Goomịnị-otu Biimịnị Biibịbịbo

Jesus Nanaowei Buburu Fịyaị Fị Uge Mịẹpaamọ ifiemị, Jesus fịrịmọ egberigbaa yọ amúwẹrị 70 tuuduo-otubo te yọ ka timi ma o? Ámịnị ụ gbeinmọ koromọdẹ a o?

Omịnị bịsẹ bara iroro agbẹịgha. Mị 70 tuuduo-otubo Jesus Nanaowei Buburu Fịyaị fị uge mịẹpaamọ ifie bọọ fa duonị, ámịnị Jesus gbeinmọ koromọdẹ, anighakpọ Jesus á tarịgha bara paagha. Bịsẹ tịekiri bị, Jesus wó fịrịmọpaa-otubo mọ kị timi dọụmị.

Ómịnị 12 fịrịmọpaa-otubo mọ 70 tuuduo-otubo mọ tarị wẹrịemi. Anịa Jesus wó biin tuuduo-otubo bolou kị duo oị-maamụ feni oweiama sẹlẹ wẹrị kọn fịrịmọpaa-otu mịẹmị. (Luke 6:​12-16) Zua ifie bụọdẹmị, JesJesus Galilee a timi ifie kị “ọ́mịnị oi-maamụ fenibo tịịnmị” bá “á fịrịmọ Ọkpọnanaowei Daabụọ egberigbaa, bá dọọn-ama kpọ zụọmị.” (Luke 9:​1-6) Zụa ifie bụọdẹmị, Jesus “zịnị 70 otuama sẹlẹwẹrị maá-kịmị maa-kịmị dịẹwẹrị á fịrịmọ paamọmị.” (Luke 9:51; 10:1) Ifie bụọmịnịmị, Jesus biin yọama kọọ mú egberigbaa timi biin tuuduo-otuama nanamị.

Jesus tuuduo-otu a paadẹ Jew-otubo, mokpọ asababẹịn-uge tei timimị, kaanghaba ánị warịbolou-otubo kpọ á sụọmọ teitimimị. (Ex. 12:​17-20) Wó fịịmụ ifie mọ naịndẹ mị, Jesus mọ wó fịrịmọpaa-otubo mọ Jerusalem amúmị. Bịsẹ bara kị paa kpọ, Jesus Judea, Galilee, bá Perea duo wó tuuduo-otubosẹ tịịn bowẹrị opu asababẹịn-uge teimọ bara mịẹgha. Gaan baramị, Jesus wó fịrịmọpaa-otubo mọ kị bị uge teimụ bara mịẹmị. Ómịnị gbaa á pịrịmị: “Ịmịnị naá ụyafịgha ifiemị, ịmịnị opu bara ka kị ámọ mọ́ asababẹịn-uge tei dịsẹ-emi.”—Luke 22:15.

Bịsẹ bara mịẹ yọbị ebi tuu k’emi. Jesus alaghatimi fịị mịnị. Ómịnị kị “Ọkpọnanaowei anịnabị, akpọ bọọ emi sẹịbosẹ kọnsiin owei bị.” (John 1:29) Ámịnị Jerusalem ka ịkịankụn Ọkpọnanaowei pịrịtimi biin kụraịama baịdẹ. Jehovah Egypt duo Israel-otubo zụọbụọmọ barabị ukiemomụ yọ kị duonị, asababẹịn-uge teimịnị. Anịa Jesus fịmị dụbadẹịn zụọbụọmọye mịẹpaamọdẹ. Ómịnị sẹị mọ fịị mọ duo kịmị awọụbosẹ zụọbụọmọ mịnị. (1Cor. 5:​7, 8) Jesus mịẹ yebị fomuun akị oi-maa tuuduo-otubo pịrịwẹrị ámịnị kị itu sibemụ otuama a paa mị. (Eph. 2:​20-22) Anịa, bịsẹ yaliyali Jerusalem opu amabị, “oi-maamụ feni okuta-ama” nana wẹrịemi, bá “anịna tọbọụ bị oi-maámụ feni fịrịmọpaa-otubo ẹrẹbo” kị gẹẹ akị okutabo atụa wẹrịemi. (Rev. 21:​10-14) Gbẹsị bị, Jehovah kikoromọ yebo mịẹ beinmọmụ yọmị peibolou nana fịrịmọpaa-otubo kpọ wẹnịfịrị nana wẹrịemi. Anịduonị Jesus ámọ mó wó tuukunumọ asababẹịn-uge tei bá Nanaowei Buburu Fịyaị fịmụ yọmị dịsẹ kụrọmọemi.

Jesus fịrịmọpaa 70-otubo mọ bá kọọ tuuduo-otubo mọ Jesus mọ bịsẹ buburu fịyaị fị uge bọọ fatimi mị. Mọabịkpọ, peibolou nana tuuduo-otubosẹ, Nanaowei Buburu Fịyaị fị uge duo arere nanamị. Bịsẹ ifie bụọdẹ kị sẹlẹ akị agono amúmụ kịmịbosẹ kpọ, Jesus bịsẹ dein bọọ mịẹ daabụọ avụọ bọọ sụọ mịnị.—Luke 22:​29, 30.