Jesus Biin Tamamayeama Mịẹmị

Ọkpọnanaowei Daabụọ ebiegberi gbaamụ kị duonị Jesus mị kiriogbo bọọ bomị. Jesus Pẹrẹ a sụọ daba mịẹmụ yebo mịẹgaan mọ yọ duonị, Jehovah yalịyalị tẹmẹ akị ụ pịrịwẹrị tamamayeama mịẹmị. Jesus dọọn a paabosẹ kị zụọmịnị. Wó múdẹ yọsẹ dọọnmịnị otuama ụ dọụbo angọ-zụọtimi mị. Bo ụ laa otubosẹ ómịnị mọ zụọ kụrọmọmị. Tọrụbaantimi otubo kpọ yọ ẹrịmị, beri-yọnaaghatimi otubo kpọ yọ naamị, bara mọ bụọmọ fịịdẹ otubo kpọ waị wẹnịmị, seitẹmẹ pịrị ụyamọtimi otubo kpọ peree nanamị. Dọọntimi otubo wó bịdẹ bọọ kiri-anga kị gbele kpọ ánị angọbo kụrọtimi mị. Jesus múdẹ yọsẹ kịmịotu wó a tuuduo mútimi mị. Ómịnị bẹtịbị kị timi dọụtimi kpọ, kịmịotu ụ dọụbo daba ómịnị ifie mịẹpaamọ á pịrịtimi mị. Jesus kẹnị ụbọ kpọ dugogha.

Kẹnị ifie, zụa kịmịama bara mọ bụọ mọ fịịdẹ owei kọn Jesus inyenrintimi warị bọọ múmị. Anịa kịmịotu warịma biintimi duonị, ámịnị sụọ mú Jesus laa a paagha. Anịduonị ámịnị warị-agọnọ bọọ kẹnị yọ mịẹ finiwẹrị agọnọ duo bịsẹ owei koromọ Jesus yarịmị. Jesus gbaa bịsẹ owei pịrịmị: ‘Seriitịẹdá wẹnị.’ Bịsẹ, bara mọ bụọmọ fịịdẹ owei mị seriitịẹwẹrị wẹnị ifiemị, kịmịbo angọbọụmị.

Kẹnị ifie ba, Jesus kẹnị ama duosụọ ifie mị, oia pinaki-dọọn (leprosy) kẹrịwẹrị owei-ama, alaayọ a tịẹtimi gịamị: ‘Jesus, wo barịị!’ Bịsẹ ifie mị pinaki-dọọn kẹrịwẹrị ụbọ bụọmọ zini kịmịama mọ naịngha timi mị. Jehovah oloko mị pinaki-dọọn kẹrịwẹrị kịmị angọ zụọ kụrọmọ daba, karịwarị bọọ mú bara kị gbaa wẹrịmị. Anịduonị Jesus gbaa oia kịmịbo pịrịwẹrị karịwarị bọọ múmị. Ámịnị karịwarị bọọ múmịnị bị, ánị angọbo paakị kụrọmị. Pinaki-dọọn kẹrịtimi oia kịmịbo, kẹnị ụbọ, angọ kụrọdẹ bara nimi ifiemị, ómịnị waịbo Jesus kulemị, bá tokoni kọn Ọkpọnanaowei kpọ pịrịmị. Oia kịmịbosẹ, bịsẹ owei bẹtịbị kị waịbo Jesus kulemị.

Dọọntimi oi-maa kụraị-fịnị (12 years) baịdẹ ere, anị angọ zụọ kụrọmọ dọụmị. Anịduonị, amịnị kịmịotu bẹnịị-emi yọ a lụwẹị tọụn duobo Jesus tụawẹrị angọnọ bịdẹ bọọ kiri-anga gbelemị. Tịẹkiri tịẹkiri ka bịsẹ ere angọ mị ebimị. Bịsẹ bara paa ifiemị, Jesus kịmịbo biimị: “Te ụbọ kị ị gbele ma o?” Amịnị malafa kụrọmọmị, mọabịkpọ amịnị bo Jesus laawẹrị anị mịẹye gbaa ụ pịrịmị. Jesus gbaa a pịrịmị: ‘Embaụ, dọọ mú.’ Jesus gbaa yemị erema kụrọmọmị

Jairus tịịnmịnị owei Jesus tẹẹmị: ‘Sisei ine warị bọọ bo! Ine kala eretọbọụma ebibara kị dọọnmịnị.’ Anịa Jesus laa mú Jairus warị laaghatimi tọbọụma fịịmị. Jesus mú warị laa ifiemị, biin kịmịama Jairus warị kịmịbo mọ you yọ a bo emi bara ómịnị mọ ẹrịmị. Jesus gbaa á pịrịmị: ‘You kụmọ amịnị bụnụ kị bụnụ-emi.’ Jesus tọbọụ bara kẹrịwẹrị gbaamị: “Tọbọụ seritịẹ!” Amịnị kirimọkirimọ tịtẹmị. Fịyaị kọn a pịrị fị bara Jesus mọ gbaa a daụ mọ yin mọ pịrịmị. Tọbọụ daụ mọ yin mọ pọwẹị kụrọmọ bara ị́ mọ tọngha?