Baratụa Ị́ Mọ Mọ Bible Tolumọmịnị Otubo Pịrịwẹrị Gesii Ma Tịẹkụrọ

1-2. (a) Tetuu kị duonị zụa Bible tolumọmịnị otu gesii ma tịẹkụrọmụ yọmị kụrọ-emi a o? (b) Mị egberitịbịmị omịnị teeki kẹrị ẹrẹtei dọụmịnị a o?

Ị́ KPO bo Jehovah Iseri ụbọ a paamụ yọbị bụụdọọnye nana wẹrị ma? Kaanghaba ị́mọ mọ kẹnị yọ a timi fịrị wẹnịmịnị otu, iné ikie-otu, bá iné warị-otu bolouịmbẹlẹ ị́ pịrịgha fa bara ịmọ iroro ma? Anịghakpọ ị́mịnị laa Jehovah dọụ bara mịẹgha fa bara ị́mọ iroro ma? Bịsẹ baraghaba, ị́mọ mọ Bible tolumọmịnị otubo gesii ma tịẹkụrọmụ yọbị bụụdọọnye nana wẹrịemiaba, ị́ mịẹ tamamagha fa.

² Kịmịotu tẹmẹanga ma sọụ bọlọụ a múmụ yọmị, malafayọ a tịẹmọ a paaemi bara Jesus mọ nimi wẹrịemi. (Matt. 13:​20-22) Bịsẹ bara kị gbaa kpọ, ámịnị laa wó a tuuduogha fa bara Jesus mọ irorogha. Anịduonị, Jesus baratụa wó tuuduo-otubo pịrịwẹrị, ámịnị zịnịotu barịị wẹrị bei nịa ye lelepẹlẹmị, (1) ánị tẹmẹanga bọlọụbụọ yọ tịẹmọ dọụmịnị yebo mọ, (2) olomu tarị akị Jehovah a nanamụ bara mọ, (3) Jehovah akị ánị ụndụ ma bọlọụ daamụ bara mọ, bá (4) ánị bụụdọọnyebo dẹịnmọmụ bara lelei-pẹlẹmị. Omịnị Pọwẹịtimi Bẹseri Bẹseri Laa! Fun mị akị baratụa wo mọ Bible tolumọmịnị otubo pịrịwẹrị gesii ma tịẹkụrọ dọụmịnịmị, tebara ka kị Jesus gbaa wó tuuduo-otubo pịrị yebo dimịẹmịnị a o?

Á BARỊỊ ÁNỊ TẸMẸANGA BỌLỌỤBỤỌ YỌ TỊẸMỌ DỌỤMỊNỊ YEBO LELEI-PẸLẸ

3. Teeki Nicodemus Jesus tuuduo kịmị a paamụyọ tịẹmọ kpọ paatimi ma o?

³ Nicodemus, Jew ibemị yelaa kịmị ka paatimimị, anịa Jesus tuuduo kịmị a paamụ yọbị, ómịnị bụụdọọnye nanamị. Jesus egberigbaa fịrị wẹnịtimi sọndịa agọnọ-owei laadẹ kị, Nicodemus Jehovah kị Jesus fịrịmọ bo bara lelei-pẹlẹmị. (John 3:1, 2) Anịa, Nicodemus “Jew otubo esiinmịnị duonị” kịmị fa yọ ka mú Jesus mọ ẹrẹteimị. (John 7:13; 12:42) Kaanghaba wó tọn barasẹ, ómịnị Jesus tuuduo ụbọ a paadaba biin yeama wó bara duo serimịnị.a

4. Jesus tebara ka kị baratụa Nicodemus pịrịwẹrị Jehovah wó bara ma dọụ wẹrịemi yebo nimi ma o?

⁴ Nicodemus Olokobo nimi wẹrịemi, anịa Jehovah wó bara ma dọụ wẹrịemi ye nimimụ yọbị baratụa-pịrịye dọụ wẹrịemi. Jesus tebara ka kị baratụa ụ pịrị ma o? Dein korodẹ kị gbaa kpọ, Jesus ifie mịẹpaamọ wẹrị Nicodemus mọ ẹrẹteimị. Jesus gaan bara Nicodemus mịẹ agbẹị-emi yebo gbaa u pịrịmị: anị ómịnị boloudei, benibile, bá peibolou akị Ọkpọnanaowei Tọbọụ bị a tụa.—John 3:​5, 14-21.

5. Omịnị tebara ka kị wo mọ Bible tolumọmịnị ụbọ barịị wẹrị wó bọlọụbụọ yọ tịẹmọmịnị yebo nimimịnị a o?

⁵ Wo mọ Bible tolumọmịnị otubo zụa ifieama Bible nimi wẹrịemi anịa tẹmẹanga ma bọlọụ bụọgha, anịduonị ámịnị wo baratụa-pịrịye dọụ wẹrịemi. Zụa ifieama ánị wẹnịmịnị fịrịbo mọ bá ánị warịotubo mọ ánị tẹmẹanga bọlọụbụọ yọ tịẹmọ a paaemi. Anịduonị omịnị ifie mịẹpaamọ ámọ mọ fịyaị fị bá wẹnịtei gbeleidaba, bịsẹyọ duo laa ánị bụụdọọnyebo nimi wẹrị baratụa á pịrị a paaemi. Baratụa ị́mọ mọ́ Bible tolumọmịnị ụbọ pịrịdá, ị́ mịẹ pọwẹịmọmụ yọ diya ómịnị Jehovah tarị wẹrịemi yọ ka kị bọloụdaa wẹrị dei yọama mịẹ.

6. Ị́mịnị tebara ka kị baratụa ị́mọ mọ́ Bible tolumọmịnị kịmị pịrịwẹrị malafagha bara gesii ma tịẹkụrọmịnị a o? (1Corinthians 16:13)

⁶ Bible tolumọmịnị kịmị Jehovah baratụa ụ pịrị wẹrị laa wó tolumọmịnị yebo mịẹmụ bara nimidaba, bịsẹ yọmị ụ kụrọmọ wẹrị wó tolumọdẹ yebo mịẹmịnị. (1Corinthians 16:13 goo.) Bible kọn zịnịotu tolumọmịnị ụbọmị, school yọ kịmị tolumọmịnị owei bara k’emi. Ebi kịmị tolumọ owei a paamụ yọmị, paa kịmị tolumọyọ bẹtịbị mịẹgha, ụbọ laa mịẹgha paaemi yeama kpọ kọn ụbọ kụrọmọmịnị. Bịsẹ bara kị wo kpọ Bible akị kịmị tolumọmịnị mị paa Jehovah kọn ánị bara ma dọụ wẹrịemi yebo bẹtịbị gbaa á pịrịgha fa, ámịnị laa mịẹ a paaemi bara kpọ kọn á kụrọmọmịnị. Ị́mịnị tebara ka kị bịsẹ bara mịẹmịnị a o?

BARATỤA Ị́ MỌ MỌ́ BIBLE TOLUMỌMỊNỊ ỤBỌ PỊRỊDÁ OLOMU TARỊ AKỊ JEHOVAH A NANA

7. Jesus te ụwọụ ka kị baratụa ụ peitimi kịmịbo pịrịwẹrị Jehovah tarị kụrọmọ ma o?

⁷ Jesus wó tuuduo-otubo Ọkpọnanaowei tarị yọ kị á dịnẹmọ wẹrị ánị tolumọdẹ yebo mịẹmịnị bara nimi wẹrịemi. Anịduonị biin ifieama ómịnị á mịẹ Ọkpọnanaowei tarịmụ yeama kọn á tolumọmị. Gbaamaba, ómịnị Jehovah kọn ebi yeama akị awọụ pịrịmịnị daụ kị tọnmọmị. (Matt. 7:​9-11) Bịsẹ ifiemị ụ peitimi otubo kaanghaba zụaotu á daụ otubo á tarịgha. Anịa Jesus kẹnị tọnmọdịaye gbaamị, tọbọụmị warị a barasin wẹrị waịbo ifiemị, ụ daụmị dieneni nana bara ka kị ụ kẹrị akịmị. Bịsẹ gbaa tọnmọdịa yemị bei kịmịbo gbele kụrọmọ wẹrịemi, ámịnị Jehovah dieneni akị kịmị-awọụama a nana wẹrịemi bara dọụ ẹrịmị.—Luke 15:​20-24.

8. Ị́mịnị tebara ka kị baratụa ị́mọ mọ́ Bible tolumọmịnị ụbọ pịrịwẹrị Jehovah tarị kụrọmọmịnị a o?

⁸ Ị́mịnị kpọ baratụa ị́mọ mọ́ Bible tolumọmịnị kịmị pịrịwẹrị olomu bara akị Jehovah tarị a paaemi. Bịsẹ bara mịẹmịnị yọbị, ị́mịnị ụbọ mọ Bible tolumọmịnị ifiesẹ Jehovah nana wẹrịemi inyenrinbụọbo kọn ụ tolumọ, bá wó tolumọmịnị yebo mọ Jehovah tarị mọ kẹnịsụọmọ-emi bara mịẹgaan paamọ. Parụbụọmọ ịkịan bị ị́mọ kọn ụ mọ mọ́ ẹrẹmịnị ifiemị, yebị akị ụ gbele emi bara kpọ mịẹgaan paamọ. (Rom. 5:8; 1John 4:10) Bible tolumọmịnị ụbọ Jehovah kọkọ ụ tarịemi bara akị angọ a nimidaba, baratụa ụ pịrịwẹrị wó tolumọdẹ yebo kọn tụa inyenrinmịnị.—Gal. 2:20.

9. Teeki baratụa Michael pịrịwẹrị wó ụndụ dei ma o?

⁹ Wo wẹrị Michael, Indonesia emi owei paamọye ditụa. Gesii ka Michael ziimị anịa ómịnị benibilegha. Michael 18 years laa ifiemị, ómịnị yọụpaa zịnị ibe a mú wẹrị opu motor yọụ fịrị kị wẹnịmị. Tuu ifie laabị, ómịnị ere nanamị, anịa ómịnị mọkpọ wó warịbolou ma barasin wẹrị bịsẹ kpekẹnị opu motor yọụ fịrị kị wẹnịmị. Ụ bịsẹ fa ifiemị, ụ taa mọ wó tọbọụma mọ koro Bible tolumọmị bá bọlọụ kpọ bụọmị. Timi kẹnị ifie laamị ụ yin fịịmị, anịduonị ómịnị waị ama amú wẹrị ụ daụ kekere fịrị wẹnịmị bá Bible kpọ tolumọmị. Ómịnị Pọwẹịtimi Bẹseri Bẹseri Laa! funmị, tolumọye 27 tolumọtimi “Ebibara Tuudọụ” anga laa ifiemị, ómịnị Jehovah wó tọbọụ bụọmọ ụyafị bara kẹrị iroro yọmị ụ gbele kụrọmọ duonị ómịnị you kpọ youmị. Parụbụọmọ ịkịanmị wó a tọrụ kẹrịyọ duonị ómịnị wó ụndụ deiwẹrị benibilemị.

BARATỤA Ị́ MỌ MỌ́ BIBLE TOLUMỌMỊNỊ ỤBỌ PỊRỊWẸRỊ JEHOVAH AKỊ WÓ ỤNDỤ MA BỌLỌỤDÁ

10. Jesus tebara ka kị baratụa wó tuuduo-otubo pịrịwẹrị Jehovah karịmụ yọ ka kị bọlọụdá ma o? (Luke 5:​5-11) (Foto kpọ dii.)

¹⁰ Bọlọụ Jesus a tuuduo-otubo ómịnị kị kikoromọ wẹrịemi Messiah bara nimimị, anịa ámịnị mọkpọ egberigbaa fịrị ka kị ánị ụndụ ma bọlọụdámụ yọbị baratụa-pịrịye dọụ wẹrịemi. Peter mọ Andrew mọ Jesus tuuduo-otuama paatimi zụa ifie laa dẹkị, Jesus ámịnị beinmọ beinmọ bara akị wó a tuuduo bara kọn á tịịnmị. (Matt. 4:​18, 19) Ámịnị James mọ John mọ sụọmọ wẹrị endi dọụ fịrị wẹnịtimi ifiemị, sịlị nana fa kị timimị. (Mark 1:​16-20) Anịa Peter mọ Andrew mọ ụwọụ dọụ wẹrị ánị warịbolou gbalịmụ bara mịẹsin dẹbị, ámịnị “ánị ariribo gbein-koromọ,” wẹrị Jesus tuuduo-otuama paamị. Teeki duonị ámịnị bịsẹ bara mịẹ ma o? Luke gbaa amọ, Jesus mịẹ tamama yebo á kụrọmọ wẹrị, Jehovah kọkọ ánị dọụ wẹrịemi yebo kọn á pịrịmịnị eti nanamị.— Luke 5:​5-11 goo.

11. Omịnị tebara ka kị wo paamọdẹ yebo kọn wo mọ Bible tolumọmịnị ụbọ kụrọmọ a paaemi a o?

¹¹ Omịnị Jesus bara laa tamama yeama mịẹgha fa, bịsẹ bara kị gbaa kpọ, Jehovah baratụa ụ karịmịnịyọ kọn bọlọụdámịnị kịmịbo pịrịdẹ bara omịnị mọ gbaa wo mọ Bible tolumọmịnị ụbọ pịrị a paaemi. Gbaamaba, ị́mịnị bọlọụ yetolumọyọ amú dọụtimi ifiemị Jehovah baratụa ị́ pịrị baramị ị́mọ ukie wẹrịemi? Kaanghaba ị́mịnị mú iné fịrị tịbị-owei laa wẹrị yetolumọyọ amúmụ ifie laadaba, ị́mịnị fịrị wẹnịgha fa bara gbaa ụ pịrị kpọ paaemi. Ị́mịnị Jehovah karịmụ yọbị akị bọlọụdá yọ duonị, Jehovah baratụa ị́ pịrịdẹ yọmị iné peibolou kụrọmọdẹ bara kpọ gbaa ị́mọ mọ́ Bible tolumọmịnị ụbọ pịrị.

12. (a) Omịnị kịmị mọ Bible tolumọ yọ amú dọụmịnimị tetuu kị duonị zịnị bịnaotuama tụa mú agbẹị-emi a o? (b) Omịnị tebara ka kị wo vidiobo kọn ebibara ụbọ tolumọ a paaemi a o? Mịẹdịaye gbaa.

¹² Ị́mịnị ụbọ mọ Bible tolumọyọ amú dọụmịnị ifiebị, zịnị bịnaotuama kpọ tụa mú. Ámịnị ánị ụndụbo Jehovah kọn bọlọụdá yọ duonị á laadẹ arerebo gbaa paamọmịnị yọbị baratụa ụ pịrịmịnị. Ámịnị mịẹtimi gesii nimi bara mọ bá mịẹdẹ kị Jehovah kọn bọlọụdá bara mọ kọn á bii. Bịsẹyọ bụọmọ kpọ, ifie mịẹpaamọdá Pọwẹịtimi Bẹseri Bẹseri Laa! funmị “Ebibara Tuudọụ” anịghakpọ “Diitụa” anga ma emi vidiobo kọn ị́mọ mọ́ Bible tolumọmịnị ụbọ mọ dii. Gbaamaba, ámịnị tolumọye 37 tolumọmịnị ifiemị, Jehovah Wo Dọụemi Yebo Mịẹmịnị vidio bọọ emi tolumọ yebo kọn ụbọ mọ ẹrẹtei a paaeemi.

BARATỤA Ị́ MỌ MỌ́ BIBLE TOLUMỌMỊNỊ ỤBỌ PỊRỊWẸRỊ WÓ BỤỤDỌỌNYE DẸỊNMỌ

13. Jesus tebara ka kị wó tuuduo-otubo tọlọmọwẹrị penimọye koru ma o?

¹³ Jesus barịị barịị gbaa wó tuuduo-otubo pịrị amọ, penimọye ánị warị otubo mọ bá zịnị otuama mọ duobo á laamịnị. (Matt. 5:11; 10:​22, 36) Jesus fịịmọ naịndẹ ifiebị, wó tuuduo-otubo fịị bolou asụọmụ bara gbaa á pịrịmị. (Matt. 24:9; John 15:20; 16:2) Ómịnị mọkpọ egberigbaa yọbị kịlịkịlị timimọ bara kpọ gbaa á pịrịmị. Jesus gbaamị kịmịama á penimọ kpọ ámịnị bịsẹ kịmịbo mọ sụụ kụmọ, anịa kịlịkịlị bara kị timi egberigbaa fịrịwẹnị.

14. Omịnị tebara ka kị baratụa wo mọ mọ́ Bible tolumọmịnị otu pịrịwẹrị dadiye dẹịnmọmịnị a o? (2Timothy 3:12)

¹⁴ Omịnị baratụa wo mọ́ Bible tolumọmịnị ụbọ pịrịwẹrị angọtọlọmọ dẹkị penimọye bomụ ifie laa agbẹị-emi. (2Timothy 3:12 goo.) Anịa bịsẹ bara mịẹmụ yọmị omịnị bọlọụ wẹrịmọ penimọye bo ụ laamụ bara gbaa ụ pịrị. Ikie-otu, ámọ mọ́ kẹnịyọ fịrị wẹnịmịnị otu bá warịbolou otu kpọ á penimọ a paaemi bara gbaa á pịrị. Zụa kịmịama ánị ụndụbo deidẹ duonị, ámọ mọ́ kẹnịyọ fịrị wẹnịmịnị otu á dẹrịmịnị bá warị otu kpọ á weri kpọ paaemi. Omịnị ifie famọgha bara baratụa wo mọ́ Bible tolumọ otubo pịrịwẹrị dadiye bomụ ifie koru daba, ámịnị laa dadiye dẹịnmọ a paadẹ.

15. Teeki baratụa wo mọ mọ́ Bible tolumọmịnị otubo pịrịwẹrị warịbolou duo bomịnị penimọ yeama daatịẹmọ a paaemi a o?

¹⁵ Gbaa ị́ mọ mọ́ Bible tolumọmịnị ụbọ pịrị, wó warị otubo Jehovah Iseriotu ụ lẹlẹmọdẹ bara iroro kpọ paaemị, anịghakpọ ámịnị Jehovah Iseriotu tarịgha kị duonị ụ penimọ kpọ paaemi. Jesus ifie kpọ wó bịnaotubo bolouịmbẹlẹ ụ pịrịgha. (Mark 3:21; John 7:5) Gbaa ị́ mọ mọ́ Bible tolumọmịnị ụbọ pịrị, bịsẹbara paa daba ómịnị etipou bá tarị nana bara ka kị á mọ mọ́ inyenrin.

16. Ị́ tebrara ka kị baratụa ị́ mọ mọ́ Bible tolumọmịnị ụbọ pịrịwẹrị wó peibolou gbaa wó warị otubo pịrị a paaemi a o?

¹⁶ Gbaa ị́ mọ mó Bible tolumọmịnị ụbọ pịrịdá, wó warịbolou otubo Bible tolumọ dịsẹnana kpọ, kẹnị ifie ka kị yebọsẹ gbaasinmọ bara mịẹkụmọ. Tuubị ómịnị biin yeama kọn kẹnị ifie a gbaadaba, á dẹịn wẹrị ba ụ pei dọụgha kpọ paaemi. Ómịnị biingha yeama gbaadaba zịnị ifie kpọ ámịnị pei dịsẹ a paaemi. (Col. 4:6) Ụ kụrọmọ dá jw.org kọn wó warị otubo dịa. Anịkị ámịnị ánị dọụdẹ ifiesẹ sụọwẹrị Jehovah Iseriotu emibara tolumọ angọ pịrị a paadẹ.

17. Omịnị tebara ka kị baratụa wo mọ Bible tolumọmịnị ụbọ pịrịwẹrị Jehovah Iseriotu gbelemọ biibịbịama parụ a paaemi a o? (Foto kpọ dii.)

¹⁷ Ị́mịnị laa jw.org “Frequently Asked Questions” akị baratụa ị́ mọ mọ́ Bible tolumọmịnị kịmị pịrịwẹrị, wó warị otubo mọ bá fịrị wẹnịmịnị otubo mọ bii a paaemi biibịbịbo parụmịnị. (2Tim. 2:​24, 25) Pọwẹịtimi Bẹseri Bẹseri Laa! Funbị ámọ tolumọ sịndẹ ifiesẹ, “Zụa Kịmịama Gbaamịnị” anga kpọ akị ụ mọ mọ́ ẹrẹtei. Baratụa ụ pịrịwẹrị fun digha bara akị biibịbịbo parụ. Mịẹ ebimọ agbẹị-emi yọ emiaba, ifie famọgha bara gbaa ụ pịrị. Bịsẹbara ị́mọ mịẹ daba baratụa ụ pịrịwẹrị ómịnị malafagha bara wó peibolou gbaa zịnịotu pịrị a paadẹ.

18. Ị́mịnị tebara ka kị baratụa ị́ mọ mọ́ Bible tolumọmịnị ụbọ pịrịwẹrị laa egberi gbaamịnị a o? (Matthew 10:27)

¹⁸ Jesus ebiegberi gbaamụ bara kọn wó tuuduo-otubo kụrọmọmị. (Matthew 10:27 goo.) Bible tolumọmịnị ụbọ kịalị ifie famọgha bara koro wó peibolou gbaa kịmịotu pịrị daba, baratụa wó pịrịwẹrị Jehovah a sẹsẹrẹ dẹịnmịnị. Anịa ị́mịnị tebara ka kị baratụa ụ pịrịwẹrị egberigbaa kịmị pịrị a paamịnị a o? Itu mị egberigbaa ekpekpe gbeleye emibara gbaadaba, bịsẹ ifie kọn ị́ mọ mọ́ Bible tolumịnị ụbọ kụrọmọdá benibilegha egberigbaa kịmị a paa. Bịsẹ ifiebo baratụa ụ pịrịwẹrị egberigbaa kịmịotu pịrịmụ yọbị bọụbọụ ụ pịrị dẹịnmịnị bá yetolumọyọ kpọ assignment mịẹ a paaemi bara gbaa ụ pịrị. Ómịnị assignment mịẹdaba baratụa ụ pịrịwẹrị, malafagha bara egberigbaa kịmịotu pịrịmịnị.

ETI AKỊ ỤBỌ BỌỌ NANA WẸRỊEMI BARA MỊẸDỊA

19. Jesus tebara kị kọn eti akị wó tuuduo-otubo nana wẹrịemi bara mịẹdịa ma o, omịnị tebara ka kị ụ dimịẹmịnị a o?

¹⁹ Jesus agọnọ amú dọụtimi ifiemị, ómịnị gbaa wó tuuduo-otubo pịrịmị, kẹnị baị laadaba ámịnị waị ụ mọ mọ́ inyenrin gbelemịnị. Anịa Jesus ámịnị agọnọ ka waị gbeleimụ bara kị gbaamịnị bara ámịnị mọ nimigha. Mọabịkpọ, Jesus tọrụtụa ánị nimigha yebo diigha, anịa ánị ebi inyenrinbo kị diimị. (John 14:​1-5, 8) Ámịnị agọnọ amúmụ ukiemọye kẹrịakịmụ yọbị, ifie dọụ wẹrịemi bara Jesus mọ nimimị. (John 16:12) Anịduonị wo kpọ wo mọ mó Bible tolumọmịnị otubo Jehovah dọụye mịẹ dịsẹnana wẹrịemi eti nana.

20. Chifundo tebara ka kị eti kọn Alinafe a nana wẹrịemi bara mịẹdịa ma o?

²⁰ Wo mọ Bible tolumọmịnị otubo kẹnị erein kịrịịye mịẹmịnị ukiemọye wo mọ nana. Wo Chifundo, Malawi emi bịnaraụ paamọye dii. Amịnị Pọwẹịtimi Bẹseri Bẹseri Laa! funbị akị Alinafe Catholic karịbụọ amúmịnị ere mọ tolumọmị. Chifundo tolumọye 14 kọn á mọ mọ́ tolumọsin dẹbị, amịnị Alinafe biimị, kara wẹrịemi ye kọn Ọkpọnanaowei karịmịnị yọmị amịnị tebara kị tọn ma o? Alinafe boloukụn bara gbaa Chifundo pịrịmị “bẹtịbị ụbọ kị tọn angọ pịrịmịnị!” Yebị Chifundo mịẹ kẹnị bara kị paamị, amịnị ba Alinafe mọ tolumọgha fa bara kpọ iroromị. Anịa amịnị etipou bara Alinafe mọ tolumọ bọlọụ a múmị, Alinafe dei a paaemi bara amọ iroromị. Zụa agọnọwei-ama bụọdẹmị Chifundo tolumọye 34 bọọ emi biibịbị kọn Alinafebiimị: “Ị́mịnị Bible tolumọmịnị, bá Jehovah nimidẹ yọmị, tebara ka kị baratụa ị́ pịrịdẹ a o?” Chifundo paaye gbaamị, “Alinafe biin yeama kị gbaamị, amịnị mọkpọ gbaa amọ Jehovah Iseriotu Bible bọọ fa yese mịẹgha.” Bịsẹyọ bụọmị, Alinafe ánị karịtimi yebosẹ tangbei wẹrị benibilemị.

21. Omịnị tebara ka kị baratụa wo mọ Bible tolumọmịnị ụbọ pịrịwẹrị gesii ma tịẹkụromịnị a o?

²¹ Jehovah kị gesii kọn wo mọ mó Bible tolumọmịnị otu adụdụbo “mịẹ sọụmịnị” kị gbaa kpọ, omịnị kpọ wẹnị fịrị nana wẹrịemi. (1Cor. 3:7) Omịnị Jehovah dọụ wẹrịemi yebo akị ụbọ tolumọmịnị, bá baratụa ụbọ pịrịwẹrị olumo bara Jehovah tarịmịnị. Bịsẹyọ bụọmọ kpọ omịnị ụbọ kụrọmọ wẹrị Jehovah kị kọn wó ụndụ bọọ bọlọụ daamịnị. Bụụdọọye paadaba Jehovah ka sẹsẹrẹ agbẹị-emi bara kpọ kọn ụbọ tolumọmịnị. Omịnị eti kọn wó a nana wẹrịemi bara kpọ mịẹ ubọ dịa, bịsẹ yọmị baratụa ụbọ pịrị wẹrị Jehovah dọụbara mịẹ bá gesii kpọ a tịẹkụromịnị .