EGBERITỊBỊ 10
DUMA 31 Oh, Walk With God!
Jehovah Mọ Jesus Mọ Ye-iroromịnị Bara Dimịẹ
“Christ mẹnị bọọ ụyafị bara kị, ámịnị kpọ angọtọlọmọ wẹrịụyafịmịnị bara akị ịkịọụ a gbinipẹlẹ.”—1 PET. 4:1.
TOLUMỌ DỌỤMỊNỊ YEBO
Bei egberitịbịmị fịrịmọpaaowei Peter Jesus ye-iroro bara duo yetolumọ akị bara mọ bá omịnị kpọ tolumọ akị a paaemi yebo kị wo mọ kẹrị ẹrẹteimịnị.
1-2. Teeki Jehovah tarịmụ yọ bọọ sụọ-emi a, Jesus tebara ka kị bịsẹyọ mịẹgaan ma o?
“Ị́MỊNỊ iné adụdụsẹ, iné angọsẹ iné kụrọsẹ bá iné ịkịọụsẹ akị iné Ọkpọnanaowei Jehovah tarị.” (Luke 10:27) Jesus Moses Oloko bị yelaa-dẹịn yebị mịẹgaan paamọmị. Omịnị wo adụdụsẹ ka kị Jehovah tarịmịnị, bịsẹ yọbị wo dịsẹ-emi yebosẹ bolou bọọ sụọemi. Bá beinmọ beinmọ bara wo kụrọsẹ akị Jehovah karịmụ yọ kpọ sụọemi. Omịnị wo ịkịọụ kpọ akị Jehovah tarịmịnị, anị wo ye-iroromịnị bara kị gbaamịnị. Kọkọ, omịnị laa Jehovah ye-iroromịnị bara bọọ asuotuu nimisingha fa. Anịa omịnị “Christ ịkịọụ” tolumọ nimidaba baratụa wo pịrịwẹrị Jehovah ye-iroromịnị bara ma suotuu nimi dẹịnmịnị, tuubị Jesus wó daụ ye-iroromịnị bara ka kị ye-iroromịnị.—1Cor. 2:16.
2 Jesus wó ịkịọụsẹ akị Jehovah tarịmị. Ómịnị kịrịịye mịẹmịnị yọbị ụyafịmịnị bara kị nimi wẹrịemi kpọ, ómịnị wó daụ dọụyọ nimi bá bịsẹ bara kị mịẹmụ bara gbinipẹlẹmị. Ómịnị kẹnị ye kpọ bụọmọ wẹrị wó Daụ dọuyọ mịẹmụ yọ tịẹmọgha.
3. Fịrịmọpaaowei Peter teeki kọn Jesus duo tolumọ akị ma, bá Christtuuduo-otu teeki mịẹ kị Peter mọ gbaa ma o? (1Peter 4:1)
3 Peter mọ zịnị fịrịmọpaa-otubo mọ fomuun nanawẹrị Jesus mọ wẹnị gbelei wẹrị yeama tolumọ akị mị. Peter bọlọụ wó Bible fun gẹẹ ifiemị, ómịnị Christtuduo-otubo Christ ye-iroromịnị bara ka kị ye-iroro bara kọn á kụrọmọmị.a (1Peter 4:1 goo.) Peter “Angọtọlọmọ” gbaa egberi ingbọmị akị sụụotu sụụyọ amụ́ dọụmịnị ifiesẹ akị angọtọlọmọ mịnị bara kị gbaamọ wẹrịemi. Anịduonị Christtuuduo-otu Jesus ye-iroromịnị bara dii ye-irorodaba, ámịnị seimịẹ dịsẹyọ mọ bá Satan akpọ dẹịnmọmụ sụụ yeama nanadẹ.—2Cor. 10:3-5; Eph. 6:12.
4. Bei egberitịbịbị tebara ka kị baratụa wo pịrịwẹrị Peter gbaa egberi dii wẹnịmịnị a o?
4 Omịnị Jesus ye-iroromịnị bara mọ bá ụ dimịẹ a paaemi bara mọ ditụamịnị. Omịnị (1) Jehovah ye-iroromịnị bara dimịẹ wẹrị, kẹnị bara akị ye-iroromịnị, (2) angọ iyerimọ, bá (3) ịkịọụ sain-saintịmị tẹẹbịbị duo Jehovah a sẹsẹrẹmụ bara kpọ tolumọmịnị.
JEHOVAH YE-IROROMỊNỊ BARA DIMỊẸ
5. Peter kẹnị ifie tebara ka Jehovah ye-iroromịnị bara irorogha bara mịẹdịa ma o?
5 Wo wẹrị kẹnị ifie Peter Jehovah ye-iroromịnị bara dii irorogha bara ditụa. Jesus gbaa wó tuuduo-otubo pịrị amọ, ómịnị Jerusalem a mụ́wẹrị karịbụọ-tịbịotubo ụ kẹrịakị wẹrị wó ụyamọ bá ụ baámụ bara gbaa a pịrịmị. (Matt. 16:21) Jehovah Jesus bụọmọ wẹrị fịịmịnị gbaa egberibị Peter ghọ pei a seimị, tuubị—Jesus kị Israel-otubo ukiemọye bá Messiah bị. (Matt. 16:16) Anịduonị Peter Jesus tịịn akabara múwẹrị gbaa ụ pịrịmị: “Nanaowei, bịsẹ egberi gbaa kụmọ; bịsẹ ye bụọmọ wẹrị benebene ị́ paamọ kụmọ.” (Matt. 16:22) Peter Jehovah ye-iroromịnị bara kọn ye-irorogha duonị, wó iroroye mọ Jesus iroroye mọ kẹnị sụọmọgha.
6. Jesus tebara ka kị Jehovah ye-iroromịnị bara kọn ye-iroromịnị bara mịẹdịa ma o?
6 Jesus wó agọnọ Daụ ye-iroromịnị bara ka kị ye-iroromịnị. Anịduonị Jesus gbaa akị Peter pịrịmị: “Satan, ine tọrụyọ duoserii! Ị́mịnị kịmị mịẹ adalaịmọ owei ka paa ị pịrịemi, tuubị ị́mịnị Ọkpọnanaowei ye-iroromịnị bara kọn ye-irorogha, anịa kịmịawọụ ye-iroromịnị bara ka kị ye-iroromịnị.” (Matt. 16:23) Peter Jesus ebi kị dọụtimi kpọ paaemi, anịa Jesus Peter tolumọbịbị kẹrịakịgha. Jesus bei kiriogbo ma bodaba ụyafịmụ bara kị Jehovah mọ dọụ wẹrịemi. Bịsẹ ifiebị Peter Ọkpọnanaowei ye-iroromịnị bara ka kị ye-iroromụ tolumọye nanamị. wo kpọ bịsẹyọ duo ebi tolumọye nana.
7. Tuu ifie laamị Peter tebara ka kị Jehovah ye-iroromịnị bara dimịẹ ma o? (Bọlọụ foto dii.)
7 Gaan baramị, Peter Jehovah ye-iroromịnị bara mọ wó ye-iroromịnị bara mọ kẹnịsụọmọ dọụemi bara mịẹdịamị. Jew duo paagha-otubo bo Christtuuduo-otu a paamọ ifie laabị. Peter ámọ fịrịmọ egberigbaa Cornelius pịrịyọ a múmị, bọlọụ zịnị ibe duobo Christtuuduo-otu a paa otubo Cornelius kpọ kẹnị ụbọ. Zịnị ibe-otubo mọ Jew-otubo mọ yemịẹ gbelei kaagha, anịduonị Peter egberi gbaa á pịrịmụ yọbị angọtọlọmọ agbẹị-emi. Jehovah zịnị ibe-otubo kpọ bụọmọ wẹrị ụ karịmụyọ Peter mọ nimibị, omịnị wó ye-iroromịnị bara deimị. Anịduonị, ụ fịrịmọ akị egberịgbaa Cornelius pịrịyọ amú ifiebị ómịnị “bẹbẹ-kpụụngha.” (Acts 10:28, 29) Ómịnị egberigbaa Cornelius mọ wó warịbolou-otubo mọ pịrịwẹrị ámịnị benibilemị.—Acts 10:21-23, 34, 35, 44-48.
Peter Cornelius warị duosụọmịnị (Gooyọ 7 dii)
8. Ị́mịnị tebara ka kị iné iroromịnị yebo mọ Jehovah iroromịnị yebo mọ kẹnịsụọmọemi bara mịẹdịa a paaemi a o? (1Peter 3:8 bá footnote)
8 Kụraịama bụọbị, Peter Christtuuduo-otubo “kẹnị bara ka kị ye-iroro” bara kọn á kụrọmọmị (1Peter 3:8 goo.) Omịnị Jehovah kịmịama duonị, Bible gbaa bara dii wẹnịdaba wo ye-iroromịnị bara mọ Jehovah ye-iroromịnị bara mọ kẹnịsụọmọmịnị. Gbaamaba, Jesus wó tuuduo-otubo Daabụọ ka kị ánị ụndụbo bọlọụ kẹrị bara gbaa á pịrịmị. (Matt. 6:33) Anịduonị itu bị bịna-ụbọ beinmọ beinmọ egberigbaa fịrịwẹnị dọụmịnịaba, omịnị ụbọ suumọmụ egberiama gbaa kụmọ, ụbọ kụrọmọ wẹrị laa bịsẹ fịrịwẹnị beinmọmụ yeama kị gbaa.
ANGỌ-IYERIMỌ
9-10. Jesus tebara ka kị angọ-iyerimọ kụrọmọemi bara mịẹdịa ma o?
9 Jesus ámọ kẹrị deinmị, Jesus angọ-iyerimọ gbelemọ yọmị yelaa tolumọye akị Peter mọ bá wó zịnị fịrịmọpaa otubo mọ tolumọmị. Jesus, bọlọụ Peter mọ John mọ fịrịmọ mú ánị fịyaị fịmụ yọmị tọlọmọmị, anị ómịnị á mọ mó fị kunumọ fịyaị bị. Ámịnị yọbị tọlọmọ timi ifiemị, beni mọ angọ kụọ-bịdẹ mọ kpọ tịẹmọmị anịkị egeni otubo bodaba ánị buobo sụrụ dẹkị fịyaị fịmịnị. Anịa ifie laadaba te ụbọ kị angọ-iyerimọ wẹrị bei fịrị wẹnịmịnị a o?
10 Ifie famọgha bara, Jesus angọ-iyerimọ kụrọmọemi bara mịẹdịamị. Ómịnị wó aru siin bá angọ kụọ-bịdẹ kọn wó konu kpa siinbị, ómịnị beni akị tịẹmọwẹrị ánị bụọbo sụrụ bá kụọ ikparịmọmị. Jesus mịẹ yebị fịrịmọpaa-otubo mịẹ tamamamị, tuubị odubo-otu kị bịsẹ paa fịrịbo wẹnịmịnị. (John 13:4, 5) Ómịnị wó fịrịmọpaa-otubo bụọbosẹ kị sụrụmị, ụ yẹrị dọụmịnị owei, Judas bụọbo kpọ sụrụmị. Anịa bịsẹ fịrịbị ifie akịmị, mọabịkpọ Jesus angọ-iyerimọ bara fịrịwẹnị siinmị. Bịsẹyọ bụọmị Jesus etipou bara gbaa á pịrịmị: “Ámịnị ine wẹnị fịrị ma suotuu nimi wẹrịemi? Ámịnị ‘Tolumọ-owei’ bá ‘Nanaowei’ ka kị ị tịịnmịnị, ámịnị kọkọ kiriiemi. Anịa, Ịmịnị, ánị Nanaowei bá Tolumọ-oweibị, ánị bụọbo sụrụ wẹrịemiaba, ámịnị kpọ zọzọ bụọbo sụrụ.”—John 13:12-14.
Gesii bara akị angọ iyerimọmịnị yọbị. . . wo ịkịọụ bolou bọọ iroromịnị yebo kpọ sụọemi
11. Peter tebara ka kị angọ-iyerimọ inyenrinbụọ tolumọdẹ bara mịẹdịa ma o? (1 Peter 5:5) (Foto kpọ dii.)
11 Peter Jesus angọ-iyerimọ inyenrinbụọ duo tolumọye nanamị. Jesus waị agọnọ amúdẹ ifiebị, Peter ziisẹ naa wẹnịgha kịmị mịẹ wẹnịmọmị. (Acts 1:8, 9; 3:2, 6-8) Biin kịmịama paaye naawẹrị bo yọ ma bẹnịmị. (Acts 3:11) Peter duo paa yọbị kịmịotu oroupaa kị dọụmịnị, anịduonị bei paa yebị Peter mịẹ tokoni akị angọ pịrị dọụ ma? Peter bịsẹ bara mịẹgha, ómịnị tokoni bị akị Jehovah mọ Jesus mọ kị pịrịmị, ómịnị gbaamị: “[Jesus’] ẹrẹ mọ, bá omịnị peibolou akị wó ẹrẹ ma tụayọ kị duonị, bei kịmị angọ kụrọmị.” (Acts 3:12-16) Jesus angọ-iyerimọ inyenrinbụọ nanamụ yọ gbelemọ tolumọbịbị akị Christtuuduo-otubo pịrịtimi ifiebị, Peter akị letter ma tụa egberi ingbọbo Jesus angọ kụọ-bịdẹ kọn wó konu kpawẹrị fịrịmọpaa-otubo bụọbo sụrụ egberibị ka kị wo ukiemọ wẹrịemi.—1Peter 5:5 goo.
Peter tamamaa ye mịẹsindẹbị, ómịnị angọ-iyerimọ wẹrị tokoni akị Jehovah mọ Jesus mọ kị pịrịmị. Omịnị kpọ angọ-iyerimọ inyenrinbụọ mịẹdịadá kịmịotu tokoni akị wo pịrị anịghakpọ wo gbẹẹmụ bara akị ịkịọụ a tụawẹrị fịrị wẹnị kụmọ (Gooyọ 11-12 dii)
12. Peter mịẹ barabị, omịnị kpọ tebara ka kị ifiebosẹ angọ-iyerimọ inyenrinbụọ nana wẹrịemi bara mịẹdịamịnị a o?
12 Omịnị Peter angọ-iyerimọ inyenrinbụọ dimịẹ a paaemi. Ukie, gesii bara akị angọ iyerimọmịnị yọbị paa omịnị bẹbẹ akị kịrịịye gbaayọ dẹịn-emi. Peter akị angọ-iyerimọ gbaa wẹrịemi egberi ingbọbị didaba wo ịkịọụ bolou bọọ iroromịnị yebo kpọ sụọemi bara kị gbaamị. Omịnị Jehovah mọ kịmịotu mọ tarị emi kị duonị odubo-gbaan á pịrịmịnị, kịmịotu tokoni akị wo pịrịmụ yọ duonịgha. Kịmịotu kị wo ẹrịgha kpọ, omịnị pọwẹịtimi fịrị wẹnị wo bịnaotubo mọ Jehovah mọ pịrịmịnịsẹ, omịnị angọ-iyerimọ emi bara kị mịẹdịamịnị.—Matt. 6:1-4.
“ỊKỊỌỤ SAỊNSAỊN” TIMI
13. Teeki “ịkịọụ saịnsaịn” a o?
13 Teeki “ịkịọụ saịnsaịn” timi bolou ma sụọemi a o? (1Pet. 4:7) Ịkịọụ saịnsaịn-emi Christtuuduo kịmịmị angọtụa Jehovah ye-iroromịnị bara kị diwẹrị ebi iroroama tọnmịnị. Bịsẹ ụbọbị ụ mọ Jehovah mọ nana wẹrịemi ikie kị yelaa akị zịnị yeama dẹịn-emi bara mịẹdịamịnị. Ómịnị kị yelaadẹịn-emi anịghakpọ yebosẹ nimi wẹrịemi bara kpọ mịẹgha fa. Ịkịọụ saịnsaịn-emi kịmịmị Jehovah ka sẹsẹrẹmịnị bá ifiebosẹ tẹẹ Jehovah yarịdẹ kị yemịẹmịnị.b
14. Kẹnị ifie Peter tebara ka kị Jehovah a sẹsẹrẹgha bara mịẹdịa ma o?
14 Jesus kiriogbo bọọ timi kunumọ deinbị, ómịnị berifaanye akị wó tuuduo-otubo pịrịmị: “Bei deinmị á kịmịsẹ ị gbelemọ yọbị adalaịmịnị.” Peter agbobu titiwẹrị gbaamị: “Kịmịsẹ kị ị́ gbelemọ yọbị adalaị kpọ, Ịmịnị benebene adalaigha fa!” Bịsẹ deinbị Jesus wó tuuduo-otubo zụayaị kụrọmọmị: “Ifiebosẹ letimi bá pẹlẹgha bara tẹẹbịbị mịẹ.” (Matt. 26:31, 33, 41) Peter bịsẹ tolumọbịbị kẹrịakị wẹrị a, ómịnị boloukụrọtimi Jesus mọ kpẹkpẹrẹmụ timimị. Peter bịsẹ bara mịẹgha duonị, ómịnị Jesus piimị, bịsẹ yọbị ụ mịẹ bolouịmbẹlẹgha.—Matt. 26:69-75.
15. Jesus tebara ka kị wó kiriogbo bọọ timi kunumọ deinbị ịkịọụ saịnsaịn-emi bara mịẹdịa ma o?
15 Jesus beinmọ beinmọ bara Jehovah ka sẹsẹrẹmị. Ómịnị yalịyalị emi kị gbaa kpọ, Jesus ifiebosẹ tẹẹbịbị mịẹmị. Bịsẹyọ kị baratụa ụ pịrịwẹrị boloukụrọtimi Jehovah dọụbara mịẹmị. (Matt. 26:39, 42, 44; John 18:4, 5) Peter Jesus ifiebosẹ tẹẹ dẹkị yemịẹmịnị bara ẹrịmịnị yọbị baratụa wó ụndụ pịrịmị.
16. Peter tebara ka kị ịkịọụ saịnsaịn inyenrinbụọ nanadẹ bara mịẹdịa ma o? (1Peter 4:7)
16 Ifie bụọbị, Peter Jehovah ka sẹsẹrẹ wẹrị ifiebosẹ tẹẹbịbị mịẹmị. Jesus waị fịịyọ duoseri dẹbị, omịnị gbaa akị Peter mọ kọọ fịrịmọpaa otubo mọ pịrị amọ, yalịyalị tẹmẹbị ánị angọ duo sụọwẹrị ámịnị egberigbaa fịrị wẹnị beinmọmịnị. Anịa, ámịnị Jerusalem a timi bei ye paamụ ifie koru bara Jesus mọ gbaa á pịrịmị. (Luke 24:49; Acts 1:4, 5) Bịsẹ korumịnị ifiebị Peter teeki mịẹtimi ma o? Peter mọ zịnị Christtuuduo-otuama mọ “pẹlẹgha bara tẹẹbịbị mịẹtimimị.” (Acts 1:13, 14) Bịsẹ ifie bụọbị, Peter wó bọlọụ gẹẹ funbị Christtuuduo-otubo ịkịọụ saịnsaịn timi bá Jehovah ka sẹsẹrẹị dá ifiebosẹ tẹẹbịbị mịẹ bara akị á kụrọmọmị. (1Peter 4:7 goo.) Peter Jehovah ka sẹsẹrẹị agbẹị-emi bara tolumọ angọ pịrịmị bá tẹmẹanga ma kasụọwẹrị bịnaotubo kụrọmọmị.—Gal. 2:9.
17. Omịnị ebibara yemịẹdị wẹrịemi kpọ, ifiebosẹ teeki mịẹ agbẹị-emi a o? (Foto kpọ dii.)
17 Omịnị ịkịọụ saịnsaịn timi dọụmịnịsẹ, ifiebosẹ tẹẹbịbị mịẹ Jehovah pịrị. Omịnị yemịẹdị wẹrịemi kị gbaa kpọ, ifiebosẹ Jehovah bara kụrọ bii. Anịduonị, omịnị yelaa iroroama tọn dọụmịnịsẹ Jehovah baratụa pịrịye bii, ómịnị kị ebi ị́ pịrị dẹịn-emi ye nimi-wẹrịemi eti nana.
Peter Jehovah a sẹsẹrẹị wẹrị ifiebosẹ tẹẹbịbị mịẹmị. Omịnị kpọ yelaa iroro tọn doụmịnịsẹ ịkịọụ saịnsaịn timi Jehovah baratụa pịrịye bii (Gooyọ 17 dii)c
18. Wo ye-iroromịnị bara mọ Jehovah ye-iroromịnị bara mọ tebara ka kị ifiebosẹ kẹnịsụọmọ dẹịnmịnị a o?
18 Jehovah omịnị laa wó inyenrinbụọbo dimịẹ a paaemi bara kọn wo tẹmẹ yọbị, wo mịẹ pọwẹị kamị. (Gen. 1:26) Kọkọ, omịnị laa beinmọ beinmọ bara akị Jehovah dimịẹ a paagha. (Isa. 55:9) Mọabịkpọ, wosẹ Peter bara, angọ-iyerimọ, ịkịọụ saịnsaịn timi bá Jehovah ye-iroromịnị bara dii ye-iroro.
DUMA 30 My Father, My God and Friend
a Akị 1Peter 4:1 bị “ịkịọụ a gbinipẹlẹ” gbaa wẹrịemi egberibị, kọn “ịkịọụ ma ye-iroromịnị bara gbaa kpọ paaemi.”
b Mọkpọ ebibara ịkịọụ saịnsaịn egberimị zịnị yeama nimi dọụmịnịaba, jw.org anịghakpọ JW Library® app duosụọ dá “Bible Verses Explained” anga bọọ “Soundness of mind” egberitịbị ma múdá “2Timothy 1:7 Explained—‘God Has Not Given Us a Spirit of Fear,’” dii.
c FOTOBO EMIBARAM: Kẹnị bịna-araụ fịrị dọụmịnị duonị biibịbị parụmụ yọ a timi korumịnị ifiebị, amịnị bẹbẹfinigha bara tẹẹbịbị mịẹmịnị.