Jehovah Sụụ Jehoshaphat Pịrịmị

Jehoshaphat, Judah ibe daatimi ifiemị, ómịnị ibe ma timi orubo mọ bá Baal tanabo mọ seimọsinmị. Ómịnị kịmịsẹ Jehovah olokobo nimi kị dọụmị. Anịduonị ómịnị wó ala-otubo mọ bá Levite-otubo mọ fịrịmọ Judah ibesẹ a mú Jehovah olokobo kọn kịmịbo tolumọmị.

Á mọ mọ́ naịntimi ibebo, Jehovah wó kịmịbo mọ emi bara nimiwẹrịemi duonị, ámịnị Judah-otubo mọ sụụmụ yọbị esiinmị. Anịduonị ámịnị yeama kpọ fịrịmọ akị Pẹrẹ Jehoshaphat yarịmị. Anịa Moab-otu, Ammon-otu, bá Seir ete duobo otu Judah-otubo mọ sụụyọ a bomị. Jehoshaphat, Jehovah baratụa-pịrịye dọụmị. Anịduonị ómịnị Jerusalem bọọ, owei-otubo mọ, ere-otubo mọ bá kala-awọụbosẹ kpọ bẹnịmọmị. Jehoshaphat ánị tọrụyọma tẹẹmị: ‘Jehovah, ị́mịnị faghaba, omịnị laa á dẹịnmọgha fa. Sisei wo mịẹmụye gbaa wo pịrị.’

Jehovah, Jehoshaphat tẹẹbịbị parụmị. Jehovah gbaa ụ pịrịmị: ‘Malafakụmọ. Ịmịnị ị́ barịị mịnị. Ebibara tịẹkụrọdá, ịmịnị akị ị́ zụọmụ bara dii.’ Jehovah tebara ka kị á zụọbụọmọ ma o?

Barịị pekeimị, Jehoshaphat duma tuunmụ kịmịama sẹlẹmị bá á bịị army-otu tọrụyọ duo marchmị. Ámịnị Jerusalem duo wẹnịmú Tekoa laamị, Tekoa kị ánị sụụkirimị.

Duma tuun otubo bolouịmbẹlẹ bara ánị okolobosẹ serimọ dumabo tuun Jehovah tokonimịnị ifiemị, Jehovah sụụ wó kịmịbo pịrịmị. Ómịnị Ammon-otubo mọ bá Moab-otubo mọ mịẹ zọzọ kẹrị-sụụwẹrị zọzọ baasinmị. Jehovah Judah-otubo zụọbụọmọmị, sụụ-otubo mọ, bá ịkịankụn-otubo kpọ. Á mọ mọ́ naịntimi ibebo Jehovah mịẹye naa ifiemị, Jehovah mọkpọ wó kịmịbo zụọbụọmọmịnị bara ámịnị mọ nimimị. Jehovah tebara ka kị wó kịmịbo zụọbụọmọmịnị a o? Jehovah biin ụwọụama ka kị wó kịmịbo zụọmịnị. Jehovah wó kịmịbo zụọbụọmọ mụ yọbị, ómịnị kịmị baratụa-pịrịye dọụgha.