Elizabeth Tọbọụ Ziimị

Jerusalem akpakpabo waị kẹrịwẹrị 400 timitimi kụraị-ama bụọdẹmị, ịkịankụn-owei Zechariah mọ bá wó taa Elizabeth mọ Jerusalem mọ naịn-emi yọ a timi inyenrintimi mị. Ámịnị zọzọ nanawẹrị biin kụraịama baịdẹ, anịa ámịnị naa kẹnị tọbọụ kpọ ziigha. Kẹnị erein Zechariah karịwarị bọọ incense ịyọụnmọtimi ifiemị, angel Gabriel bo ụ paamọ mị. Zechariah malafamị, anịa angel Gabriel gbaa ụ pịrịmị: ‘Malafakụmọ. Jehovah ị fịrịmọ ebiegberi kị gbaa ị́ pịrị yọ a bo emi. Ị́ taa, Elizabeth, owei-tọbọụ ziimịnị John ka kị ụ tịịn. Jehovah kẹnị yelaa fịrị akị John pịrị wẹnịmụ bara gbaadẹ.’ Zechariah gbaamị: Ịmịnị tebara kị mịẹtimi iné gbaamịnị egberi mị kọkọ paamụ bara nimi mịnị a o? Ị mọ ị taa mọ okosu akị tọbọụ ziidẹịndẹ.’ Gabriel gbaa Zechariah pịrịmị: ‘Ọkpọnanaowei kị ị fịrịmọ bo mị egberi gbaa ị́ pịrịmị. Anịa ị́mịnị mị egberi mị, paabeinmụ bara biberingha duonị, ị́mịnị bá ẹrẹghatimi tọbọụ ziidẹ kị ẹrẹ mịnị.’

Zechariah karịwarịma timi alaa zịnị ifieama dẹịnmị. Anịduonị ómịnị laa paabo ifiemị, tiri-anga bọọ timi ụ korutimi otubo paaye nimi dọụmị. Anịa Zechariah ẹrẹ a paagha. Ómịnị wó barabo ka kị tọnmọ ẹrẹmị. Bịsẹ bara paadẹ ifiemị, Ọkpọnanaowei ịsọmụ-egberi gbaa Zechariah pịrịdẹ bara kịmịbo mọ nimi mị.

Timi kẹnị ifie laamị, angel-owei gbaawẹrị bara bị, Elizabeth ofurowẹrị owei-tọbọụ ziimị. Elizabeth ikie-otubo mọ anị bịnaotubo mọ tọbọụ dii yọ a bomị. Ámịnị pọwẹị a pịrị kụrọmọmị. Elizabeth gbaamị: ‘John ka kị tọbọụ tịịn mịnị.’ Ámịnị gbaamị: ‘Iné ziitusẹ John ẹrẹ fịị kịmị fa. Anịduonị, Zechariah, ụ daụ ẹrẹ ka kị ụ tịịn.’ Anịa mị Zechariah gẹẹ koromọ egberibo: ‘John kị wo ẹrẹ.’ Bịsẹ tịẹkirimị, Zechariah waị ẹrẹmị! Judea bọọ emi otubosẹ Elizabeth tọbọụ ziidẹ bara naa ifiemị, yemị á mịẹ tamamaamị. Anịduonị ámịnị gbaamị: ‘Bei tọbọụ bị dụba daba, ómịnị tebara kị paamịnị a o?’

Bịsẹ yọ bụọ ifiemị, yalịyalị tẹmẹ Zechariah beinwẹrị ómịnị bụrụmị. Ụ gbaamị: ‘Tokoni Jehovah laa. Ómịnị zụọbụọmọ-owei Messiah fịrịmọbo wo zụọbụọmọ mụ bara kikoromọ Abraham pịrị wẹrịmị. John bụrụ-owei ka paamịnị, ómịnị ụwọụ tọlọmọwẹrị Messiah bomụ ifie korumịnị.’

Kẹnị yelaa ye Elizabeth bịna-araụ Mary kpọ paamọmị. Wo waị tolumọ mụ egberitịbị bị omịnị bịsẹ ye dọụ ẹrị mịnị.