Jesus Waị Agọnọ A Múmị

Jesus Galilee amú wó tuuduo-otubo laawẹrị, kẹnị yelaa fịrị akị á pịrịmị. Ụ gbaamị: ‘Mú ibebosẹ a tuuduo-otu dọụ. Ịmịnị akị á tolumọdẹ yebo kọn á tolumọdá á kọn benibilemọ.’ Ómịnị mọkpọ gbaa á pịrịmị: ‘Ukie, ịmịnị ifiebosẹ á mọ mọ́ timi mịnị.’

Jesus waị fịịyọ duoserii ifiemị, ómịnị erein a maasii (40 days) akị kiriogbo bọọ timi mị. Bịsẹ ifiemị, Jesus Galilee mọ bá Jerusalem mọ a wó tuuduo-otubo biin yaị pịrị ẹrịmị. Ómịnị yelaa yeama akị á tolumọmị, bá biin tamamaa yeama kpọ mịẹmị. Bịsẹ ifie bụọmị, ómịnị Olive Ogun bọọ wó fịrịmọpaa-otubo mọ bẹnịịmị. Jesus bịsẹ ifie ka wó tuuduo-otubo mọ bẹnịị kunumọmị. Ómịnị gbaa á pịrịmị: ‘Jerusalem duoserii-kụmọ. Jerusalem a timi Daụ kikoromọ wẹrịemi ye koru.’

Fịrịmọpaa-otubo wó gbaatimi yema sụọtuunimigha duonị, ámịnị ụ biimị: ‘Ị́mịnị Israel Pẹrẹ a paamụ ifie laadẹ a?’ Jesus á parụmị: ‘Jehovah ị kọn Pẹrẹ a tụamụ ifie naa laagha. Alaaghatimi yalịyalị tẹmẹ mị kụrọ akị á pịrịwẹrị ámịnị iseritịẹ ị pịrịmịnị. Ámịnị Jerusalem, Judea, Samaria, bá akpọyọrọsẹ a mú egberigbaa.’

Jesus bịsẹbara gbaasin ifiemị, ómịnị dọlọ-dọlọ agọnọ uwoutimi agọnọ-tọrụ duo sụọfamị. Wó tuuduo-otubo ụ diitimi, ómịnị agọnọ duo sụọfamị.

Bịsẹ yọ bụọ ifiemị, tuuduo-otubo Olive Ogun duoseriiwẹrị Jerusalem a múmị. Ámịnị ifiebosẹ kẹnị agọnọ-warị a gbeleiwẹrị tẹẹbịbị mịẹtimi mị. Ámịnị bịsẹ yọ bọọ bẹnịịwẹrị Jesus waị zịnị yeama gbaa á pịrịmụ ifie kị korutimi mị.