“Egberima Dịsẹ Nana Wẹrịemi Otubo” Egberi Kẹrịakịmịnị

1. Kịmịotu bọlọụ ebiegberi naadaba tebara kị mịẹmịnị a o? (Acts 13:​47, 48; 16:​14, 15)

BỌLỌỤ kụraị sọnransii bọọ timi biin kịmịama Christ gbelemọ egberi naa ifiemị, pọwẹịtimi bo Christtuuduo-otu a paamụ bara dọụmị. (Acts 13:​47, 48; 16:​14, 15 goo.) Bịsẹ bara kị, mị tịẹkiri kpọ, zụa kịmịama bọlọụ ebiegberi naamịnị ifiebị pọwẹị kụrọmọmịnị. Bọlọụ ifiema ebiegberi bọọ dịsẹ nanagha wẹrị kịmịama kpọ waị ánị adụdụbo finiwẹrị gesii kẹrị akịdẹ. Omịnị dịsẹ nana wẹrịemi otu ẹrịdaba teeki mịẹ agbẹị-emi a o?

2. Tuuduo-otu dou fịrịbị tebara ka kị kiribou tọlọmọmịnị kịmị fịrị mọ lei-emi a o?

² Wẹrị kẹnị tọnmọye dii. Tuuduo-otu dọụ fịrịbị akị kiribou tọlọmọmịnị kịmị wẹnịmịnị fịrị tọnmọ a paaemi. Beinyaị kẹnị tịn a paadaba, kiribou tọlọmọmịnị ụbọbị zịnị fịrịama kị wẹnịtimi kpọ bịsẹ fịrịbo a barasinwẹrị mú bịsẹ beinyaịbọ kadịmịnị. Bịsẹ bara kị, omịnị kpọ, gesii dịsẹ-emi ụbọ ẹrịdaba, ifie famọgha bara ụbọ barịịwẹrị bo Christtuduo-ụbọ a paamịnị. Bá mọkpọ baratụa saramọ gesii kẹrị akigha kịmịbo kpọ pịrịwẹrị ánị naamịnị egberibo yelaaemi bara nimi-mịnị. (John 4:​35, 36) Ye-leleipẹlẹ kụrọ baratụa wo pịrịwẹrị, wo peimịnị ụbọ mọ ẹrẹ agbẹị-emi bara nimi-mịnị. Mị egberitịbịmị, omịnị dịsẹ nana wẹrịemi kịmị mọ bọlọụ ifie a gbeleidaba mịẹ agbẹị-emi bara diitụamịnị. Omịnị baratụa kịmị pịrị sọụ bọlọụ a mú mọ bara kpọ diitụamịnị.

BARATỤA AKỊ DỊSẸ NANAEMI OTU PỊRỊMỤ BARAMỊ

3. Dịsẹ nana wẹrịemi otu ẹrịdaba, omịnị teeki mịẹ a paaemi a o? (1Corinthians 9:26)

³ Omịnị dịsẹ nana wẹrịemi kịmị ẹrịdaba, ifie famọgha bara baratụa ụbọ pịrịwẹrị bo Jehovah tolumọ nimi dọụmịnị. Anịduonị, ẹrẹtei siindaba, omịnị kịmịotu mọ Bible tolumọmịnị bara gbaa ụbọ pịrị, bá ụ tịịn yetolumọyọ a bo. —1Corinthians 9:26 goo.

4. Zụaotuama ifie famọgha bara koro Bible tolumọ dịsẹ nanamị. Kẹnị paaye gbaa.

⁴ Omịnị kịmịotu mọ Bible tolumọmịnị bara gbaa. Zụa kịmịama ifie famọgha bara koro Bible tolumọ dịsẹ nanamịnị. Gbaamaba, Canada ibemị, kẹnị Thursday-baị, kẹnị ere wẹnị mú cart kọn egberigbaamịnị bịnaotu laawẹrị Pọwẹịtimi Bẹseri Bẹseri Laa! Fun akịmị. Funmị akịdẹmị, á dịsẹ-emiaba kịmị bo á mọ mọ́ fun tolumọmịnị bara bịnaraụma mọ gbaa á pịrị ifiemị, erema dịsẹ nana wẹrịemi yọ duonị, amịnị ánị phone number kọn bịnaotubo pịrịmị. Zụa hour-ama bụọdẹmị, erema text message fịrịmọ bịnaraụma pịrịwẹrị ánị fomuun emi ifie biimị, bịnaraụma weekend á dọụ mú wẹrị fun tolumọ a paaemi a bara kọn á bii ifiemị, erema á biimị: Deinbaịmị ebiemi a? Ịmịnị fomuun nana wẹrịemi. Ámịnị bịsẹ Friday baịmị Bible tolumọmị. Erema bịsẹ week bolouma yetolumọyọ kpọ múmị, bá mị tịẹkirimị, saramọ saramọ bara ka kị gesii bọọ sọụ bọlọụ a múmịnị .

5. Omịnị kịmịotu mọ Bible tolumọ dọụmịnịaba, tebara ka kị ebidẹịn ụwọụ nimimịnị a o? (foto kpọ dii.)

⁵ Gaan baramị, wo egberigbaa pịrịmịnị kịmịbosẹ anị erema bara fa. Zụa kịmịama ifie dọụ wẹrịemi. Omịnị ụbọ dịsẹ a paaemi egberitịbị kị kọn koro ụbọ mọ ẹrẹteimịnị. Ebi tọrụ kọn ụbọ dii, bá ụbọma dịsẹ nana wẹrịemi bara kpọ mịẹ ụ dịamịnị, bịsẹbara mịẹmịnịbị laa ụbọ mọ koro Bible tolumọ a paaemi. Omịnị kịmị mọ Bible tolumọ dọụmịnịaba, teeki gbaa a paaemi a o? Wo wẹrị ebibara kọn kịmịotu mọ koro Bible tolumọdẹ bịnaotu gbaa yeama diitụa.

6. Dịsẹ nana wẹrịemi ụbọ ẹrịdaba, omịnị teeki gbaa wẹrị waị laa bo ụbọ mọ ẹrẹtei a paaemi a o?

⁶ Mị bịnaotubo gbaa baramị, zụa yọama, omịnị kịmịotu mọ Bible tolumọ dụọmịnịaba, zụa egberi ụngbọụ-ama gbaa kụmọ. Gbaamaba “tolumọ,” bá “Bible tolumọye,” anịghakpọ “ị́ tolumọ” gbaamụ yọ dii a, “ẹrẹtei,” bá “Bible bọọ sụọtuu nimi” egberi ụngbọụbo ka kị á mọ mọ́ ẹrẹteidaba, ebidẹịn emi. Mọkpọ zịnị ifie kpọ ubo mọ ẹrẹtei bọlọụ a mú dụọmịnịaba ị́mịnị gbaa a paaemi, “Bible mị ụndụ gbelemọ yelaa biibịbịama paraị wẹrịemi yọbị kịmị angọ bọụmọmị, anịghakpọ “Bible mị karịbụọ gbelemọ egberiama kụmọ gbaagha, anịa baratụa wo pịrịwẹrị ebibara ụndụ inyenrinmụ bara kpọ gbaa wẹrịemi.” Ị́mịnị mọkpọ gbaa a paaemi: “ẹrẹteimị ifie akịgha fa; ị́mịnị 10 duomú 15 miniti kpọ kọn yelaaemi ye tolumọ akị a paaemi.” Ị́mịnị, “ifiebosẹ,” anịghakpọ “weekbosẹ,” egberi ụngbọụbo gbaamụ yọ kịlẹ a paaemi, tuubị bịsẹ egberibo ụbọ mịẹ esiin sụọ a paaemi.

7. Zụaotu te ifie ka Bible gesii dọụ ẹrị ma o? (1Corinthians 14:​23-25)

⁷ Á tịịn yetolumọyọ a bo. Fịrịmọpaa-owei Paul ifiebị, zụa kịmịama yetolumọyọ a mú ifie ka, anị tolumọtimi yebo kọkọ gesii-emị bara nimimị. (1Corinthians 14:​23-25 goo.) Mị tịẹkiri kpọ bịsẹbara k’emi. Yetolumọyọ a bomịnị yọmị baratụa biin aya Bible tolumọmịnị kịmịama pịrịwẹrị gesii bọọ sọụ bọlọụ a mú dẹịnmịnị. Te ifie kị ị́mịnị á tịịn yetolumọyọ a bo agbẹị-emi a o? Pọwẹịtimi Bẹseri Bẹseri Laa! funmị tolumọyọ 10 á tịịn agbẹị-emi ifie gbaa wẹrịemi, anịa tolumọ timi bịsẹyọ laadẹ kị á tịịn bara gbaagha. Ị́mịnị bọlọụ ámọ mọ́ ẹrẹteimịnị ifiemị, á tịịn yetolumọyọ bo a paaemi, kaanghaba ị́mịnị amabẹnịmọ egberitịbịbị anịghakpọ bịsẹ week bọọ tolumọmịnị Lewarị fun egberitịbị gbaa á pịrị a paaemi.

8. Te yeama kị wo mọ gbaa wo tịịn yetolumọyọ a bomịnị kịmị pịrịmịnị a o? (Isaiah 54:13)

⁸ Dịsẹ nana wẹrịemi ụbọ tịịn yetolumọyọ a bo dọụmịnị ifiemị, wo yetolumọ yọbo mọ bá zịnị karịbụọbo mọ bẹbẹ paaemi bara tuugbaa ụbọ pịrị. Kẹnị ere bọlọụ yetolumọyọ a bo ifiemị, bịnaoweimị Lewarị fun tolumọmịnị mị, amịnị ámọ mọ́ Bible tolumọmịnị ụbọ biimị, “Bei kịmịbị kịmịsẹ ẹrẹbosẹ kị nimisiin wẹrịemi a?” Bịnaraụma á parụmị, omịnị wo warị-otubo ẹrẹbosẹ nimi wẹrịemi bara kị, omịnị angọtụa wẹrị wo itu bọọ emi otubo ẹrẹbo nimimịnị bara bịnaraụ mọ gbaa á pịrịmị. Ánị churchmị biin kịmịama zọzọ ẹrẹ nimigha bara ámọ gbaamị. Omịnị wo yetolumọ yọbo bẹbẹ paaemi zịnị ụwọụama kpọ gbaa ụbọ pịrị a paaemi. (Isaiah 54:13 goo.) Omịnị bẹnịị wẹrị Jehovah karị, ụ duo tolumọye nana, bá zọzọ kpọ kụrọmọmịnị. (Heb. 2:12; 10:​24, 25) Jehovah pịrị tolumọmụ yọ kị duonị bẹnịịmịnị. (1Cor. 14:40) Wo Kingdom Hall bo laa yetolumọ akị a paaemi bara ka kị kẹrị wẹrịemi. Omịnị kẹnị anga kpọ a sụọgha duonị omịnị wo yetolumọ yọbo politics egberi ẹrẹteigha; omịnị kịmịotu mọ bẹbẹkpụn bá wo bẹtịbị nimi wẹrịemi yeama gbaagha. mịẹdẹkị ụbọmị yetolumọyọ a bomịnịmị, omịnị Teeki Amananaowei Daabụọ Warị Bọọ Paaemọ? vidio kọn ụbọ dịa. Bịsẹ yọmị baratụa ụ pịrịwẹrị yetolumọyọ bọọ paamịnị yebo nimimịnị.

9-10. Omịnị kịmị tịịn yetolumọyọ a bomịnịmị, te yeama kị gbaa ụbọ pịrịwẹrị wó malafamịnị yọ dẹịnmomịnị a o? (Foto kpọ dii.)

⁹ Zụaotu ámịnị, yetolumọyọ a bodaba, omịnị á penimọ wẹrị bo Jehovah iseri-ụbọ a paamụ malafamịnị. Kịmịotu bo wo sụọmọ wo mọ yetolumọmịnị yọbị wo mịẹ pọwẹịmịnị, bá ámịnị kperein tịtẹtimi egberi pei a paaemi bara gbaa ụbọ pịrị. Warịbolou-otu kpọ bo a paaemi, ánị kala-awọụbo kpọ kọn tụa bo a paaemi. Wo yetolumọ yọbo, omịnị kala-awọụbo kọn bẹbẹ tolumọgha. Anịa, kịmịsẹ kẹnịyọ ka timi tolumọyebo naamịnị. Anịkị, daụ mọ yin mọ otubo tọrụmọ tọrụmọ ánị awọụbo ẹrị bá kọn á tolumọmịnị yebo kpọ nimidẹ. (Deut. 31:12) Omịnị envelope-ama paamọ kịmịotu pịrịwẹrị sịlị tụa bara mịẹgha. Anịa omịnị Jesus gbaa egberi kị dii mịẹmịnị: “Ámịnị ye gbẹẹgha bara ka kị nana duonị, ámịnị kpọ fomuun bara ka kị pịrị.” (Matt. 10:8) Gbaa ụbọ pịrị, ganị (garịn) bịdẹ tụadẹ kị yetolumọyọ bo a paaemi bara fa. Ọkpọnanaowei adụdụ bolou kị ditụamịnị.—1Sam. 16:7.

¹⁰ Ụbọmi yetolumọyọ a bodaba, zụzụ bara ụbọ kẹrịakị. Ụbọ kọn itu-kosuotubo mo bá zịnị bịnaotubo kpọ dịa. Bịnaotubo ebibara akị ụbọ kẹrịakị wẹrịemisẹ, zịnị ifie kpọ ụbọ waị bo dịsẹmịnị. Yetolumọmịnị ifiebị, ụbọmị Bible nanaghaba, iné Bible kọn ụ mọ mó dịẹ bá baratụa ụ pịrịwẹrị ẹrẹmịnị owei gbaamịnị egberibo a sụọtuu nimi anịghakpọ wo yetolumọmịnị bara gbaa ụ pịrị.

BỌLỌỤ BIBLE TOLUMỌMỊNỊ IFIEMỊ

11. Ị́mịnị tebara ka kị ị́mọ mọ́ Bible tolumọmịnị ụbọ ifiemị didụbamọ wẹrịemi bara mịẹdịamịnị a o?

¹¹ Omịnị kịmị mọ Bible tolumọmịnị-aba teeki kọn ịkịọụ a wẹrị agbẹị-emi a o? Ụbọmị zịnị mịẹmịnị yeama nana wẹrịemi duonị wó fomuun nana wẹrịemi ifie didụbamọ. Gbaamaba, ị́mịnị kịmị mọ tolumọmụ ifie gbaa pẹlẹdaba, angọtụadá gbaa wẹrịemi ifiema mú ụbọ laa, iné ete bọọ emi otubo bịsẹ bara mịẹgha kpọ ị́mịnị á dimịẹ kụmọ. Bọlọụ ụbọ mọ tolụmọmịnị ifiemị, tolumọye mịẹ kẹsị. Ubọmị tolumọ bọlọụ ámú dọụmịnị kpọ, omịnị tolumọye mịẹ kẹsịmụ yọ kị ebidẹịn emi bara kị kasụọdẹ egberigbaa bịnaotubo mọ gbaamị. Biin egberiama ẹrẹ kụmọ. Warị nana ụbọ bụọmọ wẹrị wó ịkịọụ ma emi yebo gbaa paamọ.—Prov. 10:19.

12. Omịnị koro kịmị mọ Bible tolumọdaba, te ka kị bọlọụdaa agbẹị-emi a o?

¹² Ị́ koro kịmị mọ Bible tolumọmịnị ifiemị, ụbọmị Jehovah mọ Jesus mọ nimi bá á tarịmụ yọ ka kị bọlọụdaa. Ị́ laa bịsẹ bara mịẹmụ yọmị, ị́mịnị ụbọ mọ yetolumọmịnị ifiemị, iné nimi wẹrịemi yeama gbaa kụmọ, anịa Bible kị duo ụbọ tolumọ. (Acts 10:​25, 26) Fịrịmọpaa-owei Paul ebi mịẹdịaye ka paa wo pịrị-emi, ómịnị kịmịotu tolumọ timi ifiemị, Jesus ka kị bọlọụdaamị. Jehovah, Jesus kị fịrịmọ bo baratụa wo pịrịmị. Omịnị ụ nimi bá ụ tarị kị Jehovah mọ dọụ wẹrịemi. (1Cor. 2:​1, 2) Bịsẹyọ bụọmọ kpọ Paul omịnị baratụa wo mọ Bible tolumọmịnị otubo pịrịwẹrị ebi inyenrinbụọ-ama nanamụ yọbị yelaa-emi bara mịẹgaanmị, bịsẹ inyenrinbụọbo kọn gold, silver, bá yelaa okuta-ama tọnmọ a paaemi. (1Cor. 3:​11-15) Bịsẹ ebi inyenrinbụọbo anị peibolou, kịlịkịlị-nimiye, ye-leleipẹlẹ, bá Jehovah esiinmịnị yọbị. (Ps. 19:​9, 10; Prov. 3:​13-15; 1Pet. 1:7) Omịnị kpọ Paul mịẹ bara dimịẹdá baratụa wo mọ Bible tolumọmịnị otubo pịrịwẹrị kụrọ peibolou nana, bá á kọn Jehovah a nana wẹrịemi tarị kpọ mịẹ kụrọmọ.—2Cor. 1:24.

13. Omịnị baratụa dịsẹnana wẹrịemi otu pịrịmịnịmị, tebara ka kị etipou bá ye asụọtuu nimi wẹrịemi bara mịẹdịamịnị a o? (2Corinthians 10:​4, 5) (Foto kpọ dii.)

¹³ Omịnị Jesus dimịẹdá etipou bá ye asụọtuu-nimi wẹrịemi bara ka kị kịmịotu tolumọ. Ụbọ mịẹ bụzemụ biibịbịama bii kụmọ. Mịẹ ka paaemiaba, kẹnị yọ kụrọ ụbọ pịrịmịnị ifiesẹ, tolumọ bọlọụ amúdá tuu ifie kị waị bo bịsẹyọ tolumọ. Ụbọ penimọ wẹrị iné tolumọmịnị yebo kẹrịakịmụ bara dii a, gesii bụọmọ wẹrị wó adụdụ ma ekemi nana. (John 16:12; Col. 2:​6, 7) Bible gbaa baramị, ekpe karịbụọ tolumọ yebo tịẹkụrọemi warị-akpakpa bara k’emi, omịnị á famọ-pẹị agbẹị-emi. (2Corinthians 10:​4, 5 goo; see study note on “overturning strongly entrenched things.”) Anịduonị omịnị baratụa wo mọ Bible tolumọmịnị otubo pịrịwẹrị eti kọn Jehovah atụadaba, ánị nana wẹrịemi ekpe tolumoyebo, kụrọemi kpọ ámịnị laa dẹịnmọmịnị.—Ps. 91:9.

AYA OTUAMA YETOLUMỌYỌ A BODABA

14. Omịnị tebara ka kị aya yetolumọyọ a bomịnị otubo mọ inyenrinmịnị a o?

¹⁴ Jehovah omịnị kịmịsẹ tarị kị dọụ wẹrịemi. Zịnị ibe kị duo bo, bá zịnị bẹlị kị fiemịnị kpọ, sịlị emi bá sịlị fa kpọ, omịnị kpekẹnị bara ka kị kịmịsẹ tarị kị Jehovah mọ dọụ wẹrịemi. (Jas. 2:​1-4, 9) Omịnị tebara ka kị aya yetolumọyọ a bomịnị otubo tarị wẹrịemi bara mịẹdịamịnị a o?

15-16. Omịnị tebara ka kị aya yetolumọyọ a bomịnị otubo tarị wẹrịemi bara mịẹ á dịa paaemi a o?

¹⁵ Zụa otu wo yetolumọyọ bọọ paamịnị yebo nimi dọụmịnị kị duonị bomịnị, anịghakpọ zịnị yọ inyenrinmịnị ụbọ kị ụbọ kụrọmọ wẹrị múmịnị. Anịduonị omịnị aya kịmị kọn wo yetolumọyọ bọọ ẹrịdaba, ebibara á kule. Zụzụ bara á kẹrịakị, anịa á mịẹ bụzemọ bara mịẹkụmọ. Á tịịn bo ị́mọ mọ peitimi. Iné Bible mọ bá kọn tolumọmịnị fun mọ kọn ámọ mọ́ dịẹ, anịghakpọ ánị bẹtịbị yaị kọn á pịrị. Zịnị á mịẹ pọwẹịmọmụ yeama kpọ mịẹ. Kẹnị owei Kingdom Hall a bo ifiemị omịnị gbaa akị ụ kụle bịnaowei pịrịmị, ịmịnị bụzemịnị, ine tụa wẹrịemi arumị zịnịotu yaịbo mọ leigha. Bịnaoweimị Jehovah Iseriotubosẹ kọọ kịmịbo emibara k’emi bara gbaa ụ pịrịwẹrị wó ịkịọụ mịẹ dọọmị. Bịsẹ kịmịbị, tuu ifie laamị benibilemị, anịa ómịnị bịnaoweimị gbaa ụ pịrị egberi baragha. Kọn ịkịọụ a wẹrị agbẹị-emi egberi: Omịnị aya yetolumọyọ a bo ụbọ mịẹ bụze anịghakpọ wo gbelegha biibịbịama bii kụmọ, bịsẹ yọmị omịnị ụbọmị a dịsẹ nana wẹrịemi bara kị mịẹdịamịnị.—1Pet. 4:15.

¹⁶ Omịnị á mịẹ bụzeghamụ zịnị ụwọụ, anị omịnị ẹrẹteimịnị ifie, biibịbị parụmịnị ifie bá assignment mịẹmịnị ifie kpọ kịlịkịlị bara ka kị ánị pei wẹrịemi yebo kẹrị ẹrẹtei. Á mịẹ boloukọn wẹrị waị yetolumọyọ a bogha fa egberiama ẹrẹ kụmọ. (Titus 2:8; 3:2) Gbaamaba, omịnị ánị pei wẹrịemi yebo dịseimọgha fa. (2Cor. 6:3) Bịsẹyọ gbelemọ yọmị, amabẹnịmọ ẹrẹegberi pịrịmịnị bịnaotubo kịlịkịlị bara ka kị pịrịmịnị. Ámịnị tiri-otubo sụọtuu nimigha fa egberi ungbọụbo kpọ a tuugbaa gaan paamọmịnị.

17. Omịnị te ka kị ịkịọụ atụa wẹrị “egberima dịsẹ nana wẹrịemi” otubo dọụmịnị a o?

¹⁷ Ereinbo bụọmịnịmị, omịnị izoumọ izoumọ bara ka kị tuuduo-otu dọụ fịrị wẹnịmịnị, bá pẹlẹgha bara “Ọkpọnanaowei egberima dịsẹ nana wẹrị fagha fagha ụndụ nanamịnị” otubo dọụ ẹrịmịnị. (Acts 13:48) Omịnị á dọụ ẹrịdaba, omịnị ifie famọgha bara ámọ mọ́ Bible tolumọ bá á tịịn yetolumọyọ a bomịnị. Bịsẹ bara wo mọ mịẹmịnịmị, omịnị baratụa á pịrịwẹrị “fagha fagha ụndụ ụwọụ” ka timi wẹnịmịnị.—Matt. 7:14.