Laa Owei-tọbọụ Ziimị!

Abraham mọ Sarah mọ zọzọ nanawẹrị biin kụraịama baịdẹ. Ámịnị Ur ama bọọ ánị ebi warị bọọ barasiin wẹrị tapolin warị-ama ka inyenrintimi mị. Sarah eti akị Jehovah a tụawẹrị duonị, tapolin-warị a timi mị a dẹịndẹ bara gbaagha.

Tọbọụ ziimụ yọmị sarah dịsẹ kụrọmọ duonị, ámịnị gbaa Abraham pịrịmị: ‘Ine odubo-araụ Hagar tọbọụ zii daba, tọbọụ mị ine tọbọụ bara kị paa mịnị.’ Timi kẹnị ifie laamị, Hagar tọbọụ zii mị. Wó ẹrẹ mị Ishmael.

Biin kụraịama bụọmị, tara igeni-otu bo Abraham mọ Sarah mọ sụọmị. Bịsẹ ifiemị, Abraham 99 kụraị baịdẹ, Sarah bá 89 kụraị baịdẹ. Abraham á bịị kẹnị tịịn kirikunu a tịtẹwẹrị fịyaị akị á kamaị mị. Bịsẹ igeni-otubo ị́ mọ nimi wẹrịemi? Bịsẹ igeni-otubo angel-ama! Ámịnị gbaa Abraham pịrịmị: ‘Bomịnị kụraịmị, mị ifie laa daba ị́ mọ iné erema mọ owei-tọbọụ zii mịnị.’ Sarah tapolin-warị duo á peitimi mị. Amịnị lẹẹ dẹrị wẹrị iroromị: ‘Ịmịnị bei okosubo laadẹ bara kị laa tọbọụ zii a paa mịnị?’

Kọkọ, Jehovah angel-owei gbaawẹrị bara kị paamị, barịị kụraị laamị, Sarah owei-tọbọụ ziimị. Abraham, Isaac ka kị ụ tịịnmị, Isaac ẹrẹ tuumị “dẹrị.”

Isaac sọnran kụraị anịghakpọ naa sọnran kụraị laa siinghamị, Ismael Isaac mịẹdẹrịtimi bara Sarah mọ ẹrịmị. Sarah anị tọbọụ kekere dọụtimi duonị, amịnị mú Abraham laawẹrị, ómịnị Hagar mọ Ishmael mọ duopaamọ bara gbaa ụ pịrịmị. Abraham á duopaamọ dọụgha timimị. Anịa Jehovah gbaa Abraham pịrịmị: ‘Sarah gbaamịnị egberi pei. Ịmịnị Ishmael kekere mịnị. Anịa Ịmịnị Isaac duotolu ka ine kikoromọ wẹrịemi yebo mịẹbeinmọ mịnị.’