EGBERITỊBỊ 18
DUMA 65 Move Ahead!
Asịyaịpesi Emi Binaowei-ama—Mark mọ Timothy mọ Dimịẹ
“Mark akị tụamụ bo, ómịnị egberigbaa fịrịmị baratụa ị pịrịmịnị.”—2 TIM. 4:11.
TOLUMỌ DỌỤMỊNỊ YEBO
Bei egberitịbịmị omịnị Mark mọ Timothy mọ mịedịa yebị baratụạ asịyaịpesi emi bịnaotuama pịrịwẹrị beinmọ beinmọ bara baratụa zịnịotu pịrịmụ bara tolumọmịnị.
1-2. Mark mọ Timothy mọ baratụa zịnịotu pịrịmụ yọbị te bụụdọọnyeama kị á tịẹmọ a paatimi ma o?
ASỊYAỊPESI emi binaowei-ama, ámịnị kpọ zịnịotu barịị bá Jehovah ogbo bị fịrịama wẹnị dọụmịnị a? Kọkọ ámịnị wẹnị dọụmịnị. Anịa biin asịyaịpesi-ama angọ paamọ wẹrị bo Jehovah fịrị wẹnịmịnị yọbị wo mịẹ pọwẹịmọ kamị! (Ps. 110:3) Kaanghaba, ámịnị bụụdọọnyeama nanamịnị kpọ paaemi. Ámịnị bọlọụ a paamụye nimigha bá ebibara fịrị wẹnịdịgha duonị malafamịnị a? Bịsẹ bara aba, ámịnị bẹtịbị fa.
2 Mark mọ Timothy mọ kpọ bịsẹ a paa bụụdọọnyeama nanamị. Anịa ámịnị bịsẹyọ bụọmọ wẹrị baratụa zịnịotu pịrịmụyọ tịẹmọgha. Fịrịmọpaa-owei Paul mọ Barnabas mọ bọlọụ yọụpaa egberigbaayọ amú ifiemị, Mark ụ yin mọ ebi warị kị inyenrintịmị á pịrị ụ tịịnmị. (Acts 12:12, 13, 25) Mark fịrịwẹnị Jehovah pịrị dọụmịnị duonị, wó ebi warị ma barasin wẹrị á sụọmọ múmị. Ómịnị bọlọụ Antioch ka múmị. Bịsẹyọ bụọmọ dẹmị ómịnị Paul mọ Barnabas mọ sụọmọ wẹrị alaa yọama kpọ amúmị. (Acts 13:1-5) Bịsẹbara kị, Paul Timothy tịịn ifiemị ọ́mịnị ụ daụ mọ yin mọ a barasin wẹrị Paul sụọmọ egberigbaa fịrị wẹnịmị. Ómịnị Asịyaịpesi bá ebibara fịrịwẹnịmụ bara kpọ nimigha, bịsẹbara kị gbaa kpọ Timothy bịsẹyọ bụọmọ wẹrị ụ tịẹmọgha. (Compare 1Corinthians 16:10, 11 and 1Timothy 4:12.) Ómịnị Paul tịịn bẹbẹ kẹrịakịwẹrị biin tarịama bịsẹyọ duobo ụ laamị.—Acts 16:3-5.
3. (a) Ómịnị tebara kị mịẹtimi Paul eti kọn Mark mọ Timothy mọ a tụa wẹrịemi bara nịmị ma o? (2Timothy 4:6, 9, 11) (Foto kpọ dii.) (b) Bei egberitịbịmị omịnị te biibịbịama kị kẹrị ẹrẹtei dọụmịnị a o?
3 Mark mọ Timothy mọ asịyaịpesi emi ifie kị itubị biin fịrịama wẹnịmụ bara tolumọmị. Anịduonị Paul eti akị Mark mọ Timothy mọ atụamị, wó fịịmụ ifie mọ naịnbị Paul á tịịn angọ mọ naịnmị. (2Timothy 4:6, 9, 11 goo.) Tetuu kị duonị Paul eti akị Mark mọ Timothy mọ atụa bá á tarị ma o? Asịyaịpesi emi binaoweibo tebara kị kọn á dimịẹ a paaemi a o? Asịyaịpesi emi binaoweibo tebara kị kọn Paul gbaa egberi duo arere nanamịnị a o?
Mark mọ Timothy mọ asịyaịpesi ghọ timi ifiemị biin fịrị ka kị itu bolou bọọ wẹnịtimi duonị Paul á tarịmị (Gooyọ 3)b
MARK DIMỊẸ—FỊRỊWẸNỊ ZỊNỊOTU PỊRỊMỤ YỌ BỌỌ DỊSẸNANA
4-5. Mark tebara ka kị fịrịwẹnị zịnịotu pịrịmụ yọbị dịsẹnana wẹrịemi bara mịẹdịa ma o?
4 Kẹnị fun gbaa baramị, odubo-gbaan kịmịotu pịrịmịnị yọmị anị “angọtụa bá pẹlẹgha bara baratụa zịnịotu pịrịmịnị yọmị.” Mark kọkọ bịsẹ yọmị ebi mịẹdịaye ka paaemi. Paul maamụkaramọ ifie egberigbaayọ amú ifiemị, Mark kọn tụa múgha yọmị Mark dọọn kpọ paaemi. (Acts 15:37, 38) Anịa Mark bịsẹyọ bụọmọ ụ mịẹ suusụọwẹrị baratụạ bịnaotubo pịrịgha fa bara mịẹgha.
5 Mark wó bịnaowei Barnabas mọ egberigbaa fịrịwẹnị yọ a múmị. Timi 11 years bụọdẹ ifiemị, Paul Rome bị ikoliwarị a timi ifiemị Mark baratụa ụ pịrịmị. (Philem. 23, 24) Anịduonị fịrịmọpaaowei Paul, Mark gbelemọ egberi gbaa timi ifiemị, ụ gbaa amọ “Mark . . . opu kụrọmọye ka paa ị pịrịmị.”—Col. 4:10, 11.
6. Mark kasụọdẹ Christtuuduo-otuama mọ wẹnị yọbị, te arereama kị nana ma o? (Footnote kpọ dii.)
6 Mark kasụọdẹ Christuuduo-otubo mọ wẹnị gbeleiyọ duo arere nanamị. Ómịnị Paul mọ Rome a timi zụa ifie laa dẹbị, Mark Babylon a mú fịrịmọpaaowei Peter sụọmọmị. Ánị maa kịmị wẹnị gbeleitimi bara duonị Peter akị ụ tịịn barabị “Mark, ine tọbọụ.” (1Pet. 5:13) Ámịnị wẹnị gbeleimịnị bị, Peter Jesus mọ timi ifie bọọ paa yeama gbaa ụ pịrịmị, tuu ifie laabị Mark, Peter gbaa ụ pịrị yebo akị wó fun ma gẹẹtụamị.a
7. Seung-Woo tebara ka kị Mark dimịẹ ma o? (Foto kpọ dii.)
7 Mark pẹlẹgha bara fịrịwẹnị Jehovah pịrị bá kasụọdẹ bịnaotubo mọ kpọ naịntimimị. Ị́mịnị tebara ka kị Mark dimịẹ a paaemi a o? Jehovah ogbo bị wẹnị fịrị naa ị́ laagha aba, etipoutimi bá zịnị ụwọụama nẹ akị Jehovah karị a paaemi ụwọụama dọụ paamọ. Wẹrị Seung-Woo paamọye dii, ómịnị bẹị tịẹkiri bị itu-kosuowei ka paaemi. Anịa ómịnị asịyaịpesi a timi ifiemị, angọ akị zịnị asịyaịpesi-ama kị tọnmọ timimị. Zụa fịrịwẹnị fomuun-ama zịnị asịyaịpesi-ama laa ifiebị, ụ laagha duonị yebị ụ dọọn kụrọmọmị, ómịnị egberibị akị zụa kasụọdẹ bịnaotuama mọ ẹrẹteimị. Kẹnị itu-kosuowei gbaa ụ pịrị amọ, kịmị kị wó wẹnịmịnị fịrịbo ẹrịgha kị gbaa kpọ ómịnị pẹlẹgha bara fịrịwẹnị zịnịotu pịrị. Seung-Woo bịsẹ egberi peiwẹrị baratụa owadẹ otuama mọ bá zịnị otuama mọ pịrịwẹrị laa yetolumọyọ a múmị. Tuu ifie laamị, ụ gbaa amọ: “Ịmịnị baratụa zịnịotu pịrịmịnị yọ duo bomịnị pọwẹị nanamị.”
Asịyaịpesi emi bịnaowei tebara kị kọn kasụọdẹ bịnaowei-ama mọ wẹnịmịnị yọ duo arere nanamịnị a o? (Gooyọ 7)
TIMOTHY DIMỊẸ—ZỊNỊOTU TARỊ WẸRỊEMI BARA MỊẸDỊA
8. Paul yọụpaa egberigbaayọ amú timi ifiebị, tetuu kị duonị Timothy kpọ sẹlẹ ma o? (Philippians 2:19-22)
8 Paul waị yọụpaa ụ penimọtimi amabo amú egberigbaa dọụmịnịsẹ, ómịnị bọlọụ kụrọemi bịnaotuama ụ sụọmọ múyọ dọụ wẹrịemi. Ómịnị bọlọụ Silas kị sẹlẹmị. (Acts 15:22, 40) Tuu ifie laabị ómịnị Timothy kpọ sẹlẹmị. Tetuu kị duonị Timothy bẹbẹ paaemi a o? Bịnaotubo Timothy ebi inyenrinbụọbo gbaamịnị. (Acts 16:1, 2) Bịsẹyọ bụọmọ kpọ Timothy ifiebosẹ baratụa bịnaotubo pịrịmịnị.—Philippians 2:19-22 goo.
9. Timothy tebara ka kị bịnaotubo tarị wẹrịemi bara mịẹdịa ma o?
9 Timothy, Paul sụọmọ egberigbaa fịrị wẹnịtimi ifiesẹ ọ́mịnị baratụa zịnịotu pịrịmụyọ ka kị bọọụdámị, Paul kpọ bịsẹ yọmị ẹrịmị. Anịduonị, ómịnị Timothy akị Beroea ma timi wẹrị aya Christtuuduo-otubo kụrọmọmị. (Acts 17:13, 14) Kẹnị ifie, Timothy Silas mịẹdịaye kpọ duo arere nanamị, Silas kpọ Beroea a timimị. Tuu ifie laabị, Paul Timothy fịrịmọ Thessalonica Christtuuduo-otubo kụrọmọyọ a múmị. (1Thess. 3:2, ftn.) Timothy akị bịnaotubo a nana wẹrịemi tarị kụrọ bọlọụ bọlọu ka múmị, anịduonị bịnaotubo ụyafịmịnị ifiesẹ, ómịnị kpọ á mọ mọ́ sụọ youmị. (Rom. 12:15; 2Tim. 1:4) Asịyaịpesi emi bịnaotubo tebara ka kị Timothy dimịẹ a paaemi a o?
10. Woo Jae tebara ka kị bịnaotubo a dịsẹ nanamụ bara tolumọ ma o?
10 Woo Jae tịịnmịnị bịnaowei baratụa bịnaotubo pịrịmịnị bara tolumọ angọ pịrịmị. Ómịnị asịyaịpesi a timi ifiemị, Woo Jae okosidẹ bịnaotuama mọ ẹrẹteimụ yọmị kụrọ ụ pịrịmị. Ómịnị Kingdom Hall bọọ á kule sindaba wẹnị seridẹ. Kẹnị itu-kosuowei gbaa Woo Jae pịrịmị, ómịnị bịnaotubo kule bá á dịsẹ-emi yeama kọn ámọ mọ́ ẹrẹtei bara gbaamị. Woo Jae gbaa bara kị dimịẹmị. Mị tịẹkirimị, Woo Jae itu-kosuowei ka paadẹ. Ómịnị gbaa amọ “Ịmịnị bịnaotubo mọ ebibara ẹrẹteimụ bara nimidẹ. Ịmịnị ánị dọụmịnị yebo asụọtuu nimi yọmị ị mịẹ pọwẹịmịnị. Bịsẹ yọmị ị barịwẹrị laa baratụa ine bịnaotubo pịrị a paadẹ.”
11. Asịyaịpesi emi bịnaoweibo tebara ka kị ánị ituma emi binaotubo a dịsẹnana wẹrịemi bara mịẹdịamịnị a o? (Foto kpọ dii.)
11 Asịyaịpesi emi bịnaoweiama, ámịnị tebara ka kị zịnịotu a dịsẹnana wẹrịemi bara mịẹdịamịnị a o? Yetolumọyọ laadaba, ámịnị kala bá okosu kpọ a dịsẹnana wẹrịemi bara mịẹdịa. Ánị emibara mị akị á bii, bá ebibara á pei. Bịsẹbara ị́mọ mịẹtimi kẹnị ifie laadaba, ị́mịnị akị baratụa á pịrịmụ bara nimimịnị. Kaanghaba okosudẹ taa mọ yei mọ otu JW Library® app finimọ bara nimigha. Anịghakpọ ámọ mọ́ egberigbaayọ amúmụ kịmị fa. Bịsẹbara paadaba ị́mịnị laa ánị phone duo Jw library finimọ bara kọn á dịa, anịghakpọ ámọ mọ́ egberigbaayọ amú a paaemi a? Ị́mịnị baratụa zịnịotu pịrịmịnịsẹ, ị́mịnị ebi mịẹdịạye ka paa kịmịsẹ pịrịemi.
Asịyaịpesi emi bịnaowei itumị biin fịrịama kị wẹnị a paaemi (Gooyọ 11)
PAUL GBAA EGBERI DUO ARERE NANA
12. Paul gbaa Timothy pịrị yebo tebara ka kị baratụa asịyaịpesi emi bịnaowei-ama pịrịmịnị a o?
12 Paul baratụa Timothy pịrịwẹrị wó ụndụ mọ bá egberigbaa fịrị wẹnịmụ tolumọ yeama nanamị. (1Tim. 1:18; 2Tim. 4:5) Asịyaịpesi oweiama ámịnị Paul tolumọ yebo duo arere nana a paaemi. Tebara a o? Paul gbaa Timothy pịrịmịnị yebo ámọ goomịnịbị, gẹẹ ámịnị kị pịrị wẹrịemi bara ka kị goo, bá akị ánị ụndụbo tụa inyenrin a paaemi yeama dọụẹrị. Wo zụa mịẹdịayeama ditụa.
13. Te ye kị baratụa ị́ pịrịwẹrị Jehovah mọ naịn timimịnị a o?
13 “Iné angọ tolumọ wẹrị ebibara Ọkpọnanaowei karịmụyọ ka kị bọlọụdá.” (1Tim. 4:7b) Teekị ebibara Ọkpọnanaowei karị gbaamịnị egberi tuumị a o? Anị ị́mịnị Jehovah mọ naịn bá wó dọụmịnị yebo mịẹmụ dịsẹ nanamụ yọkị gbaamịnị. Wo zii ifiebị bịsẹ inyenrinbụọmị kọn tụa wo ziigha duonị, omịnị tebara kị mịẹtimi bịsẹ inyenrinbụọ nanamịnị a o? “Iné angọ tolumọ” gbaa Greek egberi imgbomị akị baịn tolumomịnị kịmị ebibara angọtụa wẹrị baịn tolumịnị bara kị gbaamịnị. Baịn tolumọmịnị kịmị ebibara tolumọwẹrị bọlọụ bụọmụ bara kị mịẹmịnị. Omịnị kpọ bịsẹbara ka kị angọtụa wẹrị wo mịẹ mú Jehovah mọ naịnmụ inyenrinbụọama nana agbẹị-emi.
14. Omịnị Bible goomịnị ifiebị te ka kị ikịọụ ghọ wẹrị agbẹị-emi a o? Mịẹdịaye gbaa
14 Jehovah mọ naịn dẹịnmụ yọ ka kị ịkịọụ a wẹrị Bible goo. Gbaamaba, Jesus kẹnị pẹrẹ asịyaịpesi mọ ẹrẹtei baramị te ka kị ị́ tolumọ ma o? (Mark 10:17-22) Bei kịmị bị Jesus kị Messiah bara nimi wẹrịemi anịa wó a tuuduomụ peibolou nanagha. Mọabịkpọ, “Jesus ụ tarị kụrọmọmị.” Jesus akị ụ mọ mọ́ ẹrẹ barabị tebara ka kị ị́ gbele ma o? Gaan barabị, ómịnị ebi iroro tọn angọ pịrịmu bara kị Jesus mọ dọụmị. Jehovah akị ụ tarị wẹrịemi bara kị Jesus kpọ mọ mịẹdịamị. (John 14:9) Ị́mịnị bei egberi mọ bá iné emi tịẹkiri mọ ditụa daba, angọ bii, ‘Ịmịnị teeki mịẹwẹrị Jehovah mọ naịn bá baratụa ine bịnaotubo kpọ pịrị dẹịnmịnị a o?’
15. Asịyaịpesi emi bịnaowei tetuu kị duonị ebi mịẹdịaye a paa agbẹị-emị a o? Tọnmọdịaye gbaa. (1Timothy 4:12, 13)
15 “Ebi mịẹdịaye ka paa peibolou nana otubo pịrị.” (1Timothy 4:12, 13 goo.) Timothy ebibara fun goo, bá kịmị tolumọ bara nimimụyọ Paul mọ dọụmị, anịa bịsẹyọ bẹtịbịgha, Timothy mọkpọ ebi inyenrinbụoama—Tarị, peibolou, bá yalịyalị timimụ inyenrinbụọ nana Paul mọ dọụmị. Tetuu a o? Ebi inyenrinbụọ yelaa akị bẹbẹ a gbaaye dẹịn-emi. Gbaamaba ị́mịnị angotụa egberigbaa gbelemọ talk pịrị dọụmịnịsẹ, ị́mịnị kpọ iné kụrọse kị kọn egberigbaa fịrị wẹnịmịnị ifiesẹ, laa ebịbara bịsẹ talk pịrị a paadẹ. Iné ebi mịẹdịa kpọ egberigbaayọ amú mụ yọbị yelaaemi bara mịẹdịamịnị.— 1Tim. 3:13.
16. (a) Asịyaịpesi-ama te sọnran ụwọụama ka kị ebi mịẹdịaye a paa a paaemi a o? (b) “ẹrẹmịnị bara” gbelemọ yọmị asịyaịpesi emi bịnaowei tebara kị kọn ebi mịẹdịaye a paamịnị a o?
16 Omịnị 1Timothy 4:12 didaba, Paul asịyaịpesi emi bịnaowei ebi mịẹdiạye a paa agbẹị-emi sọnran ụwọụama gbaa wẹrịemi. Ị́mịnị bẹtịbị Bible tolumọ angọ pịrịmịnị ifiemị, bịsẹ yebo akị tụa tolumo a paaemi a? Gbaamaba, ị́mịnị iné “ẹrẹmịnị bara” kpọ ebi mịẹdịaye a paa dọụmịnịsẹ, iné ẹrẹbịbịbo zịnịotu kụrọmọ a paaemi bara kẹrị iroro. Ị́mịnị mọkpọ ị́ daụ mọ yin mọ otubo mọ kị kẹnị warị inyenrinmịnị aba, á mịẹ ị́ pịrịmịnị yebo akị á kule a paaemi a? Kịmị yetolumọyọ assignment mịẹdaba, ị́mịnị mú ụbọ kule a paaemi a? Ị́ ba biibịbị parụmịnị ifiemị, laa fun digha bara biibịbị parụ a paaemi a? Ị́mịnị angọtụa ebi erẹbịbịama ẹrẹ dọụmịnị yọmị mịẹdịa amọ ị́mịnị tẹmẹanga bọọ bọlọụ bụọmịnị kịmị ka paaemi.—1Tim. 4:15.
17. Teeki baratụa asịyaịpesi emi bịnaowei pịrịwẹrị tẹmẹanga bọọ tọnpẹlẹdẹ yebo mịẹ beinmọmịnị a o? (2Timothy 2:22)
17 “Asịyaịpesi otu dịsẹmịnị yeama kịle, anịa kịrịye mịẹmụyọ kị gbinipẹlẹ.” (2Timothy 2:22 goo.) Timothy tẹmẹanga bọọ ụ mịẹ suusụọ a paaemi yebo datịẹmọdá Jehovah karịmụyọ kị kọn bọlọụdá bara Paul mọ kọn ụ kụrọmọmị. Kaanghaba zụa yeama seigha kị gbaa kpọ, ifie akịmịnị duonị tẹmẹanga ye mịẹmu ifiemị ba dụbagha bara ị́ mọ dọụẹrịdẹ kpọ paaemi. Gbaamaba, ị́mịnị iné ifiesẹ kọn ball gbọlụ, Internet duosụọ, bá vidio game-ama teinmọ yọ dii a, ifie mịẹpaamọ wẹrị Jehovah karịmụ fịrịama kị wẹnị. Kaanghaba ị́mịnị ifie mịẹpaamọ wẹrị Kingdom Hall tọlọmọ anịghakpọ cart kọn egberigbaa a paaemi. Bei fịrịbo ị́ mọ wẹnịmịnị yọmị baratụa ị́ pịrịwẹrị aya ikieotuama kpọ nanamịnị, ámịnị baratụa ị́ pịrịwẹrị tẹmẹanga mịẹmụyeama tọnpẹlẹ bá mịẹ beinmọ a paaemi.
ODUBOGBAAN ZỊNỊOTU PỊRỊMỊNỊ YỌBỊ TARỊAMA MỊẸPAAMOMỊNỊ
18. Tetuu kị duonị Mark mọ Timothy mọ bolouịmbẹlẹ bara omịnị mọ gbaa a paaemi a o?
18 Mark mọ Timothy mọ biin yeama ka barasinwẹrị beinmọ beinmọ bara odubogbaan ánị bịnaotubo pịrịmị, bịsẹ yọbị baratụa á pịrịwẹrị pọwẹị nanamị. (Acts 20:35) Mark odubogbaan wó bịnaotubo pịrịmụ yọ duonị, yọụ akpọmị biin yọama ka múmị. Ómịnị Jesus mọ bá egberigbaa fịrị gbelemọ yọbị biin yeama kị gẹẹmị. Timothy baratụa Paul pịrịwẹrị itu-ama mịẹpaamọ bá bịnaotubo kpọ kụrọmọmị. Gaan barabị, Mark mọ Timothy mọ wẹnị fịrịbosẹ Jehovah mịẹ bolouịmbẹlẹmị.
19. Tetuu kị duonị asịyaịpesi emi bịnaowei Paul gbaa Timothy pịrị egberi pei agbẹị-emi a o, ámịnị bịsẹbara mịẹdaba te tarịama kị á laamịnị a o?
19 Paul gẹẹ Timothy pịrị funbo ómịnị kọkọ Timothy tarị wẹrịemi bara mịẹdịamị. Bei Bible yọbo Jehovah kọkọ asịyaịpesi emi bịnaoweibo tarị emi bara kị mịẹdịa wẹrịemi. Asịyaịpesi otu, ámịnị bọlọụbụọ kị Jehovah mọ dọụmịnị. Anịduonị Paul tolumọ yebo akị adụdụ á tụadá baratụa zịnịotu pịrịmụ dịsẹ nana dẹịn. Ámịnị bịsẹbara mịẹdaba, ámịnị mị tịẹkiri kpọ ebi ụndụ nanamịnị bá mị bọlọụ kpọ “fagha fagha ụndụ” nanamịnị. 1Tim. 6:18, 19.
DUMA 80 “Taste and See That Jehovah Is Good”
a Peter ebibara iroromịnị kịmị, anịkị duonị ómịnị Jesus gbelemọ egberiama gbaa Mark pịrị timi ifiemị, Jesus paamọ yebo mọ, yebo ụ gbele bara mọ bá wó mịẹbara mọ gbaa Mark pịrịmị. Anịkị duonị Mark kpọ bịsẹbara diwẹrị Jesus mịẹbara gẹẹmị.—Mark 3:5; 7:34; 8:12.
b FOTO MỊ EMIBARA MỊ: Paul mọ Barnabas mọ yọụpaa egberigbaa fịrị wẹnịtimi ifiemị Mark baratụa á pịrịmịnị. Timothy kẹnị itu amú kụrọmọye akị bịnaotubo pịrịmịnị.