EGBERITỊBỊ 47
DUMA 103 Shepherds—Gifts in Men
Bịnaoweiama—Ámịnị Kpọ Itu-kosuotu A Paamụ Bara Ka Kị Fịrịwẹnịmịnị A O?
“Bịnaowei angọtụa fịrị wẹnịwẹrị itukosu-owei a paa dọụmịnịsẹ, ọ́mịni ebi fịrị kị wẹnị dọụmịnị.”—1 TIM. 3:1.
Tolumọ Dọụmịnị Yebo
Bei egberitịbịmị bịnaowei itu kosu-owei a paa dọụmịnịsẹ Bible gbaa wẹrịemi nana agbẹị-emi inyenrinbụọbo kị omịnị mọ ditụamịnị.
1-2. Te fịrịama kpọ Itukosu-owei wẹnịmụ “ebi fịrị” bolou bọọ sụọemi a o?
Ị́MỊNỊ baratụa itu-kosuotu pịrịmịnị kịmị ka paaemi aba, ị́mịnị angọtụa wẹrị zụa itukosu-owei a paamọ inyenrinbụọama nanadẹ bara kị paaemi. Anịa ị́ kpọ itukosu-owei a paawẹrị “ebi fịrị” wẹnị itu pịrị dọụmịnị a?—1Tim. 3:1.
2 Itukosu-owei te fịrịama kị wẹnịmịnị a o? Ómịnị egberigbaa fịrịma bọlọụdamịnị, ebibara anịnabo gbalị bá á tolumọmịnị, bá wó inyenrinbụọ mọ wó ẹrẹ paamọmịnị egberibo mọ kọn itu kụrọmọmịnị. Bible mị, “ebi dịẹpịrịye a paaemi oweiama” kọn á tịịn yọmị agbẹị-emi.—Eph. 4:8.
3. Bịnaowei teeki mịẹwẹrị laa itukosu-owei a paamịnị a o? (1Timothy 3:1-7; Titus 1:5-9)
3 Ị́mịnị teeki mịẹ dẹkị laa itukosu-owei a paamịnị a o? Itukosu-owei a paamụ yọ mọ angọ gbalị fịrị wẹnimụ yọ mọ bẹbẹ paaemi. Angọ gbalị fịrị wẹnị dọụmịnịsẹ, ị́mịnị iné wẹnịmụ fịrị nimi ebimọ wẹrịemisẹ, fịrị nana ụbọmị fịrịbị kọn ị́ pịrị wẹnịmịnị. Anịa, ị́mịnị itukosu-owei ka paa dọụmịnịsẹ, ị́mịnị angọtụa egberigbaayọ amú bá ebịbara Bible kọn kịmịotu tolumọmịnị kị gbaa kpọ, zịnị mịẹmụye emi. Ị́mịnị 1Timothy 3:1-7 bá Titus 1:5-9. (Goo) gbaa wẹrịemi inyenrinbụọbo kpọ nanamịnị. Bei egberitịbịmị omịnị bịsẹ inyenrinbụọbo tarụ ditụa dọụmịnị: iné emi ete mọ bá itu bolou mọ ebi inyenrinbụọ nanamụ bara, ebi mịẹdịaye a paa iné warịbolou otubo pịrịmụ bara mọ, bá baratụa itu pịrịmụ yọ bọọ dịsẹ nanamụ bara mọ wo mọ ditụamịnị.
EBI INYENRINBỤỌ NANA
4. Teeki sei ẹrẹ nanagha fa tuubị a o?
4 Itukosu-owei a paamụ yọbị, ị́mịnị “Sei ẹrẹ nanagha fa,” gbaamịnị barasẹ, ị́mịnị ebi inyenrinbụọ nana wẹrịemi duonị, bịnaotubo ị́mịnị ebi kịmị bara ka kị ị́ dimịnị, iné sei egberi gbaagha. Bá mọkpọ, tiri otu kpọ iné “ebi egberi kị gbaa.” Jehovah karịgha otubo ị́ gbaseimọ kpọ paaemi, bịsẹ bara kị paa kpọ ámịnị iné sei egberi gbaamụ ebi tuu nana kụmọ. (Dan. 6:4, 5) Iné angọ bii, ‘Itu bolou mọ ịnẹ emi ete bọọ emị otubo mọ, ịmịnị ebi inyenrinbụọ nana wẹrịemi bara ka kị ị diimịnị a o?’
5. Ị́mịnị tebara ka kị ebiye kị tarịemi bara mịẹdịamịnị a o?
5 Ị́mịnị “ebiye kị tarị” wẹrịemi aba, ị́mịnị iné ịkịọụ kọn zịnịotu ebi inyenrinbụọbo kị ditụamịnị bá tọrụkẹrịyọ kpọ mịẹdịạmịnị. Ị́mịnị pọwẹịtimi dọụ wẹrịemi bara dẹịn bara ka kị ebimịẹ zịnịotu dịamịnị. (1Thess. 2:8; Titus 1:8 bọọ emi “lover of goodness” study note bị dii.) Tetuu kị duonị itu-kosuotu bei inyenrinbụọ nana agbẹị-emi a o? Tuubị ámịnị baratụa aninabo pịrị bá á kekeremụ fịrị kị nana wẹrịemi, bei fịrịbị ifie akị kụrọmọ fa k’emi. (1Pet. 5:1-3) Bisẹ bara k’emi kpọ, odubo-gbaan zịnịotu pịrịmịnị yọ duo paamịnị pọwẹịbị dụba akị wẹnịmịnị fịrị dẹịn-emi.—Acts 20:35.
6. Omịnị te ụwọụama ka kị igeni kẹrịakịmịnị bara mịẹdia a paaemi a o? (Hebrews 13:2, 16; Foto kpọ dii.)
6 Ị́mịnị “Igeni kẹrịakị inyenrinbụọ nana” wẹrịemi ifiesẹ ebimịẹ zịnịotu pịrịmịnị. Ebimịẹ ị́ mọ mọ́ naịnkagha kịmị kpọ pịrịmịnị. (1Pet. 4:9) Igeni kẹrịakịmịnị ụbọ gbelemọ yọmị kẹnị ye a tuugbaa fun gbaamị: “Ómịnị wó warị mọ, wó adụdụ mọ fini kịmịsẹ kị pịrịmịnị.” Iné angọ bii, ‘kịmịotu ịmịnị igeni kẹrịakịmịnị owei bara ka kị ị nimi wẹrịemị?’ (Hebrews 13:2, 16 goo.) Igeni kẹrịakịmịnị kịmị ebimịẹ kịmịsẹ kị pịrịmịnị, gbaamaba baratụapịrịye dọụ wẹrịemi otu bá angọtụa itu bọọ fịrị wẹnịmịnị otu, itu dii otu bá zịnị itu duobo amabẹnịmọ egberi pịrị otu.—Gen. 18:2-8; Prov. 3:27; Luke 14:13, 14; Acts 16:15; Rom. 12:13.
Igeni kẹrịakịmịnị taa mọ yei mọ otu kẹnị itu diiowei mọ ụ taa mọ akị warị atụamịnị (Gooyọ 6 dii)
7. Itukosu-owei tebara ka kị sịlị tarị kụrọmọgha inyenrinbụọ mịẹdịamịnị a o?
7 “Sịlị tarị kụrọmọgha fa.” Gbaamịnị barasẹ ị́mịnị mẹnịanga yeama akị bọlọụdaagha fa. Ị́mịnị pẹrẹ anịghakpọ ingoemi kị gbaa kpọ, Jehovah karịmịnị yọ ka kị iné ụndụ bọọ yelaadẹịn ye mịẹmịnị. (Matt. 6:33) Ị́mịnị iné ifie mọ, iné kụrọ mọ, bá zịnị nanayeama mọ kọn fịrịwẹnị Jehovah pịrịmịnị bá baratụa iné warịbolou mọ, bá itu mọ pịrịmịnị. (Matt. 6:24; 1John 2:15-17) Iné angọ bii: ‘Ịmịnị tebara ka kị sịlị diimịnị a? Ine nanadẹ yebo ine a tọrụkẹrịemi a o? Anịghakpọ biin sịlị nanamụyọ mọ nanayeama nanamụ yọ kị dọụmịnị a?’—1Tim. 6:6, 17-19.
8. Ị́mịnị te ụwọụama ka kị angọ kẹrị bá agbeị bara akị yemịe inyenrinbụọ mịẹdịamịnị a o?
8 Ị́mịnị “angọ kẹrị inyenrinbụọ nana,” bá “agbẹị bara akị ye mịẹ inyenrinbụọ nana” wẹrịemisẹ, ị́mịnị fịyaị fị, wuru bou, bịdẹ tụa, angọ tọlọmọ bá zorumịnị ifie kpọ mịẹbụọgha fa. Ị́mịnị Jehovah karịgha otubo mịẹmịnị yebo dimịẹgha fa. (Luke 21:34; Jas. 4:4) Kịmịotu agbẹịgha bara kọn ị́ mọ mọ́ inyenrin kpọ, ị́mịnị etipoumịnị. Ị́mịnị “wuru boukẹrịgha kịmị”; anịghakpọ kịmịama ị́mịnị wuru kụrọmọmịnị kịmị bara kọn ị́ nimigha. Iné angọ bii, ‘Inẹ inyenrinmịnị bara kpọ ịmịnị angọ kẹrị bá agbẹị bara akị ye mịẹ inyenrinbụọ mịẹdịamịnị?’
9. Ebibara ye iroromịnị bá galaba-galaba bara ye mịẹgha egberimị teeki wó tuu a o?
9 Ị́mịnị “ebibara ye iroromịnị” ifiesẹ ị́mịnị Bible gbaa bara kị dii yemịẹmịnị. Ị́mịnị Bible mị kọn yemịẹmịnị bara tolumọ nimi ebimọdẹ, bá bịsẹ bara kị dii iroro tọn angọ pịrịmịnị. Ị́mịnị kịmịama gbaa egberiama dii ụgụlapẹlẹgha. Ị́mịni egberi paabarasẹ ghọ tuudọụ dẹkị gbaa paamọmịnị. (Prov. 18:13) Ị́ bịsẹ bara mịẹdaba, ị́mịnị kpọ Jehovah kị dimịẹmịnị kịmị ka paadẹ. Ị́mịnị “galaba-galaba bara ye mịẹgha” ifiesẹ agbẹị ifie ka kị ye mịẹmịnị bá galaba galaba bara timigha fa. Kịmịotu eti akị iné a tụa wẹrịemi bá gbaa bara dimịẹmịnị kịmị ka kị ị́ dimọ wẹrịemi. Bei gbaa wẹrịemi inyenrinbụọbo ị́ mọ mịẹdịa wẹrịemisẹ baratụa ị́ pịrịwẹrị ebi ẹrẹ nanamịnị. itukosu-owei warị tịbịowei ka paaemiaba nana agbẹị-emi inyenrinbụọbo Bible mọ gbaa wẹrịemi, wo wẹrị a ditụa.
EBI MỊẸDỊAYE KA PAA INÉ WARỊ OTUBO PỊRỊ
10. Bịnaowei tebara ka kị tịbị á timi ebibara wó warịbolou tolumọmịnị bara mịẹdịamịni a o”?
10 Ị́mịnị itukosu-owei a paa dọụmịnị yei ụbọ aba , ị́mịnị akị iné warị otubo mọ inyenrinmịnị barabị yelaaemi. Ị́mịnị “tịbị á timi ebibara [iné] warịbolou tolumọmịnị kịmị ka paa.” Tarị nana wẹrịemi warị tịbiowei ka paa, warịbolou dọụ wẹrịemi yebo kpọ mịẹ á pịrị. Gbaamaba family worship, yetolumọyọ, bá egberigbaayọ kpọ bọlọụdámịnị. Tetuu kị duonị mị yebo yelaaemi a o? Fịrịmọpaaowei Paul biimị: “Ebibara wó warịbolou kpọ tolumọgha kịmịbị, tebara ka kị laa Ọkpọnanaowei itu kekere a paaemi a o?”—1Tim. 3:5.
11-12. Iné warịbolou otubo inyenrinbụọmị tebara ka kị iné itukosu-owei a paamụ yọ gbele a paaemi a o? (Foto kpọ dii.)
11 Ị́mịnị awọụama ziidẹ daụ ụbọ ka paaemi aba iné 18 kụraị dẹịngha “awọụbo gbaayọnaa bá angọtụa inyenrinbụọ nanamịnị.” Ị́mịnị tarị nana bara ka kị á tolumọmịnị. Kala awọụ ifiebosẹ daụ ụbọ mọ dẹrị bá zorutei kị dọụmịnị. Anịa ị́mịnị ebibara á tolumọ daba, ámịnị gbaayọnaa, ị́ mọ zịnịotu mọ didụbamọ, bá ebi inyenrinbụọ nanamịnị. Ị́mịnị kị baratụa awọụbọ pịrịwẹrị Jehovah tarị, Bible gbaa bara dii inyenrin bá angọdịẹpaamọ Jehovah pịrịwẹrị benibelemịnị.
12 “Awọụbo Ọkpọnanaowei karịmịnị, bá kịmịotu ámịnị tibikụrọ anịghakpọ kẹrịmọtịẹmọ a paagha bara gbaagha.” Iné zii wẹrịemi tọbọụ itu bọọ a timi kụrọsei mịẹdaba, tebara ka kị ị́ gbele a paaemi a o? Daụ bị wó awọụbo tolumọ ebimọgha timi kụrọsei mịẹdaba, daụ bị itukosu-owei a paamụ yọ tịẹmo kpọ paaemi anịghakpọ iné wẹnịmịnị itukosu-owei fịrị gbele kpọ paaemị.—October 15, 1996, issue of The Watchtower, p. 21, pars. 6-7 dii.
Daụ otuama ánị awọụbo tolumọdá fịrịwẹnị Jehovah mọ itu mọ pịrị (Gooyọ 11 dii)
BARATỤA ITU PỊRỊ
13. Ị́mịnị tebara ka kị kịlịkịlị inyenrinbụọ mịẹdịamịnị a? (b) Ị́mịnị tebara ki ịmịnị kị yelaadẹịnemi inyenrinbụọ daatịẹmọmịnị a o?
13 Bịnaowei Christtuuduo-otu inyenrinbụọbo inyenrin paamọmịnị aba yelaa itu pịrịemi. “Ebibara ye-iroromịnị” kịmị ifiebosẹ dọọ kị mịẹ paamọmịnị. Ị́mịnị ebibara ye-iroromịnị bara mịẹ kịmịotu dịa dọụmịnị aba, zịnịotu egberigbaamịnịsẹ ebibara á pei bá egberi ma sụọtuunimi. Gbaamaba, itu-kosuotu iroro tọndẹ anịa bịsẹ tọn irorobị ị́ dịsẹ aba, Bible oloko seimọgha ifiesẹ ị́mịnị kpọ ánị gbaayọ kẹrịakịmịnị a o? “Ifiẹbosẹ wo tọn bara kị mịẹgha fa.” Kịmịsẹ iné dọụbara bẹtịbị kị mịẹ inyenrinbụọ nanagha fa. Zịnịotu gbaamịnị egberibo kpọ kẹrịakị bá yelaaemi bara mịẹdịa. (Gen. 13:8, 9; Prov. 15:22) Ị́mịnị “sụụ dọụgha” anịghakpọ “kịalị boloukọngha fa.” Bẹbẹ-kpụn anịghakpọ zịnị kịmị diseimọmụ bara dii a, bọụbọụ bá kịlịkịlị inyenrinbụọ mịẹdịa. Ị́mịnị dọọ inyenrinbụọ nana wẹrịemi duonị, dọọ mịẹpaamọmụ yọmị kụrọemi kị gbaa kpọ ị́mịnị kị bọlọụdámịnị. (Jas. 3:17, 18) Iné gbaa bọụbọụ egberibo baratụa boloukọnmịnị kịmị pịrịwẹrị dọọ adụdụ nanamịnị, wo mọ mọ́ Jehovah karịgha otu adụdụbo kpọ gbele a paaemi.—Judg. 8:1-3; Prov. 20:3; 25:15; Matt. 5:23, 24.
14. “Aya ka bo gesii nimi kịmị a paagha fa . . . ” bá “Ọkpọnanaowei mọ kpẹkpẹrẹẹ emi” gbaa egberibị teeki bẹmọ wẹrịemi a o?
14 Itukosu-owei a paa dọụmịnị kịmị “aya ka bo gesii nimi kịmị a paagha fa.” Ị́mịnị benibilewẹrị biin kuraịama bụọdẹ kị itukosu-owei á paamọ bara gbaagha. Anịa ị́mịnị kasụọdẹ Christtuduo kịmị a paamụ yọbị ifie dọụ wẹrịemi. Mịẹdẹ kị ị́mịnị itukosu-owei a paamịnịbị, ị́mịnị kpọ Jesus bara angọ-iyerịmọ Jehovah pịrịmịnị bá ị́mịnị pọwẹịtimi Jehovah ị pịrịdẹ fịrịsẹ wẹnịtimi korumịnị bara mịẹdia. (Matt. 20:23; Phil. 2:5-8) Ị́mịnị Jehovah olokobo koko bá wó ogbo gbaamịnị bara diwẹnịmịnị ifiesẹ, ị́mịnị “Ọkpọnanaowei mọ kpẹkpẹrẹẹ emi” bara kị mịẹdịamịnị.—1Tim. 4:15.
15. Ebibara ẹrẹbịbị pịrịmịnị kịmị kị itukosu-owei a paamịnị a? Tuugbaa
15 Bible mị mịẹgaan amọ itukosu-owei “ebibara kịmị tolumọmụ bara nimimịnị.” Bei egberimị ị́mịnị fun nimi ebimọ bá ebibara amabẹnịmọ egberi pịrịmụ bara nimi yọ kị gbaamịnị a? benebene. Itukosu-otubosẹ opu school amú anịghakpọ ebibara amabẹnịmọ egberi pịrịmịnị bara fa, ámịnị egberigbaayọ amúdaba ebibara Bible kị duo kịmịotu tolumọmịnị, bá bịna kịmị kụrọmọyọ amúmịnị ifiesẹ ebibara Bible kị duo á kụrọmọmịnị. (1Timothy 3:2 bọọ emi “qualified to teach” study note bị dii; 1Corinthians 12:28, 29 mọ Ephesians 4:11 mọ kọn tụa dii.) Opu fun warị amúgha kị gbaa kpọ, iné Bible kọn kịmị tolumọmịnị bara mịẹ ebimọ bọlọụdẹịn. Ị́mịnị tebara kị mịẹtimi ebi kịmị tolumọ kịmị a paamịnị a o?
16. Ị́mịnị tebara kị mịẹtimi ebi kịmị tolumọ kịmị a paamịnị a o? (Foto kpọ dii.)
16 “Gesii egberibo kẹrị kụrọmọ wẹrịemi.” Ebi kịmị tolumọ kịmị a paa dọụmịnịsẹ, kịmịsẹ yọ anịghakpọ kịmị fagha yọ tolumọye pịrịmịnị ifiesẹ iné ẹrẹmịnị egberibo Bible kị duobo. Ebibara Bible mọ bá Bible duo mịẹpaamọ wẹrịemi funbo mọ goo angọ pịrị. (Prov. 15:28; 16:23; Titus 1:9 bọọ emi “holding firmly to the faithful word” study note bị dii.) Yetolumọ angọ pịrịmịnị ifiesẹ, fun mị akị Bible yọbo atuugbaa wẹrịemi bara nimi ebimọ bá akị tụa inyenrin. Bá kịmị tolumọmịnị ifiesẹ, iné tolumọmịnị yebo ụbọ adụdụ gbelemụ bara ka kị ụbọ tolumọ. Ị́mịnị mịẹmụbara akị kasụọdẹ itu kosu-kịmị biimịnị yọ kpọ ị́ mịẹ ebi kịmị tolumọ kịmị a paamịnị. (1Tim. 5:17) Itukosu-kịmị “ebibara. . . kịmị kụrọmọmịnị,” omịnị ebibara bịnaotubo kụrọmọmịnị; Anịa, itukosu-owei zụa ifieama “zezemọye kpọ pịrịmịnị.” Bịsẹ bara kị gbaa kpọ, ámịnị tarị nana bara ka kị mịẹmịnị. Ị́mịnị bọụbọụ tarị nana bara Bible kị duo kịmịotu tolumọmịnịsẹ, ị́mịnị ebi kịmị tolumọ ụbọ a paamịnị, tuubị ị́mịnị dụbadẹịn kịmị tolumọ owei Jesus kị dimịẹmịnị.—Matt. 11:28-30; 2Tim. 2:24.
Itukosu-owei Bible akị kịmị mọ tolumọmịnị ifiemị, baratụa itu-kosuotu pịrịmịnị bịnaoweibị itukosu-owei duo yetolumọ akịmịnị. Baratụa itu-kosuotu pịrịmịnị bịnaowei korodiye bọlọụ a tịẹtimi wó ẹrẹbịbị pịrịmụ bara kọn angọ tọlọmọmịnị (Gooyọ 16 dii)
ITU BỌỌ FỊRỊWẸNỊMỊNỊ YỌMỊ SUUSỤỌ KỤMỌ
17. (a) Baratụa itu-kosuotu pịrịmịnị bịnaoweiama te kụrọmọye kị nanawẹrị itukosu-owei a paamọ inyenrinbụọbo nana mịnị a o? (b) Bịnaowei kọn itukosu-owei atụa dọụmịnịsẹ itu-kosuotu teeki ukie agbẹị-emi a o? (“Bịnaowei Kọn Itukosu-owei Atụa Dọụmịnịsẹ Agbẹị Bara Ka Kị Mịẹ” ekpedi dii)
17 Mịẹtimi laa itukosu-owei a paamọ inyenrinbụọbo dituade bị, zụa baratụa itu-kosuotu pịrịmịnị bịnaoweiama ámịnị laa itu-kosuotu a paagha fa bara kị iroromịnị. Bei gbaadẹ inyenrinbụọbosẹ nana ebimọ dẹkị Jehovah mọ wó ogbo mọ iné akị itukosu-owei mịẹmụ bara gbaagha. (1Pet. 2:21) Jehovah yalịyalị tẹmẹ kị baratụa ị́ pịrịwẹrị mị inyenrinbụọbọ nanamịnị. (Phil. 2:13) Ị́mịnị mịẹ ebimọ bọlọụdẹịn dọụmịnị inyenrinbụọ emi a? Tẹẹ Jehovah yari, wó baratụapiriye bii. Bịsẹ inyenrinbụọ gbelemọ yọmị ye asụọtuu dọụ, bá Itukosu-kịmị biidá mịẹ ebimọ bọlọụdẹịnmụ bara gbaa ị́ pịrị.
18. Te kụrọmọye kị baratụa itu-kosuotu pịrịmịnị bịnaoweibo laaemi a o?
18 Pebidá wosẹ, bá itu-kosuotubo kpọ, bei egberitịbị bọọ kẹrị ẹrẹteidẹ inyenrinbụọbọ mịẹdịa bọlọụ amú. (Phil. 3:16) Ị́mịnị baratụa itu-kosuotu pịrịmịnị bịnaowei ka paaemi a? Itu bọọ iné wẹnịmịnị fịrị wẹnị bọlọụ amú, suusụọ kụmọ! Tẹẹ Jehovah pịrịdá baratụa ị́ pịrịwẹrị ị́mịnị pẹlẹgha bara ụ karị, bá fịrịwẹnị itu pịrịmịnị yọ mịẹ ebimo bọlọụdẹịn. (Isa. 64:8) Ị́mịnị angọtụa wẹrị itukosu-owei a paa dọụmịnị yọbị Jehovah tarịama akị ị́ pịrịmịnị.
DUMA 101 Working Together in Unity