EGBERITỊBỊ 42
DUMA 103 Shepherds—Gifts in Men
Jehovah Mọ Jesus Mọ Ebi Dịẹpịrịye A Paaemi Oweiama Kọn Wo Pịrị Yọmị Tọrụkẹrịyọ Mịẹdịa
“Ómịnị agọnọ amú ifiebị . . . , ómịnị ebi dịẹpịrịye a paaemi oweiama kọn wo pịrịmị.”—EPH. 4:8.
TOLUMỌ DỌỤMỊNỊ YEBO
Bei egberitịbịmị, baratụa itu-kosuotu pịrịmịnị otu, itu-kosuotu bá itu dii-otubo baratụa wo pịrịmịnị bara tolumọmịnị, bá omịnị tọrụkẹrịyọ mịẹ bei peibolou nana bịnaoweibo dịamụ bara kpọ tolumọmịnị.
1. Jesus te yeama ka kị wo pịrị ma o?
BARAFINIMỌ Jesus laa kịmị bei kịrịogbo bọọ fa. Jesus kiriogboma timi ifiemị, ómịnị sịlị akịgha bara wo nana wẹrịemi kụrọ kọn tamama yeama mịẹ kịmịama pịrịmị. (Luke 9:12-17) Jesus wó ụndụ kpọ kọn fịị wosẹ pịrịmị, anị kọkọ Jesus akị wo pịrịdẹ dụbadẹịn dịẹpịrịyemị. (John 15:13) Jesus fịyọduo-waịserii ifie duobosẹ, ómịnị baratụa kịmịotu pịrịtimi bei tịẹkiri laadẹ. Jesus kọkọ wó gbaawẹrị bara mịẹdẹ, ómịnị Jehovah biiwẹrị yalịyalị tẹmẹ kọn wo pịrịwẹrị, tolumọye mọ kụrọmọye mọ kọn wosẹ pịrịmịnị. (John 14:16, 17, ftn.; 16:13) Jesus wo yetolumọyọbo duo wo tolumọ wẹrị, omịnị laa tuuduo-otu dọụ fịrịmị akị akpọyọrẹịsẹ a wẹnịmịnị.—Matt. 28:18-20.
2. Ephesians 4:7, 8 “dịẹpịrịye a paaemi oweiama” gbaadaba te kịmịama kpọ sụọemi a o?
2 Jesus akị wo pịrị zịnị dịẹpịrịye wo mọ ditua. Fịrịmọpaaowei Paul gbaa amọ Jesus agọnọ amúdẹbị, “ómịnị dịẹpịrịye a paaemi oweiama kọn wo pịrịmị.” (Ephesians 4:7, 8 goo.) Paul gbaa barabị Jesus bei oweibo akị itu mịẹ kụrọmọ dọụmịnị kị duonị kọn wo pịrị wẹrịemi. (Eph. 1:22, 23; 4:11-13) Bei tịẹkịrịbị “dịẹpịrịye a paaemi oweiama” wo mọ tịịndaba anị itu-kosuotu, baratụa itu-kosuotu pịrịmịnị bịnaoweibo mọ bá teree dii-otubo mọ bise bolouma sụọemi.a Anịa bei kịmịbo yalịyalịgha duonị zụa ifieama ámịnị mịẹkirimịnị. (Jas. 3:2) ámịnị mịẹkirimịnị kị gbaa kpọ, wo Nanaowei Jesus Christ bei kịmịbo ka kị baratụa wo pịrịmịnị, ámịnị kọkọ dịẹpịrịye ka paa wosẹ pịrịemi.
3. Wosẹ baratụa bei ebi dịẹpịrịye a paaemi bịnaoweibo pịrịmụ bara tọnmọdịa
3 Jesus itu kụrọmọmụ fịrị akị bei kịmịbọ pịrị wẹrịemi. (Eph. 4:12) Bịsẹ bara kị gbaa kpọ wosẹ baratụa á pịrịwẹrị a paaemi. Gbaamaba wo zụa kịmịama Kingdom Hall kẹrị fịrịama wẹnịmịnị. Zụa kịmịama mú Kingdom Hall kẹrịagha anịa baratụa fịrịwenimịnị otubo kị pịrịmịnị, tebara a o? Fịyaị mịẹpaamọ, motor akị kịmịbọ saịmú bá zịnị fịrịama kpọ wẹnị á pịrịwẹrị á barịmịnị. Bịsẹ kpeikẹnị bara kị wosẹ wo ẹrẹbịbịbo mọ bá wo mịẹmịnị yebo mọ akị baratụa teree dii-otubo mo, itu-kosuotubo mọ bá baratụa itu-kosuotu pịrịmịnị otubo mọ pịrị. Wo wẹrị wosẹ bei bịnaotubo angotụa wẹnịmịnị fịrịbo duo arere nanamịnị bara ditụa bá wosẹ tọrụkẹrịyọ mịẹ á dịa, bá Jesus kpọ dịamụ bara kẹrị ẹrẹtei.
BARATỤA ITU-KOSUOTU PỊRỊMỊNỊ BỊNAOWEIBO “EBI FỊRỊAMA KỊ WẸNỊMỊNỊ”
4. Bọlọụ kụraị sonransibị baratụa itu-kosuotu pịrịtimi bịnaoweibo te ebi fịrịama kị wẹnịtimi ma o?
4 Bọlọụ kụraị sonransibị, zụa bịnaoweiama bo baratụa itu-kosuotu pịrị otuama a paamị. (1Tim. 3:8) Paul “ebi fịrịama wẹnịmịnị” otu gbaa ifiebị kaanghaba bei bịnaotubo kị gbaamịnị. (1Cor. 12:28) Gaan bo paaemi yọmị baratụa itu-kosuotu pịrịmịnị bịnaoweibo biin yelaa fịrịama kị wẹnịmịnị, bịsẹ yọmị baratụa itu-kosuotubo pịrịwẹrị laa fomuun nanawẹrị bịnaotubo kekere by á tolumọdẹ. Gbaamaba, baratụa itu-kosuotu pịrịmịnị otubo kị Ọkpọnanaowei egberibo gẹẹ bá gẹẹmụ yebo fei timi-mị.
5. Wo ifie kpọ baratụa itu-kosuotu pịrịmịnị bịnaoweibo te ebi fịrịama kị wẹnịmịnị a o?
5 Iné itumị, baratụa itu-kosuotu pịrịmịnị bịnaoweibo wẹnịmịnị fịrịbo kẹrị iroro dii. (1Pet. 4:10) Itu boloumị, bei bịnaotubo, sịlị, egberigbaa ete, funbo dịẹpaamọ, farịye, Kingdom Hall tọlọmọ bá kịmị kịẹn gbelemọ fịribọ kị wẹnịmịnị kpọ paaemi. Bei fịrịbosẹ baratụa itu pịrịwẹrị bọlọụ ámúmịnị. (1Cor. 14:40) Bịsẹ yọ kị bụọmọ kpọ baratụa itu-kosuotu pịrịmịnị bịnaoweibo yetolumọyọ bọọ ẹrẹbịbị kpọ pịrịmịnị. Zụa ifieama bei bịnaotubo ovuru duo kẹnị ụbọ sẹlẹwẹrị group overseer palịmọ fịrịwẹnị owei a paamịnị, bá itu-kosuotubo sụọmọwẹrị mú bịnaotuama kụrọmọ kpọ paaemi.
6. Baratụa itu-kosuotu pịrịmịnị bịnaoweibo angọtụa te fịrịama kị wẹnịmịnị a o?
6 Baratụa itu-kosuotu pịrịmịnị bịnaoweibo kọkọ baratụa itu pịrịmịnị a o? Beberly,b tịịnmịnị bịnaraụ, ámịnị Bolivia k’emi, ámịnị gbaamị. “Yetolumọyọ ámúdaba ịmbẹlẹ bụọmị, baratụa itu-kosuotubo pịrịmịnị bịnaoweibo ị mọ kulemị.” Ámịnị mọkpọ gbaamị “ánị wẹnịmịnị fịrị duonị, ịmịnị laa duma tuun, biibịbị parụ, ẹrẹbịbịama pei bá vidiobo mọ fotobo mọ duo tolumọye nanamịnị. Bịsẹ yo bụọmọ kpọ yetolumọmịnị ifiebị ámịnị Kịngdom Hall lemịnị bá phonu duo yetolumọ yo bọọ paaemi otubo kpọ dimịnị. Yetolumọ fadaba, ámịnị kị bọlọụdáwẹrị Kịngdom Hall tọlọmọmịnị, sịlị ikpedibo kpọ dimịnị bá wo dọụ wẹrịemi funbo kpọ kọn wo pịrịmịnị. Ịmịnị kọkọ á kulemịnị!” Leslie, Colombia k’emi bịnaraụ, á yeibị itu-kosuowei. Ámịnị gbaamị: “Baratụa itu-kosuotubo pịrịmịnị bịnaoweibo fagha wẹrị a, fịrịbo kụrọ Ị yei pịrịmụ timimị. Ị yei ifie kpọ faghamụ timimị. Bei bịnaotubo dịsẹ nana bá angọtụamịnị yọmị, ine tọrụkẹrịmị.” Kọkọ wosẹ tọrụkẹrị-emi.—1Tim. 3:13.
7. Omịnị tebara ka kị baratụa itu-kosuotu pịrịmịnị bịnaoweibo mịẹmịnị yebo wo tọrụkẹrị-emi bara mịẹdịamịnị a o? (Foto kpọ dii.)
7 Baratụa itu-kosuotu pịrịmịnị bịnaoweibo wẹnịmịnị fịrịbo wo dịsẹ-emi. Bịsẹ bara kị gbaa kpọ Bible mọkpọ gbaamị: “ámịnị tọrụkẹrị-emi bara mịẹdia.” (Col. 3:15) Krzysztof, Finland k’emi itu-kosuowei, akị tọrụkẹrị-emi bara mịẹdịamịnị ụwọụ gbaamị, “ịmịnị phonu duo fun gẹẹ baratụa itu-kosuotu pịrịmịnị bịnaowei yarịmịnị, ịmịnị Bible yọ mọ bá wó gbaawẹrị ị kụrọmọ egberi kpọ gẹe tụamịnị anighakpọ, ịmịnị wo wẹnị ebi fịrị gẹẹ tụawẹrị ụ kulemịnị.” Pascal mọ Jael mọ, New Caledonia k’emi, ámịnị tẹẹbịbị mịẹ akị baratụa itu-kosuotu pịrịmịnị bịnaoweibo pịrịmịnị. Pascal gbaamị, “bei ovurusẹ omịnị tẹẹ akị baratụa itu-kosuotu pịrịmịnị bịnaoweibo pịrịmịnị, Jehovah bei bịnaotubo kọn wo pịrị yọ kpo akị ụ kulemịnị, bá Jehovah á mọ mọ́ timi bá baratụa á pịrị yọ kpọ tẹẹmịnị.” Jehovah mị tẹẹbịbị paabo parụmịnị, bịsẹ yọmị wrere mịẹpaamọ itusẹ pịrịmịnị.—2Cor. 1:11.
ITU-KOSUOTUBO “ÁNỊ OVURU BỌỌ ANGỌTỤA FỊRỊWẸNỊ KỤRỌMỌMỊNỊ”
8. Tetuu kị duonị Paul bọlọụ sọransii itu-kosuotubo “angọtụa fịrịwẹnịmịnị bara” gbaa ma? (1Thessalonians 5:12, 13)
8 Bọlọu Christtuuduo-otu itu bọọ timi itu-kosuotubo angọtụa fịrịwẹnịmị. (1Thessalonians 5:12, 13 goo; 1Tim. 5:17) ámịnị kị ituma bọlọụdáwẹrị yetolumọyọ bọọ bịnaotubo tolumọ bá kẹnịsụọmọwẹrị iroroama tọnpẹlẹ timi-mị. ámịnị agbẹị-emi “tolumọbịbịama” akị á pịrịwẹrị itu kekere timi-mị. (1Thess. 2:11, 12; 2Tim. 4:2) Bịsẹ yo bụọmọ kpọ bei kịmịbo ánị warịbolou gbalị bá á mọ Jehovah mọ ikie kpọ mịẹ kụrọmọmịnị.—1Tim. 3:2, 4; Titus 1:6-9.
9. Itu-kosuotubo te fịrịama kị wẹnịmịnị a o?
9 Itu-kosuotu ifiebosẹ kị fịrị wẹnịmịnị. Ámịnị egberigbaa otu. (2Tim. 4:5) Ámịnị egberigbaa fịrịmị bọlọụdámịnị, akị etebo egberigbaamụ bara kpọ tọnpẹlẹmịnị, bá ebi egberigbaamụ bara kpọ kọn bịnotubo tolumọmịnị. Ámịnị dieneni nana bá kẹnịanga kpọ asụọgha bara ụgụla pẹlẹmịnị. Kịmị itu bọọ kụrọsei mịẹdaba, itu-kosuotubo baratụa ụbọ pịrịwẹrị waị bo Jehovah ikie-ụbọ a paamịnị. Bá ámịnị kịlịkịlị bara itubị yalịyalị timimụ yọ kpọ mịẹmịnị. (1Cor. 5:12, 13; Gal. 6:1) Wo nimi wẹrịemi baramị, itu-kosuotubo anịna gbalị-otu fịrị kị wẹnị dẹịnmịnị. (1Pet. 5:1-3) Ámịnị Bible duo yelaa egberiama kọn wo tolumọmịnị, angọtụa ituma emi bịnaotubosẹ nimi-mịnị, bá Bible kọn warị amú bịnaotubo kụrọmọmịnị. Zụa itu-kosuotuama Kingdom Hall kẹrị bá tolọmọ fịrị kpọ wẹnịmịnị, zụa ba opubenịị gbelemọ fịrịama kị wẹnịmịnị, zụa itu-kosuotuama Hospital Liaison Committees bá Patient Visitation Groups fịrị kpọ kọn tụa wẹnịmịnị. Itu-kosuotubo kọkọ angọtụa fịrịwẹnị wo pịrịmịnị!
10. Tetuu kị duonị omịnị tọrụkẹrịyọ mịẹ itukosuotubo dịa agbẹị-emi a ọ?
10 Jehovah gbaamị anịna gbalị-otuama tọrụtụa wosẹ dimịnị anịduonị “omịnị ba malafagha fa.” (Jer. 23:4) Bei egberibo kọkọ paa Johanna pịrịmị, ámịnị Finland k’emi bịnaraụ, á yin dọọntimi ifiemị. Á gbaamị: “ịmịnị ine bụụdọọnye gbaa zịnị kịmị pịrịmụ yọmị kụrọemi, anịa ịmịnị ine bụụdọọnyebo gbaa kẹnị itu-kosuowei pịrịtimi ifiemị, wo maa kịmị ebibara zọzọ nimigha kị gbaa kpọ, ómịnị etipou bara ka kị ị pei, ị mọ mó tẹẹ, bá Jehovah ị tarị wẹrịemi bara gbaamị. Ịmịnị ebibara wó gbaa egberibo ukiegha kị gbaa kpọ, ịmịnị ba malafagha. Jehovah gbesị agbẹị ifie kị bịnaoweibị fịrịmọ bomị.” Iné itu bọọ emi itu-kosuotubo tebara ka kị baratụa ị́ pịrịdẹ a o?
11. Omịnị tebara ka kị tọrụkẹrịyọ mịẹ itu-kosuotubo dịa a paaemi a o? (Foto kpọ dii.)
11 “Ánị wẹnịmịnị fịrịbo duonị” omịnị tọrụkẹrịyọ mịẹ itu-kosuotubo dịa kị Jehovah mọ dọụ wẹrịemi (1Thess. 5:12, 13) Henrietta, Finland ka inyerinmịnị, gbaa amọ: “Itu-kosuotubo kị kụrọnana dẹịn anịghakpọ ámịnị bụụdọọn-yeama fagha kị duonị ámịnị bịnaotubo barịmịnị bara paagha. Zụa ifieama ịmịnị gbaa á pịrịmịnị, ‘Ị́mịnị ebi itu-kosuowei bara ị́ mọ nịmị wẹriẹmi? Bịsẹ yọ barafakụmọ.’” Sera Türkiyec emi bịnaraụ gbaamị: “Itu-kosuotubo kpọ ‘kụrọmọye’ dọụ wẹrịemi. Anịkị ámịnị dẹịnsụọgha bara ánị wẹnịmịnị ebi fịrịbo wẹnị bọlọụ amú a paadẹ. Anịduonị omịnị fun gẹẹ á kụrọmọ, á tịịn bo wo warịma fịyaị fị, bá á sụọmọ egberigbaayọ amú a paaemi.” Ị́ kpọ tọrụkẹrịyọ mịẹ iné ituma fịrịwẹnị kụrọmọmịnị itu-kosukịmị dịadẹ a o? Ụwọụ dọụdá tọrụkẹrịyọ mịẹ ụ dịa.—1Cor. 16:18.
Ị́mịnị “kụrọmọye” kọn ituma bọlọụdámịnị bịnaoweibo pịrịwẹrị, ámịnị angọtụa ánị fịrịbo wẹnị bọlọụ amú a paaemi (Gooyọ 7, 11, 15 dii)
TEREE DIIOTU WO KỤRỌMỌMỊNỊ
12. Bọlọụ kụraị sonransibị Jesus te zịnị otuama kpọ sẹlẹwẹrị itu kụrọmọtimi ma o? (1Thessalonians 2:7, 8)
12 Jesus Christ kọn itu pịrị wẹrịemi oweibo zịnị fịrị kpọ wẹnịmịnị. Jerusalem bọọ timị itu-kosuotubo Jesus gbaa bara diwẹnịmịnị duonị ámịnị Paul, Barnabas, bá zịnị otuama mọ fịrịmọ zịnị yọama dii yọ amúmị. (Acts 11:22) Tetuu a o? Mú itubo kụrọmọmụ fịrị kị wẹnịmị. (Acts 15:40, 41) Bịsẹ bịnaotubo angọ akị biin ịkịan-ama kị kụnwẹrị kụrọmọye bá tolumọyẹ mọ kọn itu pịrịmị, zụa ifieama ánị ụndụbo akpotu bolou kpọ asụọmịnị. 1Thessalonians 2:7, 8 goo.
13. Teree diiotu te fịrịama kị wẹnịmịnị a o?
13 Teree diiotu ifiebosẹ yọụpaamịnị. Zụa itu dii-otuama biin hour-ama kị yọụwẹrị mú ituama dimịnị. Wiki ovorumị, teree diiowei biin ẹrẹbịbịama pịrịmịnị, bịnaotubo kụrọmọ, ụwọụpẹlẹ-otubo mọ ẹrẹtei, itu-kosuotu mọ ẹrẹtei, bá akị wiki ovorumị egberigbaamụ bara kpọ tọnpẹlẹmịnị. Ómịnị ẹrẹmu egberibo akị ango tọlọmọmịnị bá kalaete bẹnịbo mọ bá opubẹnịbo mọ mịẹmụ fịrịama kpọ wẹnịmịnị. Ụwọụpẹlẹ otu school kpọ tolumọmịnị, bẹnịị ifie ladaba ete bọọ emi ụwọụpẹlẹ-otubo mọ bẹnịmịnị, bá zịnị fịrịama kpọ wẹnịmịni, zụa branch office duo bomịnị fịrịama izoumọ izoumọ kị paamịnị.
14. Tetuama kị duonị omịnị tọrụkẹrịyọ mịẹ Teree dii-otubo dịa agbẹị-emi a o?
14 Teree diiotu wẹnịmịnị fịrịbo tebara ka kị baratụa itu pịrịmịnị a o? Teree diiowei bodaba paamịnị bara gbelemọ yobị, kẹni Türkiye bịnaowei gbaamị: “Ámịnị bo wo itu dimịnị ifiesẹ, fomuun mịẹpaamọ ị pịrịwẹrị ine bịnaotubo barịmịnị. Ịmịnị biin teree diiotu mọ gbeleidẹ, anịa kẹnị ụbọ kpọ naa ifie fagha duonị ị mọ mọ́ ẹrẹgha fa bara mịẹgha.” Wo bọlọụ anga bọọ tịịnwẹrị bịnaraụma Johanna, teree dii-owei mọ egberigbaayọ amúmị, anịa ánị maa kịmị kẹnị ụbọ kpọ ẹrịgha. Johanna gbaamị “bịsẹ bara kị paa kpọ, ịmịnị bịsẹ erein baragha fa, ine maa bịnaotubo zịnị yo amúdẹ, yebị ị gbele kụrọmọmị. Teree dii-oweimị, ị kụrọmọmị bá Jehovah karịmịnị yọmị, omịnị zụa ifieama wo tarị wẹriemi otubo mọ keni yọ a timigha fa kpo kọn ine ukiemọmị. Bei bọlọụmị wosẹ ba wo tarị wẹrịemi otubo mọ zọzọ a barasingha fa bara kpọ akị ị kụrọmọmị.” Biin teree dii-otuama bịsẹ bara ka kị itu bọọ emi bịnaotubo kụrọmọmịnị, anịduonị bịnaotubo á tarị kụrọmọdẹ.. Acts 20:37–21:1.
15. (a) 3 John 5-8 gbaa bara dịdaba, omịnị tebara ka kị tọrụkẹrịyọ mịẹ teree dii-otu dịamịnị a o? (Foto kpọ dii.) (b) Omịnị tetuu kị duonị tọrụkẹrịyọ mịẹ akị itu bọọ bọlọụdámịnị bịnaoweibo erebo pịrị agbẹị-emi a o, bá tebara ka kị bịsẹ yọ mịẹ a paaemi a o? (“Ánị Erebo Ukie” Ekpedi dii.)
15 Fịrịmọpaaowei John, Gaius kụrọmọmị, Gaius ebibara tọrụtụạ bo itu dimịnị bịnaotubo kẹrịaki bá “Ọkpọnanaowei dọụ wẹrịemi bara ka kị á mo mó inyerintimi ánị waịmụ ifie laa” bara John mọ gbaa ụ pịrịmị (3 John 5-8 goo.) Teree diiowei bodaba omịnị ụ tịịn warị abo fịyaị fịmịnị yọ kpọ kẹnị ụwọụ. Bá itu mọ kẹnịsụọmọwẹrị egberigbaayọ amúmịnị yo kpọ zịnị ụwọụ. Leslie, bọlọụ anga bọọ tịịn wẹrị bịnaraụma, zịnị ụwọụama akị tọrụkẹrịyọ mịẹdịamịnị. “Jehovah baratụa á pịrịwẹrị ánị dọụ wẹrịemi yebo nana bara ị mọ tẹẹmị,” ámịnị mọkpọ gbaamị. “Ị mọ ị yei mọ fun gẹẹ teree-diiowei pịrịmịnị, wó bo duonị wo laadẹ arerebo kpọ gbaa ụ pịrịmịnị.” Ukie, teree dii-otubo kpọ kịmịawoụama anịduonị dẹịnsụọmịnị ifiema paamịnị. Zụa ifieama, dọọn, bụụdọọnye, malafagha bá suusụọmịnị ifieama kpọ emi. Anịduonị tarị nana egberiama gbaa á pịrị bá yeama kọn á pịrị, bịsẹ bara miẹdaba Jehovah wo duotolubị ánị tẹẹbịbịbo parụmịnị!—Prov. 12:25.
OMỊNỊ BỌLỌỤDÁMỤ KỊMỊAMA DỌỤ WẸRỊEMI
16. Proverbs 3:27 gbaa bara didaba, bịnaoweibo te biibịbị ka kị angọ bii agbẹị-emi a o?
16 Akpọyọrọmị, omịnị bọlọụdámụ bịnaoweiama dọụ kụrọmọ wẹrịemi. Ị́mịnị kpọ benibiledẹ bịnaowei a, ị́mịnị angọpaamọ baratụa a paaemi a? (Proverbs 3:27 goo.) Ị́ kpọ angọtụa bo baratụa itu-kosuotu pịrịmọ kịmị a paa dọụmịnị a? Ị́mịnị baratụa itu-kosuotu pịrịmịnị kịmị ka paa emịaba, ị́ laa angọtụa itu-kosuowei a paawẹrị baratụa bịnaotubo pịrị a paaemi a?d Í kpọ iné ụndụ bọọ yeama deiwẹrị Egberigbaa-otu School (SKE) amú a paaemi a? Mị schoolbị ị́ tolumọwẹrị ebibara Jesus mọ fịrịwẹnị gbelemịnị. Ị́ laa mịẹghamụ bara iroromịnị aba, tẹẹ Jehovah pịrị. Ómịnị yalịyalị tẹmẹ akị baratụa ị́ pịrịwẹrị kọn ị́ pịrịdẹ fịrịsẹ wẹnị beinmọmu bara bii.—Luke 11:13; Acts 20:28.
17. Jesus “ebi dịẹpịrịye a paaemi oweiama” kọn wo pịrị yọmị, teekị mịẹdịa wẹrịemi a o?
17 Jesus “ebi dịẹpịrịye a paaemi oweiama” sẹlẹ yọbị, Jesus kọkọ bei kunumọ ereinbo wo bọlọudá bá wo kekeremịnị bara mịẹgaan wẹrịemi. (Matt. 28:20) Wo Pẹrẹowei Jesus tarị nana, barafinimọ, wo dọụmịnị yebo mịẹ wo pịrị bá ebi dịẹpịrịye a paaemị oweiama sẹlẹ akị wo barịmịnị yọbị wo tọrụkẹrị-emi. Anịduonị ị kpọ tọrụkẹrịyọ mịẹ bei angọtụa fịrịwẹnịmịnị bịnaotubo pịrịmụ ụwọụama dọụpaamọ dá mịẹ á dịa. Jehovah kulemụ yọ barakụmọ, tuubị “ebi yebosẹ bá karaị-emi yebosẹ” Jehovah kị duobo-emi”.—Jas. 1:17.
DUMA 99 Myriads of Brothers
a Itu-kosuotu Governing Body a paamịnị, baratụa Governing Body pịrịmịnị otu a paamịnị, Branch Committee otuama a paamịnị, bá zịnị fịrịama wẹnịmịnị. Bei kịmịbosẹ “dịepịrịye a paaemi oweiama.”
b Zụa ẹrẹ-ama deidẹ.
c Bọlọụmị Turkey kị tịịn timimị.
d Ị́ kpọ mịẹtimi baratụa itu-kosuotu pịrịmịnị kịmị a paa anịghakpo itu-kosuowei a paamọ bara nimi dọụmịnị aba, “November 2024 lewarị funbị Brothers—Are You Reaching Out to Be a Ministerial Servant?” bá “Brothers—Are You Reaching Out to Serve as an Elder?” egberitịbịbo dii.