Jesus Tẹẹmụ Bara Akị Wó Tuuduo-otubo Tolumọmị

Pharisee-otubo agọnọ-beniyaị kị mịẹtimi mị. Ámịnị ebi kị mịẹ kpọ, ámịnị kịmịotu á seri dọụmịnị kị duonị, bịsẹ ebi mịẹmịnị. Ámịnị kịmịotu biin emi yọ ama ka tẹẹtimi mị, anịkị kịmịotu ánị ẹrịmụ duonị. Pharisee-otubo danghaị emi tẹẹbịbịama akị ánị tịbịbiri bọọ tụawẹrị mú karịwarịbo mọ bá kịmịotu biin emi yọ ama laadaba, ámịnị bịsẹ tẹẹbịbịbo mịẹtimimị. Ámịnị kịmịotu pịrị ẹrị dọụtimi kị duonị bịsẹbara mịẹtimimị. Anịduonị, Jesus gbaa kịmịbo pịrị yebị ánị angọbọụmọmị. Jesus gbaa á pịrịmị: ‘Pharisee-otubo tẹẹmịnị bara tẹẹ kụmọ. Ámịnị danghaị tẹẹbịbị-ama mịẹmịnị duonị, Ọkpọnanaowei ánị tẹẹbịbị parụmịnị bara kị tọn wẹrịemi, anịa bịsẹ bara fa. Tẹẹbịbị mịẹmịnịsẹ ị́ mọ Jehovah mọ kị ẹrẹteimịnị, zịnị kịmị sụọgha. Kẹnịye akị barịị barịị gbaa kụmọ. Ị́mịnị adụdụ duo tẹẹ ụ yarị kị Jehovah mọ dọụwẹrịemi.

‘Bei iné tẹẹ agbẹị-emi barabị: “Wo Daụ nị agọnọ emi owei, pebidá iné ẹrẹ mịẹ yalịyalị. Iné Daabụọ kọnbo. Agọnọ mị iné dọụbara paadẹ baramị, pebidá kiriogbo kpọ iné dọụbara paa.” ’ Erein bọọ fịmụ fịyaị kpọ akị tụa tẹẹ, Jehovah ánị seibo akị á bụọmọ, bá anị ụndụ gbele-emi zịnị yeama kpọ akị tụa tẹẹ a paaemi bara kpọ Jesus mọ gbaa á pịrịmị.

Jesus gbaa á pịrịmị: ‘Ifiebosẹ tẹẹ. Pẹlẹgha bara iné Daụ, Jehovah, bara bọọ ebi yeama bii. Daụ mọ yin mọ otubosẹ ebiyeama ka kị ánị awọụbo pịrị dịsẹmịnị. Iné tọbọụ iné bara breadi bii daba, ị́mịnị okuta akị ụ pịrị mịnị a? Iné tọbọụ indi bii daba, ị́mịnị dawaịn anịghakpọ seiye akị ụ pịrịmịnị a?’

Jesus bịsẹ bara gbaa sindẹ ifiemị, ómịnị wó gbaa yema tuugbaa á pịrịmị. Ụ gbaamị: ‘Ámịnị kpọ ebi dịẹpịrịyeama akị ánị awọụ-ama pịrịmịnịaba, ánị Daụ, Jehovah, kị yalịyalị tẹmẹ akị á pịrịgha fa o? Ị́mịnị wó bara a biimụ yọkị Jehovah mọ dọụwẹrịemi.’ Ị́mịnị kpọ Jesus gbaa bara mịẹmịnị a? Ị́mịnị te yeama ka kị iné tẹẹbịbị bọọ tụa tẹẹmịnị a o?