TOLUMỌYE 17
Jesus Te Paa Kịmị A O?
Omịnị Jesus mịẹ yebo mọ má wo gbaa egberibo mọ tolumọ nimi daba, laa ụ nimi ebimọ, wo inyenrinbụọbo nimi má wo Daụ Jehovah mọ naịn dẹịn mịnị. Bịsẹ inyenrinbụọmọ te yeama a o? Omịnị tebara ka kị wó ụndụ bọọ Jesus daá mịẹ mịnị a o?
1. Jesus tebara ka kị wo Daụ mọ lei emi a o?
Jesus biin kụraị-ama ka kị, agọnọ bọọ wo Daụ inyenrin mịnị bara tolumọ dẹ. Anị duonị, omịnị yebosẹ akị wo Daụ mịẹ mịnị bara kị mịẹ emi. (John 5:19 goo.) Jesus, gbẹsị wo Daụ inyenrin bara sẹ kị dii inyenrin mị, anị duonị omịnị laa gbaa mị: “Ine ẹrị dẹ kịmịsẹ ị Daụ kpọ ẹrị dẹ.” (John 14:9) Ị́mịnị Jesus inyenrin bara tolumọ nimi daba, ị́mịnị bo wo daụ Jehovah nimi dẹịn mịnị. Gbaa maba, Jesus dieneni akị kịmịotu ghọ nana yọmị Jehovah akị ị́ diimọ wẹrị emi bara kị gbaa ị́ pịrị mịnị.
2. Jesus tebara ka kị Jehovah tarị wẹrị emi bara mịẹdịa ma o?
Jesus gbaa mị: “Akpọ-otubo ịmịnị ị Daụ tarị wẹrị emi bara nimi mụ yọmị, ịmịnị gbẹsị wo dọụ bara kị mịẹ mịnị.” (John 14:31) Jesus ọkpọ bọọ timi ifie mị, kụrọ inyenrin bolou ghọ sụọ kpọ, Daụ tarị wẹrị emi duonị, wo dọụ yọ kị mịẹtim’mị. Jesus wo Daụ emi bara gbaa paamọ má kịmịotu barị wẹrị bo wo Daụ nimi dịsẹ mị.—John 14:23.
3. Jesus tebara ka kị kịmịotu tarị wẹrị emi bara mịẹdịa ma o?
Bible gbaa bara bị Jesus “kịmị-awọụ dịsẹ kụrọmọ emi.” (Proverbs 8:31, footnote) Omịnị kịmịotu tarị emi duonị, omịnị a kụrọmọ má adụdụsẹ akị baratụa a pịrị mị. Jesus wẹnị tamamaa fịrịbo omịni kụrọ má dieneni kpọ nana wẹrị emi bara kị mịẹdịa mị. (Mark 1:40-42) Omịnị ebi mịẹ kịmịsẹ pịrị má kẹnị kịmị kpọ dịseimọgha. Wó egberibo pei otubosẹ kụrọmọye mọ ukiemọye mọ nana mị. Jesus kịmịsẹ tarị emi duonị omịnị a pịrị ụyamọ má fịị kịmịsẹ pịrị mị. Anịa omịnị wo tolumọyebo dii wẹnị otubo kị tarị kụrọmọ dẹịn mị.—John 15:13, 14 goo.
EBIBARA TUUDỌỤ
Mọkpọ Jesus emi bara tolumọ bọlọụ a mú. Omịnị kịmịotu tarị má ebi mịẹ bara diimịẹ.
4. Jesus wo Daụ tarị mị
Jesus kị omịnị Ọkpọnanaowei tarị mụ bara mịẹ wó dịa mị. Luke 6:12; John 15:10 má John 17:26 goo. Bible yọmọ kẹnị kẹnị goo dá, biibịbị paraị:
Jesus mịẹ bara bị, wó kpọ tebara ka kị Jehovah tarị wẹrị emi bara mịẹdịa mịnị a o?
Jesus wo Daụ tarị emi duonị, ifiemọsẹ tẹẹbịbị duo Daụ mọ ẹrẹtei mị
5. Jesus ụyafị mịnị otubo kekere mị
Jesus baratụa kịmịotu pịrị yọ ka kị bọlọụ daa mị. Omịnị ọngọ dẹịn emi kpọ wo ifie mọ má wo kụrọmọ akị baratụa kịmịotu pịrị mị. Mark 6:30-44 goo, má bei biibịbịmọ kẹrị ẹrẹtei:
Bei goo yọmị, Jesus te ụwọụama ka kị baratụa kịmịotu pịrị ma o?—Gooyọ 31, 34, 41, má 42 dii.
Tetuu kị duonị Jesus baratụa kịmị-otu pịrị ma o? —Gooyọ 34 dii.
Jesus, Jehovah diimịẹ mịnị yọmị, te ka kị Jehovah gbelemọ yọ bọọ wó tolumọ ma o?
Omịnị tebara ka kị Jesus baratụa kịmịotu pịrị bara diimịẹ mịnị a o?
6. Jesus ebi mịẹ kịmị
Jesus biin yeama kị nanagha kpọ omịnị bara finimọ ye dịẹ mị. Wó gbaa bara mị, wó kpọ ye dịẹ inyenrinbụọ nana. Acts 20:35 goo dá, bei biibịbị kẹrị ẹrẹtei:
Jesus gbaa bara dii daba, teeki pọwẹị akị wó pịrị mịnị a o?
VIDIO farị dá, bei biibịbị kẹrị ẹrẹteị.
Omịnị biin yeama kị nanagha kpọ, omịnị te ụwọụama ka kị ebi mịẹ a paa emi a o?
Ị́ kpọ nimi ma?
Bible gbaa bara bị, omịnị Jesus ẹrẹ kị duo tẹẹbịbị mịẹ Jehovah yarị. (John 16:23, 24 goo.) Omịnị bịsẹ bara tẹẹ daba, Jesus wo mịẹ Jehovah mọ naịn bara bị, wó dịsẹ emi bara kị mịẹdịa mịnị.
ZỤA KỊMỊAMA GBAA MỊNỊ: “Ọkpọnanaowei wó fị mịnị ụyamọ akị ye diimọgha.”
Jesus wo Daụ kị dii inyenrin mịnị aba, omịnị tebara ka kị Jehovah wó kekere mịnị bara inyenrin paamọ ma o?
KỊLỌỌBARA
Jesus Jehovah tarị emi, bá kịmịotu kpọ tarị emi. Jesus, Jehovah bara k’emi duonị, omịnị ụ nimi daba, omịnị Jehovah kpọ nimi dẹịn mịnị.
Waị diitụa
Jesus mịẹ bara bị, wó kpọ tebara ka kị Jehovah tarị wẹrị emi bara mịẹdịa mịnị a o?
Jesus mịẹ bara bị, wó kpọ tebara ka kị kịmịotu tarị wẹrị emi bara mịẹdịa mịnị a o?
Jesus inyenrinbụọ bosẹ teeki ị́ dịsẹ dẹịn emi a o?
DIITỤA
Jesus inyenrinbụọbo bẹẹ diitụa.
“To Imitate Jesus, Be . . . ” (Jesus—The Way, the Truth, the Life, page 317)
Jesus ẹrẹ akị tẹẹmọ agbẹị emi tuu dii.
“Why Pray in Jesus’ Name?” (The Watchtower, February 1, 2008)
Jesus angọ mị emi bara bị Bible mọ gbaa ma o?
Omịnị Jesus ere otumọ inyenrin bara duo teeki tolumọ akị ma o?
“Respect and Dignity Under God’s Care” (The Watchtower, September 1, 2012)