Tẹẹ Zịnịotu Pịrịmụ Yọmị Bara Kụmọ

1. Omịnị tebara kị mịẹtimi wo tẹẹbịbịbo yelaa Jehovah pịrị-emi bara nimi ma o?

TẸẸBỊBỊ tamama dịẹpịrịye. Wẹrị iroro dii: Jehovah fịrịama akị angel otubosẹ pịrị wẹrịemi. (Ps. 91:11) Bá yelaa fịrịama kpọ kọn wó Tọbọụ pịrị wẹrịemi. (Matt. 28:18) Anịa, tẹẹbịbị naamịnị yọ ba o? Jehovah mị fịrịbị akị zịnị kịmị pịrịgha, wó bẹtịbị kị mị fịrị wẹnịmịnị. Jehovah kị “Tẹẹbịbị naamịnị owei,” ómịnị kị bẹtịbị wo tẹẹbịbịbo peimịnị.—Ps. 65:2.

2. Tẹẹ zịnịotu pịrị gbelemọ yọmị, omịnị te ka kị fịrịmọpaa-owei Paul duo tolumọ akị a paaemi a o?

² Omịnị peree bara wo bụụdọọnyebo gbaa Jehovah pịrị a paaemi, mọabịkpọ omịnị tẹẹ zịnịotu kpọ pịrị agbẹị-emi. Fịrịmọpaa-owei Paul kpọ bịsẹ bara kị mịẹmị. Gbaamaba, ómịnị fun gẹẹ Ephesus itu pịrị ifiemị, ụ gbaamị: “Ịmịnị ifiebosẹ ine tẹẹbịbịbo ánị ẹrẹbo tịịnmịnị.” (Eph. 1:16) Paul tẹẹ akị kẹnị ụbọ kẹnị ụbọ kpọ pịrịmị. Gbaamaba, ómịnị gbaa Timothy pịrịmị: “Ịmịnị Ọkpọnanaowei kulemị, . . . Bá dein mọ erein mọ ine adụdụ duo tẹẹbịbị mịẹmịnị ifiesẹ, ịmịnị iné ukiemịnị.” (2Tim. 1:3) Paul wó bẹtịbị bụụdọọnyeama kpọ nana wẹrị tẹẹ Jehovah pịrịmị. (2Cor. 11:23; 12:​7, 8) Bịsẹ bara kị gbaa kpọ, ómịnị ifie mịẹpaamọ wẹrị tẹẹ zịnịotu kpọ pịrịmị.

3. Teeki wo tẹẹ zịnịotu pịrịmụ yọ kimọ a paaemi a o?

³ Omịnị zụa ifieama tẹẹ zịnịotu pịrịmụ yọ bara kpọ paaemi. Tetuu a o? Sabrinaa tịịnmịnị bịnaraụ, kẹnị tuu gbaa wo pịrị wẹrịemi. Á gbaamị: “Akpọmị kụrọemi duonị, kịmịsẹ ánị bụụdọọnmịnị yebo mọ ánị dọụmịnị yebo mọ ka kị bọlọụ kẹrị wẹrị tẹẹbịbị mịẹ Jehovah pịrịmịnị.” Ị́ kpọ kọkọ bịsẹ bara dọụ ẹrịdẹ a o? Bịsẹ baraghaba, mị egberitịbịmị baratụa ị́ pịrịwẹrị, (1) tẹẹ zịnịotu pịrịmụ yọmị yelaaemi tuu mọ, bá (2) akị tẹẹ zịnịotu pịrị a paaemi ụwọụbo nimimịnị.

TETUU KỊ DUONỊ TẸẸ ZỊNỊOTU PỊRỊ AGBẸỊ-EMI A O?

4-5. Omịnị tẹẹ zịnịotu pịrịmịnị yọmị te “ebiama kị paamịnị” a o? (James 5:16)

⁴ Tẹẹ zịnịotu pịrịmịnị yọmị “ebiama paamịnị.” (James 5:16 goo.) Tẹẹ zịnị otu pịrịmịnị yọmị, á paamọmịnị ye dei a paaemi a? Paaemi. Jesus, Peter alaghatimi ụ piimụ bara nimi duonị, gbaa ụ pịrịmị: “Iné peibolou mị suusụọgha fa yọ duonị, ịmịnị tẹẹ ị́ pịrịdẹ.” (Luke 22:32) Paul kpọ tẹẹbịbị dei yọama mịẹpaamọ a paaemi bara nimi wẹrịemi. Ómịnị Rome mị agbẹịgha bara ikoli warị a timi ifiemị, ómịnị fun gẹẹ Philemon yarịmị: “Iné tẹẹbịbịbo duonị alaghatimi ịmịnị ikoli warị duo paamịnị.” (Philem. 22; see study note “for I am hoping that through your prayers.”) Kọkọ alaghatimi Paul ikoli warị duo paawẹrị, waị egberigbaa fịrị wẹnịmị.

⁵ Anịa, omịnị tẹẹbịbị mịẹmịnị ifiemị, Jehovah penimọ wẹrị wo tẹẹbịbịbo parụ bara mịẹgha fa. Jehovah beri tịẹmọ wó odubo otubo gbaamịnị egberibo peimịnị, bá ánị biimịnị yebo mịẹ á pịrịmụ agbẹị ifie kpọ nimi wẹrịemi. Jehovah baratụa wo pịrịmịnị bara wo mọ nimi yọmị, eti akị wo pịrịwẹrị omịnị wo a bụụdọọnmịnị yebosẹ kọn wó bara ma tụamịnị.—Ps. 37:5; see 2Corinthians 1:11 and study notes.

6. Omịnị tẹẹ zịnịotu pịrịmịnịmị, tebara ka kị wo kọn á dimọ wẹrịemi bara gbele a paaemi a o? (1Peter 3:8)

⁶ Tẹẹ zịnịotu pịrịmịnị yọmị baratụa wo pịrịwẹrị “dineni” nana dẹịnmịnị. (1Peter 3:8 goo.) Dineni akị kịmị a nanamịnị yọmị, anị ụbọ paamọmịnị bụụdọọnye nimi bá baratụa ụbọ pịrịwẹrị peree nanamụ yọkị gbaamịnị. (Mark 1:​40, 41) Michael tịịnmịnị itu-kosuowei gbaamị: “Zịnịotu dọụ wẹrịemi yeama ịmịnị mọ kọn ine tẹẹbịbị ma tụa tẹẹmịnị, bịsẹ yọkị baratụa ị pịrịwẹrị ánị fịmịnị ụyabo nimi-dẹịn bá olomu tarị mịẹ á dịamịnị. Ịmịnị ánị a dịsẹ nana wẹrịemi bara ámọ nimigha kpọ, ịmịnị ámọ mọ́ naịn dẹịnmịnị bara ịmọ nimi wẹrịemi.” Mọkpọ Richard tịịnmịnị itu-kosuowei, tẹẹ zịnịotu pịrịmịnị yọ duo paamịnị arerebo zịnị gbaamị. “Omịnị tẹẹ kịmị pịrịdaba, omịnị baratụa á pịrịmụ yọmị dịsẹnana dẹịnmịnị.” Ụ mọkpọ gbaamị: “Omịnị tẹẹ kịmị pịrịwẹrị bá baratụa bịsẹ ụbọ pịrịdaba, Jehovah wo kọn ụbọ tẹẹbịbị parụdẹ bara kị mịẹdịamịnị.”

7. Tebara ka tẹẹ zịnịotu pịrịmịnị yọmị, baratụa wo pịrịwẹrị agbẹị bara akị wo bụụdọọnyebo diimịnị a o? (Philippians 2:​3, 4) (Fotobo kpọ dii.)

⁷ Tẹẹ zịnịotu pịrịmịnị yọmị, baratụa wo pịrịwẹrị agbẹị bara akị wo bụụdọọnyebo diimịnị. (Philippians 2:​3, 4 goo.) Omịnị Oru akpọ kị inyenrinmịnị duonị, kịmịsẹ bẹbẹ bẹbẹ bụụdọọnyeama kị nana wẹrịemi. (1John 5:19; Rev. 12:12) Omịnị tẹẹ zịnịotu pịrịmịnị yọ kọn wo ụndụ bọọ tụa inyenrindaba, baratụa wo pịrịwẹrị “[wo] laamịnị ụyamị, akpọyọrẹị ma emi bịnaotubosẹ kị laamịnị bara nimimịnị.” (1Pet. 5:9) Katherine ụwọụpẹlẹ fịrị wẹnịmịnị bịnaraụ gbaamị: “Ịmịnị tẹẹ zịnịotu pịrịmịnị yọmị, zịnịotu kpọ bụụdọọnyeama nana wẹrịemi bara akị ine ukiemọmịnị. Bịsẹyọ kị baratụa ị pịrịwẹrị ba ine bụụdọọnyebo kẹrị irorogha.”

ÁMỊNỊ WO TẸẸBỊBỊBO DỌỤ WẸRỊEMI

8. Omịnị tẹẹ te otu kị pịrị a paaemi a o?

⁸ Omịnị tẹẹ te otu kị pịrị agbẹị-emi a o? Omịnị tẹẹ biin kịmịama pịrị a paaemi. Gbaamaba, dọọn bụụdọọnye nana wẹrịemi otu, school yọ a pịrị mịẹ dẹrị anịghakpọ á pịrị penimọmịnị asịyaịpesiama, okosu bụụdọọnye nana wẹrịemi otu. Biin bịnaotuama ánị warịbolouotu anịghakpọ daabụọ-otu kị pịrị penimọmịni. (Matt. 10:​18, 36; Acts 12:5) Zụaotu daabụọ-otu mịẹ paamọmịnị akpotu-ama duonị ánị warịbo kpọ duo baịn seridẹ. Zụaotu ba vurudu akpotu bụụdọọnyeama kị laamịnị. Omịnị mị bịnaotubo nimigha. Anịa, omịnị tẹẹ á pịrịdaba, Jesus omịnị “zọzọ tarị” gbaa egberi kị mịẹ beinmọmịnị. —John 13:34.

9. Tetuu kị duonị omịnị tẹẹ Jehovah ogboma bọlọụdaamịnị otubo mọ, bá ánị erebo mọ pịrị agbẹị-emi a o?

⁹ Omịnị laa tẹẹ Jehovah ogboma bọlọụdaamịnị otubo pịrị kpọ paaemi. Gbaamaba, Governing Body, baratụa á pịrịmịnị otubo, Branch Committee otu, branch office ma zịnị ikokịama bọlọụdamịnị otu, itu diiotu, itu-kosuotu, bá baratụa itu-kosuotu pịrịmịnị otubo pịrị a paaemi. Mị kịmịbo ánị bẹtịbị bụụdọọnye kị nana wẹrịemi kpọ, ámịnị angọtụa baratụa wo pịrịmịnị. (2Cor. 12:15) Gbaamaba, Mark tịịnmịnị itu diiowei gbaamị: “Ine okosudẹ daụ mọ yin mọ a barasiin wẹrị alaayọ mú fịrị wẹnị Jehovah ogbo pịrịmụ yọmị, ina bụụdọọn kụrọmọmị. Tuubị ánị maa kịmịbosẹ ba angọ kụrọ kagha. Anịa ine bịnaraụ mọ á yei mọ baratụa ị daụ mọ yịn mọ pịrịmịnị kị gbaa kpọ, ị́mịnị laa ámọ mọ kẹnị yọ a timi baratụa á pịrịgha yọmị ị mịẹ bolouịmbẹlẹgha.” Omịnị mị angọtụa fịrị wẹnịmịnị bịnaotubo laamịnị bụụdọọnyebo nimigha kị gbaa kpọ, omịnị ifiebosẹ tẹẹ á pịrị a paaemi. (1Thess. 5:​12, 13) Omịnị tẹẹ ánị erebo kpọ pịrị, ámịnị baratụa á yei otubo pịrịmịnị kị duonị ámịnị laa mị fịrịbo wẹnịmịnị.

10-11. Omịnị tẹẹ wo bịnaotubosẹ pịrịmịnị yọmị Jehovah mịẹ pọwẹịmịnị a o? Tuugbaa.

¹⁰ Mị egberitịbịmị wo ẹrẹteidẹ baramị, omịnị laa tẹẹbịbị mịẹ biin bịnaotuama pịrị a paaemi. Gbaamaba, kịmị akị bẹbẹ ịkịọụ a wẹrịgha kpọ, omịnị laa Jehovah bii wẹrị baratụa anịghakpọ kụrọmọye akị ikoli warị a emi otu, bá tarị wẹrịemi otu fịịdẹ kịmị pịrị a paaemi. Kẹnị itu-kosuowei Donald gbaamị, “Biin bịnaotuama kụrọ bụụdọọnyeama kị á paamọmịnị, anịduonị omịnị laa tẹẹ akị bụụdọọnye laaemi otubosẹ pịrị a paaemi.”

¹¹ Bịsẹ paa tẹẹbịbịbo Jehovah mịẹ pọwẹịmọmịnị a? Iin ụ mịẹ pọwẹịmịnị! Omịnị gbẹsị kẹnị ụbọ kẹnị ụbọ laamịnị bụụdọọnyebosẹ nimigha. Anịduonị, omịnị wo bịnaotubo laamịnị bụụdọọnyebo kọn wo tẹẹbịbị ma tụa tẹẹ a paaemi. (John 17:20; Eph. 6:18) Bịsẹ a paa tẹẹbịbịbo, omịnị “wo akpọyọrẹị bịna warịsẹ tarị wẹrịemi bara kị” mịẹdịamịnị.—1Pet. 2:17.

TẸẸ KẸNỊ ỤBỌ KẸNỊ ỤBỌ PỊRỊMỊNỊ IFIEMỊ

12. Tebara kị ye leleipẹlẹ inyenrinbụọ baratụa wo pịrịwẹrị, gbẹsị kịmịotu gbele-emi bụụdọọnyeama kọn wo tẹẹbịbịbo a tụa mịẹmịnị a o?

¹² Ye leleipẹlẹ. Omịnị tẹẹ akpọyọrọ ma emi bịnaotubo pịrịmịnị yọ bụọmọ kpọ, omịnị kẹnị ụbọ kẹnị ụbọ ẹrẹ tịịn tẹẹ a paaemi. Iné itumị kụrọ dọọn kẹrị emi bịna ụbọ emi a? School yọ á pịrị penimọmịnị duonị, bolouịmbẹlẹgha asịyaịpesi ine itu ma emi a? Bẹtịbị tọbọụ dii paamọmịnị daụ anịghakpọ yin ụbọ “Jehovah dọụbara akị” tọbọụ tolumọmụ yọmị kụrọ emi a? (Eph. 6:4) Ị́mịnị ye leleipẹlẹ inyenrinbụọ nana wẹrị emisẹ, ị́mịnị á tarị bá dineni mịẹ á dịa dẹịnmịnị, bịsẹ yọkị ị́ dịnẹmọ wẹrị tẹẹbịbị mịẹ á pịrịmịnị.b—Rom. 12:15.

13. Omịnị tebara ka kị tẹẹ naa wo tọrụ ẹrịgha bịnaotubo pịrị a paaemi a o?

¹³ Zịnịotu ẹrẹ-ama tịịn tẹẹbịbị mịẹ. Omịnị tẹẹ naa tọrụ ẹrịgha bịnaotubo kpọ pịrị a paaemi. Gbaamaba, omịnị tẹẹ akị Crimea, Eritrea, Russia, bá Singapore ikoli warịbo emi bịnaotubo pịrị a paaemi. Omịnị laa jw.org duo sụọwẹrị, ikoli warị emi bịnaotubo ẹrẹbo nimi kpọ paaemi.c Brian tịịnmịnị itu diiowei gbaamị: “Ịmịnị ikoli warị emi bịnaotubo ẹrẹbo gẹẹ paamọ, bá ẹrẹbo kpọ tịịn paamọmịnị yọmị baratụa ị pịrịwẹrị, tẹẹbịbị mịẹmịnị ifiemị laa ánị ẹrẹbo tịịn tụa tẹẹmịnị.”

14-15. Omịnị tebara ka kị gbẹsị kịmịotu laamịnị bụụdọọnyebo tịịn tẹẹbịbị mịẹ a paaemi a o?

¹⁴ Gbẹsị Jehovah mịẹ á pịrịmụye bii. Michael, bọlọụ anga ma tịịn wẹrị bịnaoweimị, gbaamị: “Ịmịnị ikoli warị emi bịnaotubo kọn jw.org a goodaba, ịmịnị kị ikoli warị a timi wẹrị a, tebara kị ịmọ mịẹmụ timi ma o bara iroromịnị. Ị taa emi baramị ina bụụdọọnmụ timimị, kịmịotu baratụa á pịrị, bá ánị dọụ wẹrịemi yebo mịe á pịrị bara ịmọ dọụmọ timimị. Anịduonị ịmịnị tẹẹbịbị mịẹmịnị ifiesẹ, gbẹsị tẹẹ ere nanadẹ anịghakpọ yei nanadẹ ikoli warị emi bịnaotubo pịrịmịnị.”—Heb. 13:​3, ftn.

¹⁵ Ikoli warị emi bịnaotubo, erein duo mú erein laa fịmịnị ụyabo wo mọ kẹrị irorodaba, omịnị gbẹsị ánị dọụ wẹrịemi yebo kọn wo tẹẹbịbịbo a tụamịnị. Gbaamaba, omịnị tẹẹ ikoli warị diimịnị otubo pịrịwẹrị ámịnị bọụbọụ bara kọn wo bịnaotubo mọ inyenrin bara tẹẹ a paaemi, bá tẹẹ akị daabụọ tịbị a timi wo bịnaotubo kaịmịnị otubo pịrịwẹrị, wo bịnaotubo fomuun bara Jehovah karị bara tẹẹmịnị. (1Tim. 2:​1, 2) Ikoli warị emi bịnaotubo nana wẹrịemi kụrọ peiboloumị, wo bịnaotubo kụrọmọ, bá naa bo Jehovah karịgha otubo kpọ kụrọmọ wẹrị Daabụọ egberi pei bara wo mọ tẹẹmịnị. (1Pet. 2:12) Bịsẹ kpekẹnị inyenrinbụọ kị, baratụa wo pịrịwẹrị tẹẹbịbị mịẹ zịnị bụụdọọnyeama inemịnị bịnaotuama kpọ pịrịmịnị. Omịnị ebibara ye leleipẹlẹ, wo bịnaotu ẹrẹbo tịịn tẹẹbịbị mịẹ, bá Jehovah gbẹsị ánị dọụ wẹrịemi yebo mịẹ á pịrị bara tẹẹmịnị yọmị, omịnị “zọzọ tarị wẹrịemi” bara kị mịẹdịamịnị—1Thess. 3:12.

AGBẸỊ BARA KA KỊ WO TẸẸBỊBỊBO MỊẸ

16. Omịnị tebara ka kị agbẹị bara kọn wo tẹẹbịbịbo mịẹmịnị a o? (Matthew 6:8)

¹⁶ Wo ẹrịdẹ baramị, wo tẹẹbịbịbo zụa ifieama ye paamụ bara dei kpọ paaemi. Anịa, omịnị agbẹị bara ka kị wo tẹẹbịbịbo mịẹmịnị. Omịnị tẹẹmịnị ifiemị, Jehovah wo bii dọụmịnị yebo nimigha bara iroro kụmọ; bá omịnị wó mịẹ agbẹị-emi bara kpọ kọn ụ tolumọgha fa. Jehovah wó odubo otubo dọụ wẹrịemi yebo nimi dẹkị, omịnị angọ kpọ a nimimịnị. (Matthew 6:8 goo.) Bịsẹ bara-aba, tetuu kị duonị omịnị tẹẹ zịnịotu pịrị agbẹị-emi a o? Mị egberitịbị ma tịịn wẹrịemi ikokibo kị bụọmọ kpọ, omịnị kịmịotu tarị wẹrịemi bara kị mịẹdịamịnị. Bịsẹ tarị kị wo dịnẹmọ wẹrị tẹẹ zọzọ pịrịmịnị. Omịnị Jehovah tarị dimịẹmịnị yọmị, ụ mịẹ pọwẹịmịnị.

17-18. Omịnị tẹẹ wo bịnaotubo pịrịmịnị baramị, te ka kị tọnmọ a paaemi a o?

¹⁷ Wo tẹẹbịbịbo ye paa bara deigha kị gbaa kpọ, omịnị wo bịnaotubo tarị wẹrịemi bara mịẹdịamịnị, bá Jehovah wo mịẹmịnị yebo ẹrị wẹrịemi. Wo wẹrị ye akị tọnmọ dii: Kẹnị warịbolou maa kala awọụ emi—owei mọ ere mọ. Oweimị dọọnmịnị. Erema mú daụ tẹẹmị: “Papa seisei ine bịnaowei zụọ. Ómịnị dọọn kụrọmọmịnị!” Daụbị wó tọbọụ tarị wẹrịemi duonị, tọbọụ dọọn zụọmụ bara kị mịẹmịnị. Anịa, mị tọbọụma ánị bịnaowei tarị wẹrịemi bara mịẹ daụ dịa yọmị, daụ mịẹ bolouịmbẹlẹ kụrọmọmịnị.

¹⁸ Omịnị kpọ bịsẹ bara kị mịẹ kị Jehovah mọ dọụ wẹrịemi—tẹẹ bá baratụa zọzọ pịrị. Omịnị bịsẹ bara mịẹdaba, omịnị wo bịnaotubo tarị kụrọmọ wẹrịemi bara kị mịẹdịamịnị, anịa Jehovah bịsẹ yọmị ẹrịmịnị. (2Thess. 1:3; Heb. 6:10) Wo tolumọdẹ baramị, zụa ifieama wo tẹẹbịbịbo paamụ timi yeama dei bá deigha kpọ paaemi. Bịsẹ bara kị gbaa kpọ, omịnị ifiebosẹ tẹẹ zọzọ pịrịmụ yọ bara fa kụmọ.