TOLUMỌYE 35
Ebi Iroro Tọn Angọ Pịrị Mụ Bara Mị
Kịmịsẹ iroro tọn angọ pịrị mịnị. Wó zụa tọn angọ pịrị mịnị iroroama ebi anịghakpọ sei wó pịrị a paa emi, má wó mọ Jehovah ikie kpọ seimọ a paa emi. Gbaamaba, omịnị kị bẹtịbị sịlị dọụ angọ pịrị mụ bara, inyenrinmụ yọ bá, yei anịghakpọ ere nana mụ bara tọn angọ pịrị mịnị. Omịnị ebi iroro tọn angọ pịrị daba, wó bolouịmbẹlẹ bá Jehovah kpọ mịẹ pọwẹịmọ mịnị.
1. Bible tebara ka kị baratụa ị́ pịrị ebi iroro tọn angọ pịrị a paa emi a o?
Iroro tọn angọ pịrị dọụ mịnị aba, Jehovah tẹẹ bá Bible kpọ diitụa. (Proverbs 2:3-6 goo.) Zụa ifieama, Jehovah oloko mị gaan k’emi. Anịaba bịsẹ olokomọ pei mụ yọ kị ebi dẹịn emi.
Anịa Bible duo boemi gaan oloko fa aba, tebara kị ị́ mọ mịẹ mịnị a o? Bịsẹ bara kị paa kpọ Jehovah “iné wẹnị mụ ụwọụ mị akị ị́ dịa mịnị.” (Isaiah 48:17) Te ụwọụ a? Bible tolumọbịbị-ama baratụa ị́ pịrị a paa emi. Bible tolumọbịbịmọ, anị Ọkpọnanaowei akị ye diimọ wẹrị emi bara gbaa wó pịrị mịnị gesii tolumọyeama. Biin ifieama omịnị Bible goo daba, Ọkpọnanaowei akị ye diimọ wẹrị emi bara bị wó mọ nimi mịnị. Omịnị Jehovah kọn ye diimọ wẹrị emi bara nimi dẹsẹ, omịnị laa Jehovah mịẹ pọwẹịmọ mịnị iroroama tọn angọ pịrị mịnị.
2. Te yeama kị ị́ mọ kẹrị iroro dẹkị iroro-tọn agbẹị emi a o?
Bible gbaa mị: “Kịlịkịlị kịmị mị ye iroro dẹkị mịẹ mịnị.” (Proverbs 14:15) Anị duonị, omịnị iroro-tọn angọ pịrị dọụ mịnị ifiesẹ, ebibara diitụa dẹkị tọnpẹlẹ. Ị́mịnị iroro tọn angọ pịrị dọụmịnị ifiesẹ, iné angọ bii: ‘Te Bible tolumọbịbị-ama kị bei egberi gbele emi a o? Ịmịnị teeki sẹlẹ dẹkị ine ịkịọụ mịẹ dọọ mịnị a o? Ine tọn angọ pịrị mịnị iroro mị, tebara ka kị zịnịotu gbele a paa emi a o? Yelaa dẹịn yemị, bei tọn-iroro mị Jehovah mịẹ pọwẹị mịnị a o?’—Deuteronomy 32:29.
Jehovah kị seiye mọ ebiye mọ gbaa wó pịrị mụ kụrọ nana wẹrị emi. Omịnị ebibara Ọkpọnanaowei olokobo mọ má tolumọbịbịbo mọ nimi bá a dii inyenrin daba, omịnị wó sei mọ ebi mọ nimi ịkịọụ kị tolumọ mịnị. Wó sei mọ ebi mọ nimi ịkịọụ kị bei seiye, mị bá ebiye bara gbaa wó pịrị mịnị. (Romans 2:14, 15) Wó sei mọ ebi mọ nimi ịkịọụ mị wó mọ tolumọ daba, baratụa wó pịrị wẹrị ebi iroro tọn angọ pịrị mịnị.
EBIBARA TUUDỌỤ
Bible tolumọbịbịbo mọ bá sei mọ ebi mọ nimi ịkịọụ baratụa wó pịrị wẹrị iroro tọn angọ pịrị mụ bara diitụa.
3. Bible gbaa bara egberi diimịẹ
Bible tolumọbịbịmọ tebara ka kị baratụa wó pịrị wẹrị iroro-tọn a paa emi a o? VIDIO farị dá, biibịbịmọ kẹrị ẹrẹtei.
Jehovah te ebi dịẹpịrịye ka kị wó pịrị wẹrị emi a o?
Jehovah tetuu kị duonị bei dịẹpịrịye bi akị wó pịrị ma o?
Ebi iroro tọn angọ pịrịmụ yọ duonị, Jehovah te ka kị wó pịrị dẹ a o?
Kẹnị Bible tolumọbịbị dii, Ephesians 5:15, 16 goo, “ebibara iné ifie kọn fịrịwẹnị” dá . . .
ifiemọsẹ Bible goo mụ bara kẹrị ẹrẹtei.
ebi yei anịghakpọ ebi ere, ebi daụ mọ yin mọ, má ebi tọbọụ a paa mụ bara kẹrị ẹrẹtei.
yetolumọyọ a mú mọ bara kẹrị ẹrẹtei.
4. Iné sei mọ ebi mọ nimi ịkịọụ tolumọ dá ebi iroro tọn angọ pịrị
Bible gaan oloko tụa wẹrị emi sẹ, iroro tọn angọ pịrị mụ yọmị kụrọ wó pịrịgha kpọ paa emi. Anịa gaan oloko faghaba tebara kị ị́mịnị mụ mịẹ mịnị a o? VIDIO farị dá, biibịbị kẹrị ẹrẹtei.
Vidio bolou mị, bịna-araụma tebara ka kị anị sei mọ ebi mọ nimi ịkịọụ tolumọ wẹrị Jehovah mịẹ pọwẹị mịnị iroro tọn angọ pịrị ma o?
Tetuu kị duonị omịnị zịnịotu bụọmọ wẹrị iroro tọn wó pịrị agbẹị a o? Hebrews 5:14 goo dá, bei biibịbịbo kẹrị ẹrẹtei:
Zịnịotu iroro tọn wó pịrị mụ yọmị bọụ dẹịn emi kị gbaa kpọ, omịnị teeki nimi agbẹị emi a o?
Teeki baratụa ị pịrị wẹrị ebi ye tọn angọ pịrị a paa emi a o?
Map emi bara bị, wó sei mọ ebi mọ nimi ịkịọụ bị mịẹmọ agbẹị ye akị wó tolumọ mịnị
5. Zịnịotu sei mọ ebi mọ nimi ịkịọu mọ diidụbamo
Kịmịsẹ kpekẹnị bara akị iroro tọngha. Anịa, omini tebara ka kị zịnịotu ịkịọụ diidụbamọ wẹrị emi bara mịẹdịa mịnị a o? Wẹrị bei maa yebo dii:
Bọlọụ yemị: Makeup dịsẹ kụrọmọ emi bịnaraụ serii aya itu a mú mị,anịa itu bọọ emi bịnaerebo bịsẹ inyenrinbụọ dịsẹgha.
Romans 15:1 má 1 Corinthians 10:23, 24 goo da, bei biibịbịmọ kẹrị ẹrẹtei:
Mị Bible goo yọbo dii daba, bịna-araụma teeki tọn angọ pịrị a paa emi a o? Zịnị kịmị ịkịọụ a bụụdọọn mịnị aba teeki ị́ mọ mịẹ mịnị a o?
Mamụkaramọ yemị: Kẹnị bịnaowei kụrọ wuru dọlọ bou mị, seigha bara nimi wẹrị emi, anịa omịnị bá kụrọ wuru bougha fa bara tọn angọ pịrị dẹ. Kịmịsẹ bẹnị emi yọ, bịnaotu kụrọ wuru boumịnị bara omịnị mọ ẹrẹ mị.
Ecclesiastes 7:16 má Romans 14:1, 10 goo dá, bei biibịbịmọ kẹrị ẹrẹtei:
Mị Bible goo yọ dii daba, bịnaowei mị teeki tọn angọ pịrị a paa emi a o? Zịnị kịmị mịẹ mịnị ye iné ịkịọụ bọọ bụụdọọn mịnị aba, teeki ị́ mọ mịẹ mịnị a?
Te yeama kị baratụa ị́ pịrị wẹrị ebi iroro tọn angọ pịrị mịnị a o?
1. Jehovah bii dá baratụa ị́ pịrị.—James 1:5.
2. Bible mọ Bible gbelemọ funama ghọ tuudọụ. Ị́mịnị Kasụọdẹ Christtuuduo-otumọ kpọ ẹrẹtei a paa emi.
3. Iné tọn iroro mị, iné ịkịọụ mọ má zịnịotu ịkịọụ kpọ gbelemụ bara kẹrị iroro.
ZỤA KỊMỊAMA GBAA MỊNỊ: “Ị́mịnị iné dịsẹ dẹ yesẹ mịẹmụ kụrọ nana wẹrị emi. Ị́ gbele ma o?”
Tetuu kị duonị omịnị Ọkpọnanaowei mọ, zịnịotu mọ akị tụa iroromọ agbẹị emi a o?
KỊLỌỌBARA
Jehovah bá zịnịotu akị tụa iroro daba, omịnị laa ebi iroro tọn mịnị.
Waị diitụa
Ị́mịnị tebara ka kị Jehovah mịẹ pọwẹịmọ mịnị yeama sẹlẹ angọ pịrị mịnị a o?
Ị́mịnị tebara ka kị iné sei mọ ebi mọ nimi-ịkịọụ tolumọ mịnị a o?
Ị́mịnị tebara ka kị ziniotu ye iroro mịnị bara diidụbamọ wẹrị emi bara mịẹdịa mịnị a o?
DIITỤA
Ị́mịnị tebara ka kị Ọkpọnanaowei mọ naịn dẹịn mụ iroroama tọn angọ pịrị a paa emi a o?
“Make Decisions That Honor God” (The Watchtower, April 15, 2011)
Jehovah tolumọye akị wó pịrị mịnị bara dii.
Baratụa kẹnị kịmị pịrị wẹrị laa kụrọ iroro tọnpẹlẹ ye dọụ ẹrị.
Olokoama tụagha ifie kpọ, laa Jehovah mịẹ pọwẹịmọ mụ bara tolumọ nimi.
“Do You Always Need a Bible Command?” (The Watchtower, December 1, 2003)