Ọkpọnanaowei Tarịbị Dụụ Fa

1-2. Biin Christtuuduo-otubo te bụụdọọnyeama kị nanamịnị a o?

WẸRỊ iroro dii, arụ tọrụbịrị a yọụmịnị ifiemị ekime paadaba, arụ mịẹ kpeke-kpeke a paaemi. Anịa arụ kẹrịmọ tịẹmọmụ ye faghaba, adaiwaịnbo arụ kọn fọụ dọụdẹ yọsẹ múmịnị. Mị arụ kẹrị-tịẹmọmịnị yemị baratụa arụ pịrịwẹrị ekime duonị ba kpeke-kpekegha fa.

² Kụrọ bụụdọọnye wo laadaba, omịnị kpọ bịsẹ arụ bara kị emi bara iroro a paaemi. Wo iroromịnị yebo kẹrị tịẹmọmụ yọmị kụrọ wo pịrị a paaemi. Zụa erein-ama Jehovah wo tarị emi, bá baratụa wo pịrịmịnị eti wo mọ nana a paaemi; zụa erein-ama ba Jehovah tọrụtụa wo diigha bara wo mọ iroro kpọ paaemi. (Ps. 10:1; 13:1) Kaanghaba iné ikie ụbọ kụrọmọye akị ị́ pịrịdaba, bịsẹ tịẹkirimị ị́mịnị ebi yeama iroro kpọ paaemi. (Prov. 17:17; 25:11) Anịa alaghatimi bịsẹ tamanaịnyọbo waị iné ịkịọụ ma sụọ a paaemi. Jehovah kọkọ iné a barasindẹ bara ị́mọ iroro kpọ paaemi. Anịduonị bụụdọọnye bodaba, ị́mịnị tebara ka kị zigeigha fa bara timimịnị a o? Gbaamịnị barasẹ, ị́mịnị tebara ka kị Jehovah ifiebosẹ ị́ tarị wẹrịemi, bá baratụa ị pịrịmịnị eti nanamịnị a o?

3. Psalm 31:7 bá 136:1 gbaa bara didaba, teeki “kpẹkpẹrẹẹ tarị” a o, bá tetuu kị duonị kpẹkpẹrẹẹ tarị gbelemọ yọmị Jehovah kị ebi-deịn mịẹdịaye wo mo gbaa a paaemi a o? (Foto kpọ dii.)

³ Omịnị kụrọ bụụdọọnye bolou emi ifiesẹ, kẹnịye nẹ baratụa wo pịrịmụ ye, anị omịnị ifiebosẹ Jehovah kpẹkpẹrẹẹ tarị kẹrị ukiemịnị yọmị. (Psalm 31:7; 136:1 goo.) “Kpẹkpẹrẹẹ tarị” gbaadaba, anị timi dụụ laamịnị tarị, paaye paaye ụbọ ma barasingha tarị. Bịsẹyọ gbelemọ yọmị, Jehovah kị ebi-dẹịn mịẹdịaye a paa wo pịrị-emi. Bible mị Jehovah gbelemọ yọmị gbaa amọ, ómịnị “beinmọbeinmọ bara kpẹkpẹrẹẹ tarị nana wẹrịemi.” (Ex. 34:​6, 7) Bible mọkpọ Jehovah gbelemọ yọmị gbaamị: “Ị́mịnị beinmọbeinmọ bara kpẹkpẹrẹẹ tarị mịẹ akị ị́ tịịnmịnị otubosẹ dịamịnị.” (Ps. 86:5) Bịsẹ yọmị teeki gbaamịnị a o? Jehovah benebene wó peibolou nana odubo otubo gbein koromọgha fa! Omịnị ifiebosẹ Jehovah kpẹkpẹrẹẹ tarị kẹrị ukiedaba, baratụa wo pịrịwẹrị kụrọ bụụdọọnye bolou emi ifie kpọ zigeigha fa.—Ps. 23:4.

INÉ BỌLỌỤ TOLUMỌ NIMI BIBLE GESIIBO DIIMỌ WẸRỊEMI BARA KA KỊ JEHOVAH TARỊ KPỌ DII

4. Wo bọlọụ Bible duo tolumọ nimi gesiibo zụa gbaa, bá tetuu kị duonị omịnị á pịrị lẹlẹmọ a paagha o?.

⁴ Omịnị kụrọ bụụdọọnye bolou emi ifiesẹ, baratụa wo pịrịwẹrị zigeigha fa zịnị ye mọkpọ emi, anị omịnị Jehovah tarịmị akị wo bolou tolumọ nimi Bible gesiibo bara kị diimọ. “Bọlọụ tolumọ nimi Bible gesiibo” gbaadaba teeki wo mọ gbaamịnị a o? Kaanghaba ị́mịnị Bible duo biin gesii ama tolumọdẹ. Gbaamaba, Ọkpọnanaowei ẹrịmị Jehovah, Jesus kị Ọkpọnanaowei kpekpekẹnị Tọbọụ, fịịdẹ-otubo kẹnị ye kpọ nimigha, bá mị bọlọụmị kịmịawọụ Paradise a inyenrintimi bẹseri bẹseri laamụ bara kpọ ị́mọ tolumọdẹ. (Ps. 83:18; Eccl. 9:5; John 3:16; Rev. 21:​3, 4) Ị́mịnị bịsẹ tolumọ yebo kẹrịakịmị, mị tolumọyebo gesii bara ị́mọ nimi yọ duonị kịmị ba laa ị́ lẹlẹmọ a paagha. Tetuu a o? Mị tolumọ yebo Bible kị duo bo-emi bara ị́mọ nimidẹ. Ị́mịnị bọlọụ tolumọ nimi Bible gesiibo kọn Jehovah tarị diimọdaba, baratụa ị́ pịrịwẹrị Jehovah benebene iné ifie nanagha, bá tọrụtụa ị́ diigha tamanaịnyọ nanagha fa. Wo wẹrị baratụa ị́ pịrịmụ bara diitụa.

5. Kịmị laa ekpe tolumọ yeama barasin a paaemi bara gbaa.

⁵ Ị́mịnị bọlọụ Bible tolumọ ifiemị, teeki baratụa ị́ pịrịwẹrị ekpe tolumọyebo a barasin ma o? Kẹnị baratụa ị́ pịrịye, anị ị́mịnị iné karịbụọ kọn ị́ tolumọmịnị yebo mọ bá Bible kọn ị́ tolumọmịnị yebo mọ diitụamị. Kẹnị mịẹdịaye wo mọ diitụa: Ị́mịnị bọlọụmị Jesus kị seridẹịn Ọkpọnanaowei bara ị́mọ pei wẹrị kpọ paaemi. Bible mị ị́mọ tolumọmịnịmị, ị́mịnị angọ biimị, ‘bei tolumọ yemị kọkọ kịrịị-emi?’ Bible mị ị́mọ diitụa ifiemị, bịsẹ tolumọ yemị kịrịịgha bara ị́mọ dọụ ẹrịmị. Anịduonị, ị́mịnị bịsẹ tolumọye ma barasin wẹrị Bible gesii kị kẹrịakịmị. Bible gbaa amọ: “Ọkpọnanaowei tẹmẹ yebosẹ Jesus kị bọlọụ tọbọụ,” bá ómịnị kị “Ọkpọnanaowei kpekpekẹnị Tọbọụ” ị́mịnị bịsẹ gesii kẹrịakịmị (Col. 1:15; John 3:18) Anịa “ekpe tolumọ yebo” a barasinmụ yọmị kụrọ fa k’emi. (2Cor. 10:​4, 5) Bịsẹ bara kị paa kpọ, ị́mịnị laa ánị barasindẹ ifiesẹ, ị́mịnị waị benebene a kẹrịakịgha fa.—Phil. 3:13.

6. Tetuu kị duonị Jehovah “kpẹkpẹrẹẹ tarịbị timi bẹseri bẹseri kị laamịnị” eti ị́mọ nana ma o?

⁶ Ị́mịnị bịsẹ kpekẹnị bara ka kị Bible mị kọn Jehovah tarị gbaa wẹrịemi bara dii a paaemi. Bụụdọọnye bolou emi ifie, Jehovah kọkọ ị́ tarị wẹrịemi tamanaịyọ ị́mọ nanadaba, iné angọ bii, ‘mị iroro yebị kịrịị-emi?’ Jehovah tarị gbelemọ yọmị iné nanamịnị tamanaịnyọbo mọ, bá Psalm 136:1 bọọ gbaa wẹrịemi egberi mọ akị tọnmọ dii. Wo ẹrẹteimịnị egberitịbịmị bịsẹ Bible yọkị duo bo-emi. Tetuu kị duonị mị Bible yọmị Jehovah tarịbị “kpẹkpẹrẹẹ” kị emi bara gbaa ma o? Bá tetuu kị duonị “wó kpẹkpẹrẹẹ tarịbị, timi bẹseri bẹseri kị laamịnị” bara kọn 26 ifieama kọn mị Bible yọma gẹẹ wẹrịemi a o? Wo naadẹ baramị, Jehovah kpẹkpẹrẹẹ tarị kpọ kẹnị yelaa Bible tolumọye nẹ Bible bolou ma emi ye, bịsẹ tarị kpọ wo bọlọụ tolumọ nimi Bible gesiibo bara k’emi. Jehovah laa wo tarịgha, bá omịnị wó tọrụyọ ma ye a paagha bara gbaamịnị yọmị ekpe egberi. Omịnị benebene bịsẹ egberi pei kụmọ, wo akị zịnị ekpe tolumọ yebo datịẹmọmịnị bara ka kị mị ye kpọ daatịẹmọ!

7. Jehovah kọkọ ị́ tarị wẹrịemi tamanaịyọ ị́mọ nanadaba, teeki ị́mọ mịẹ a paaemi a o?

⁷ Jehovah wo tarị wẹrịemi biin Bible yọama mọkpọ emi. Gbaamaba, Jesus gbaa akị wó tuuduo-otubo pịrịmị: “Ámịnị yelaa akị biin sparrow ofoni-ama dẹịn-emi.” (Matt. 10:31) Jehovah angọzii kpọ gbaa wó kịmịbo pịrịmị: “Ịmịnị á kụrọmọmịnị, iin, ịmịnị baratụa á pịrịmịnị, ịmịnị ine kịrịịye mịẹmịnị amabara kọn á kẹrị palịmọmịnị.” (Isa. 41:10) Bei gbaa egberibo wo mọ diidaba, Jesus ‘ámịnị yelaa kpọ paaemi,’ anịghakpọ Jehovah ‘ịmịnị kaanghaba á barịịmịnị’ bara gbaagha. Jesus, gbaa amọ: “Ámịnị yelaa dẹịn-emi” Jehovah kpọ gbaa amọ “ịmịnị á barịịmịnị.” Ị́mịnị bụụdọọnye bolou a emi ifie, Jehovah kọkọ ị́ tarị wẹrịemi tamanaịyọ nanadaba, mị Bible yọbo baratụa ị́ pịrịwẹrị gbein adụdụ nanamịnị, bá baratụa ị́ pịrịwẹrị Jehovah kọkọ ị́ tarị wẹrịemi bara nimi dẹịnmịnị. Bei egberibo gesii egberiama. Anịduonị ebibara a kẹrị iroro, bá tẹẹbịbị kpọ mịẹ, bịsẹ yọmị baratụa ị́ pịrịwẹrị 1John 4:16 bọọ emi egberibo ị́ kpọ mọ gbaa a paaemi: Bịsẹ yọmị gbaa amọ “omịnị Ọkpọnanaowei kọn wo a nana wẹrịemi tarị nimi bá peidẹ.”a

8. Zụa ifieama Jehovah ị́ tarị wẹrịemi yọmị mọkpọ tamanaịyọ nanamịnịaba, teeki ị́mọ mịẹ a paaemi a o?

⁸ Zụa ifieama Jehovah ị́ tarị wẹrịemi yọmị mọkpọ tamanaịyọ nanamịnịaba, teekị ị́mọ mịẹ a paaemi a o? Iné iroromịnị yebo mọ iné Jehovah nimi wẹrịemi yọ mọ kẹnịsụọmọemi bara diitụa. Wo iroromịnị yebo dei a paaemi, anịa gesiimị benebene deigha, Bible mị Jehovah wo tarị wẹrịemi gbaa yọmị benebene deigha fa. Omịnị bịsẹ yọ peigha ifiesẹ, omịnị Jehovah yelaa inyenrinbụọmị—anị wó tarịbị peigha bara kị mịẹdịamịnị.—1John 4:8.

JEHOVAH “Á TARỊ WẸRỊEMI” BARA KẸRỊ IRORO

9-10. John 16:​26, 27 mị, Jesus “Daụmị á tarị wẹrịemi” bara gbaa ifiemị, ómịnị te egberi ka kị ámọ mọ́ ẹrẹtimi ma? (Foto kpọ dii.)

⁹ Omịnị Jesus gbaa wó tuuduo-otubo pịrị egberi duo Jehovah tarịbị emibara tolumọ. Ómịnị mị egberi gbaa á pịrịtimi ifiemị, á mịẹ pọwẹịmọmụ yeama kị gbaa á pịrịtimi bara fa. Anịa, ómịnị zịnị egberi ka kị ámọ mó ẹrẹtimimị, tẹẹbịbị gbelemọ egberi.

¹⁰ Bịsẹ ifiemị Jesus, wó tuuduo-otubo ụ duotolu ka tẹẹ bara kị gbaamị, tẹẹ ómịnị kị pịrị bara gbaagha. (John 16:​23, 24) Bịsẹ yọ nimimụ yọmị yelaa á pịrị-emi. Tuumị, ómịnị waị fịịyọ duo seribomị, wó tuuduo-otubo tẹẹ ụ pịrịmụ ịkịọụ nana kpọ paaemi. Jesus ánị ebi ikie-owei duonị, ómịnị á tarị-emi bá ánị tẹẹbịbịbo naa wẹrị gbaa Daụ pịrịmịnị bara iroro kpọ paaemi. Anịa, Jesus ámịnị bịsẹ bara iroro kụmọ bara gbaa á pịrịmị. Tetuu a o? Tuumị: “Daụmị a tarị-emi.” Bei kpọ tẹẹbịbị gbelemọ tolumọyebo, kẹnị yelaa tolumọye. Mị egberimị ị́ kpọ gbele-emi: Ị́mịnị Bible tolumọmịnịmị, ị́mịnị bo Jesus nimi, bá ụ tarị dẹịnmịnị. (John 14:21) Anịa, bọlọụ kụraị sọransi Christtuuduo-otubo mịẹ baramị, ị́mịnị kpọ Jehovah “kọkọ” ị́ tarị wẹrịemi bara nimi wẹrị tẹẹ ụ pịrị. Ị́mịnị tẹẹ ụ pịrịmịnị ifiesẹ, Jehovah kọkọ ị́ tarị wẹrịemi peibolou ị́mọ nana wẹrịemi bara kị mịẹdịamịnị.—1John 5:14.

TAMANAỊNYE KỌN BOMỊNỊ YỌMA SỤỌTUU NIMI

11. Tetuu kị duonị omịnị Jehovah wo tarị wẹrịemi yọmị tamanaịnyọ nanadaba, Satan kị mịẹ pọwẹịmọ mịnị a o?

¹¹ Jehovah wo tarịgha tamanaịyọmị tẹyọ kị duo bomịnị a o? Satan kị duo bomịnị bara ị́mọ gbaa kpọ paaemi, anịa bịsẹ yọmị kịrịị-emi. Ómịnị ifiebosẹ “wo kaanfị kị dọụmịnị,” omịnị Jehovah wo tarị wẹrịemi yọmị tamanaịnyọ nanadaba, ụ mịẹ pọwẹịmịnị. (1Pet. 5:8) Wẹrị dii a, Jehovah wo tarị wẹrịemi kị duonị parụ ịkịan mịẹ paamọmị, anịa parụ ịkịan duo paamịnị arerebo wo laa agbẹịgha bara omịnị mọ iroro kị Satan mọ dọụmịnị. (Heb. 2:9) Omịnị Jehovah wo tarị wẹrịemi yọmị tamanaịnyọ nana bá bụụdọọnye a sụọ wẹrị, Jehovah karịmịnị yọ tịẹmọdaba, te ụbọ kị pọwẹịmịnị a o? Satan kị pọwẹịmịnị. Jehovah ba benebene ụ tarịgha bara Satan mọ nimi wẹrịemi, anịa Jehovah omịnị kị tarịgha bá wo gbeinmọ-koromọdẹ bara omịnị mọ iroro kị Satan mọ dọụmịnị. (Eph. 6:11) Satan kọn wo lẹlẹmọmịnị ụwọụbo wo mọ nimidaba, baratụa wo pịrịwẹrị ifiebosẹ “ụ datịẹmọmụ” bara gbinipẹlẹmịnị.—Jas. 4:7.

12-13. Adam mọ Eve mọ duo bo wo laa-emi seimị, tebara ka kị wo mịẹwẹrị Jehovah wo tarị wẹrịemi yọmị tamanaịnyọ nana a paaemi a o?

¹² Zịnị ye mọkpọ wo mịẹ tamanaịnyọ nana a paaemi. Te ye a o? Anị Adam mọ Eve mọ duo bo wo laa seimị. (Ps. 51:5; Rom. 5:12) Bịsẹ sei kị, kịmịawọụ mọ Jehovah mọ ovuru puumọmị. Bei yekị wo ịkịọụ, wo adụdụ, bá wo angọ kpọ seimọmị.

¹³ Anịkịduonị omịnị agbẹịgha iroro yeama nanamịnị, wo mịẹ kpeke-kpeke inyenrinbụọ nana, malafa, bá bụzemịnị. Bịsẹ yọkị bụọmọ kpọ, sei wo angọ-bolou ma emi duonị, omịnị ifiebosẹ bịsẹ iroro yebo nana a paaemi. Jehovah bịsẹ bara akị wo tẹmẹgha wẹrịmị. (Rom. 8:​20, 21) Gbaamaba, tire pẹịdẹ motor laa ebibara yọụ kụrọmọgha bara kị, wo angọbo kpọ sei duonị ebibara Jehovah kọn wo tẹmẹ wẹrịemi bara kọn fịrị wẹnị a paagha. Anịduonị, zụa ifieama Jehovah wo tarị wẹrịemi yọmị omịnị tamanaịnyọ nanamịnịsẹ, wo mịẹ tamamagha. Bịsẹ bara paadaba, omịnị ukie Jehovah kị “dụbadein bá tamama Ọkpọnanaowei nẹ kpẹkpẹrẹẹ tarị mịẹ akị ụ tarị, bá wó olokobo kekeremịnị otubo . . . dịamịnị owei.”—Neh. 1:5.

14. Parụ ịkịan kẹrị iroromịnị yọmị, tebara ka kị baratụa wo pịrịwẹrị Jehovah benebene wo tarịgha iroroye dẹịnmọmịnị a o? (Romans 5:8) (“Sei Kịmị Lẹlẹmọ ‘Kụrọ’” Datịẹmọ ekpedi kpọ dii)

¹⁴ Zụa ifieama, Jehovah wo tarịgha bara wo mọ iroro kpọ paaemi, gesii gbaamaba, Jehovah wo tarị agbẹịgha, bịsẹyọ kị Jehovah tarịmị mịẹ yelaa wo pịrị dẹịn-emi. Wo mịẹ yeama kị duonị Jehovah wo tarị agbẹị-emi bara fa. Mọabịkpọ, ómịnị parụbụọmọ ịkịan mịẹpaamọ wẹrị wo seibo teri famọdẹ, Jehovah wo tarị-emi kị duonị bịsẹ yọ mịẹpaamọmị. (1John 4:10) Mọkpọ ukie, Jesus sei mịẹgha kịmịama kị duonị bo fịịgha, anịa sei mịẹ otu zụọbụọmọmụ kị duonị bo fịịmị. (Romans 5:8 goo.) Mịẹkirigha ụbọ fa, anịa Jehovah omịnị yebosẹ mịẹkịrịị bara biigha. Wo angọ ma emi seimị wo mịẹ Jehovah wo tarịgha bara iroro a paaemi bara wo mọ nimidaba, bịsẹ yọmị baratụa wo pịrịwẹrị Jehovah wo tarịgha iroroyeama anda tịẹmọmụ bara gbini-pẹlẹmịnị.—Rom. 7:​24, 25.

JEHOVAH A BARASIN KỤMỌ

15-16. Omịnị Jehovah a barasingha ifiesẹ, teeki paamịnị a, bá tetuu a o? (2Samuel 22:26)

¹⁵ Omịnị kịrịịye sẹle angọ pịriị kị Jehovah mọ dọụmịnị, anị ụ mọ mọ́ “palị-timimịnị”yọmị. (Deut. 30:​19, 20) Omịnị bịsẹ bara mịẹdaba, Jehovah kpọ wo a barasingha fa. (2Samuel 22:26 goo.) Omịnị Jehovah a barasingha ifiesẹ, paabara paabara ómịnị baratụa wo pịrịmịnị bara wo mọ nimi wẹrịemi.

¹⁶ Bụụdọọnyeama wo laadaba, wo tolumọdẹ baramị, omịnị zigeigha bara timi agbẹị-emi tuuama nana wẹrịemi. Jehovah wo tarị wẹrịemi, bá ifiebosẹ baratụa wo pịrịmịnị bara wo mọ nimi wẹrịemi. Bible bịsẹbara ka kị wo tolumọ wẹrịemi. Omịnị Jehovah wo a nana wẹrịemi tarịmị tamanaịnyọ nanadẹ ifiesẹ, bịsẹ tịẹkirimị wo ịkịọụ bọọ sụọmịnị yebo kẹrị iroromụ bara dii a, Jehovah tarị gbelemọ yọmị wo nimidẹ yebo kị kẹrị iroro. Jehovah Kpẹkpẹrẹẹ tarịmị timi bẹseri bẹseri kị laamịnị. Pebidá wosẹ eti akị mị Bible gbaa wẹrịemi gesii ma tụa.