Gesii Bara Akị Iné Mịẹ Mịnị Yesẹ Mịẹ

Kịmịsẹ gesiiye mịẹ mịnị kịmị ka kị ikie mịẹ dọụ emi. Jehovah ikieụbọ a paa dọụ mịnị kịmị kpọ gesiiye kị mịẹ agbẹị emi. Anịa gesiiye mịẹgha kịmịama kị akpọ bọọ biin dẹịn emi duonị, gesiiye mịẹmụ yọmị kụrọ emi. Gesiiye mịẹ mịnị yọmị te arereama k’emi a o?

1. Tetuu kị duonị omịnị gesiiye mịẹ agbẹị emi a o?

Wó mịẹ mịnị yebo mọ, má iroro mịnị yebosẹ Jehovah mọ ẹrị siin wẹrị emi. Anị duonị, wó gesii bara ka kị kịmịotumọ inyenrin daba, omịnị Jehovah tarị emi, bá ụ diidụbamọ wẹrị emi bara kị mịẹdịa mịnị. (Hebrews 4:13) Omịnị gesii bara ka kị ye mịẹ mịnị ifie sẹ, Jehovah wó ẹrịmịnị bá bolouịmbẹlẹ mịnị. Bible gbaa mị: “Jehovah, aritụa mịnị kịmị golu emi, anịa omịnị gesiiye mịẹ mịnị kịmịbo mọ kị naịn dẹịn emi.”—Proverbs 3:32.

2. Wó mịẹ mịnị yesẹ, omịnị tebara ka kị gesii inyenrinbụọ mịẹdịa a paa emi a o?

Jehovah dọụ emi bara bị omịnị “gesii egberi kị gbaa zụzụ pịrị.” (Zechariah 8:16, 17) Anị duonị omịnị gesii egberi kị gbaa wó warịbolou-otu, kẹnịyọ ghọ fịrịwẹnị mịnị otu, kẹnị peibolou nanawẹrị emi otu bá government otu kpọ pịrị. Omịnị a lẹịmọgha fa. Gesiiye mịẹ mịnị kịmị mị, zịnịotu ye furugha má kịmị kpọ ninigha fa. (Proverbs 24:28 mọ Ephesians 4:28 mọ goo.) Omịnị government tịbịsa kpọ gbẹẹ mịnị. (Romans 13:5-7) Ifiemọsẹ omịnị “gesii bara ka kị yemọsẹ mịẹ mịnị.”—Hebrews 13:18.

3. Gesii bara akị ye mịẹ mịnị yọmị te arereama k’emi a o?

Ifiemọsẹ omịnị gesiiye kị mịẹ mịnịsẹ, kịmịama eti akị wó a tụa mịnị. Má itu bolou kpọ, kịmịsẹ bá malafagha fa. Itu bị bo tarị nana emi warịbolou ka paa mịnị. Wó ịkịọụ kpọ bo peree kị timi mịnị. Gesiiye wó mọ mịẹ mịnị ifiesẹ, omịnị “wó zụọbụọmọ Ọkpọnanaowei tolumọyemọ kị diidụbamọ mịnị” bá baratụa zịnịotu kpọ pịrị wẹrị bo itu bọọ sụọ mịnị.—Titus 2:10.

EBIBARA TUUDỌỤ

4. Gesii inyenrinbụọ mị Jehovah mịẹ pọwẹị mịnị

Psalm 44:21 má Malachi 3:16 goo dá, bei biibịbịmọ kẹrị ẹrẹtei:

• Tetuu kị duonị omịnị laa gesii sọwẹịgha fa o?

• Gesiiye gbaa mụ yọmị kụrọ emi, anịa omịnị gesiiye kị gbaa mịnị ifiesẹ, Jehovah mịẹ tebara kị paa mịnị a o?

5. Ifiemọsẹ gesiiye kị mịẹ

VIDIO: Teeki Kịmị Mịẹ Pọwẹị Mịnị A O?—Peree Sei Mọ Ebi Mọ Nimi Ịkịọụ (2:32)

Hebrews 13:18 goo dá, gesiiye mịẹmụ bara kẹrị ẹrẹtei . . .

• warịbolou-otu mọ.

• fịrị yọ anịghakpọ sukulu yọ.

• zịnị yọama kpọ.

6. Gesiye mịẹ mịnị yọmị yelaa emi

Gesiiye mịẹ mịnị yọmị biin bụụdọọn yeama mịẹpaamọ wó pịrị a paa emi. Anịa fatuu mị gesiiye mịẹ kị ebi dẹịn emi. Psalm 34:12-16 goo dá, bei biibịbị kẹrị ẹrẹtei:

• Gesiiye mịẹ mịnị yọmị tebara ka kị baratụa ị́ pịrị a paa emi a o?

1. Gesiiye mịẹ mịnị taa mọ yei mọ otu, anị zọzọ nana yọ kị mịẹ kụrọmọ mịnị

2. Gesiibara akị fịrịwẹnị dẹsẹ, iné fịrị yọ tịbịowei eti akị iné a tụa a paa emi

3. Gesiibara inyenrin daba, government otu wó diidụbamọ mịnị

KỊLỌỌBARA

Jehovah dọụ wẹrị emi bara bị, wo ikieụbọ sẹ, gesii bara kị inyenrin má gesii egberi kị gbaa.

Waị diitụa

• Omịnị te ụwọụama ka kị gesii inyenrinbụọ mịẹdịa mịnị a o?

• Tetuu kị duonị omịnị laa gesii sọwẹịgha fa o?

• Tetuu kị duonị omịnị ifiemọsẹ gesii bara inyenrin mịnị a o?

DIITỤA

Daụ mọ yin mọ, tebara ka kị anị awọụbo tolumọ wẹrị ifiemọsẹ gesii bara inyenrin a paa emi a o?

Gesii Bara Kị Inyenrin (1:44

Ye gbaa daba, gbaa bara mịẹ mịnị yọmị te arereama k’emi a o?

Gbaa Bara Mịẹ Dá, Tarịama Nana (9:09)

Tịbịsa sịlịbo akị ebiye mịẹgha kpọ, omịnị tịbịsa gbẹẹ agbẹị emi tuu dii.

“Taxes—Must You Pay Them?” (The Watchtower, September 1, 2011)

Teeki baratụa gesiiye mịẹghatimi kịmị pịrị bo gesii kịmị a paa ma o?

“I Learned That Jehovah Is Merciful and Forgiving” (The Watchtower, May 1, 2015)