TOLUMỌYE 30
Iné Tarị Wẹrị Fịịdẹ-otubo Waị Inyenrin Mịnị!
Fịị bị kịmị dọọn fa kị emi má kịmị mịẹ bolouịmbẹlẹgha. Anị kị duonị Bible fịị akị wó egirẹn-owei tịịn wẹrị emi. (1 Corinthians 15:26) Tolumọyọ 27 bị, Jehovah fịị seri siin mịnị bara ị́mịnị mọ tolumọdẹ. Anịa bei bọlọụ mị, teeki fịịdẹ-otubo paamọ mịnị a o? Bei tolumọyọ bị, zịnị tamamaa ye nị Jehovah mịẹmụ ye ị́mịnị mọ tolumọ mịnị—billion dẹịn emi kịmịama Jehovah mọ akị fịịyọ duo tịịn serimọ bo wẹrị bẹseri bẹseri ụndụ nana mịnị. Bei yemị kọkọ paa mịnị? Fịịdẹ-otubo serii bo daba agọnọ anịghakpọ kiriogbo ka timi inyenrin mịnị a o?
1. Teeki Jehovah mọ mịẹ wó tari wẹrị fịịdẹ-otumọ pịrị dọụ mịnị a o?
Fịịdẹ-otubo tịịn serimọ bo waị inyenrin mụ yọbị, Jehovah dịsẹ kụrọmọ fa k’emi. Job peibolou akị Jehovah a nana mị. Omịnị fịị daba, Jehovah wo ukie mụ bara omịnị mọ bibirẹn wẹrị emi duonị, omịnị gbaa Ọkpọnanaowei pịrị mị: “Ị́mịnị ị tịịn daba, ịmịnị [dụwẹị ogugu duo] ị́ paraị mịnị.”—Job 14:13-15 goo.
2. Omịnị tebara ka kị Fịịde-otumọ waị serii bo inyenrin mịnị bara nịmị ma o?
Jesus mị kiriogbo bọọ timi ifie bị, Ọkpọnanaowei kụrọ akị ụ pịrị wẹrị fịịdẹ-otu tịịn serimọ mị. Oi maa kụraị-fịnị baịdẹ ẹyọrọ tọbọụ fịị mị. Má yei fịịdẹ ere kpekẹnị oweitọbọụ kpọ fịị mị, Jesus asẹẹ tịịn seri mị. (Mark 5:41, 42; Luke 7:12-15) Bịsẹ ifie bụọdẹ bị, Lazarus, Jesus ikieowei fịị mị. Lazarus fịị wẹrị a pịrị dibi wẹrị nia dein baịdẹ kpọ, Jesus fịịyọ duo ụ tịịn serimọ bo waị inyenrin mị. Jesus tẹẹbịbị mịẹ akị Ọkpọnanaowei pịrị siin dẹ bị, omịnị Lazarus dibi yọ dii wẹrị ụ tịịn mị: “Lazarus, paa bo!” bịsẹ tịẹkiri bị, “fịịdẹ kịmị bị serii paabo mị”—Lazarus fịịyọ duo serii dẹ! (John 11:43, 44) Wẹrị Lazarus bịnaotubo mọ ikieotubo mọ bolouịmbẹlẹ bara iroro dii!
3. Iné tarị wẹrị fịịdẹ-otumọ te ukiemọye kị nana wẹrị emi a o?
Bible gbaa wẹrị emi: “Fịịdẹ-otubo waị tịịn-serii bo mịnị.” (Acts 24:15) Jesus fịịyọ duo tịịn serimọ kịmịmọ, fịị wẹrị ifie mị, amịnị agọnọ ghọ mụgha. (John 3:13) Anị duonị Jesus fịịyọ duo a tịịn serimọ bo ifie mị, amịnị pọwẹị mị. Bịsẹ kpekẹnị bara bị, Jesus alaghatimi billion dẹịn emi kịmịama akị fịịyọ duo tịịn seri wẹrị kiriogbo bọọ paradise a inyenrintimi bẹseri bẹseri laa mịnị. Jesus gbaa amọ “dụwẹị ogugu bọọ emi otumọsẹ seri bo mịnị”—fịị wẹrị kịmị bá ukiegha kịmịmọ kpọ, Ọkpọnanaowei anị ukie wẹrị a tịịn serimọ bo mịnị.—John 5:28, 29.
EBIBARA TUUDỌỤ
Jesus fịịdẹ-otu tịịn serimụ kụrọ nana wẹrị emi, má a tịịn serimọ bo mụ yọ kpọ dịsẹ nana wẹrị emi bara bị, akị Bible duo tolumọ nimi. Fịịyọ duo serii bo yemị ị́ kụrọmọ, má ukiemọye akị ị́ pịrị mịnị bara tolumọ.
4. Jesus fịịdẹ-otu tịịn serimụ kụrọ nana wẹrị emi bara mịẹdịa mị
Mọkpọ Jesus mịẹ akị wo ikieowei Lazarus pịrị yebi diitụa. John 11:14, 38-44 goo dá, bei biibịbịmọ kẹrị ẹrẹtei:
Omịnị tebara kị mịẹtimi Lazarus kọkọ fịị bara nimi ma o?—Goo yọ 39 dii.
Lazarus fịịdẹ bị omịnị agọnọ kọọ mú wẹrị a, Jesus waị ụ tịịn bei kiriogbo bọọ bo mụ timi ma o?
5. Biin kịmịama fịịyọ duo serii bo mịnị!
Psalm 37:29 goo dá, bei biibịbị kẹrị ẹrẹtei:
Billion dẹịn emi fịịdẹ-otubo seribo daba, tẹyọ ka timi inyenrin mịnị a o?
Jesus, Jehovah karị wẹrị fịịdẹ-otu bẹtịbị tịịn serigha fa, biin kịmịama nị Ọkpọnanaowei nimigha duonị ụ karịghatimi fịị otu kpọ tịịn seri mịnị. Acts 24:15 goo dá, bei biibịbị kẹrị ẹrẹtei:
Tẹ ụbọ kị waị fịịyọ duo seribo kị, ị́ mọ dọụ emi a o?
Iroro dii: Daụbọ wo tọbọụ tịịn sịyaịn bụnụyọ duo seri mụ yọmị kụrọgha. Bịsẹ kpekẹnị bara bị, fịịdẹ-otu tịịn seri mụ yọmị kọrụ Jesus pịrịgha
6. Fịịyọ duo kịmị-otu tịịn serimụ egberi mị ị́ kụrọmọ má ukiemọye akị ị́ pịrị a paa emi
Bịịn kịmịama Jairus tọbọụma egberi bị, akị Bible duo goo wẹrị kụrọmọye nana mịnị. Bei paa yemị akị Luke 8:40-42, 49-56 bọọ goo.
Jesus, Jairus tọbọụma akị fịịyọ duo tịịn seri dọụtimi ifie mị, gbaa tọbọụma daụ pịrị mị: “malafa kụmọ, peibolou kị nana.” (Goo yọ 50 dii.) Fịịyọ duo serii bo ukiemọye bị, tebara ka kị baratụa ị́ pịrị a paa emi a . . .
iné tarị wẹrị emi ụbọ fịị daba?
iné ụndụ bị akpotu a sụọ daba?
VIDIO farị dá, bei biibịbị kẹrị ẹrẹtei.
Fịịyọ duo seribo ukiemọye bị tebara ka kị Phelicity daụ mọ yin mọ kụrọmọ ma o?
ZỤA KỊMỊAMA GBAA MỊNỊ: “Fịịde-otu fịịyọ duo seriibo mịnị egberi mị, peigha sei emi.”
Ị́mịnị tebara kị tọn ma o?
Fịịdẹ-otu waị seriibo mịnị gbelemọ yọ mị, te Bible yọ kị ị́ mọ goo ụbọ pịrị a paa emi a o?
KỊLỌỌBARA
Bible gbaa wẹrị emi bara mị, fịịyọ duo seriibo mịnị kịmịbo billion dẹịn emi. Amịnị fịịyọ duo seriibo Jehovah mọ dọụ emi. Anị duonị Jehovah fịịdẹ-otubo tịịn seri mụ kụrọ akị Jesus pịrịdẹ.
Waị diitụa
Jehovah mọ Jesus mọ tebara ka kị fịịdẹ-otu waị fịịyọ duo serii bo mụ yọ dịịmọ wẹrị emi a o?
Billion dẹịn emi kịmịama fịịyọ duo serii bo daba, teyọ ka timi inyenrin mịnị a o—agọnọ anịghakpọ kiriogbo a? Tetuu a?
Tetuu kị duonị, iné tarị wẹrị fịịdẹ-otubo waị seriibo mịnị bara ị́ mọ pei ma o?
DIITỤA
Iné tarị wẹrị emi kịmị fịị daba, baratụa ị́ pịrị mụ ye tolumọ nimi.
Bible tolumoyemọ laa baratụa kịmị fịịdẹ ụbọ pịrị a paa emi a o?
Tarị wẹrị emi kịmị fịị daba teeki awọụbo kụrọmọ mịnị a o?
Kịmịama tịịn serimọ agọnọ ghọ mú mịnị a? Te paa kịmịama kị waị fịịyọ duo serii bogha fa o?