Bịnaoweiama—Ámịnị Kpọ Baratụa Itu-kosuotu Pịrị Kịmị A Paamụ Bara Ka Kị Fịrịwẹnịmịnị A O?

1. Fịrịmọpaaowei Paul tebara ka kị baratụa Itu-kosuotu pịrịmịnị bịnaoweibo dimọ ma o?

BARATỤA Itu-kosuotu pịrịmịnị binaoweibo yelaa fịrịama kị wẹnị itubo pịrịmịnị. Fịrịmọpaaowei Paul bei peibolou nana bịnaoweibo wẹnịmịnị fịrịbo a tọrụkẹrịmị. Gbaamaba, Paul fun gẹẹ Philippi bịnaotubo pịrị ifiebị, ómịnị Itu-kosuotubo mọ bá baratụa á pịrịmịnị bịnaoweibo kulemị.—Phil. 1:1.

2. Baratụa Itu-kosuotu pịrị fịrị bịnaowei Luis laa ifiemị ómịnị teeki gbaa ma o?

² Bịin benibiledẹ bịnaoweiama bo baratụa Itu-kosuotu pịrịmịnị kịmịama a paadaba pọwei nanamịnị. Gbaamaba, Devan 18 years ka timi baratụa Itu-kosuotu pịrị kịmị apaamị. Bịnaowei Luis 50 years dẹịndẹ kị baratụa Itu-kosuotu pịrị kịmị a paamị. Luis gbaamị, “Ine bịnaotubo akị ị tarị wẹrịemi barabị ị mọ irorode ifiesẹ, ịmịnị baratụa Itu-kosuotubo pịrịwẹrị fịrịwẹnị itu pịrịmịnị yọmị ị mịẹ pọwẹị nanamịnị!”

3. Te biibịbịama kị wo mọ kẹrị ẹrẹtei dọụmịnị a o?

³ Ị́mịnị benibiledẹ anịa naa baratụa Itu-kosuotu pịrị kịmị a paaghaba, bịsẹ bara paamọ bara ị́ mọ gbinipele angọ pịrị a paaemi a o? Teeki ị́ dịnẹmọwẹrị bịsẹ fịrị wẹnị dịsẹnana a paaemi a? Bịble gbaa bara didaba, bịsẹ fomuun nana dọụmịnịsẹ, ịmịnị te inyenrinbụoama kị nana agbẹị-emi a o? Bei egberitịbịbị, omịnị bei biibịbịbo kẹrị ẹrẹteimịnị. Anịa wo bọlọụ, baratụa Itu-kosuotu pịrịmịnị otu wẹnịmịnị fịrịbo ditụa.

BARATỤA ITU-KOSUOTU PỊRỊMỊNỊ OTUBO TẸ FỊRỊ KỊ WẸNỊMỊNỊ A O?

4. Baratụa Itu-kosuotu pịrịmịnị otubo tẹ fịrịama kị wẹnịmịnị a o? (Foto kpọ dii.)

⁴ Baratụa Itu-kosuotu pịrịmịnị bịnaoweibo yalịyalị tẹmẹ kị á sẹlẹwẹrị fịrịwẹnị Itu-kosuotubo mọ bá itu mọ pịrịmịnị. Bei binaoweibo biin fịrịama kị wẹnịmịnị gbaamaba ámịnị egberigbaamu ete mịẹpaamọ itu bọọ emi bịnaotubo pịrị bá bịnaotubo ifiebosẹ kọn egberigbaamụ funbo nanamụ yọ kpọ mịẹpaamọ itu bọọ egberi gbaamịnị otubo pịrịmịnị. Kingdom Hall tọlọmọ fịrị wẹnịmịnị. Kịmị kịẹn fịrị bá audio/vidio fịrị kpọ wẹnịmịnị. Bei fịrịbo ifiebosẹ kị wẹnịmịnị fịrịama. Bei bịnaoweibo tẹmẹanga kpọ kụrọemi kịmịama; Yelaadẹịn yemị ámịnị Jehovah tarị bá angọtụa wó kịrịị ụwọụbo kị diwẹnịmịnị. Bá ámịnị olomu tarị akị itu bọọ emi bịnaotubo kpọ ghọ nana wẹrịemi. (Matt. 22:​37-39) Benibiledẹ bịnaowei tebara kị mịẹtimi laa baratua Itu-kosuotu pịrị kịmị a paamịnị a o?

5. Baratụa Itu-kosuotu pịrị kịmị a paa dọụmịnị bịnaowei teeki mịẹ agbẹị-emi a o?

⁵ Bible mị kịmị mịẹtimi laa baratụa Itu-kosuotu pịrị ụbọ a paamọ inyenrinbụọama gbaa wẹrịemi. (1Tim. 3:​8-10, 12, 13) Ị́ kpọ baratụa itu pịrị fomuun nana dọụmịnịsẹ angọtụa bịsẹ Bible yọbo goo bá gbaa wẹrịemi bara inyenrin paamọ. Anịa ị́mịnị bọlọụ, tetuu kị duonị baratụa Itu-kosuotu pịrị kịmị a paa dọụmịnị a biibịbịmị kọn angọ bii.

TEEKI Ị́ DỊNẸMỌ A PAAEMI A?

6. Teeki ị́ dịnẹmọwẹrị fịrịwẹnị itu pịrị a paaemi a o? (Matthew 20:28; bọlọụ dii.)

⁶ Jesus Christ kị dụbadẹịn mịẹdịaye mịe wo dịa wẹrịemi, wó mịẹ yebosẹ Jehovah mọ kịmịawọụ mọ tarịyọ kị ụ dịnẹmọ wẹrị mịẹmị. Bịsẹ tarị kị ụ dịnẹmọwẹrị angọtụa fịrịwenị kịmịotu pịrịmị. (Matthew 20:28 goo; John 13:​5, 14, 15) Tarị kị ị́ dịnẹmọwẹrị baratụa Itu-kosuotu pịrị kịmị a paa dọụmịnịsẹ, Jehovah baratụa ị́ pịrịwẹrị iné tọnmịnị iroro mịẹ beinmọmịnị bá tarịama kpọ ị́ laamịnị.—1Cor. 16:14; 1Pet. 5:5.

7. Tetuu kị duonị bịnaowei tokoni nanamụyọ kị duonị baratụa Itu-kosuotu pịrị kịmị a paa dọụmịnị bara mịẹ agbẹịgha o?

⁷ Akpọ mị, kịmịotu ifiebosẹ ánị wẹnịmịnị fịrịbo duonị kịmịama á tokoni kị dọụmịnị. Jehovah ogbomị bịsẹ bara mịẹgha. Jesus mịẹ bara kị dimịẹmịnị bịnaoweimị, ómịnị kị kụrọdẹịn anịghakpọ yelaadẹịn emi bara kọn angọ mịẹgha. Fịrị akị bịsẹ a paa inyenrinbụọ nana wẹrịemi kịmị pịrịdaba, ómịnị angọ-iyerimọwẹrị ebibara Jehovah yelaa anịnabo diigha fa. Ómịnị dụba akị odubo-gbaan kịmịotu pịrịyọ dẹịn-emi bara kị iroromịnị. (John 10:12) Jehovah angọ serimọmịnị kịmị dịsẹgha bá tarị kpọ kọn bịsẹ ụbọ pịrịgha fa.—1Cor. 10:​24, 33; 13:​4, 5.

8. Jesus te ka kị fịrịmọpaaotubo tolumọ ma o?

⁸ Zụa ifieama, Jesus mọ naịntimi ikieotubo kpọ tokoni akị angọ pịrịmụ iroroye tọnmị. Wo wẹrị Jesus maá fịrịmọpaaotu ditụa—anị James mọ John mọ. Jesus agọnọ laadaba yelaa fịrịama akị á pịrị bara ámịnị mọ biimị. Jesus ánị biimịnị yebị kịrịemi bara gbaagha. Anịa, ómịnị oi-mamụfịnị fịrịmopaaotubo tịịnwẹrị gbaa á pịrịmị: “Ánị ovurumị dụbadẹịn dọụmịnị kịmịsẹ odubo-gbaan kọọ otubo pịrị, bá bọlọụ yọkị dọụmịnị kịmịsẹ odubo-owei ka paa kọọ otubo pịrị.” (Mark 10:​35-37, 43, 44) Bịnaowei ebi ịkịọụ kị nanawẹrị odubo-gbaan itu pịrị dọụmịnịsẹ, arereama kị itu laamịnị.—1Thess. 2:8.

TEEKI BARATỤA Ị́ PỊRỊWẸRỊ FỊRỊ WẸNỊMỤ DỊSẸ NANA DẸỊNMỊNỊ A?

9. Ị́mịnị tebara ka kị baratụa Itu-kosuotu pịrị kịmị a paamọ dịsẹnana yo mịẹ kụrọmọ dẹịnmịnị a o?

⁹ Tamanaịnyọ fagha baramị, ị́mịnị Jehovah tarị bá odubo-gbaan zịnịotu pịrị dịsẹnana wẹrịemi, anịa ị́mịnị baratụa Itu-kosuotu pịrị kịmị a paamọ yọbị dịsẹ nanagha kpọ paaemi. Teeki baratụa ị́ pịrị a paaemi a? Odubo-gbaan iné bịnaotubo pịrịmịnị bolou bọọ emi pọwẹị kẹrị iroro dii a. Jesus gbaamị: “Ye akị kịmị pịrịmịnị yọmị pọwẹị mịẹpaamọ akị kẹrịakịmịnị yọ dẹịn-emi.” (Acts 20:35) Jesus bịsẹ bara kị mịẹmị. Ómịnị odubo-gbaan zịnịotu pịrịmịnị bolou duo pọwẹị nanamị, ị́ kpọ ụ dimịẹ a paaemi.

10. Jesus tebara ka kị odubo-gbaan kịmịama pịrịmịnị yọbị ụ dịsẹ-emi bara mịẹdịa ma o? (Mark 6:​31-34)

¹⁰ Wo wẹrị Jesus fịrịwẹnị zịnịotu pịrịyọ duo pọwẹị nana bara dii. (Mark 6:​31-34 goo.) Kẹnị ifie, Jesus mọ wó tuuduo-otubo mọ egberigbaatimi dẹịndẹ duonị, ámịnị yọ dọụwẹrị embafou dọụtimimị. Anịa Jesus mọ wo fịrịmọpaaotubo mọ mú yọ laa ifiebi biin kịmịama kị bọlọụ bịsẹ yọ laawẹrị timi á korumịnị, ámịnị Jesus pịrị tolumọ yọ ka bomị. Jesus mọ wó fịrịmopaaotubo mọ “fịyaị fịmụ ifie kpọ nanagha.” Anịduonị Jesus á tolumọgha fa bara gbaa kpọ paatimimị, anịghakpọ dọlọ á tolumọwẹrị, ‘á wẹrị mú’ gbaa kpọ paatimimi. Anịa Jesus á tarịemi duonị ómịnị “biinyeama kọn á tolumọmị.” Ómịnị á tolumọtimi “ifie mú fade” kpọ mọkpọ á tolumọmịnị. (Mark 6:35) Ómịnị bịsẹ ifiebị á tolumọgha kpọ seigha, anịa “ómịnị dieneni kọn ánị ghọ nana yọ kị ụ dịnẹmọwẹrị á tolumọmị.” Omịnị á tarịemi kị duonị á tolumọmụ dịsẹnanamị. Fịrịwẹnị zịnịotu pịrị yọbị kọkọ Jesus mịẹ pọwẹị nanamị.

11. Jesus tebara ka kị odubo-gbaan ụ peitimi kịmịbo pịrị ma o? (Foto kpọ dii.)

¹¹ Jesus Ọkpọnanaowei ebiegberi gbaa bịsẹ kịmịbo pịrịsiindẹ mị, ómịnị zịnịye kpọ mịẹmị. Ómịnị tamamaa bara fịyaị mịẹpaamọwẹrị wó tuuduo-otubo fịrịmọ fịyaịbo dịẹpaamọ kịmịbo pịrị fịmị. (Mark 6:41) Jesus bei mịẹ yebị, odubo-gbaan zịnịotu pịrịmụ bara ka kị wó fịrịmọpaa-otubo tolumọmị. Angọ paamọ ye mịẹ zịnịotu pịrịmịnị yọmị yelaaemi bara Jesus mọ kọn wó fịrịmọpaaotubo tolumọmị. Baratụa Itu-kosuotu pịrịmịnị kịmịbo kpọ bịsẹ yelaa fịrị a paabo kị wẹnịmịnị. Fịrịmọpaaotubo Jesus wẹnị tamamaa fịrịbị ẹrẹmị bá ụ mọ mọ́ gbelei fịyaịbo dịẹpaamọ “kịmịsẹ pịrị fịtimi biribein yọbị” opu bara ka kị á mịe bolouịmbẹlẹ wẹrịemi! (Mark 6:42) Jesus ifiebosẹ zịnịotu ebi kị dọụ akị wó angọ ebimụ yọ dẹịnmị. Ómịnị kiriogbo bọọ a timi ifiesẹ akị odubo-gbaan kịmịotu kị pịrịmị. (Matt. 4:23; 8:16) Jesus kịmịama tolumọ bá ánị dọụemi yeama kpọ mịẹ á pịrị yọmị bolouịmbẹlẹ kụrọmọmị. Tamanaịnyọ fagha barabị, ị́mịnị kpọ angọtụa wẹrị baratụa Itu-kosuotu pịrị kịmị a paamụ yọmị pọwẹị nanamịnị bara wo mọ nimi wẹrịemi.

12. Tetuu kị duonị omịnị ye a paagha duonị laa baratụa itu pịrịgha fa bara iroro agbẹịgha o?

¹² Ị́mịnị naa mịẹmú lagha bara kị iroromịnị kpọ, suusụọ kụmọ. Ị́mịnị laa fịrịwẹnị itu pịrị a paaemi ebi inyenrinbụọama nana wẹrịemi. Paul 1Corinthians 12:​12-30 bọọ gbaa wẹrịemi egberibo baratụa ị́ pịrị a paaemi, anịduonị tẹẹbịbị mịẹdá bịsẹ yọ goo angọ pịrị. Paul gbaa egberibo didaba, Jehovah karịmịnị kịmịbọsẹ, itu bọọ yelaaemi fịrị wẹnimịnị bara mịẹgaan wẹrịemi, ị kpọ yelaa fịrị wẹnịmịnị. Tịẹkirimị ị́mịnị naa baratụa Itu-kosuotu pịrị kịmị a paagha kị gbaa kpọ, dẹịnsụọ kụmọ. Anịa, ị́mịnị tịẹkiribị laa wẹnị Jehovah mọ bá bịnaotubo mọ pịrị a paaemi fịrịama kẹrị iroro. Itu-kosuotubo iné laa kụrẹị mịẹmụyeama nimiwẹrị fịrị dịẹ ị́ pịrị wẹnị a paaemi bara nimi.—Rom. 12:​4-8.

13. Tetuu kị duonị baratụa Itu-kosuotu pịrị dọụmịnị ụbọ laa nana agbẹị-emi inyenrinbụọbo nana a paaemi a o?

¹³ Ị́mịnị kpọ laa baratụa Itu-kosuotu pịrị kịmị a paa agbẹị-emi zịnị tuu wo mọ ditụa: baratụa Itu-kosuotu pịrị kịmị nana agbẹị-emi inyenrinbụọbo Christuuduo-otubosẹ kị nana agbei-emi. Gbaamaba, Christtuuduo-otubosẹ kị Jehovah mọ naịntimi agbẹị-emi, ye dịẹpaamọ zịnịotu pịrị yọ duo pọwẹị nana agbẹị-emi bá Christtuuduo-otu ebi inyenrinbụọbo inyenrin paamọ agbẹị-emi. Anịa, bịnaowei teeki mịẹwẹrị laa baratụa Itu-kosuotu pịrị kịmị a paamịnị a o?

BỊNAOWEI BỊ NANAMỤ INYENRINBỤỌAMA

14. Teeki “angọtụa fịrịwẹnị” tuu a o? (1Timothy 3:​8-10, 12)

¹⁴ Wo wẹrị 1Timothy 3:​8-10, 12 gbaa wẹrịemi inyenrinbụọbo ditụa. (Goo.). Baratụa Itu-kosuotu pịrị dọụmịnị bịnaowei “angọtụa fịrịwẹnị.” Zịnị bara kọn bei egberi ụngbọmị gbaa dọụmịnịsẹ kọn “didụbamọ,” anịghakpọ “kịmịotu pịrị didụbamọ agbei-emi” gbaa a paaemi. Ị́mịnị ba kịmịotumọ dẹrị kụmọ bara gbaagha. (Eccl. 3:​1, 4) Anịa, itu bọọ wẹnịmịnị fịrịmị angọtụa bara ka kị wẹnịmụ bara kị gbaamịnị. Fịrị akị ị́ pịrịdaba, ị́mịnị ebi ifie bá ebibara akị fịrị wẹnịsiinmịnị aba, itu mị ị́ didụbamọmịnị.

15. Teeki “kịmị lẹlẹmogha fa” bá “mẹnẹmọtu tụa inyenrinbụọ nanagha fa” tuumị a o?

¹⁵ “Kịmị lẹlẹmọgha” gbaadaba, akị aritụagha, ikpegha, bá eti kọn tụa agbẹị-emi kịmị ka paamụ yọ kị bẹmọ wẹrịemi. Iné gbaadẹ yesẹ mịẹmịnị, bá kịmị lẹlẹmọ inyenrinbụọ kpọ nanagha fa. (Prov. 3:32) “Mẹnẹmọtu tụa inyenrinbụọ nanagha fa” gbaadaba, ị́mịnị iné yọụmịnị fọụmị kịmị lẹlẹmọwẹrị sịlị nanagha fa bá gerede bara ka kị sịlị gbelemọ yeama mịẹmịnị. Sịlị nanamụ yọ duonị, ị́ mọ mọ́ Jehovah karịmịnị otubo ị́mịnị mọ lẹlẹmọgha fa.

16. (a) Wụrụ bou kụrọmọgha fa gbaabị, teeki gbaamịni a o? (b) Teeki peree ikịọụ nana tuubị a o?

¹⁶ “Wuru bou kụrọmọgha fa” gbaa egberịmị, anị ị́mịnị kụrọ wụrụ bọụ kụrọmọ bá kịmịotu kpọ bịsẹ bara akị ị́ nimidẹ bara paa kụmọ. “peree ikịọụ nana” gbaadaba, anị ị́mịnị Jehovah dọụbara ka kị yemịẹmịnị. Ị́mịnị yalịgha kị gbaa kpọ, Ọkpọnanaowei mọ naịn-emi yọ duo paamịnị pọwẹịmị ị́ kpọ mọ nana.

17. Tebara ka kị bịnaowei laa fịrị wẹnị a paaemi bara dadimịnị a o? (1Timothy 3:10; foto kpọ dii.)

¹⁷ “Laa fịrị wẹnị a paaemi bara kọn á dadi.” Gbaamịnị barasẹ, ámịnị fịrị kọn ị́ pịrịdaba ị́mịnị laa wẹnịmịnị bara mịẹdiadẹ. Anịduonị, Itu-kosuotu fịrị kọn ị́ pịrịdaba, angọ-iyerimọ bara Jehovah ogbo gbaa bara kị diwẹnị. Ebibara kọn ị́ pịrị wẹrịemi fịrị bọọ sụọtuunimi bá fịrị wẹnịsiin agbẹị-emi ifie kpọ nimipẹlẹ. Ị́mịnị kịlịlị bara kọn ị́ pịrị wẹrịemi fịrị wẹnidaba, itu bọọ emi bịnaotu iné tẹmẹanga bọlọụ-bụọmịnị barabị ẹrịwẹrị tọrụkẹrịyọ mịẹdịamịnị. Pebida Itu-kosuotu angọtụa benibeledẹ bịnaoweibo tolumọ. (1Timothy 3:10 goo.) Iné itu kpọ benibeledẹ oia kụraị dẹịndẹ asịyaịpesiama emi a? Ámịnị Bible tolumọ angọ pịrịmịnị a? Ámịnị angọ tolọmọwẹrị yetolumọyọ ladaba biibịbị parụ bá ifiebosẹ angọtụa egberigbaayọ amúmịnị? Bịsẹ bara kị paaemi aba, ánị laadẹ kụraịbo dịwẹrị fịrị kọn á pịrị. Bịsẹ bara mịẹdaba ámịnị “laa fịrị wẹnị a paaemi bara kọn á dadi” a paadẹ “. Mịẹdẹ kị ámịnị sia kụraị mọ naịndaba, ámịnị laa baratụa Itu-kosuotu pịrị kịmịama a paa a paadẹ.

18. Sei ye akị tịbị-gbaịnmọ wẹrịemi kịmị a paagha fa gbaa egberimị, teeki wó tuu a o?

¹⁸ “Sei ye akị tịbị-gbaịnmọ wẹrịemi kịmị a paagha fa.” Gbaamịnị barabị, kịmị ebituu nanawẹrị ị́mịnị kụrọsei mịẹ wẹrịemi bara kọn ị́ gbaịnmọ kụmọ. Wo nimi wẹrịemi baramị, kịmịotu ikpe egberiama kọn Christtuduo-otu gbaseimọ a paaemi. Kịmịotu ikpe egberiama akị Jesus gbaịnmọ baramị, akị wó tuuduo-otubo kpọ gbainmọmịnị bara Jesus mọ gbaamị. (John 15:20) Anịa, ị́mịnị Jesus bara ebi inyenrinbụọ mịẹdịadaba, itu bọọ emi otubo ebi tọrụ akị ị́ dịimịnị.—Matt. 11:19.

19. Kẹnị ere kị nana egberimị, teeki wó tuumị a o?

¹⁹ “Kẹnị ere kị nana wẹrịemi.” Ere nana daba, Jehovah gbaa bara ka kị ere nana wẹriemi bịnaowei ka paa—kẹnị owei, kẹnị ere. (Matt. 19:​3-9) Christtuuduo ụbọ naa wó nanagha ere mọ bụnụ kụmọ. (Heb. 13:4) Zịnị yeama mọkpọ emi. Ómịnị benebene ụ taa a barasinwẹrị, zịnị ere mọ bụnụ dịsẹ nanagha fa.—Job 31:1.

20. Bịnaowei tebara ka kị tọrụtụa wó warịbolou dimịnị bara mịẹdịamịnị a?

²⁰ “Tịbị á timi ebibara ánị awọụbo mọ bá ánị warịbolou mọ tolumọmịnị otu ka paa.” Ị́mịnị warị-tịbiowei aba, ebịbara ị́ laaemi fịrịbo wẹnị. Ifiebosẹ family worship mịẹ. Egberigbaayọ amúdaba ị́ taa mọ wẹnị, bá iné awọụbo mọ kpọ wẹnị gbelei. Baratụa iné awọụbo pịrịdá Jehovah mọ ebi ikie kẹrị. (Eph. 6:4) Ebibara tọrụtụa wó warịbolou dimịnị kịmịsẹ, laa ebibara akị itu bọọ emi anịnabo kpọ dimịnị.—1Timothy 3:5 kọn tụa dii.

21. Ị́mịnị naa baratụa Itu-kosuotu pịrị kịmị a paagha aba, teeki mịẹ agbẹị-emi a o?

²¹ Bịnaowei-otu, ámịnị naá baratụa Itu-kosuotu pịrị kịmị a paagha aba, tẹẹ Jehovah pịrị bá ebibara mị egberitịbi tolumọ angọ pịrị. Mịẹdẹ kị laa baratụa Itu-kosuotu pịrị kịmị a paamọ inyenrinbụọbo tolumọ angọ pịrị bá akị tụa inyenrin. Ị́mịnị akị Jehovah mọ iné bịnaotubo mọ a nana wẹrịemi tarị kẹrị iroro. Odubo-gbaan á pịrị dịsẹ nanayọ mịẹ kụrọmọ dẹịn. (1Pet. 4:​8, 10) Odubo-gbaan iné tẹmẹanga bịnaotubo pịrịmịnị yọbị dụba pọwẹị kị ị́ laamịnị. Ị́mịnị angọtụa baratụa Itu-kosuotu pịrị kịmị a paadaba, Jehovah tarịama kọn ị́ pịrịmịnị!—Phil. 2:13.