Opu Tịn Mọ Lei-emi Daabụọ

Kẹnị dein, Nebuchadnezzar dawaịmị. Dawaị bị ụ mịẹ malafamị. Anịduonị, wó bụrụ-otubo dawaị bọọ tuugbaa ụ pịrị bara ómịnị mọ gbaamị. Anịa bụrụ-otubo dawaị-tuu nimiwẹrị gbaa ụ pịrịgha. Ómịnị bá mịẹmụ bara fa duonị, ómịnị Daniel mo ẹrẹmị.

Nebuchadnezzar gbaa Daniel pịrịmị: ‘Ịmịnị dawaị-tọrụ a kẹnị tịn ẹrịmị. Tịn mị danghaị mú agọnọ tọrụ duo sụọemi. Kiriogbo bọọ iné timiyọ-timiyọ ị́mịnị tịn bị ẹrị a paaemi. Tịnpomubo ebi bá biin tịn-beinyaịama kpọ nanawẹrịemi. Nama-ama mú tịn-kirikonu bọọ embafoutimi mị, bá ofoni-ama kpọ tịn-barabo a warịama kẹrịwẹrịmị. Kẹnị angel agọnọ duo korobo wẹrị gbaamị: “Tịn pẹlẹ koromọdá tịn-barabo kpọ pẹlẹsin. Anịa tịn-tuu mọ bá tịn-ikemibo mọ pẹlẹkụmọ, ogu mọ bá copper mọ akị mịẹ wẹrịemi ye akị tịn fịna yọrọ. Tịn adụdụmị, kịmị-tọbọụ adụdụ duo deibo nama adụdụ ka paamịnị, bá sọnọma ifie bụọmịnị. Kịmịsẹ Ọkpọnanaowei kị Daamịnị bá ómịnị daabụọ mị akị ụ dịsẹdẹ ụbọsẹ kị pịrịmịnị bara nimi mịnị.”’

Jehovah dawaị-tuu mịẹgaan Daniel pịrịmị. Daniel dawaị bọọ sụọtuu nimi ifiemị, ómịnị malafa kụrọmọmị. Daniel gbaa pẹrẹ pịrịmị: ‘O pẹrẹ, Ịmịnị bẹtịbị aba, mị dawaị bị iné egiren-otuama kị paamọ-mụtimi mị, anịa dawaị bị ị́mịnị kị paamọmịnị. Pẹlẹ koromọ tịn bị ị́mịnị ka tịbịtịẹmọ-wẹrịemi. Iné daabụọ mị iné bara duo seriimịnị. Kụrọ nama-ama bou-bolou bọọ tuoama pẹlẹ-fịmịnị baramị, ị́mịnị kpọ bou-bolou bọọ tuoama kị pẹlẹ fịmịnị. Angel bị, tịn-tuu mọ tịn-ikemibo mọ pẹlẹkụmọ gbaa duonị, ị́mịnị waị ibe daamịnị.’

Kẹnị kụraị bụọmị, Nebuchadnezzar wó warị-agọnọ bọọ wẹnị yọrẹị Babylon emibara diitimi mị. Ómịnị gbaamị: ‘Wẹrị ine kẹrị ebimọdẹ opu ama dii. Ịmịnị kọkọ dụba bá kụrọ nanadẹ!’ Nebuchadnezzar mọkpọ ẹrẹmịnị mị, ómịnị agọnọ duo kẹnị okolo naamị. Bịsẹ okolo mị gbaamị: ‘Nebuchadnezzar! Daabụọ mị iné bara duo seriidẹ.’

Bịsẹ tịẹkirimị, Nebuchadnezzar nọmụmị, ómịnị bo kụrọ nama bara kị paamị. Ómịnị wó ebi-warị bọọ barasinwẹrị bouma mú kụrọ namabo mọ kị inyenrinmị. Nebuchadnezzar tịbị-dumounbo uge-ịpịọụn-ama anịghakpọ uge-pụngọ-ama bara kị danghaịmị. Wó emimeinbo bá ofoni emimein-ama bara kị paamị.

Sọnọma kụraị bụọ ifiemị, Nebuchadnezzar angọ mị waị ebimị. Jehovah waị ụ kọn Babylon bọọ pẹrẹ a tụa ifiemị, Nebuchadnezzar gbaamị: ‘Ịmịnị agọnọbo Daamịnị owei Jehovah tokonimị. Jehovah kị Daamịnị. Ómịnị angọserimọmịnị otu mịẹ angọ-iyerimọmịnị bá daabụọ mị akị ụ dịsẹdẹ ụbọsẹ kị pịrịmịnị.’