o?

¹⁵ David psalm 103 bọọ gbaa egberimị tebara ka kị baratụa wo pịrịwẹrị Jehovah wo bụọmọdẹ eti nanamịnị a o? Omịnị Jehovah naa mokpọ wo mịẹ bụọmọdẹ seibo kọn wo bụomọdẹ eti nanaghaba, ango bii: ‘Jehovah ukie wẹrịemi yemị ịmọ barafamịnị a? Jehovah ịmịnị sei gbeledẹ bara ukie wẹrị ine seibo kọn ị bụọmọmịnị, ịmịnị bịsẹyọ barafamịnị a? Ịmịnị Jehovah barafadẹ ye ukiemịnị a? Jehovah ine mịẹ bụọmọdẹ seibo barafadẹ bá bọlọụ laa daba kọn ine ụyamọgha fa, ịmịnị mọkpọ bịsẹ seibo ukiemịnị a?’ Jehovah wo mịẹ bụọmọdẹ seibo kọn ịkịọụ a gbaịngha, anịduonị wo kpọ kọn ịkịọụ a wẹrị kụmọ. (Ps. 130:3) Jehovah wo bụọmọdẹ eti wo mọ nana daba, baratụa wo pịrịwẹrị wo mịẹkiridẹ yebo kọn angọ bụọmọ wẹrị Jehovah karị bọlọụ a múmịnị.

16. Ifiebosẹ wo mịẹ bụọmọdẹ seibo ukiemịnị yọmị te akpotu k’emi a o? Tọnmọdiaye gbaa. (Foto kpọ dii.)

¹⁶ Motor yọụmịnị kịmị tẹmẹdiye kọn toun a paamịnị ye dimụ yọmị seigha, anịa ifiebosẹ bịsẹ tẹmẹdiye bẹtịbị kị diimịnị yọmị ụ mịẹ akpotu asụọmịnị. Bịsẹ bara kị ifiebosẹ wo mịẹ bụọmọdẹ seibo kẹrị iroromịnị yọmị wo mịẹ mú akpotu a sụọ a paaemi. Anịa zụa ifieama bịsẹ yebo ukiemịnị yọmị baratụa wo pịrịwẹrị waị bịsẹ sei mịẹgha fa. Bịsẹ bara kị gbaa kpọ ifiebosẹ bịsẹ mịẹkiri yọbo kị kẹrị irorodaba, wo mịẹwẹrị Jehovah karịmụ yọ tịẹmọ kpọ paaemi. Anịduonị pebida wosẹ bọlọụ kị dii, omịnị ụndụ ụwọụ ka timi wẹnị Jehovah kikoromọ wẹrịemi ayakpọ ma múmịnị, bịsẹ yọmị omịnị ba wo paamọdẹ sei yebosẹ “ukiegha fa.”—Isa. 65:17; Prov. 4:25.

IFIEBOSẸ ETI NANA

17. Tetuu kị duonị omịnị ifiebosẹ Jehovah wo tarị bá wo bụọmọdẹ bara gbaa wo adụdụ pịrị agbẹị-emi a o?

¹⁷ Omịnị ifiebosẹ Jehovah wo tarị wẹrịemi bara gbaa wo adụdụ pịrị agbẹị-emi. (1John 3:​19, ftn.) Tetuu a o? Satan wo mịẹwẹrị Jehovah wo tarịgha bá benebene wo bụọmọgha fa bara iroro kị dọụmịnị. Satan dọụmịnị barasẹ, omịnị bá Jehovah karị kụmọ. Anịa wó ifiemị zaụ dẹịnmịnị duonị, Satan wo Jehovah karịmịnị yọ tịẹmọmụ yọmị, angọtụa bọlọụ ifie dẹịnmịnị. (Rev. 12:12) Wosẹ benebene Satan bụọmọ wo dẹịnmọ kụmọ!

18. Ị́ tebara kị mịẹwẹrị Jehovah ị́ tarị bá ị́ bụọmọdẹ eti nanamịnị a o?

¹⁸ Jehovah kọkọ ị́ tarị wẹrịemi eti mịẹ kụrọmọ dẹịn dọụmịnịsẹ, bụọdẹ egberitịbịmị wo tolumọdẹ yebo dimịẹ. Bá Jehovah iné mịẹdẹ seibo kọn ị́ bụọmọdẹ eti ị́mọ nana dọụmịnịsẹ, Jehovah kọn wó angọ gbaa wẹrịemi bara kẹrị iroro, Bible gẹẹ otubo kọn Jehovah kịmị bụọmọ inyenrinbụọ gbaa wẹrịemi bara kpọ kẹrị iroro. Ị́mịnị sei gbeledẹ kịmị bara Jehovah mọ nimi wẹrịemi duonị ómịnị dieneni akị iné a nanamụ bara kpọ ukie. Bá Jehovah kịmị bụọmọdaba, beinmọ beinmọ bara ka kị kịmị bụọmọmịnị bara kpọ kẹrị ukie. Bịsẹ bara ị́mọ mịẹdaba, ị́mịnị kpọ David bara gbaa a paaemi, “‘Ine mịẹ seibo’ ị́mọ kọn ị bụọmọ yọmị Jehovah umbana!”—Ps. 32:5.