Teeki Opu Akpotu MỊ A O?

Bible Paraịbịbị Mị

Kịmịawọụ tẹmẹ duobosẹ, naa paagha opu akpotu paamịnị. Bible bụrụ-wẹrịemi barabị, bei akpotu bị “tuukunumọ ereinbo” ka paamịnị. (2 Timothy 3:1; Daniel 12:4, New American Bible) Opu Akpotu mị “Ọkpọnanaowei bei ọkpọ tẹmẹ ifie duobosẹ naa paagha ye, bá paa bụọdaba benebene bá paagha fa akpotu.”—Mark 13:19; Daniel 12:1; Matthew 24:21, 22.

Opu akpotu bọọ paamịnị yebo

• Ikpé karịbụọ gbeingọgọlọmịnị. Saramọ saramọ bara ikpé karịbụọ gbeingọgọlọmịnị. (Revelation 17:1, 5; 18:9, 10, 21) United Nations ogbomị ọkpọ daabụọbo a tịbịtịẹmọwẹrị Ọkpọnanaowei dọụyọ mịẹbeinmọmịnị.—Revelation 17:3, 15-18.a

• Gesii Karịbụọ kọnsin dọụmịnị. Kẹnị sụọmọemi biin ibe-ama nị Ezekiel kọn “Gog of the land of Magog” tịịnwẹrịemi ibe-ama, gesii bara Ọkpọnanaowei karịmịnị otubo baasin dọụmịnị. Anịa, Ọkpọnanaowei wó kịmịbo kekeremịnị.—Ezekiel 38:1, 2, 9-12, 18-23.

• Kiriogbo bọọ emi otubo kẹrị ụgụla-sụọmịnị. Jesus kiriogbo bọọ emi otubo kẹrị ụgụḷa-sụọmịnị bá “anịna gbalị-kịmị, oboribo mọ bá anịnabo mọ puumọmịnị baramị, ómịnị kịmịawọụ puumọmịnị.” (Matthew 25:31-33) Kịmịotu baratụa Jesus “bịnaotubo,” anị ụ mọ́ mọ agọnọ bọọ timi kiriogbo daamịnị otubo pịrị bara kị diiwẹrị ụgụlapẹlẹ akị kẹnị-ụbọ kẹnị-ụbọ pịrịmịnị.—Matthew 25:34-46.

• Daabụọ bọọ sụọ daamịnị otubo bẹnịmọmịnị. Yalịyalị tẹmẹ pịrị sẹlẹwẹrị mú agọnọ bọọ Jesus sụọmọ daamịnị otubo, peibolou kẹrị kụrọmọwẹrị fịịdaba, ámịnị fịị duo seriiwẹrị agọnọ a múmịnị.—Matthew 24:31; 1 Corinthians 15:50-53; 1 Thessalonians 4:15-17.

• Armageddon. Mị “Seriidẹịn Ọkpọnanaowei opu sụụ ereinmị” kọn akị “Jehovah erein” kpọ tịịnmịnị. (Revelation 16:14, 16; Isaiah 13:9; 2 Peter 3:12) Christ kịrịịye mịẹgha otubosẹ gbeingọgọlọmịnị. (Zephaniah 1:18; 2 Thessalonians 1:6-10) Sọnọma tịbị tụawẹrịemi bou kụrọ nama kpọ gbeingọgọlọmịnị, anị ọkpọ daabụọbo.—Revelation 19:19-21.

Opu akpotu bụọdaba paamịnị yebo

• Satan mọ seitẹmẹbo mọ kẹrị kaịmịnị. Kẹnị kụrọ angel-owei, Satan mọ seitẹmẹbo mọ gbein “abyss bolou bọọ tụamịnị.” Ámịnị bá kụrọ nanawẹrị ye mịẹghafa bara kị bịịmọwẹrịemi. (Revelation 20:1-3) Satan abyss bọọ emi ifiemị, ikoliwarị a emi bara kị paamịnị; ómịnị bá laa ọkpọ bọọ kẹnịye kpọ mịẹgha fa.—Revelation 20:7.

• Jesus koro 1,000 kụraịama akị daamịnị. Ọkpọnanaowei Daabụọ mị koro 1,000 kụraịama akị daamịnị, bá biin ebi-yeama mịẹ kịmịawọụ pịrịmịnị. (Revelation 5:9, 10; 20:4, 6) Kịẹnbiri fa “kịmị ikpudu” laa “opu akpotu duo tịẹwẹrị,” Jesus 1,000 kụraịama akị koro daamụ ifiebị ẹrịmịnị.—Revelation 7:9, 14; Psalm 37:9-11.