Jesus Fị Kunumọ Buboru Fịyaịmị

Jew-otubo kụraịbosẹ Asababẹịn Oge teitimi mị. Ámịnị Nisan agọnọwei bọọ 14 karamọ erein ka bịsẹ oge teitimi mị. Bịsẹ oge mị, Jehovah Egypt bọọ omoni-bolou duo á zụọtẹịmọwẹrị á kọn Kikoromọwẹrị Ogbo bọọ bo bara ka kị ánị ukiemọtimi mị. Kụraị 33 C.E. mị, Jesus mọ fịrịmọpaa-otubo mọ Jerusalem bọọ kẹnị agọnọwarị kọọ Asababẹịn oge teimị. Ámịnị fịyaị fịtimi ifiemị, Jesus gbaamị: ‘An’a kẹnị ụbọ ị yerị-paamọmịnị.’ Jesus gbaa yemị, fịrịmọpaa-otubo mịẹ angọbọụmị, anịduonị, ámịnị ụ biimị: ‘Te ụbọ a?’ Jesus gbaamị: ‘Breadị mị Ị mọ kọn pịrịmịnị ụbọmị.’ Ómịnị bịsẹbara gbaasindẹ ifiemị, ómịnị breadị kọn Judas Iscariot pịrịmị. Judas kirimọkirimọ seriitịẹwẹrị warịbolou duo wẹnị paamị.

Jesus tẹẹbịbị mịẹ bá breadịbo yaịnmọ akị kọọ fịrịmọpaa-otubo pịrịmị. Ómịnị gbaamị: ‘Mị breadị fị. Breadị mị ine angọ anị ịmịnị akị á pịrịmụ ye ka tịbịtịẹmọ wẹrịemi.’ Ómịnị waị tẹẹbịbị mịẹsindẹ ifiemị, ómịnị wuru kpọ akị wó fịrịmọpaa-otubo pịrịwẹrị gbaamị: ‘Mị wuru bou. Wuru mị, ine asịịn anị ịmịnị akị á pịrịwẹrị ánị seibo bụọmọ mụ ye ka tịbịtịẹmọ wẹrịemi. Ámịnị ị mọ mọ́ gbelei agọnọ bọọ pẹrẹ-ama a sụọ mịnị. Kụraịbosẹ beiye mịẹ ine ukie.’ Jesus tuuduo-otubo bei tịẹkiri kpọ, kụraịbosẹ, bịsẹ buboru bọọ gbeleiwẹrị Jesus gbaa bara mịẹmịnị. Bei tịẹkiri bị, Nanaowei Buboru Fịyaị ka kị bịsẹ ye tịịnmịnị.

Ámịnị fịyaị fịsindẹ ifiemị, ámịnị ánị ikpudu bọọ te ụbọ kị dụbadẹịn emi bara dụnịịmị. Anịa Jesus gbaa á pịrịmị: ‘Angọ akị yelaagha anịghakpọ zaụdẹịn-emi bara diimọ wẹrịemi ụbọ kị, ánị ikpudu bọọ dụbadẹịn-emi.

‘Ámịnị ine ikie-otuama. Ị Daụ ị fịrịmọ yebosẹ ịmịnị mọ gbaa á pịrịdẹ. Alaaghatimi, ịmịnị waị agọnọ a ị Daụ dọụ múmịnị. Ámịnị kiriogbo bọọ timimịnị. Ámịnị tarị mịẹ zọzọ dịamịnịaba, kịmịama ámịnị ine tuuduo-otuama bara nimi mịnị. Ịmịnị á tarịwẹrịemi baramị, ámịnị kpọ zọzọ tarị.’

Kunumọ bị, Jesus tẹẹbịbị mịẹmị, Jehovah wó tuuduo-otubosẹ kekere bara ómịnị mọ tẹẹmị. Ámịnị zọzọ naawẹrị dọọ kẹnịwẹnịmọ bara kpọ ómịnị mọ tẹẹmị. Jehovah ẹrẹ mịẹ yalịyalị bara kpọ ómịnị mọ tẹẹmị. Bịsẹbara mịẹsindẹ ifiemị, Jesus mọ fịrịmọpaa-otubo mọ duma tuun Jehovah tokoniwẹrị warị-bolou duo wẹnị paamị. Jesus kẹrịkaịmụ ifiebị bo naịnmị.