Jesus Daabụọ Egberi Gbaamị

Jesus benibilesin ifiemị, ómịnị koro egberigbaa fịrị wẹnịmị. Ụ gbaamị: ‘Ọkpọnanaowei Daabụọ bị bo naịndẹ.’ Ómịnị Galilee mọ bá Judea mọ a mú egberigbaa ifiemị, tuuduo-otubo kpọ ụ mọ mọ́ múmị. Jesus Nazareth wó ama bọọ mú ifiemị, ómịnị karịwarị bọọ múwẹrị bụrụ-owei Isaiah gẹẹwẹrị fun-kpoo goo paamọmị. Ụ gbaamị: ‘Ịmịnị laa ebiegberi gbaamụ yọ duonị, Jehovah yalịyalị tẹmẹ kọn ị pịrịdẹ.’ Bịsẹ yemị, teeki bẹmọ wẹrịemi a? Jesus tamamaa yeama mịẹ kị kịmịotu mọ dọụwẹrị mị. Anịa, Jesus ebiegberi gbaamụ kị duonị Jehovah yalịyalị tẹmẹ mị akị ụ pịrị bara kị bẹmọ-wẹrịemi. Ómịnị gbaa wó tuuduo-otubo pịrịmị: ‘Bei erein bị, bei bụrụ-egberi bị paabeindẹ.’

Bịsẹ yọ bụọmị, Jesus Galilee Abadị bọọ mú ifiemị, ómịnị Abadị bọọ wó tuuduo-otubo a nein ẹrịmị. Ámịnị abadị bọọ indi kị dọụtimi mị. Ánị ẹrẹbo, Peter, Andrew, James, bá John. Ómịnị gbaa á pịrịmị: ‘Ine tuuduo, ịmịnị á mịẹ kịmịotu dọụ otuama ka paamịnị.’ Ámịnị kirimọkirimọ ánị indi-dọụ fịrị bọọ barasinwẹrị wó a tuuduomị. Ámịnị Galilee bọọ Jehovah Daabụọ egberi gbaa mú yọbosẹ laamị. Ámịnị karịwarịbo mọ, fọụtiribo mọ, bá ụwọụbosẹ ka egberigbaamị. Biin kịmịama á mọ mọ́ ánị múdẹ yọsẹ a múmị. Biin kịmịama kị Jesus wẹnịtimi fịrị naamị, Syria otubo kpọ naamị.

Timi kẹnị ifie laamị, dọọn-ama zụọmụ kụrọ mọ, bá kịmịotu angọ a seitẹmẹ-ama kọnsinmụ kụrọ Jesus mọ akị wó tuuduo-otubo pịrịmị. Ómịnị, ama duo mú ama laa, bá gbẹnẹ duo mú gbẹnẹ laa a mú egberigbaa fịrị wẹnịtimi ifiemị, zịnị otuama kpọ ụ mọ mọ́ múmị. Mary Magdalene, Joanna, Susanna, bá zịnị peibolou tụa ereama mọ baratụa Jesus mọ bá wó tuuduo-otubo mọ pịrịmị.

Egberi gbaamụ bara Jesus mọ akị wó tuuduo-otubo tolumọsindẹ ifiemị, ómịnị á fịrịmọ egberigbaa yọ a múmị. Jesus tuuduo-otubo mú Galilee bọọ egberigbaa ifiemị, biin kịmịama kị Jesus tuuduo-otuama paawẹrị benibilemị. Biin kịmịama kị bo wó tuuduo-otu a paa dọụtimi mị. Anịduonị Jesus á kọn sou-laadẹ kiri kị tọnmọmị. Ómịnị gbaamị: ‘Tẹẹ Jehovah yarịdá biin fịrịwẹnị otuama fịrịmọbo fịyaịbo sou.’ Ómịnị waị wó tuuduo-otubo a 70 fịrịmọ mú Judea bọọ egberigbaamị. Ómịnị á kọn maa-kịmị maa-kịmị kị dịẹmọmị. Ámịnị Daabụọ egberi bị akị kịmị a paabosẹ kị tolumọmị. Tuuduo-otubo egberigbaa yọ duobo ifiemị, ámịnị pọwẹịtimi egberigbaa yọ bọọ ẹrị yebo gbaa Jesus pịrịmị. Devil kụrọ nanawẹrị egberigbaa fịrị tịẹmọgha.

Ómịnị waị agọnọ a mú kpọ wó tuuduo-otubo mọkpọ egberigbaa fịrị wẹnị bọlọụ a mú mụ yọ duonị, ómịnị gbaa á pịrịmị: ‘Ebiegberi gbaa mú kiriogbosẹ laa. Ọkpọnanaowei egberi mị akị kịmịotu tolumọdá á kọn benibilemọ.’