Revelation Tịbịyọ 17 Bọọ Gbaawẹrịemi Kwekwe Bou Kụrọ Nama Bị Teye A O?

Bible Paraịbịbị Mị

Revelation tịbịyọ 17 bọọ emi kwekwe bou kụrọ nama bị, akị ọkpọ daabụọbo mịẹ kẹnịsụọmọ bá anị a tịbị-tịẹmọwẹrịemi ogbo kị bịịmọ-wẹrịemi. Bei ogbo bị akị League of Nations kị tịịntimi mị. Anịa bei tịẹkiri bị, United Nations kị kọn mị ogbo tịịnmịnị.

Kwekwe bou kụrọ nama leleimụ barabị

1. Politics ogbo. Kwekwe bou kụrọ nama bị “sọnọma tịbịama” kị nana wẹrịemi. Bei tịbịbo kọn “sọnọma ogunama,” bá “sọnọma pẹrẹ-ama,” anịghakpọ daa-kụrọama ka tịbị-tịẹmọwẹrịemi. (Revelation 17:9, 10) Bible mị, zụa ifieama ogun bá nama-ama kọn daabụọama ka tịbị-tịẹmọmịnị.—Jeremiah 51:24, 25; Daniel 2:44, 45; 7:17, 23.

2. Ọkpọsẹ daakụrọ mọ lei-emi. Kwekwe bou kụrọ nama bị, Revelation tịbịyọ 13 bọọ emi sọnọma-tịbị nanawẹrịemi bou kụrọ nama mọ lei-emi, anị ọkpọ daabụọbosẹ a tịbị-tịẹmọwẹrịemi yemị. Mị maa bou kụrọ namabosẹ sọnọma tịbị, oia imgbeama anịghakpọ akụnran-ama, bá Ọkpọnanaowei werimịnị ẹrẹama kpọ nanawẹrịemi. (Revelation 13:1; 17:3) Bei leiyọbo ye kị bịịmọ-wẹrịemi. Kwekwe bou kụrọ nama bị, ọkpọsẹ daakụrọbo mọ lei-emi.—Revelation 13:15.

3. Zịnị daakụrọama kị duo kụrọ nanawẹrịemi. Kwekwe bou kụrọ nama bị, zịnị daakụrọama kị “duo paamị.”—Revelation 17:11, 17.

4. Karịbụọ mọ yemịẹ gbeleimịnị. Opu Babylon, anị ọkpọ bọọ emi ikpé karịbụọbosẹ a tịbị-tịẹmọwẹrịemi yemị, kwekwe bou kụrọ nama agọnọ bọọ tịtẹ-emi yọmị, karịbụọ ogboama kị bei nama kẹrịmọmịnị bara kị mịẹgaan wẹrịemi.—Revelation 17:3-5.

5. Ọkpọnanaowei didụbamọgha. Nama bị “Ọkpọnanaowei werimịnị ẹrẹama kị nanawẹrịemi.”—Revelation 17:3.

6. Kụrọ fa ifie. Kwekwe bou kụrọ nama bị, “abyss”a a timi dẹkị waị serii paabomịnị.—Revelation 17:8.

Bible bụrụ-egberi paabeinmị

League of Nations mọ bá United Nations mọ, Bible bọọ emi kwekwe bou kụrọ nama gbelemọ bụrụ egberibo mịẹbeinmọ bara dii.

1. Politics ogbo. United Nations ogbomị baratụa ọkpọ politics ogbobosẹ pịrịmịnị. “Ogbo bọọ sụọemi ibebosẹ kụrọnana zịnị deingha” bara amịnị mọ mịẹpaamọmịnịb

2. Ọkpọsẹ daakụrọ mọ lei-emi. Kụraị 2011 laamị, United Nations bọọ sụọdẹ ibebo 193 laamị. Anịduonị, ámịnị ọkpọ bọọ biindẹịn ibeama bá kịmịama ka tịbị-tịẹmọ wẹrịemi bara gbaamị.

3. Zịnị daakụrọama kị duo kụrọ nanawẹrịemi. Bẹbẹ ibeama kị kẹnịsụọmọwẹrị United Nations ogbo mịẹpaamọ wẹrịemi, bá mị ibebo akị ụ pịrị kụrọ bẹtịbị kị ómịnị nanawẹrịemi.

4. Karịbụọ mọ yemịẹ gbeleimịnị. Ọkpọ karịbụọbo baratụa akị League of Nations pịrịtimi mị, bá bei tịẹkịrị bị baratụa United Nations kpọ pịrịmịnị.c

5. Ọkpọnanaowei didụbamọgha. “Ọkpọyọrọẹịsẹ a dọọ mọ kekereye mọ mịẹpaamọ mụ”d yọkị duonị United Nations ogbo mịẹmị. Mị tọnpẹlẹyemị ebiemi kị gbaa kpọ, UN ogbo mị Ọkpọnanaowei didụbamọgha. Tuubị Ọkpọnanaowei Daabụọ kụmọ laa mịẹ a paaemi ye kị, ámịnị mọ mịẹmụ bara gbaaemi.—Psalm 46:9; Daniel 2:44.

6. Kụrọ fa ifie. World War I fadẹ ifie ka League of Nations mịẹpaamọmị. Mị ogbomị dọọ mịẹpaamọ agbẹịtimi mị, anịa bịsẹbara paagha. World War II 1939 kụraị bọọ paa ifiebị, mị ogbo mị bá fa. Kụraị 1945, World War II bo dụụ ifie ka United Nations mịẹpaamọmị. Mị ogbo akị fịrịwẹnịmịnị baramị League of Nations mọ lei kụrọmọemi.