Iné Tẹẹbịbịbo Mịẹ Ebimọ Dẹịnmịnị Baramị

1-2. (a) Teeki omịnị adụdụ duo bo bara tẹẹ Jehovah yarịmụ yọ kimọ a paaemi a o? (b) Omịnị tebara kị mịẹtimi Jehovah ebibara wo tẹẹbịbịbo peimịnị bara nimi ma o?

Ị́MỊNỊ zụa ifie a kpekẹnị yeama, kpekẹnị bara anịghakpọ adụdụ duo bogha bara kọn tẹẹ Jehovah pịrị bara dọụ ẹrịdẹ a o? Bịsẹ baraghaba, ị́mịnị bẹtịbị fa. Akpọ ma emi bụụdọọnyebo duonị, omịnị izoumọ izoumọ bara ka kị tẹẹbịbị mịẹ kpọ paaemi. Anịghakpọ omịnị tẹẹ Jehovah yarị agbẹịgha bara akị angọ dii kpọ paaemi.

² Wo tẹẹbịbịbo gbelemọ yọbị, Bible wo tolumọ amọ Jehovah tọrụyọ ma yelaaemi yemị, wo bẹbẹ duo paamịnị biin egberi-amagha, anịa omịnị angọ-iyerimọ wẹrị adụdụsẹ duo tẹẹ ụ pịrịmịnị yọkị, yelaa ụ pịrị-emi. Ómịnị “angọ-iyerimọ otu tẹẹbịbịbo” naamịnị. (Ps. 10:17) Ómịnị wo tarị wẹrịemi duonị, ebibara wo gbaamịnị egberi ụngbọụbosẹ peimịnị.—Ps. 139:​1-3.

3. Mị egberitịbịmị, te biibịbịama kị wo mọ ditụamịnị a o?

³ Omịnị bii a paaemi: Tetuu kị duonị omịnị malafagha bara tẹẹ Jehovah yarị a paaemi a o? Omịnị tebara ka kị wo tẹẹbịbịbo mịẹ ebimọ bọlọụ dẹịn a paaemi a o? Bible ma gẹẹ wẹrịemi tẹẹbịbịbo kẹrị iroromịnị yọmị, tebara ka kị baratụa wo pịrịwẹrị wo tẹẹbịbịbo mịẹ ebimọ dẹịnmịnị a o? Bá wo bụụdọọnyebo wo bụọmọ wẹrị ebibara wo adụdụ ma emi yebo gbaagha ifie laadaba, omịnị tebara kị mịẹmịnị a o? Wo wẹrị parụbịbịbo dọụ ẹrị.

MALAFAGHA BARA TẸẸ JEHOVAH YARỊ

4. Teeki baratụa wo pịrịwẹrị malafagha bara tẹẹ Jehovah yarịmịnị a o? (Psalm 119:145)

⁴ Jehovah wo a barasingha fa, bá wo ebi kị dọụmịnị ikie-owei bara wo mọ nimidaba, baratụa wo pịrịwẹrị malafagha bara tẹẹ ụ yarịmịnị. Psalm 119 gẹẹ oweimị Jehovah mọ ebi ikie kẹrị wẹrịmị. Ómịnị bụụdọonyeama nanamị. Gbaamaba, kịmịotu ekpe egberiama kọn ụ gbainmọmị. (Ps. 119:​23, 69, 78) Bá wó bẹtịbị mịẹkiri yọbo kpọ wó a bụụdọọnmị. (Ps. 119:5) Bịsẹ bara kị gbaa kpọ, ómịnị wó adụdụsẹ finiwẹrị tẹẹ Jehovah yarịmụ yọbị malafagha.—Psalm 119:145 goo.

5. Tetuu kị duonị omịnị agbẹịgha iroro yeama bụọmọ wẹrị tẹẹ Jehovah yarịmụ yọ tịẹmọ agbẹịgha o? Tọnmọdịaye gbaa.

⁵ Kụrọ sei mịẹdẹ otubo kpọ tẹẹ ụ yarị bara Jehovah mọ gbaa wẹrịemi. (Isa. 55:​6, 7) Anịduonị agbẹịgha iroro yeama bụọmọ wẹrị tẹẹ Jehovah yarị mọ yọ tịẹmọ kụmọ. Wẹrị mị tọnmọdịaye diitụa, aeroplane yọụmịnị owei, ómịnị baratụa-pịrịye dọụ wẹrị-emisẹ, aeroplane office ma timi fịrị wẹnịmịnị otubo bara duo baratụa-pịrịye bii a paeemi bara nimi wẹrịemi. Anịa ómịnị mịẹkiridaba, anịghakpọ ụwọụ bụọdaba, bụzemịnị yọ bụọmọ wẹrị bịsẹ kịmịbo mọ ẹrẹmụ yọ tịẹmọ agbẹị-emi a o? Benebene bịsẹ bara mịẹ agbẹịgha! Bịsẹ kpekẹnị bara kị, omịnị kpọ mịẹkiridaba, tẹẹ Jehovah yarịmụ yọmị malafa kụmọ.—Ps. 119:​25, 176.

INÉ TẸẸBỊBỊBO MỊẸ EBIMỌ DẸỊNMỤ BARAMỊ

6-7. Jehovah inyenrinbụọbo kẹrị iroromịnị yọmị tebara ka kị baratụa wo pịrịwẹrị wo tẹẹbịbịbo mịẹ ebimọ dẹịnmịnị a o? Paaye gbaa. (Foto kpọ dii.)

⁶ Omịnị wo adụdụsẹ finiwẹrị Jehovah mọ ẹrẹteidẹ ifiesẹ, wo tẹẹbịbịbo ebi dẹịnmịnị. Anịduonị, omịnị kọkọ teeki mịẹwẹrị wo tẹẹbịbịbo ebi bọlọụ dẹịnmịnị a o?

⁷ Jehovah inyenrinbụọbo kẹrị iroro.a Omịnị ebibara Jehovah inyenrinbụọbo kẹrị irorodaba, laa ebibara ụ mọ mọ́ ẹrẹtei dẹịnmịnị. (Ps. 145:​8, 9, 18) Wo wẹrị Kristine tịịnmịnị bịnaraụ paamọye diitụa, á daụmị osịa fa kị timimị. Á gbaamị: “Jehovah akị ị Daụ bara diimọ wẹrị ẹrẹteimụ yọmị bọụbọụ ị pịrịgha. Ine tọn wẹrị barasẹ, ịmịnị yalịgha duonị, ómịnị ị gbein koromọmịnị.” Jehovah nana wẹrịemi inyenrinbụọbo te ye kị baratụa á pịrị ma o? Á gbaamị: “Jehovah kpẹkpẹrẹẹ tarịbị, ị mịẹ ba malafagha. Ómịnị ina barasingha fa eti ịmọ nana wẹrịemi. Ịmịnị koro kị koro kpọ, ómịnị ị kẹrị-tịẹmọmịnị bara ịmọ nimi wẹrịemi. Bịsẹ yọmị baratụa ị pịrịwẹrị, ịmịnị ị mịẹ pọwẹịmịnị yebo mọ bá ị mịẹ pọwẹịgha yebo ịmọ gbaa Jehovah pịrịmụ yọmị ba malafagha.”

8-9. Iné gbaa dọụmịnị yebo kẹrị irorodẹ kị tẹẹmịnị yọmị, te arereama kị emi a o? Paaye gbaa.

⁸ Iné gbaa dọụmịnị yebo kẹrị iroro. Ị́ tẹẹ dọụmịnịsẹ, ị́mịnị zụa biibịbịama akị angọ bii a paaemi. Gbaamaba: ‘Mị tịẹkirimị, gbẹsị te bụụdọọnyeama kị ịmọ nana wẹrịemi a o? Ịmịnị bụọmọ agbẹị-emi kịmị emi a? Jehovah baratụa ị pịrịwẹrị dẹịnmọmụ aya bụụdọọnyeama ịmọ nana wẹrịemi a?’ (2Ki. 19:​15-19) Bịsẹ yọ bụọmọ kpọ, Jesus tẹẹbịbị mịẹmụ bara akị wo tolumọtimi ifiemị, wo tẹẹmụ yebo gbelemọ yọmị, ụ gbaamị, omịnị Jehovah ẹrẹ mọ, wó Daabụọ mọ, bá wó dọụbara mọ kọn wo tẹẹbịbị ma tụa tẹẹ. Pebidá wosẹ bịsẹ bara kị dimịe.—Matt. 6:​9, 10.

⁹ Aliska tịịnmịnị bịnaraụ, cancer dọọn á yei kẹrịdẹ bara naa ifiemị, tẹẹbịbị mịẹmụ yọmị kụrọ á pịrịmị. Á gbaamị: “Yemị ị gbele kụrọmọmị anịduonị ịmịnị ba ebibara ye iroro wẹrị tẹẹbịbị mịẹgha.” Teeki baratụa á pịrị ma o? Amịnị mọkpọ gbaamị: “Ịmịnị tẹẹ dọụmịnị ifiesẹ, ifie dọlọ akị wẹrị ine gbaa dọụmịnị egberibo kẹrị iroromịnị, bịsẹ yọmị baratụa ị pịrịwẹrị ịmịnị tẹẹbịbị mịẹmịnị ifiesẹ ba ine angọ bẹtịbị kẹrị irorogha. Bịsẹ yọmị ine adụdụ mịẹ dọọ nana, bá baratụa ị pịrịwẹrị zịnị yeama kpọ kọn ine tẹẹbịbị ma tụa a paadẹ.”

10. Tetuu kị duonị omịnị izougha bara akị tẹẹbịbị mịẹ agbẹị-emi a o? (Foto kpọ dii.)

¹⁰ Izougha bara akị tẹẹbịbị mịẹ. Kẹsị tẹẹbịbị kpọ wo mịẹ Jehovah mọ naịn a paaemi. Bịsẹ bara kị gbaa kpọ, omịnị izougha bara Jehovah mọ ẹrẹtimi alaadaba, baratụa wo pịrịwẹrị wo ịkịọụ ma emi biin yeama gbaa ụ pịrịmịnị.b Aliska yei, Elijah, gbaamị: “Ịmịnị ereinmị barịị barịị kị tẹẹ Jehovah yarịmịnị, anịduonị ịmịnị izougha bara ka kị tẹẹmịnị, bịsẹ yọmị baratụa ị pịrịwẹrị Jehovah mọ naịn dẹịndẹ. Jehovah etipou timi ine ṭẹbịbịbo peimịnị, anịduonị ịmịnị izougha bara ka kị ụ mọ mọ́ ẹrẹteimịnị.” Bei ye mịẹdii: Ifie bá ye ina bụụdọọngha fa yọ dọụdá izougha bara tẹẹ Jehovah yarị, kaanghaba ị́mịnị tẹẹ paamọ kpọ paaemi, tẹẹ Jehovah yarịmụ yọmị akị zorutei kụmọ.

BIBLE BOLOU MA ADỤDỤ DUO TẸẸ JEHOVAH YARỊ KỊMỊBO MỊẸ TẸẸBỊBỊBO KẸRỊ IRORO

11. Bible bolou mị kịmịotu adụdụ duo mịẹ tẹẹbịbịbo wo mọ kẹrị iroromịnị yọmị te arereama kị emi a o? (“Á Paamọ Yebo Kị Ị́ Kpọ Paamọmịnị A O ?” Ekpedi kpọ dii)

¹¹ Bible bolou ma emi adụdụ duo mịẹ tẹẹbịbịbo mọ, dumabo mọ ị́mọ kẹrị irorodaba, baratụa ị́ pịrịmịnị. Jehovah odubo otubo adụdụsẹ duo gbaamịnị egberibo ị́mọ ditụamịnị yọmị, ị́ dịnẹmọ wẹrị ị́mịnị kpọ adụdụ duo bo bara Jehovah mọ ẹrẹtei a paaemi. Bịsẹ yọ bụọmọ kpọ, ị́mịnị akị iné tẹẹbịbịbo ma tụawẹrị Jehovah tokonimụ aya yeama dọụ ẹrị kpọ paaemi. Bá ị́ laamịnị bụụdọọnyebo laadẹ wẹrị otu mịẹ tẹẹbịbị-ama kpọ ị́mọ ẹrịmịnị.

12. Bible boloumị kịmịotu mịẹdẹ tẹẹbịbịbo kẹrị iroromịnị ifiemị, omịnị te biibịbịama ka angọ bii a paaemi a o?

¹² Ị́mịnị Bible boloumị kịmịotu mịẹdẹ tẹẹbịbịbo kẹrị iroromịnịmị, zụa yeama akị angọ bii: ‘Te ụbọ kị mị egberibo gbaa ma o, bá teeki ụbọ paamọ wẹrị mị tẹẹbịbị mịẹ ma o? Ụbọ tẹẹbịbịmị, ị paamọmịnị yebo mọ lei-emi a o? Ịmịnị te ka kị mị tẹẹbịbị duo tolumọ akị a paaemi a o?’ Mị parụbịbịbo nanamụ yọmị, ị́mịnị mọkpọ tuudọụ a paaemi, ánịa bịsẹ bara ị́mọ mịẹdaba, arere ị́ laamịnị. Wo wẹrị zụa mịẹdịa yeama diitụa.

13. Tẹẹbịbị gbelemọ yọmị omịnị Hannah duo teeki tolumọ akị ma o? (1Samuel 1:​10, 11) (Bọlọụ foto kpọ dii.)

¹³ Wo wẹrị 1Samuel 1:​10, 11 goo. Hannah bei tẹẹbịbị mịẹ ifiemị, maa bụụdọọnye kị á laa timimị. Amịnị zii fa, ánị faran araụ kpọ ánị ụndụ mịẹ bọụbọụ á pịrịgha. (1Sam. 1:​4-7) Iné bụụdọọnyemị timi alaadẹ kị gbaa kpọ, Hannah tẹẹbịbịmị te tolumọye ka kị ị́ pịrị a paaemi a o? Hannah izougha bara ánị adụdụ bọọ emi yebosẹ gbaa Ọkpọnanaowei pịrị yọmị, baratụa a pịrịwẹrị dọọ nanamị. (1Sam. 1:​12, 18) Omịnị kpọ [wo] “bụụdọọnyebo gbeinmọ Jehovah pịrị” bá gbẹsị yemị wo a bụụdọọnmụ laaemi bara gbaa Jehovah pịrịdaba, wo mịẹ dọọ nanamịnị.—Ps. 55:22.

14. (a) Omịnị te zịnị yeama ka kị Hannah duo tolumọ akị ma o? (b) Bible bọọ emi yebo goo, bá kẹrị iroromịnị yọmị, tebara ka kị baratụa wo pịrịwẹrị wo tẹẹbịbịbo mịẹ ebimọ dẹịnmịnị a o? (Footnote kpọ dii.)

¹⁴ Hannah, Samuel zii wẹrị zụa kụraịama baịbị, amịnị Samuel kọn Tịbị Ịkịankụn owei Eli pịrịmị. (1Sam. 1:​24-28) Amịnị tẹẹbịbị mịẹtimi ifiemị, Jehovah ụ mọ mọ́ kpẹkpẹrẹẹ emi odubo otubo kekere, bá tọrụtụa á diimịnị eti amịnị mọ nana wẹrịemi bara gbaa paamọmị.c (1Sam. 2:​1, 8, 9) Warịbolou mị á laamịnị bụụdọọnyebo naa fagha kị gbaa kpọ, Hannah Jehovah kọn á pịrịmịnị tarịbo ka kị bọlọụdaamị. Bịsẹ yọmị te ka kị wo tolumọ wẹrịemi a o? Omịnị bụụdọọnye bolou ka emi kpọ, Jehovah baratụa wo pịrịtimi mị tịẹkiri laadẹ bara kẹrị irorodaba, bịsẹ yọkị wo barịị wẹrị bịsẹ bụụdọọnyebo inemịnị.

15. Kịmị agbẹịgha bara akị wo mọ inyenrindaba, omịnị te ka kị bụrụ-owei Jeremia tẹẹbịbị duo tolumọ akị a paaemi a o? (Jeremiah 12:1)

¹⁵ Jeremiah 12:1 goo. Bụrụ-owei Jeremiah, bo kẹnị ifie laamị, bolousei otubo bọlọụ bụọmịnị bara ẹrị yọmị wó a bụụdọọn kụrọmọmị. Israel otubo kọn zịnị Israel otubo mọ inyenrinmịnị bara ụ mọ ẹrịmị, yemị ụ gbele kụrọmọmị. (Jer. 20:​7, 8) Bolousei otu bọlọụ bụọmịnị anịghakpọ kịmịama wo dẹrịmịnị bara paadaba, yemị Jeremiah gbele barabị kọn wo kpọ gbele a paaemi. Jeremiah yemị ụ dọọn emi bara gbaa Jehovah pịrịmị, anịa Jehovah kị bịsẹ yebo mịẹpaamọmịnị bara Jeremiah mọ kọn Jehovah gbaịnmọgha. Tuu ifie laamị, Jehovah mị tịbịkụrọ otubo zezemọ bara Jeremiah mọ ẹrịmị, Jehovah ifiebosẹ kịrịịye kị mịẹmịnị eti ụ mọ nana dẹịnmị. (Jer. 32:19) Wo kpọ tẹẹ Jehovah yarịmịnị ifiemị, wo dọọnmịnị yebo gbaa ụ pịrị a paaemi, bá agbẹị ifie laadaba Jehovah yebosẹ mịẹ kịrịịmọmịnị eti nana.

16. Wo emi tịẹkirimị wo bụọmọ wẹrị zụa yeama mịẹ a paagha ifiesẹ, omịnị te ka kị kẹrịakị wẹrị Levi owei duo tolumọ akị a paaemi a o? (Psalm 42:​1-4) (Fotobo kpọ dii.)

¹⁶ Psalm 42:​1-4 goo. Mị dumamị kẹnị kẹrịakị wẹrị Levi owei kị tuunmị, bịsẹ ifiemị ómịnị zịnị Jehovah karịmịnị otumọ gbelei inyenrin a paagha timimị. Wó tuun dumamị yemị akị ụ gbele bara mịẹgaan paamọ wẹrịemi. Kaanghaba omịnị laa warị duo paagha anịghakpọ wo peibolou duonị ikoli warị ka emiaba, mị Levi owei gbaa egberimị omịnị mọ a sụọtuu nimi a paaemi. Zụa ifieama omịnị pọwẹịmịnị, zụa ifieama omịnị pọwẹịgha, bịsẹ bara kị gbaa kpọ yemị wo gbele-emi bara gbaa Jehovah pịrị. Bịsẹ yọmị baratụa wo pịrịwẹrị agbẹị bara akị wo tịẹkiri emi bara diimịnị. Bịsẹ bara kị Levi owei kpọ paamọmị, ómịnị Jehovah tokonimụ aya fomuun-ama nana a paaemi bara nimi angọ pịrịmị. (Ps. 42:5) Ómịnị Jehovah ụ kekeremịnị bara kpọ kẹrị iroromị. Anịduonị, omịnị angọtụa tẹẹ Ọkpọnanaowei yarịdá ómịnị baratụa wo pịrịwẹrị wo iroromịnị yebo kẹrị-tịẹmọ, wo mịẹ dọọ nana, bá ye-inemụ kụrọ kpọ kọn wo pịrị bara bii.

17. (a) Omịnị te ka kị bụrụ-owei Jonah mịẹ tẹẹbịbịbị duo tolumọ akị a paaemi a o? (Jonah 2:​1, 2) (b) Kụrọ ifieama wo paamọdaba Psalm funmị tebara ka kị baratụa wo pịrị a paaemi a o? (Footnote dii.)

¹⁷ Jonah 2:​1, 2 goo. Bụrụ-owei Jonah opu endi biri bolou ma timi ifie kị mị tẹẹbịbị mịẹmị. Ómịnị mịẹkiridẹ kpọ, Jehovah wó okolo naamịnị eti Jonah mọ nana wẹrị tẹẹbịbị mịẹmị. Jonah gbaa egberibo biin yaị Psalm fun ka emi.d Kaanghaba ómịnị mị Psalm fun bọọ emi Bible yọbo nimi wẹrịmị. Ómịnị bịsẹ egberibo kẹrị iroro yọmị baratụa ụ pịrịwẹrị Jehovah ụ barịịmịnị eti nanamị. Bịsẹ kpekẹnị baramị, omịnị kpọ Bible yọama kọn wo tịbị bọọ tụa. Anịkị omịnị bụụdọọnye bolou a emi ifie tẹẹ Jehovah pịrịdaba, mị Bible yọbo wo ịkịọụ ma sụọwẹrị wo kụrọmọ a paaemi.

TẸẸBỊBỊ DUO JEHOVAH MỌ NAỊNTIMI

18-19. Zụa ifieama omịnị tẹẹ Jehovah pịrịmụ ye nimịghaba, Romans 8:​26, 27 te kụrọmọye ka kị wo pịrị wẹrịemi a o? Paaye gbaa.

¹⁸ Romans 8:​26, 27 goo. Zụa ifieama wo bụụdọọnyebo wo gbele kụrọmọemi duonị, omịnị kọn tẹẹ Jehovah yarịmụ bara nimigha kpọ paaemi. Bịsẹ bara kị paa kpọ, baratụa-pịrịye emi. Bịsẹ ifiebo laadaba, Ọkpọnanaowei yalịyalị tẹmẹmị wo “barịịmịnị.” Tebara a o? Jehovah wó tẹmẹ kọn Bible gẹẹ otubo pịrịwẹrị, biin tẹẹbibiama kọn Bible bolou ma gẹẹtụa wẹrịemi. Omịnị ba tẹẹ Jehovah yarịmụ bara nimigha ifie laadaba, Jehovah bịsẹ bụụdọọnyebo nana wẹrị tẹẹ ụ pịrị otubo tẹẹbịbịbo kị dii wẹrị wo tẹẹbịbịbo parụ kpọ paaemi.

¹⁹ Bịsẹ yọ ukiemịnị yọmị baratụa Yelena tịịnmịnị bịnaraụ pịrịmị, amịnị Russia ibe kị duo paaemi. Tẹẹbịbị mịẹ bá Bible goomịnị yọkị duonị á kẹrị kaị wẹrịmị. Bịsẹ yọmị opu bụụdọọnye ka paa bịnaraụ Yelena pịrịmị, tẹẹmụ yọ kpọ kụrọ á pịrịmị. Á gbaamị: “Ịmịnị bụụdọọnye duonị ba tẹẹ Jehovah yarị a paagha ifie laadaba, Jehovah ịmịnị kpọ Bible ifiemị, wó odubo otubo mịẹ tẹẹbịbịbo kị mịẹ dọụmịnị bara nimiwẹrị, bịsẹ tẹẹbịbịbo dii wẹrị ị parụmịnị bara ịmọ nimi wẹrịemi. . .. . . . Ịmịnị akpotu bolou ka emi kpọ bịsẹ yọmị ị kụrọmọmịnị.”

20. Omịnị bụụdọọnye bolou emi ifiemị, tebara ka kị wo ịkịọụbo tọlọmọ wẹrị tẹẹbịbị mịẹmịnị a o?

²⁰ Omịnị bụụdọọnyeama duonị dẹịnsụọmịnị ifie, tẹẹ Jehovah pịrịmịnịmị, wo ịkịọụmị zụa ifieama zịnị yeama kẹrị iroro kpọ paaemi. Mịẹpaamọdẹ Psalm fun audiobo pei. Anịghakpọ Ibe-daaowei David bara, yemị wo gbele-emi bara kọn fun a gẹẹ koromọdaba baratụa wo pịrịwẹrị, wo ịkịọụbo tọlọmọdẹ kị tẹẹbịbị mịẹmịnị. (Ps. 18, 34, 142; superscriptions.) Anịa, omịnị wo ịkịọụbo tọlọmọ wẹrị tẹẹbịbị mịẹmụ yọbị oloko fa. (Ps. 141:2) Ị́mịnị kị ebi ị́ pịrị dẹịn-emi ụwọụ sẹlẹ angọ pịrịmịnị.

21. Tetuu kị duonị omịnị wo adụdụsẹ ka kị tẹẹ Jehovah yarị a paaemi a o?

²¹ Omịnị naa ụ biigha kpọ, Jehovah wo iroromịnị yebo nimi wẹrịemi bara wo mọ nimi yọmị wo mịẹ pọwẹịmịnị. (Ps. 139:4) Bịsẹ bara kị gbaa kpọ, omịnị tẹẹ ụ pịrịmịnị yọmị, Jehovah mịẹ bolou-ịmbẹlẹmịnị. Anịduonị tẹẹ iné agọnọ Daụ pịrịmụ yọmị tuu gbein kụmọ. Bible bọọ emi tẹẹbịbịbo duo tolumọye nana. Iné adụdụsẹ ka kị tẹẹ Jehovah yarị. Ị́ mịẹ pọwẹịmịnị yebo mọ, bá ị́ mịẹ dọọn naamịnị yebo mọ gbaa ụ pịrị. Jehovah iné gesii ikie-owei duonị, ómịnị ifiebosẹ iné tẹẹbịbị naamịnị!