Kịmịsẹ Boloudei Kị Jehovah Mọ Dọụmịnị

1. Teeki boloudei a o?

OMỊNỊ mịẹkiridaba, boloudeimụ yọbị yelaaemi. Omịnị Bible didaba, kịmị kịrịghaye mịẹwẹrị tuu ifie laa dẹkị bịsẹ yebị kịrịgha bara nimiwẹrị ba bịsẹ sei mịẹgha ifiesẹ, akị boloudei kị tịịnmịnị.—Glossary dii, “Repentance.”

2. Tetuu kị duonị wosẹ boloudei egberi tolumọ agbẹị-emi a o? (Nehemiah 8:​9-11)

² Wo kịmịsẹ boloudei egberi tolumọ agbẹị-emi. Tetuu a o? Omịnị ifiebosẹ sei mịẹmịnị. Omịnị Adam mọ Eve mọ awọụama duonị, sei mọ fịị mọ wosẹ kị gbeledẹ. (Rom. 3:23; 5:12) Sei gbelegha kịmị fa. Peibolou nana kịmịama kpọ sụọemi, gbaamaba fịrịmọpaaowei Paul, kịrịye mịẹmụ yọbị kụrọ ụ pịrịmị. (Rom. 7:​21-24) Omịnị sei bolou k’emi duonị ifiebosẹ pọwẹịgha bara timi kị gbaamịnị a? Bịsẹ baragha, Jehovah omịnị bolouịmbẹlẹ kị dọụ wẹrịemi, tuubị ómịnị dieneni nana Daụ. Wẹrị Nehemiah ifiebị Jew-otubo paamọye dii. (Nehemiah 8:​9-11 goo.) Ánị mịẹbụọmọdẹ seibo duonị ámịnị bolouịmbẹlẹgha baratimimụ yọ Jehovah mọ dọụgha, anịa ámịnị bolouịmbẹlẹ timi ụ karị kị Jehovah mọ dọụmị. Kịmị sei a barasinwẹrị boloudeidaba pọwẹị nanamịnị bara Jehovah mọ nimi wẹrịemi. Jehovah bịsẹ bara ka kị wo tolumọmịnị. Omịnị sei a barasinwẹrị boloudeidaba, Wo dieneni nana Daụbị wo seibo kọn wo bụọmọmịnị.

3. Mị egberitịbịmị omịnị teeki tolumọ akịmịnị a?

³ Wo wẹrị boloudei egberi tolumọ bọlọụ amú. Bei egberitịbịmị, Omịnị tara yeama kẹrị ẹrẹteimịnị. Omịnị boloudei gbelemọ yọbị Jehovah akị Israel-otu tolumọ yebo mọ, Jehovah baratụa sei mịẹmịnị otu pịrịwẹrị boloudeimịnị bara mọ bá Jesus tuuduo-otubo boloudei yọ duo tolumọ akị yeama kpọ wo mọ tolumọmịnị.

BOLOUDEI GBELEMỌ YỌBỊ JEHOVAH AKỊ ISRAEL-OTU TOLUMỌ YEBO

4. Boloudei gbelemọ yọmị Jehovah te ka kị Israel-otubo tolumọ ma o?

⁴ Jehovah Israel-otu akị ibe mịẹ ifiebị, ómịnị ámọ mọ́ avụọ fịmị. Ámịnị Jehovah olokobo kekeredaba, ómịnị tarịama kọn á pịrị, bá á kekeremịnị. Bịsẹ olokobo gbelemọ yọbị, Jehovah gbaa á pịrịmị: “Bei ereinbị ị tụa á pịrịmịnị olokobo kụrọ bụọgha, ámịnị laa mịẹghamụ bara kpọ fa.” (Deut. 30:​11, 16) Anịa Israel-otubo gbaayọ naaghatimi Jehovah olokobo a barasin anịghakpo mú zịnị oruama karịdaba, ómịnị bá á kekeregha fa. Anịduonị ámịnị ụyafịmịnị. Anịa bịsẹ bara kị paa kpọ Jehovah á gbein-koromọgha fa. Ámịnị mọkpọ “waị Jehovah [ánị] Ọkpọnanaowei dọụ bọ bá wó okolobo pei” a paaemi. (Deut. 30:​1-3, 17-20) Gbaamịnị barasẹ, ámịnị laa bọlọụdei a paaemi. Ámịnị bịsẹ bara mịẹdaba, Jehovah wai ámọ mọ́ naịnmịnị, bá tarịama akị á pịrịmịnị.

5. Jehovah tebara ka kị Israel-otubo gbein-koromọgha bara mịẹdịa ma o? (2 Kings 17:​13, 14)

⁵ Israel-otubo barịị barịị Jehovah olokobo kekeregha bara mịẹmị. Ámịnị oruama karị bá zịnị sei kụrọmọ yeama kpọ mịẹmị. Bịsẹ ye duonị ámịnị ụyafịmị. Bịsẹ bara kị gbaa kpọ Jehovah á gbein-kọrọmọgha. Ámịnị boloudeiwẹrị waị bọ ụ karịmụ yọ duonị, Jehovah barịị barịị bụrụotuma fịrịmọ baratụa á pịrịmị—2 Kings 17:​13, 14 goo.

6. Boloudei gbelemọ yọmị Jehovah wó bụrụotubo duo te tolumọye ka kị Israel-otubo pịrị ma o? (Foto kpọ dii.)

⁶ Jehovah ifiebosẹ bụrụotu kị fịrịmọ Israel otubo kẹrịmọ-tịẹmọ bá berifaan yeama gbaa á pịrị timimị. Gbaamaba, ómịnị bụrụowei Jeremiah fịrịmọ gbaa á pịrịmị: “Ị gbein-koromọdẹ Israel-otu waị Ị dọụbo . . . Ịmịnị ba boloukọn á pịrịgha fa, . . . Ịmịnị ánị mịẹ seibo akị adụdụ awẹrịtimi bẹseri bẹseri lagha fa, tuubị ịmịnị ine kịmịbo a barasingha Daụ. Ánị mịẹkiri yebo akị angọnimi, ámịnị tịbịkụrọ Jehovah pịrịdẹ.” (Jer. 3:​12, 13) Jehovah Joel fịrịmọ gbaamị: “Ánị adụdụbosẹ akị waị ị dọụbo.” (Joel 2:​12, 13) Isaiah kpọ fịrịmọ gbaamị: “Ánị angọbo mịẹ yalịyalịdá; sei yebosẹ akị ine tọrụyọ duo serii; bá sei mịẹkụmọ.” (Isa. 1:​16-19) Bá Ezekiel fịrịmọ á biimị: “Seiyaị mịẹ kịmị fịị ị mịẹ pọwẹịmịnị a? . . . Seiyaị mịẹ kịmị wọ mịẹmịnị seibo a barasindá ụndụ nanamụ yọ kị ị mọ dọụmịnị bara á mọ nimigha o? Kẹnị ụbọ kpọ fịịmụ yọmị ị dịsẹgha, . . . anịduonị boloudeidá ụndụ nana.” (Ezek. 18:​23, 32) Kịmịotu inyenrintimi bẹseri bẹseri laa kị Jehovah mọ dọụ wẹrịemi duonị ámịnị boloudeidaba ụ mịẹ pọwẹị nanamịnị! Anịduonị Jehovah korutimi kịmị boloudeidẹ kị baratụa bịsẹ ụbọ pịrịmịnị bara mịegha. Wo wẹrị zụa mịẹdịayeama ditụa

7. Hosea akị ụ taa mọ inyenrin baramị, Jehovah bịsẹ yọ duo te ka kị Israel-otubo tolumọ ma o?

⁷ Jehovah bụrụowei Hosea taa mịẹ ye ka kị Israel-otubo tolumọmị. Hosea taa Gomer, wó a barasinwẹrị mú zịnị oweiama mọ angamị. Anịa Gomer mọkpọ boloudei a paaemi a? Jehovah, kịmịawọụ adụdụbosẹ nimi wẹrịemi oweibị gbaa Hosea pịrịmị: “Waị múdá zịnị owei pịrị tarị bá yei a barasinwẹrị mú zịnị owei mọ angamịnị erema nana, Israel otubo zịnị oruama karị ifiebị Jehovah bịsẹ bara ka kị á tarịmị.” (Hos. 3:1; Prov. 16:2) Ukie Hosea taa Gomer mọkpọ kụrọ sei kị mịẹmịnị. Bisẹ bara kị gbaa kpọ Hosea mụ á laa, ámọ mọ́ zọzọnaa bá á bụọmọ bara Jehovah mọ gbaamị.a Bei paa yebị, Jehovah akị Israel-otubo dịmọ wẹrịemi bara kị mịẹ á dịamị. Israel-otubo kụrọ seiama kị mịẹmịnị kị gbaa kpọ Jehovah mọkpọ á tarị wẹrịemi duonị baratụa á pịrịwẹrị boloudeimụ bara mịẹmị. Bei paa yebị, Jehovah kịmịawọụ adụdụbosẹ ẹrịmịnị bara kị mịẹdịa wẹrịemi, bá Jehovah baratụa kụrọ sei mịẹmịnị kịmị pịrịwẹrị boloudei kị dọụmịnị bara akị wo tolumọ wẹrịemi. (Prov. 17:3) Wo wẹrị mọkpọ ebibara bei egberibị ditụa.

JEHOVAH BARATỤA SEI MỊẸMỊNỊ OTU PỊRỊWẸRỊ BOLOUDEIMỊNỊ BARAMỊ

8. Jehovah tebara ka kị baratụa Cain pịrịwẹrị boloudeimụ bara mịẹ ma o? (Genesis 4:​3-7) (Foto kpọ dii.)

⁸ Cain kị Adam mọ Eve mọ bọlọụ tọbọụ. Adam mọ Eve mọ mịẹ seibị Caịn kpọ gbelemị, anịduonị ómịnị sei mịẹmụ dịsẹ nanamị. Cain bịsẹ sei mịẹmụ dịsẹ nanayọ datịẹmọgha, Cain gbelemọ yọmị Bible gbaamị: “Ómịnị bolousei fịrịama kị wẹnịmị.” (1John 3:12) Kaanghaba, anịkị duonị Jehovah “ebi tọrụ akị Cain mọ bá wó kụn ịkịan mọ digha.” Wó inyenrinbụọ deimụ yọ dii a, “Cain boloukon bá pọwẹị kpọ nanagha” bara kị paamị. Anịa Jehovah teeki mịẹ ma o? Jehovah Cain mọ ẹrẹteimị. (Genesis 4:​3-7 goo.) Jehovah gbaa Cain pịrịmị, ómịnị ebi yeama mịẹdaba, tarịama ụ laamịnị, anịa Jehovah mọkpọ berifaanye kọn Cain pịrịmị, ómịnị wo boloukọnmịnị yọ kẹrị-tịẹmọgha ifiesẹ, ụ mịẹ mú seị bolou a koro sụọmịnị. Anịa Cain Jehovah gbaa egberi peigha, ómịnị Jehovah bụọmọ baratụa ụ pịrịwẹrị boloudeigha. Anịa Cain Jehovah gbaaye peigha kị gbaa kpọ Jehovah ba baratụa seiyaị mịẹ otu pịrịwẹrị boloudeigha fa bara mịẹgha!

9. Jehovah tebara ka kị baratụa David pịrịwẹrị boloudei ma o?

⁹ Jehovah Pẹrẹowei David tarị kụrọmọmị. David gbelemọ yọmị Jehovah gbaamị “ine adụdụ mịẹ pọwẹịmịnị kịmị.” (Acts 13:22) Anịa David kụrọ seiama mịẹmị, ómịnị zịnị kịmị ere mọ angamị bá kịmị kpọ gbaamị. Moses oloko didaba, David fịị agbẹị-emi. (Lev. 20:10; Num. 35:31) Bịsẹ bara kị gbaa kpọ Jehovah baratụa David pịrịwẹrị boloudei kị dọụmị.b David naa boloudei inyenrinbụọ kị mịẹdịagha kị gbaa kpọ, Jehovah bụrụowei Nathan fịrịmọ mú ụ laamị. Nathan tọnmọdiaye kọn baratụa David pịrịwẹrị wó mịẹ seibo kụrọemi bara nimi angọ pịrịmị. Bịsẹ yọbị baratụa David pịrịwẹrị wó mịẹ seimị Jehovah gbele kụrọmọemi bara nimi angọ pịrịmị. (2Sam. 12:​1-14) Omịnị boloudeidẹ bara akị Psalm fun bọọ gẹẹtụa wẹrịemi. (Ps. 51, superscription) Bịsẹ yebo baratụa biin sei mịẹmịnị kịmịama pịrịwẹrị boloudeidẹ. Jehovah tarị nana bara akị baratụa David pịrịwẹrị boloudei yọbị wo mịẹ pọwẹịmọmị.

10. Jehovah etipou bá kịmị bụọmọmịnị bara ka kị kịmiawọụ mọ inyenrinmịnị yọmị tebara ka kị ị́ gbele ma o?

¹⁰ Jehovah sei apaabosẹ kị golu wẹrịemi. (Ps. 5:​4, 5) Anịa wosẹ seiyaị mịẹ otu bara Jehovah mọ nimi wẹrịemi. Jehovah wo tarị wẹrịemi duonị baratụa wo pịrịwẹrị sei dẹịnmọ kị dọụmịnị. Jehovah ifiebosẹ baratụa kụrọ seiama mịẹmịnị otuama kpọ pirịwẹrị boloudei bá bo ụ mọ mọ́ naịn kị dọụmịnị. Jehovah kọkọ wo bụọmọ dọụmịnị bara wo mọ nimi yọmị kụrọmọye kọn wo pịrịmịnị! Omịnị Jehovah etipou inyenrinbụọ mọ bá wó tarị mọ kẹrị iroro daba, baratụa wosẹ pịrịwẹrị wo peiboloubọ kẹrị kụrọmọ bá sei mịẹdaba saramọ boloudeimịnị. Boloudei gbelemọ yọbị wo wẹrị Jesus akị wo tuuduo-otubo tolumọ yebo ditụa.

JESUS TUUDUO-OTUBO BOLOUDEI GBELEMỌ YỌ BỌỌ TOLUMỌ AKỊ YEBO

11-12. Jesus ụ Daụ kịmị bụọmọ inyenrinbụọ gbelemọ yọmị te ka kị ụ peimịnị otubo tolumọ ma o? (Bọlọụ akpakpa dii.)

¹¹ Bọlọụ kụraị sọnransibị Messiah bomụ ifie laamị. Anịa bụọdẹ egberitịbịmị Jehovah kịmị akị benibilemụ owei John mọ bá Jesus Christ mọ ka kị boloudeimụ yọbị yelaaemi bara kọn kịmịama tolumọmị.—Matt. 3:​1, 2; 4:17.

¹² Jesus bei kịrịogbo bọọtimi egberigbaatimi ifiesẹ, ómịnị Jehovah kịmị bụọmọmịnị barabị mịẹ kịmịotu dịamị. Jesus kẹnị tọbọụ mọ daụ mọ kabụ kpọ kọn bịsẹ yọ mịẹ gaan paamọmị. Tọbọụmị sei mịẹmụ ụndụ kị sẹlẹ angọ pịrịmị, anịa bo kẹnị ifie laabị, “ómịnị angọ nimiwẹrị” waị warị amúmị. Daụbị tebara kị mịẹ ma o? Jesus gbaa amọ tọbọụbị “mọkpọ alayọ emi ifiebị, daụbị wó ẹrịmị, bá dieneni nana yọ duonị baịn mụ́ ụ gbeinmọ bá tarị nana bara kọn wo ọtụtụmị.” Tọbọụmị irorotimi barasẹ ómịnị waị bodaba, daụ odubo-owei ka paamụ bara kị tọnwẹrịmị, anịa daụbị “ine tọbọụ” ka kị ụ tịịnmị, bá ụ kẹrịakịmị. Daụbị gbaa amọ: “Ómịnị faa kị fatimimị, anịa waị wó dọụ ẹrịdẹ.” (Luke 15:​11-32) Jesus naa kịrịogbo bọọ bogha timi ifiebị, ómịnị biin ifieama wo Daụ dienenị kọn seiyaị mịẹ otu a nanatimi baramị ẹrị timimị. Jesus, Jehovah kọkọ dieneni nana Daụ barabị mịẹ gaan wo pịrị yọmị, wo angọ duosụọ kụrọmọmị!

13-14. Fịrịmọpaaowei Peter boloudei gbelemọ yọmị teeki tolumọ angọ pịrị ma, bá te ka kị zịnịotu tolumọ ma o? (Foto kpọ dii.)

¹³ Fịrịmọpaaowei Peter opubara ka kị Jesus duo boloudei bá kịmị bụọmọ bara tolumọ akịmị. Peter biin ifieama kị bụọmọye dọụmị, Jesus kpọ barafinimowẹrị ụ bụọmọmị. Gbaamaba, Peter tara ifie kọn Jesus pii bụọmọdẹbị, yebị ụ gbele yọ duonị, ómịnị youmị. (Matt. 26:​34, 35, 69-75) Anịa Jesus fịyọduo-waiseridẹ ifiebị, Peter bẹtịbị emi ifie ómịnị angọ paamọ Peter pịrị ẹrịmị. (Luke 24:​33, 34; 1Cor. 15:​3-5) Gbesịbị Jesus, Peter boloudeidẹ bara ẹrị yọ duonị, ómịnị ụ bụọmọmị bá ụ kụrọmọmị.—Mark 16:7 bá “and Peter” study note kpọ dii

¹⁴ Peter boloudei bá kịmị bụọmọ bara tolumọdẹ duonị, omịnị akị baratụa zịnịotu kpọ pirịmị. Pentecost oge bụọdẹmị, Peter egberigbaa akị naa boloudeigha Jew-otu pịrịmị, ámịnị Messiah badẹ bara kpọ gbaa á pịrịmị. Anịá Peter tarị nana bara akị gbaa á pịrị amọ: “Boloudei má angọ waị, anịkị ánị seibosẹ kụọseridẹ bá kụrọmọye ifiebosẹ Jehovah duobo á lamịnị.” (Acts 3:​14, 15, 17, 19) Peter mịẹdịa amọ boloudeịdẹ yọ kị seiyaị mịẹdẹ kịmị dịnẹmọwẹrị wó iroromịnị yebo mọ, bá wó ye mịẹmịnị bara mọ deiwẹrị, Jehovah dọụbara mịẹ a paaemi. Jehovah Jew-otubo seibo kụọsẹrịmụ bara Peter mọ gbaa á pịrịmị. Biin kụraịama bụọdẹbị Peter mọkpọ gbaa Christtuuduo-otu pịrịmị: “Jehovah . . . kẹnị ụbọ kpọ fịịmụ yọ dọụgha, anịa kịmịsẹ boloudeidá ụndụ nanamụ yọ kị duonị etipoumịnị.” (2Pet. 3:9) Bei kọkọ ebi ukiemọye ka paa sei mịẹdẹ Christtuuduo-otubo pịrịemi—ụbọbị kụrọsei kị mịẹdẹ kpọ!

15-16. (a) Fịrịmọpaaowei Paul tebara ka kị kịmị bụọmọ inyenrinbụọ tolumọ ma o? (1Timothy 1:​12-15) (b) Barịị egberitibịmị, omịnị teeki tolumọmịnị a o?

¹⁵ Boloudeị bá bụọmọye dọụ kụrọmọ Paul dẹịn kịmịama biingha. Omịnị Christtuuduo-otubo baa kụrọmọmị. Biin Christtuuduo-otuama Paul benebene deigha fa bara kị iroro kpọ paaemi. Anịa Paul laa dei a paaemi bara Jesus mọ nimi wẹrịemi. Ụ mọ ụ Daụ mọ Paul ebi inyenrinbụọbo ẹrịmị. Jesus gbaamị: “Bei kịmịbị yelaaemi ye ka paa ị pịrịemi.” (Acts 9:15) Jesus tamamaa bara ka kị baratụa Paul pịrịwẹrị boloudeimị. (Acts 7:58–8:3; 9:​1-9, 17-20) Paul boloudeiwẹrị bo Christtuuduo kịmị a paamị, Jesus wẹnịfịrị kpọ akị ụ pịrịmị—ómịnị bo fịrịmọpaaowei ka paamị. Paul biin ifieama, Jehovah mọ Jesus mọ dieneni kọn wó a nana yọmị gbaa paamọmị. (1Timothy 1:​12-15 goo.) Ómịnị gbaa bịnaotubo pịrịmị: “Ọkpọnanaowei tarị nanaemi kị duonị baratụa á pịrịwẹrị boloudeimịnị.”—Rom. 2:4.

¹⁶ Corinth itubị kẹnị lịkaịlịkaị kụrọ egberi paamị, Paul egberi naa ifiebị tebara kị mịẹ ma o? Paul gbaa egberi didaba, Jehovah tarị nana bara ka kị wo odubo-otubo zezemọmịnị bara mịẹdịamị bá ámịnị boloudeidaba, ómịnị dieneni mịẹ á dịamụ bara kpọ kọn wo tolumọ wẹrịemi. Barịị egberitịbịmị, omịnị ebibara mị egberi kẹrị ẹrẹmịnị.