Zọzọ Mọ Naịnmịnị Yọbị Ebi Wo Pịrịemi!

1-2. Teeki yelaa Jehovah pịrịemi a, bá ómịnị te ka kị wo bara dọụ wẹrịemi a o?

OMỊNỊ wo bịnaotubo mọ inyenrinmịnị barabị yelaa Jehovah pịrịemi, yelaa Jehovah pịrị bịsẹyọ dẹịn-emi yebo biingha. Omịnị wo angọ tarị bara ka kị wo ovẹ-otubo kpọ tarị bara Jesus mọ kọn wo tolumomị. (Matt. 22:​37-39) Bịsẹ yọmị Jehovah karịgha otubo tarịmụ yọ kpọ sụọemi. Omịnị bịsẹbara mịẹdaba, Jehovah Ọkpọnanaowei kị damịẹmịnị, ómịnị “ụraụ mọ osụọ mọ mịẹpaamọ akị ebi otubo mọ bolousei otubo mọ, bá kịrịịye mịẹmịnị otubo mọ kịrịịye mịẹgha otubo mọ pịrịmịnị.”—Matt. 5:45.

² Jehovah kịmị-awọụbosẹ kị tarị wẹrịemi kpọ, ómịnị kịrịịye mịẹmịnị otubo kị tarịdẹịn-emi. (John 14:21) Omịnị kpọ ụ dimịẹ kị Jehovah mọ dọụmịnị. Anịduonị ómịnị wo kụrọmọmị, omịnị “olomu tarị” bá “zụzụ tarị” akị wo bịnaotubo a nana. (1Pet. 4:8; Rom. 12:10) Bei tarịmị anị omịnị akị wo warịbolou-otubo anịghakpọ wo ikie-ụbọ a nana wẹrịemi tarị apaa kị gbaamịnị.

3. Tarị gbelemọ yọmị omịnị teeki ukie agbẹị-emi a o?

³ Tarị, flower bara k’emi, sọụ bọlọụ amú wo mọ dọụmịnịsẹ, omịnị ifiebosẹ ụ kekere agbẹị-emi. Fịrịmọpaa-owei Paul gbaa Christtuuduo-otu pịrịmị: “Pebidá ánị bịna tarịbị sọụ bọlọụ amú.” (Heb. 13:1) Omịnị ifiebosẹ zọzọ tarị kị Jehovah mọ dọụ wẹrịemi. Bei egberitịbịmị omịnị wo bịnaotubo mọ naịndẹịn agbẹị-emi tuu mọ bá pẹlẹgha bara ámọ mọ́ naịntimimụ bara mọ kẹrị ẹrẹteimịnị.

WO BỊNAOTUBO MỌ NAỊNDẸỊN AGBẸỊ-EMI TUUMỊ

4. Psalm 133:1 gbaa bara didaba, omịnị tebara ka kị wo bịnaotubo a nana wẹrịemi kẹnịsụọmọ yọ didụbamọmịnị a o? (Fotobo kpọ dii.)

⁴ Psalm 133:1 goo. Psalm fun gẹẹ owei gbaa amọ Jehovah tarị wẹrịemi kịmị mọ gesii ikie kẹrịmịnị yọbị “ebi-emi” omịnị kpọ wó gbaa egberi ma barapou wẹrịemi. Kịmị ifiebosẹ ebi tịn ẹrịmịnịsẹ ba tịnbị akị ye dimọgha kpọ paaemi, bịsẹbara kị wo kpọ ifiebosẹ wo bịnaotubo ẹrịmịnị yọbị, wo ámọ mó nana wẹrịemi kẹnịsụọmọ yọmị kọn ye dimọgha kpọ paaemi. Anịduonị omịnị tebara ka kị wo kẹnịsụọmọmịnị yọ didubamọmịnị a o? Omịnị ifiebosẹ wo itu bọọ emi bịnaotubo nana wẹrịemi ebi inyenrinbụọbọ kẹrị-irorodaba, baratụa wo pịrịwẹrị wo kọn ánị a nana wẹrịemi tarị mịẹ kụrọmọ dẹịnmịnị.

5. Christtuuduo-otubo nana wẹrịemi tarịbị tebara ka kị zịnịotu gbelemịnị a o?

⁵ Zụa kịmịama bọlọụ wo yetolumọyọbo a bodaba wo nana wẹrịemi tarị kị ánị angọ duo sụọdẹịnmịnị. Anịduonị, ámịnị gesii bị dọụ ẹrịdẹ bara gbaamịnị. Jesus gbaamị: “Ámịnị ánị ovuru bọọ tarị nana wẹrịemiaba kịmịsẹ ámịnị ine tuuduo-otuama bara nimimịnị.” (John 13:35) Wẹrị Chaithra paamọye ditụa, amịnị university ka múmịnị anịa amịnị Jehovah Iseriotumọ koro Bible tolumọmị. Opubẹnị a múmụ tịịnpoun fun álaabị amịnị kẹrịakịmị. Amịnị bọlọụ wo opubẹnị bọọ bo ifiebị, amịnị gbaa akị ámọ mó Bible tolumọmịnị bịnaraụma pịrịmị: “Paasẹ ị daụ mọ yin mọ naa ị kẹrị gbeinmọgha wẹrịmị. Anịa, bei opubẹnị bị 52 kịmịama bei kpekẹnị ereinma ị kẹrị gbeinmọmị! Jehovah kọkọ ị tarịemi bara ịmọ nimimị. Ịmịnị kpọ kọkọ bo wó warịbolou kịmị a paa dọụmị.” Chaithra mọkpọ Bible tolumọ bọlọụ amúmị. Bo 2024 laabị amịnị benibilemị. Kọkọ, kịmịama wo wẹnịmịnị ebi fịrịbo mọ bá wo nana wẹrịemi tarị mọ ẹrịdaba, á dịnẹmọ wẹrị bo Jehovah karịmịnị.—Matt. 5:16.

6. Wo bịnaotubo mọ naịnmịnị yọmị tebara ka kị wo kekeremịni a o?

⁶ Omịnị wo bịnaotubo mọ naịnmịnị yọbị wo kekere a paaemi. Paul gbaa akị Christtuuduo-otubo pịrịmị: “Ereinbosẹ zọzọ kụrọmọ. . . anịkị sei kịmị lẹlẹmọ kụrọbị ba ánị adụdụbo mịẹ kụrọmọgha fa.” (Heb. 3:13) Omịnị suusụọ wẹrị kịrịịye mịẹmụ yọbị bo dẹịn sụọdaba, Jehovah bịna-ụbọ fịrịmọ bo wo kụrọmọ a paami. (Ps. 73:​2, 17, 23) Bịsẹ kụrọmọ yebị kọkọ baratụa wo pịrịmịnị.

7. Tarị tebara ka kị kẹnịsụọmọ yọ mịẹpaamọmịnị a o? (Colossians 3:​13, 14)

⁷ Omịnị angọtụa tarị mịẹ zọzọ dịamịnị kịmịama, anịduonị biin tarịama wo laamịnị. (1John 4:11) Gbaamaba, tarị wo dịnẹmọ wẹrị “pẹlẹgha bara zọzọ mịẹkiri yeama inemịnị,” bịsẹ yọbị wo kẹnịsụọmọ yọ mịẹ bọlọụ amúmịnị. (Colossians 3:​13, 14 goo; Eph. 4:​2-6) Akpọyọrẹịbị, kịmịama bẹnịịmịnị yọbosẹ zụzụ wo yetolumọ yobo laaemi yọ fa.

ZỌZỌ DIDỤBAMỌ

8. Jehovah tebara ka kị baratụa wo pịrịwẹrị kẹnịsụọmọmịnị a o?

⁸ Wo nana wẹrịemi kẹnịsụọmọ yọmị tamamaye ka paaemi. Omịnị yalịgha kịmịama, anịduonị Jehovah kị bịsẹyọ mịẹpaamọ wẹrịemi. (1Cor. 12:25) Bible gbaa amọ “Ọkpọnanaowei kị zọzọ tarịmụ bara kọn wo tolumọmịnị.” (1Thess. 4:9) Gbaamịnị barasẹ, Jehovah Bible kị duo mịẹwẹrị zọzọ mọ naịnmịnị yebo kọn wo tolumọmịnị. Omịnị ebibara Bible tolumọ bá akị tụa inyenrindaba “Ọkpọnanaowei kị pịrị tolumọmịnị” bara kị paadẹ. (Heb. 4:12; Jas. 1:25) Jehovah Iseriotu angọtụa bịsẹbara kị mịẹmịnị.

9. Zọzọ didụbamọ gbelemọ yọbị Romans 12:​9-13 te ka kị wọ tolumọ ma o?

⁹ Ọkpọnanaowei egberibị tebara ka kị zọzọ mọ naịnmụ bara kọn wo tolumọmịnị a o? Wẹrị Paul bei egberi gbelemọ yọbị gbaa egberi dii, anị Romans 12:​9-13 (goo) bọọ emi barabị. Mi yọmị wo mọ didaba kẹnị yelaa egberi emi “zọzọ didụbamọmịnị yọbị, ị́mịnị kị bọlọụdaa.” Bei gbaa egberibị teeki bẹmọ wẹrịemi a? Omịnị kị bọlọụ “zụzụ bara” kịmị bụọmọ, egeni kẹrịakị, bá barafinimọ zịnịotu pịrịmịnị. (Eph. 4:32) Wo bịnaotubo kị bọlọụ angọ akị wo mọ naịnmụ yọ koru kụmọ, Ị́mịnị kị “bọlọụdaa.” Jesus gbaamị: “Ye akị kịmị pịrịmịnị yọmị pọwẹị nana akị kẹrịakịmịnị yọ dẹịn-emi.”—Acts 20:35.

10. Omịnị “zịnịotu didụbamọmịnị yọbị” tebara ka kị angọtụamịnị a o? (Foto kpọ dii.)

¹⁰ Paul, zọzọ didụbamọmụ yọbị omịnị kị bọlọụdaa egberi gbaa sindẹmị, Paul mọkpọ gbaamị “angọtụa fịrị wẹnị, suu kụmọ.” Angọtụa fịrị wẹnịmịnị kịmịbị ebibara ka kị angọtụa kụrọ fịrịwẹnịmịnị. Fịrị ụ laadaba, ómịnị angọtụa ebibara fịrị wẹnịmịnị. Proverbs 3:​27, 28 gbaa wo pịrị amọ: “Mịẹ ka paaemiaba ebimịẹ akị pịrị agbẹị-emi otubo pịrịmụ yọbị suusụọ kụmọ.” Anịduonị, kịmị baratụa-pịrịye dọụwẹrị emiaba, omịnị angọ paamọ baratụa bịsẹ ụbọ pịrịmịnị. Omịnị akị bọlọụ kimọgha fa; anịghakpọ zịnị kịmị mú baratụa bịsẹ ụbọ pịrịmịnị bara kpọ irorogha fa.—1John 3:​17, 18.

11. Teeki baratụa wo pịrịwẹrị zọzọ mọ naịn dẹịnmịnị a o?

¹¹ Omịnị akị zịnịotu didụbamọmụ zịnị ụwọụ emi, anị ifie famọgha bara á bụọmọmịnị yọmị. Ephesians 4:26 gbaamị: “Boloukọntimi ụraụ sụọfamịnị ifie laa kụmọ.” Tetuu a o? Verse 27 mị gbaa amọ, omịnị bịsẹbara mịẹghasẹ “fomuun ka kị Devil pịrịmịnị.” Bible boloumị, Jehovah barii barii ka kị omịnị zọzọ bụọmọ bara gbaa wẹrịemi. Colossians 3:13 gbaa wo pịrị amọ “ifiebosẹ. . . peree bara akị zọzọ bụọmọ.” Omịnị zọzọ mọ naịn dọụmịnịsẹ, zọzọ bụọmọmịnị yọ kpo kẹnị yelaadẹịn ye. Omịnị bịsẹbara mịẹdaba, baratụa wo pịrịwẹrị, “tẹmẹ mịẹpaamọmịnị kẹnị ịkịọụmị kekeremịnị” bá kịmịotu kẹrị bẹnịmọmịnị dọọ kpọ nanamịnị. (Eph. 4:3) Gbaamịnị barasẹ, kịmị bụọmịnị yọbị baratụa wo pịrịwẹrị kẹnịsụọmọ yọ mọ bá dọọ mọ nanamịnị.

12. Jehovah tebara ka kị baratụa wo pịrịwẹrị kịmị bụọmọ inyenrinbụọ nanamịnị a o?

¹² Kịmị yemịẹ wo dọọn mọ daba, ụbọ bụọmọmụ yọbị kụrọ wo pịrị kpọ paaemi. Anịa Jehovah tẹmẹ bị baratụa wo pịrịwẹrị laa kịmị bụọmọ a paaemi. Bible bị omịnị “zụzụ tarị” bá “angọtụa” fịrị wẹnị inyenrinbụọ nanamụ yọ gbaasin dẹmị, Bible mọkpọ gbaamị: “Tẹmẹ pịrị ị́ dịnẹmọ.” “Angọtụa anịghakpọ angọsụọ bara ka kị fịrịwẹnịmịnị” kịmị bị, anị tẹmẹ pịrị “dịnẹmọmịnị” kịmị. (Romans 12:11 study note dii.) Anịduonị Ọkpọnanaowei tẹmẹ bị baratụa wo pịrịwẹrị zụzụ tarị mịẹdịa bá peree bara akị kịmị bụọmọ inyenrinbụọ nanamịnị. Anịduonị wosẹ baratụa-pịrịye akị Jehovah bara biimịnị.—Luke 11:13.

“DỊẸDỊẸ INYENRINBỤỌ ÁNỊ OVURU BỌỌ TIMI KỤMỌ”

13. Itu boloumị teeki dịedịẹ inyenrinbụọ mịẹpaamọ a paaemi a o?

¹³ Itu boloumị “bẹbẹ yọ duo boemi” kịmịama k’emi. (1Tim. 2:​3, 4) Anịduonị omịnị angọ-dighasẹ, bẹtịbị ụbọ sẹlẹ angọ pịrịmụ yeama bụọmọ wẹrị zọzọ naagha yeama mịẹpaamọ a paaemi. Gbaamaba, birimịnị bara, angọ zụọmịnị bara bá angọ mịẹ gana-ganamịnị bara. (Rom. 14:4; 1Cor. 1:10) “Ọkpọnanaowei zọzọ tarịmụ bara akị wo tolumọdẹ” duonị, pebidá wo sẹlẹ angọ pịrịmịnị yebo kị ebi zịnịotu yaịdẹịn-emi bara iroro kụmọ.—Phil. 2:3.

14. Omịnị ifiebosẹ teeki mịẹ agbẹị-emi a, bá tetuu a o?

¹⁴ Omịnị itu boloumị ifiebosẹ zụzụ bara akị kịmịotu kụrọmọmịnị yọmị baratụa wo pịrịwẹrị dịẹdịẹ inyenrinbụọ dẹịnmọmịnị. (1Thess. 5:11) Naa bei alakagha kụraịbo, suusụọwẹrị itu bọọ barasin wẹrị kịmịama waị itu bọọ bomịnị. Omịnị zụzụ bara ka kị á kẹrịakịmịnị! (2Cor. 2:8) Wo wẹrị yetolumọyọ a boghatimi oia kụraị baịdẹ ere waị Kingdom Hall a bo ifiebị paaye dii. Á gbaamị, “Kịmịsẹ pọwẹịtimi ị kule bá ịmọ mọ bara-akịmị.” (Acts 3:19) Bei mịẹ yebị tebara ka kị á gbele ma o? Á gbaamị, “Ine iroro baramị Jehovah kị baratụa ị pịrịwẹrị waị pọwẹị nanamịnị.” Anịduonị omịnị zụzụ bara kịmịotu kẹrịakịdaba, Christ wo akị baratụa “oku yeama sibe wẹrị dẹịn sụọdẹ kịmịama kụrọmọmịnị.”—Matt. 11:​28, 29.

15. Omịnị te zịnị ụwọụ ka kị wo kẹnịsụọmọ yọ mịẹ bọlọụ ámú a paaemi a o? (Foto kpọ dii.)

¹⁵ Omịnị wo ẹrẹbịbịbo kpọ akị kẹnịsụọmọ yọ mịẹpaamọ a paaemi. Job 12:11 gbaa amọ: “Mụlọụ bị fịyaị dadimịnị bara kị, beribo kpọ egberi dadimịnị bara paa a?” Kọkọ ebi fịyaị tụọ kịmị wó tụọmịnị fịyaịbị ịmbẹlẹ-emi bara dadị dẹkị akị kịmịotu pịrịmịnị bara kị, omịnị kpọ angọtụa wo gbaa dọụmịnị egberibo ditụa dẹkị gbaa paamọ. (Ps. 141:3) Wo gbaa dọụmịnị egberịbo ifiebosẹ zịnịotu kụrọmọ, bá “arere mịẹpaamọ” á pịrịmụ yọkị wo ịkịọụ ma timi—Eph. 4:29.

16. Te otuama kị kịmị kụrọmọ egberiama ẹrẹdẹịn agbẹị-emi a o?

¹⁶ Yei otubo mọ, bá daụ mọ yin otubo mọ ifiebosẹ kịmị kụrọmọ egberiama kị ẹrẹ paamọ agbẹị-emi. (Col. 3:​19, 21; Titus 2:4) Itu-kosuotubo kpọ kịmị kụrọmọ egberiama kị ẹrẹ Jehovah anịnabo pịrị agbẹị-emi. (Isa. 32:​1, 2; Gal. 6:1) Proverb funbị gbaa wo pịrị amọ: “Agbẹị ifiema ẹrẹmịnị egberimị ebi fa k’emi!”—Prov. 15:23.

“GESII BARA KA KỊ” TARỊ MỊẸDỊA

17. Omịnị tebara ka kị wo bịnaotubo a nana wẹrịemi tarị bị adụdụ kị duo bomịnị bara mịẹdịamịnị a o?

¹⁷ Fịrịmọpaa-owei John kụrọmọye akị wo pịrịmị “omịnị, bẹbẹ ka kị tarị mịẹdịa kụmọ, anịa inyenrinbụọ ka kị gesii tarị mịẹdịa.” (1John 3:18) Omịnị wo bịnaotubo tarị wẹrịemi yọbị wo adụdụ kị duo bo agbẹị-emi. Omịnị tebara ka kị bịsẹbara mịẹmịnị a o? Omịnị ifiebosẹ wo bịnaotubo mọ yemịẹ gbeleimịnị yọmị, baratụa wo pịrịwẹrị ámọ mó naịndẹịn bá á tarị kụrọmọ dẹịnmịnị. Anịduonị pebidá wosẹ wo bịnaotubo mọ gbeleimụ fommun-ama mịẹpaamọ. Ifie mịẹpaamọ wẹrị yetolumọyọ, egberigbaayọ bá ánị warịbo ámụ́. Omịnị bịsẹbara mịẹdaba, “Ọkpọnanaowei kị wo tolumọ wẹrị zọzọ tarịmịnị” bara mịẹdịadẹ. (1Thess. 4:9) Omịnị pẹlẹgha bara bịsẹbara mịẹmịnị ifiesẹ “bịnaotuama kẹnịsụọmọ inyenrinmịnị yọbị dii ebi-emi kụrọmọemi” bara wo mọ ẹrịmịnị!—Ps. 133:1.