“Pebidá Iné Daabụọ Bị Bo”

Jehovah kikoromọmị: ‘Kịmị bá dọọn naagha fa, kịmị bá yougha fa, dọọn bá timigha fa, fịị kpọ bá timigha fa. Ịmịnị kịmị-awọụ tọrụbo a emi youyaị-benibo kụọsinmịnị. Kịmị bá bụọdẹ ifie bọọ paa seiyebosẹ ukiegha fa.’

Adam mọ Eve mọ dọọ bá pọwẹịtimi inyenrin Jehovah mọ dọụ kị duonị, ómịnị á kọn Eden fanụ-kiri bọọ tụamị. Ámịnị Jehovah karị bá awọụ-ama zii kiriogbo beinmọ kị Jehovah mọ dọụ wẹrịmị. Anịa, Adam mọ Eve mọ Jehovah gbaa bara dimịẹgha. Mọabịkpọ, Jehovah tọnwẹrịemi bara mị benebene deigha. Mị fun mị, Jehovah kikoromọdẹ yesẹ, paabeinmịnị bara mịẹgaan paamọ wo pịrịdẹ. Jehovah kikoromọ akị Abraham pịrịwẹrị yebosẹ paabeinmịnị. Wó Daabụọ bị, tarịama kọn bei kiriogbo bọọ bomịnị.

Alaaghatimi Satan mọ seitẹmẹbo mọ bá bolousei-otubo mọ ba timigha fa. Bịsẹ ifiema timi mịnị otubosẹ Jehovah kị karịmịnị. Omịnị dọọn kpọ dọọngha fa bá fịị kpọ fịịgha fa. Omịnị bụnụtimi seriidẹ ereinsẹ, angọbo kụrọ kị kụrọtimi mịnị bá pọwẹị pọwẹị kị timi mịnị. Kiriogbosẹ, paradise kị paamịnị. Kịmịsẹ ebi fịyaị ẹrị fịmịnị bá ebiwarị-ama ka timi inyenrinmịnị. Bịsẹ ifie mị, kịmị bá akpotu dọụgha fa. Kịmịsẹ ebimịẹ zọzọ pịrịmịnị. Kụrọ nama-ama bá wo esiingha fa, omịnị kpọ bá kụrọ nama-ama esiingha fa.

Jehovah fịịdẹ otubo tịịn seridaba, wo mịẹ pọwẹị kụrọmọmịnị. Jehovah waị fịịyọ duo Abel, Noah, Abraham, Sarah, Moses, Ruth, Esther, David bá zịnị otu-ama tịịn seridaba, omịnị pọwẹịtimi á gbeinmọ mịnị. Ámịnị kpọ wo mọ gbelei kiriogbo mịẹ paradise paamọmịnị. Ifiebosẹ kịmị mịẹ pọwẹịmịnị fịrị kị timi wo pịrị wẹnịmịnị.

Ị́mịnị kpọ paradise a timi kị Jehovah mọ dọụemi. Ị́mịnị Jehovah emibara nimi kụrọmọ bọlọụ dẹịnmịnị. Pebidá omịnị ereinbosẹ, Jehovah mọ naịntimi bẹseri bẹseri laa!