Jehovah Baratụa Wo Pịrịwẹrị Ye-inemịnị Baramị

1. Tetuu kị duonị omịnị ye-ine inyenrinbụọ dọụ wẹrịemi a, bá te baratụa- pịrịye kị wo mọ nana wẹrịemi a o? (1Peter 5:10)

MỊ KUNUMỌ ereinbo, inyenrinmị kụrọ fa k’emi. Anịduonị Jehovah karịmịnị otubo ye-ine inyenrinbụọ nana agbẹị-emi. Kụrọ dọọn-ama zụa kịmịama kẹrịdẹ. Zịnịotu ba ánị tarị wẹrịemi kịmịama á wẹrị fịịdẹ. Zụa-otu ánị warịbolou-otu anịghakpọ daabụọ-otu kị á penimọmịnị. (Matt. 10:​18, 36, 37) Anịa mị bụụdọọnyebo kị ị́ laamịnị kị gbaa kpọ, Jehovah baratụa ị́ pịrịwẹrị inemịnị bara nimi.— 1Peter 5:10 goo.

2. Christtuuduo-otu ye-inemịnị kụrọmị te yọ kị duo bomịnị a o?

² Ye-ine gbaadaba anị kịmị penimọye, bụụdọọnye, bá dadiye bolou ka emi kpọ dẹịnsụọgha ukiemọye kẹrị kụrọmọmịnị. Anịa Jehovah karịmịnị kịmị ye-ine dọụmịnịsẹ, wó bẹtịbị kụrọ akị mịẹ a paagha fa; Jehovah duo bomịnị “kịmịawọụ kụrọbosẹ dẹịn-emi” kụrọ kị baratụa ụ pịrị a paaemi (2Cor. 4:7) Mị egberitịbịbị, Jehovah akị baratụa wo pịrịwẹrị ye-inemịnị nia yeama wo mọ kẹrị ẹrẹteimịnị. Bá mị nia yebo wo mọ akị baratụa angọ pịrịmịnị bara kpọ ditụamịnị.

TẸẸBỊBỊ

3. Tetuu kị duonị tẹẹbịbị tamama dịẹpịrịye bara wo mọ gbaa a paaemi a o?

³ Jehovah omịnị ye-inemụ yọ duonị kẹnị tamama ye mịẹpaamọ wo pịrị wẹrịemi. Omịnị sei bolou k’emi kpọ, laa ụ mọ mó ẹrẹteimụ fomuun mịẹpaamọdẹ. (Heb. 4:16) Kẹrị iroro dii: Omịnị wo dọụdẹ ifiesẹ bá wo adụdụ ma emi yesẹ gbaa Jehovah pịrị a paaemi. Ómịnị bẹlịbosẹ naa wẹrịemi bá wo timi tẹẹdẹ yọsẹ, bẹtịbị kị emi o anịghakpọ ikoli-warị k’emi kpọ Jehovah naamịnị. (Jonah 2:​1, 2; Acts 16:​25, 26) Omịnị malafa wẹrị laa wo adụdụ bọọ emi egberibo gbaa paamọgha ifie kpọ, Jehovah wo adụdụ bolou ma emi yebo nimi wẹrịemi. (Rom. 8:​26, 27) Gesii gbaamaba, tẹẹbịbị Jehovah bara kị duo boemi tamama dịẹpịrịye!

4. Tetuu kị duonị omịnị Jehovah baratụa wo pịrịwẹrị ye-ine bara tẹẹmịnị yọmị wó dọụyọ mọ kẹnịsụọmọemi bara gbaa a paaemi a o?

⁴ Jehovah Bible duo gbaa wo pịrị amọ, “omịnị biidẹ yesẹ wó dọụyọ mọ kẹnịsụọmọ-emisẹ, ómịnị wo parụmịnị.” (1John 5:14) Anịduonị omịnị Jehovah baratụa wo pịrịwẹrị ye-inemụ yọ bii a paaemi a? Paaemi! Bịsẹ tẹẹbịbịmị wó dọụyọ mọ kẹnịsụọmọemi. Tetuu kị duonị omịnị bịsẹ bara gbaamịnị a o? Omịnị ye-inedẹ ifiesẹ Jehovah laa parụbịbị mịẹpaamọ Satan pịrị a paaemi. (Prov. 27:11) Bịsẹyọ kị bụọmọ kpọ, Bible gbaa wo pịrị amọ Jehovah “wó kụrọbị akị baratụa adụdụsẹ kọn ụ karịmịnị otubo pịrịmụ yọ ma” dịsẹ nana wẹrịemị (2Chron. 16:9) Anịduonị Jehovah baratụa wo pịrịwẹrị inemụ kụrọ mọ bá dịsẹ mọ nana wẹrịemi bara wo mọ nimi wẹrịemi.—Isa. 30:18; 41:10; Luke 11:13.

5. Tẹẹbịbị tebara ka kị baratụa wo pịrịwẹrị dọọ adụdụ nanamịnị a o? (Isaiah 26:3)

⁵ Bible gbaa amọ, omịnị pẹlẹgha bara wo a bụụdọọnmịnị yebo akị Jehovah tẹẹ daba, “Ọkpọnanaowei duo bomịnị kịmịawọụ nimi yebosẹ dẹịn-emi dọọmị, [wo] adụdụbo mọ bá [wo] ye-iroro kụrọ mọ kekeremịnị.” (Phil. 4:7) Bịsẹ yọmị wo a tọrụkẹrịmị. Jehovah karịgha otubo bụụdọọnye á laadaba, ámịnị dọọ nanamụ bẹbẹ ụwọụama dọụmịnị. Gbaamaba, zụa-otuama ba ye-iroro dọụgha duonị, ánị ịkịọụ ma emi yebosẹ kọnsinmụ yeama mịẹmịnị. Anịa bịsẹ mịẹmịnị yọbị wo Jehovah karịmịnị yọ gbele a paaemi. (Compare Matthew 12:​43-45.) Bịsẹyọ kị bụọmọ kpọ, omịnị tẹẹdaba Jehovah kọn wo pịrịmịnị dọọmị dụba akị zịnị ye duo bomịnị dọọbosẹ dẹịn-emi. Omịnị tẹẹ Jehovah pịrịdaba, omịnị kọkọ Jehovah ka sẹsẹrẹ emi bara kị mịẹdịamịnị bá ómịnị “dụụfagha dọọ” kọn wo pịrịmịnị. (Isaiah 26:3 goo.) Jehovah bịsẹ dọọmị akị wo pịrịmịnị kẹnị ụwọụ anị ómịnị baratụa wo pịrịwẹrị Bible bọọ tolumọdẹ gesiibo ukiemịnị yọmị. Bịsẹ gesiibo ukie daba baratụa wo pịrịwẹrị Jehovah tọrụtụa wo diimịnị bá wo ebi kị dọụmịnị bara wo mọ nimimịnị, bịsẹ yọmị wo adụdụ mọ wo ịkịọụ mọ mịẹ dọọ nanamịnị.—Ps. 62:​1, 2.

6. Ị́mịnị te yeama ka kị tụa tẹẹbịbị mịẹmịnị a o? Foto kpọ dii.)

⁶ Ine mịẹ agbẹị-emi yemị. Ị́mịnị iné bụụdọọnyebo inemịnịbị, pebidá “iné bụụdọọnyebosẹ gbeinmọ Jehovah kị pịrị” bá dọọ nanamụ bara kpọ tẹẹ. (Ps. 55:22) Baratụa ị́ pịrịwẹrị bịsẹ bụụdọọnye kẹrịmọ tịẹmọmụ kịlịkịlị nimiye kpọ kọn Jehovah bii. (Prov. 2:​10, 11) Bịsẹyọ bụọmọ kpọ Jehovah kulemụ yọ kpọ barafa kụmọ. (Phil. 4:6) Jehovah kọn baratụa ị́ pịrịwẹrị bịsẹ dadiyebo inetimi mị tịẹkiri laade yọ kẹrị ukie, bá bịsẹyọ kọn ụ kule. Pebidá iné bụụdọọnyebo bụọmọ ị́ mịẹ iné nanadẹ tarịbo barafa kụmọ.—Ps. 16:​5, 6.

BIBLE MỊ

7. Bible tolumọmịnị yọbị tebara ka kị baratụa wo pịrịwẹrị ye-inemịnị a o?

⁷ Jehovah baratụa wo pịrịwẹrị ye-inemụ yọ duonị Bible kọn wo pịrị wẹrịemi. Omịnị Bible goodaba Jehovah kọkọ baratụa wo pịrịmụ bara gbaa wo pịrị wẹrịemi egberiama bein, bịsẹ yọmị eti akị wo pịrịmịnị. Wo wẹrị kẹnị mịẹdịaye dii. Matthew 6:8 gbaa amọ: “Ị́ Daụbị iné bii dọụmịnị yebo nimi dẹkị ị́mịnị ụ biimịnị.” Jesus kị bịsẹ egberibo gbaamị, anịa Jehovah nimi Jesus laa-emi kịmị fa. Anịduonị, omịnị bụụdọọnye bolou k’emi kpọ, Jehovah wo a dịsẹnana wẹrịemi bara wo mọ nimi wẹrịemi. Bible mị biin kịmị kụrọmọ egberiama gẹẹ wẹrịemi, bei egberibo baratụa wo pịrịwẹrị ye-inemịnị.—Ps. 94:19.

8. (a) Baratụa wo pịrịwẹrị ye-inemịnị kẹnị Bible tolumọye gbaa, (b) Omịnị teeki mịẹwẹrị laa Bible tolumọyebo kọn ukie wẹrị tụa inyenrin a paaemi a o?

⁸ Omịnị bụụdọọnye bolou emi ifiemị, Bible tolumọ yebo baratụa wo pịrịwẹrị ye-ine a paaemi. Bịsẹ tolumọ yebo, kịlịkịlị-nimiye kọn wo pịrịwẹrị laa ebi iroro tọn angọ pịrịmịnị. (Prov. 2:​6, 7) Gbaamaba, Bible wo kụrọmọ amọ, omịnị deinbaị paamụ yeama diwẹrị kpekekpekemụ yọ dii a, ereinbosẹ Jehovah ka sẹsẹrẹ. (Matt. 6:34) Omịnị ifiebosẹ Bible goo bá kẹrị iroromịnịsẹ, omịnị laa mị tolumọ yebo dọụ kụrọmọ wẹrịemi ifiebo ukie wẹrị dimịẹ a paadẹ.

9. Jehovah kọn baratụa wo odubo otubo pịrị barabị wo mọ kọn Bible duo goodaba, tebara ka kị baratụa wo pịrịmịnị a o?

⁹ Bible mị Jehovah karịtimi otuama paamọ yeama gẹẹ wẹrịemi, bá Jehovah kọn baratụa á pịrị bara kpọ gbaa wẹrịemi. (Heb. 11:​32-34; Jas. 5:17) Omịnị bei yebo kẹrị irorodaba, baratụa wo pịrịwẹrị eti akị Jehovah a nana dẹịnmịnị “ómịnị kị wo tịbịsọwẹịyọ bá kụrọ akị wo pịrịmịnị owei, bá akpotu ifie kpọ ifie famọgha bara baratụa wo pịrịmịnị.” (Ps. 46:1) Anịduonị omịnị mị kịmịbo kọn Jehovah karị barabị kẹrị irorodaba, wo dịnẹmọ wẹrị ánị peibolou mọ ánị ye-ine inyenrinbụọ mọ dimịẹmịnị.—Jas. 5:​10, 11.

10. Bible mị baratụa ị́ pịrị ị́mọ dọụmịnịsẹ teeki ị́mọ mịẹmịnị a o?

¹⁰ Ine mịẹ agbẹị-emi yemị. Ereinbosẹ Bible goo, bá baratụa ị́ pịrị a paaemi Bible yọbo gẹẹ koromọ. Biin kịmịama pekei bị daily text Bible yọ goomịnị yọbị á kụrọmọdẹ bara dọụ ẹrịdẹ. Marie tịịnmịnị bịnaraụa a daụ mọ yin mọ cancer dọọn pịrị kẹrị ifiemị, teeki baratụa a pịrịwẹrị á kekere timi ifie ma ye-ine ma o? A gbaamọ “Pekei bosẹ ịmịnị Daily Text bọọ emi Bịble yọ goo wẹrị kẹrị iroro timimị.” “Bịsẹ mịẹmịnị yọmị baratụa ị pịrịwẹrị ine bụụdọọnyebo kẹrị iroro mọ yọ dii a, Jehovah kọn wo tolumọmịnị ebi yebo kị kẹrị iroromị.”—Ps. 61:2.

WO BỊNAOTUBO

11. Bụụdọọnye wo laadaba teeki baratụa wo pịrịwẹrị ine a paaemi a o?

¹¹ Jehovah tẹmẹanga bịnawarị kọn baratụa wo pịrịwẹrị ye-inemịnị. “Akpọyọrọsẹ [wo] bịnaotubo bịsẹ kpekẹnị ụyabo kị fịmịnị bara” wo mọ nimi yọbị baratụa wo pịrịwẹrị omịnị bẹtịbị fa bara nimimịnị. (1Pet. 5:9) Anịduonị, wo laamịnị bụụdọọnyebo wo bịnaotubo kpọ laadẹ, bá ámịnị yebị inedẹ bara wo mọ nimi yọbị, baratụa wo pịrịwẹrị omịnị kpọ laa ine a paaemi eti nanamịnị!—Acts 14:22.

12. Wo bịnaotubo tebara ka kị baratụa wo pịrị a paaemi a, omịnị ba tebara ka kị á barịị a paaemi a o? (2Corinthians 1:​3, 4)

¹² Omịnị bụụdọọnye inemịnị ifiemị, wo bịnaotubo kpọ wo kụrọmọ a paaemi. Bịsẹ bara kị paa akị fịrịmọpaa-owei Paul kpọ pịrịmị. Daabụọ otubo ba ụ bụọmọ warị duo paagha ifiemị, bịnaotuama kụrọmọye mọ baratụa-pịrịye mọ kọn Paul pịrịmị. Yebị wó a tọrụkẹrị duonị Paul ánị ẹrẹbo kpọ tịịn á kulemị. (Phil. 2:​25, 29, 30; Col. 4:​10, 11) Wo ifie kpọ bịsẹ kpekẹnị bara kị paamịnị. Omịnị bụụdọọnye bolou emi ifiemị, wo bịnaotubo baratụa wo pịrịwẹrị ine a paaemi, bịsẹ bara kị ámịnị bụụdọọnye bolou emi ifie kpọ, omịnị kpọ baratụa á pịrịwẹrị inemịnị.— 2Corinthians 1:​3, 4 goo.

13. Teeki baratụa bịnaraụ Maya pịrị wẹrị ye-ine ma o?

¹³ Maya tịịnmịnị bịnaraụ Russia k’emi, bịnaotubo ebibara ka á kụrọmọmị. Kụraị 2020 mị daabụọ-otu bo ánị warị gagala wẹrị yeama dọụmị, bá amịnị ánị peibolou gbaa zịnịotu pịrịmịnị yọ duonị á kẹrị ụgụla sụọmị. Á gbaa amọ “ị bịsẹ malafa timi ifiemị, bịnaotubo ị tịịn bá fun-ama kpọ gẹẹ ị yarị wẹrị, ámịnị ị tarị wẹrịemi bara gbaa ị dịamị,” “ịmịnị kẹnị opu tarị nana bịnawarị nana wẹrịemi bara ịmọ nimi wẹrịemi. Anịa kụraị 2020 duo bosẹ, ịmịnị bịsẹyọ nimi dẹịnmị.”

14. Omịnị teeki mịẹwẹrị wo bịnaotubo duo bomịnị baratụa-pịrịyebo duo arere nanamịnị a o? (Foto kpọ dii.)

¹⁴ Ine mịẹ agbẹị-emi yemị. Ị́mịnị iné bụụdọọnyebo inemịnịmị, ifiebosẹ iné bịnaotubo mọ naịn-timi. Bá itu-kosuotubo duo baratụa-pịrịye biimụ yọ kpọ kọn mịẹtei kụmọ. Ámịnị “opu afọrị bá kimẹị foumịnị ifiemị tịbịsọwẹịyọ ka paaemi.” (Isa. 32:​2, ftn.) Iné bịnaotubo kpọ bụụdọọnyeama inemịnị bara ukie. Anịduonị baratụa-pịriye dọụmịnị ụbọ emiaba, baratụa bịsẹ ụbọ pịrị, bịsẹ yọmị baratụa ị́ pịrịwẹrị pọwẹị pọwẹị timi iné bụụdọọnyebo inemịnị.—Acts 20:35.

WO NANA WẸRỊEMI UKIEMỌ YEBỊ

15. Ukiemọye tebara ka kị Jesus barịị ma o, bá tebara ka kị wo kpọ barịịmịnị a o? (Hebrews 12:2)

¹⁵ Jehovah gesii ukiemọye kọn wo pịrịdẹ, bịsẹ ukiemọ yebị baratụa wo pịrịwẹrị wo bụụdọọnyebo inemịnị. (Rom. 15:13) Bịsẹ ukiemọye kị baratụa Jesus kpọ pịrịwẹrị wó fịị dọụtimi erein ma ye-ine timi tuu laa bara ukie. (Hebrews 12:2 goo.) Ómịnị inetimi tuu laadaba, Jehovah ẹrẹ mịẹ yalịyalịmịnị bara nimi wẹrịemi. Bịsẹyọ bụọmọ kpọ ómịnị waị ụ daụ dọụ mú bá 144,000 otubo sụọmọwẹrị Jehovah daabụọ daamịnị bara kẹrị ukiemị. Bịsẹ kpekẹnị bara kị, omịnị ayakpọ laadaba inyenrintimi bẹseri bẹseri laamụ yọ kẹrị ukiemịnị yọbị, baratụa wo pịrịwẹrị Satan akpọ duo bomịnị ụyabosẹ inemịnị.

16. Ukiemọye tebara ka kị baratụa bịnaraụ Alla pịrịwẹrị ye-ine ma o, ị́mịnị ba ánị gbaaye duo teeki tolumọ akị ma o?

¹⁶ Wẹrị ukiemọye baratụa akị Alla tịịnmịnị bịnaraụ pịrị bara wo mọ ditụa, amịnị Russia k’emi. Daabụọ-otu a yei kẹrị akị ikoli-warị a kaịmị. Bịsẹye paa ifiemị, Alla gbaamị: “Ịmịnị ifiebosẹ wo nana wẹrịemi ukiemọye kọn tụa tẹẹmịnị bá kẹrị iroromịnị, bịsẹ yọmị baratụa ị pịrịwẹrị suusụọgha. Bei yebosẹ bụọdaba, ebi yeama bọlọụ duo bomịnị bara ịmọ nimi wẹrịemi. Jehovah bá wosẹ kpọ dẹịnmọmịnị bara ịmọ nimi wẹrịemi.”

17. Omịnị tebara ka kị wo nana wẹrịemi ukiemọ yebị wo a tọrụkẹrịemi bara mịẹdịamịnị a o? (Foto kpọ dii.)

¹⁷ Ine mịẹ agbẹị-emi yemị. Ifie mịẹpaamọdá Jehovah mị bọlọụ ma mịẹmụ yebo kẹrị iroro. Ayakpọ laadaba wo laamụ tarịbo kẹrị iroro, ị́ kpọ bịsẹyọ ma emi bara ka kị yebị kẹrị iroro. Bịsẹ bara ị́mọ mịẹdaba bei tịẹkiribị wo laamịnị bụụdọọn yebosẹ “timi alaghafa” bara ị́mọ nimimịnị. (2Cor. 4:17) Bịsẹyọ bụọmọ kpọ, iné kụrọyọsẹ akị iné peibolou gbaa zịnịotu pịrị. Bei tịẹkirimị Jehovah karịgha otubo kpọ biin bụụdọọn yeama kị nanamịnị, anịa Jehovah mị bọlọụma mịẹmịnị yebo kpọ ámịnị ma sụọtuu nimigha. Wo gbaamịnị egberibo biingha kị gbaa kpọ omịnị laa baratụa á pịrịwẹrị Jehovah mọ bá wó daabụọ mọ a dịsẹ nana a paaemi.

18. Omịnị tetuu kị duonị eti akị Jehovah kikoromọdẹ yebo atụa agbẹị-emi a o?

¹⁸ Job biin dadiyeama inetimi tuulaa ifiemị, ómịnị gbaa Jehovah pịrịmị: “Ị́mịnị iné mịẹ dọụmịnị yesẹ mịẹ a paaemi, kẹnịye kpọ laa ị́ tịẹmọgha paaghafa bara ịmọ nimidẹ.” (Job 42:2) Jehovah yemịẹ dọụmịnịsẹ, laa ụ tịẹmọmụye fa bara Job mọ nimi angọ pịrịmị. Bịsẹ yọmị baratụa wo kpọ pịrịwẹrị ye-ine a paaemi. Wo wẹrị ye akị tọnmọdịa, kẹnị dọọnmịnị ere mú biin dọọnzụọ-otuama laadẹ, ámịnị laa nimi ánị doonzụọgha. Anịa kẹnị fịrịwẹnịdị dọọnzụọ-owei ánị dọọnmị emi bara mọ bá kọn zụọmụ bara mọ gbaa á pịrịdaba á mịẹ bolouịmbẹlẹmịnị. Dọọn zụọmụ yọbị ifie ka akịmịnị kpọ amịnị alagha timi angọ ebimịnị ukiemọye nanadẹ duonị pọwẹịtimi inemịnị. Bịsẹ kpekẹnị bara kị, Jehovah kikoromọdẹ ayakpọmị bomịnị eti wo mọ nana wẹrịemi, bịsẹ yọmị baratụa wo pịrịwẹrị wo bụụdọọn yebosẹ inemịnị.

19. Te yeama kị baratụa wo pịrịwẹrị ye-inemịnị a o?

¹⁹ Wo dọụ ẹrịdẹ baramị, Jehovah, tẹẹbịbị, Bible, wo bịnaotubo bá wo ukiemọye mọ kọn baratụa wo pịrịwẹrị wo bụụdọọnyebo inemịnị. Omịnị ebibara bịsẹ yebo kọn baratụa angọ pịrịdaba, Jehovah baratụa wo pịrịwẹrị Satan akpọ duo bomịnị bụụdọọn yebosẹ inetimi ayakpọ duo sụọmịnị.—Phil. 4:13.