Jehovah Benebene Joseph Baragha

Joseph ikoli-warị a timi ifiemị, Pharaoh Egypt pẹrẹ mị, bẹbẹ paa dawaị-ama dawaịmị, anịa kẹnị ụbọ kpọ laa dawaị tuu gbaagha. Joseph laa wó dawaị bọọ tuu gbaa mịnị bara Pharaoh odubo-owei mọ gbaa Pharaoh pịrịmị. Pharaoh tịẹkiri tịẹkiri ka kịmịotu fịrịmọ mú Joseph tịịnmị.

Pharaoh ụ biimị: ‘Ị́mịnị laa ine dawaịbo a tuugbaa mịnị?’ Joseph gbaa Pharaoh pịrịmị: ‘Egypt ibe bị sọnọma kụraị fịyaị biin mịnị, bịsẹ sọnọma kụraịbo bụọdaba, barịị sọnọma kụraịbo mọụn koro mịnị. Kịlịkịlị emi kịmị sẹlẹ dá fịyaị gbaịn, anịkị iné kịmịbo ba mọụn a sụọgha fa.’ Pharaoh gbaa mị: ‘Ịmịnị ị́ sẹlẹdẹ! Egypt ibesẹ, ị bụọdaba ị́ laadẹ!’ Joseph tebara kị mịẹtimi Pharaoh dawaịbo a tuugbaa ma o? Jehovah kị baratụa Joseph pịrịmị.

Joseph sọnọma kụraị akị fịyaị gbaịnmị. Bịsẹ sọnọma kụraịbo bụọmị kiriogbosẹ mọụn koromị, Joseph gbaa wẹrị yemị paabeinmị. Akpọyọrẹịsẹ kịmịama bo Joseph bara ka fịyaị fẹịmị. Joseph daụ Jacob, Egypt ibe bị fịyaị emi bara naamị, anịduonị, ómịnị wó oia awọụbo fịrịmọ Egypt a fịyaị fẹị yọ a múmị.

Jacob awọụbo mú Joseph laa ifiemị Joseph kirimọkirimọ ka a lelei nimimị. Anịa wó bịnaotubo ụ nimigha. Ámịnị tịbị-oboimọ ụ pịrịmị. Joseph dawaị mị paabeinmị. Joseph wó bịnaotubo mọkpọ ịkịọụ-sei emi bara nimi dọụmị. Anịduonị ómịnị gbaa á pịrịmị: ‘Ámịnị ye a tuudọụ otuama. Ámịnị wo ibe emibara ka tuudọụ yọ a bomịnị.’ Ámịnị ụ parụmị: ‘Bịsẹ baragha! Omịnị Canaan kị duoboemi, wó daụ oi-maamụfini owei-awọụama kị ziimị. Kẹnị ụbọ fịịdẹ, tuupẹlẹ oweiemị wó daụ mọ kị emi.’ Joseph gbaa á pịrịmị: ‘Ánị tuupẹlẹ-owei mị a mọ kọn bodaba, kịrị ịmịnị ánị gbaamịnị egberi pei mịnị.’ Anịduonị ámịnị waị ama mú á daụ laamị.

Á kọnbo fịyaịbo fa ifiemị, Jacob waị wó awọụbo fịrịmọ Egypt a múmị. Bei ifie bị, ánị tuupẹlẹ-owei Benjamin kpọ á mọ mọ́ múmị. Joseph wó bịnaotubo dadii dọụmịnị duonị, Joseph wó silver cup mị akị Benjamin akpa ma tụa wẹrị, ámịnị kị cup furudẹ bara akị á gbaịnmọmị. Joseph odubo-otubo Benjamin akpa bọọ cup mị ẹrị ifiemị wó bịnaotubo mịẹ tamamamị. Benjamin ụyamọ mụ bara dii a, ámịnị kị ụyamọ bara Joseph bịnaotubo mọ kọn Joseph tẹẹmị.

Mị paaye duonị, wó bịnaotubo ba bọlọụ bara fa bara Joseph mọ nimimị. Joseph bá angokẹrị a paagha. Anịduonị ómịnị you wẹrị gbaamị: ‘Ịmịnị ánị bịnaowei Joseph. Ị daụ mọkpọ ụwọ́-emi?’ Yemị wó bịnaotubo mịẹ tamamamị. Ómịnị gbaa á pịrịmị: ‘Ámịnị ị mịẹye duonị, angọseimọ kụmọ. A zụọmụ kị duonị, Ọkpọnanaowei ị fịrịmọ bei yọ bọọ bomị. Kịalị mú ị daụ kọnbo.’

Ámịnị ama a mú wẹrị, mị ebi egberi gbaa á daụ dịa mị bá ụ kọn Egypt a bomị. Biin kụraịama bụọmị, Joseph mọ wó daụ mọ waị gbeleimị.