Ịmịnị Ifiebosẹ Mọkpọ Yetolumọmịnị

Kụraị 1927 U.S.A ibe, Illinois ama, Chicago mọ naịn emi yọ ka ị ziimi. Ị daụ mọ yin mọ sọnran awọụ kị ziimi—Jetha, Don, Karl, Joy bá ịmịnị Joel. Omịnị adụdụsẹ ka kị Jehovah karịmụ bara kị gbini-pẹlẹmị. Gilead school paa ifiemi, Jetha mamụkaramọ class ka sụọmị, anị 1943. Don, Karl, Joy bá ịmịnị Brooklyn, New York bọọ emi Bethel ka fịrị wẹnị yọ a múmị, anị 1944, 1947, bá 1951 kụraịbo. Ine bịnaotubo mọ bá ị daụ mọ yin mọ ebi mịẹdịayebo mọ opubara ka kị baratụa ị pịrịmị.

WO WARỊBOLOU AKỊ GESII TOLUMỌ BARA MỊ

Ị daụ mọ yin mọ gesii bara ka kị Bible goo timimị, anịduoni ámịnị Ọkpọnanaowei tarịmụ yọ kọn wosẹ tolumọmị. Ị daụ angọ paamọ wẹrị akpọsẹ bọloụ sụụ bọọ mú duonị, ánị church otubo ba wo akị yemịẹgha. I daụ laa fịghatimi waị warị a bo yọmị, ị yin mịẹ pọwẹịmọmị, anịduonị ámịnị gbaa ụ pịrịmị: “Karl, bodá wo church amú a.” Ómịnị á parụ mị: “Ịmịnị á kọn múmịnị, anịa ịmịnị benebene Church warị bolou duo sụọghafa.” Ámịnị waị ụ biimị: “tetuu a?” Ụ gbaamị: “Omịnị sụụ bolou bọọ timi ifiemị, church tịbịotu kị bo tẹẹ akị maa angamọsẹ pịrịtimimị! Ọkpọnanaowei maa angabosẹ ka sụọ sụụtimi ma?”

Ị yin church a timi ifie kị, maa Jehovah Iseriotu wo warịma bomị. Ámịnị Light tịịnmịnị maa Bible fun-ama kọn ị daụ pịrịmị, bịsẹ funbo Revelation bọọ emi egberibo kị gbaa wẹrịemi. Ị daụ funbo dịsẹ nana duonị á kẹrịakịmị. Ị yin funbo ẹrịbị, á kpọ koro a goomị. Kẹnịbaị erein newspaper boloumị kẹnị tịịnbịbị ẹrịmị, Light funbo akị Bible tolumọ dịsẹ-emi kịmịama kị tịịn wẹrịemi. Á kpọ múmịnị bara tọnpẹlẹmị. Ámú yọ laabị, kẹnị okosi ere kị ogugo finimị. Fun kpọ kẹrị wẹrịemi, Ị yin biimị, “Ị́ kpọ bei yọ ka yetolumịmịnị a?” Erema parụmị? “Iin, ine ebi bịnaraụ, sụọ bo.” Barịị wikibị ị yin wosẹ akị múmị, omịnị koro wikibosẹ ka múmị.

Kẹnị yetolumọ erein, wo tolumọmịnị owei mị ịmịnị Psalm 144:15 goo bara gbaamị, yọ gbaamị Jehovah karịmịnị kịmịbosẹ bolouịmbẹlẹmịnị. Bei gooyọ mọ, bá zịnị maa Bible yọama mọ ine angọ duosụọmị anị—1Timothy 1:​11, gbaa amọ Jehovah “pọwẹị nana Ọkpọnanaowei,” bá Ephesians 5:​1, wo kụrọmọ amọ “omịnị Ọkpọnanaowei kị dimịẹ.” Ọkpọnanaowei ụ karịmụ fomuun akị ị pịrị bá ịmịnị tọrụkẹrịyọ mịẹdịamụ yọbị yelaaemi bara ị mọ dọụ ẹrịmị, ịmịnị ine ụndụsẹ akị bịsẹ maa yebo kị mịẹmụ bara gbinipẹlẹmị.

Chicago duo mú wo mọ naịn dẹịn-emi itu laamịnị mị 32 kilometers (20 mi) laaemi. Bịsẹ bara kị gbaa kpọ, omịnị mú timimị, ine Bible nimiye kpọ dụba bọlọụ dẹịnmị. Kẹnị erein yetolumọmịnị owei mị Jetha biibịbị parụ bara gbaamị. Timi á peimịnị bị, ịmịnị iroromị: ‘Ị kpọ anị ye nimi wẹrịemi o. Ịmịnị kpọ ine bara serimọ wẹrị parụmụ timimị.’ Ịmịnị koro biibịbị parụmụ bara akị warị angọ tọlọmọmị. Yelaadẹịn yemị, Ị mọ ine bịnaotubomọ tẹmẹanga bọọ sọụ bọlọụ amúdẹịnmị. Ịmịnị kụraị 1941 ka benibelemị.

OPU BẸNỊỊ MA JEHOVAH PỊRỊ TOLUMỌMỊNỊ

Ịmịnị 1942 Cleveland, Ohio a mịẹ opu benịị bọọ paa yemị ukie wẹrịemi. United State mị 50 dẹịn-emi yọama kị telephone duo bẹnịị ma sụọmị. Wo warị otubo bịnaotubo mịẹpaamọ wẹrịemi “kala warịama” ka timi bẹnịịyọ bọọ mú timimị. Akpọsẹ maamụkaramọ sụụmị naá fagha wẹrịmị, egiren-otu mọkpọ Jehovah Iseriotubo ụyamọ kụrọmọ timimị. Buburu ifiebo, bịnạotubo ánị motor tụkpabo kọn kịmịotu wẹnịbo a paaemi anga kị dịamịnị. Bịnaotubo dein lee otuama sẹlẹmịnị. Egiren kịmị wẹnịbọmịnị bara ẹrịdaba, bịnaotubosẹ ánị motor tụkpabo kọn ụbọ tọrụbo dịadẹ anịkị ba yọ ẹrịgha bá mọtorbo binemịnị. Anịkị zịnị bịnaotu ifie famụgha bara baịn baratụa bịnaotubo pịrịyọ bomịnị. ‘Jehovah Iseriotu ebibara ka kị angọ tọlọmọmịnị bara ị mọ nimimị!’ Anịduonị ịmịnị malafagha bara ka kị dein a bunumịnị.

Biin kụraịama bụọdẹmị, ị yin bá kpekekpeke malafagha bara ị mọ nimimị, ịmịnị opubẹnịị ma paayemị ị mọ ukiemị. Ámịnị ánị etisẹ akị Jehovah mọ wó ogbo mọ ka tụamị. Ịmịnị ánị ebi mịẹdịayebo baragha fa.

Opubẹnịị naịndẹ ifie kị, ị yin beinmọ beinmọ ụwọụpẹlẹ fịrịwẹnịmị. Anịduonị beinmọ beinmọ ụwọụpẹlẹ fịrịwẹnị egberibo ẹrẹtimi ifiemị ámịnị ebibara kị peitimimị. Wo waị warị ghọ bomịnị ifiemị, a gbaamị, “Ịmịnị beinmọ beinmọ ụwọụpẹlẹ fịrịwẹnịmịnị yọ tịẹmọ dọụgha, anịa ịmịnị laa ụwọụpẹlẹ fịrịwẹnị bá ebibara ine warị otubo kpọ kekeregha fa bara gbaamị.” Omịnị laa baratụa á pịrị a paaemi a bara ámọ biimị. Omịnị baratụamịnị bara gbaamị, anịduonị ámịnị dein baịdaba wẹnịmụ fịrịama dịẹ wo pịrịmị. Omịnị school amú daba, ámịnị wo wẹnị fịrịbo ebiemi bara diisin daba egberigbaa yọ amúdẹ. Ámịnị ifiebosẹ fịrị kị wẹnịmịnị kpọ, ebibara tọrụtụa wo dimịnị. Omịnị break ifie anịghakpọ school seriwẹrị warị laadaba, ámịnị wo dọụmịnị yebo mịẹ wo pịrịmịnị. Zụa ifieama school seridaba, omịnị á sụọmọ egberigbaa yọ amúmịnị, bịsẹ yọmị baratụa wo pịrịwẹrị ụwọụpẹlẹ fịrị wẹnị kịmị gbelemọ yeama a sụọtuu nimimị.

ỊMỊNỊ ỤWỌỤPẸLẸ FỊRỊWẸNỊMỊ

Ịmịnị oi sondia kụraị ka timi ụwọụpẹlẹ fịrịwẹnịmị. Ị daụ naá Jehovah Iseri-ụbọ a paagha kị gbaa kpọ, ómịnị ine ụwọụpẹlẹ fịrịwẹnịyọ tarị kụrọmọmị. Kẹnị buburu, Ịmịnị angọtụamịnị kpọ, Ịmịnị naá Bible tolumọ dịsẹnana wẹrịemi kịmị ẹrịgha bara ị mọ gbaa ụ pịrịmị. ịmịnị dọlọ pẹlẹwẹrị, ụ biimị, “Ị́mịnị laa ị mọ mọ́ Bible tolumọ a paaemi a?” Ụ dọlọ ifie yebị irorosinbị gbaamị, “Tolumọ a paaemi.” Ị daụ kị iné bọlọụ Bible kọn tolumọ kịmị a paamị. Anị yelaa fomuun!

Omịnị “The Truth Shall Make You Free” fun ka kị tolumomị. Wo tolumọ timi kẹnị ifie laabị, Ị daụ ịmịnị Bible tolumọ angọ pịrịmịnị yọ mọ bá ebi kịmị tolumọ kịmị a paa yọkị dọụmịnị bara ị mọ dọụ ẹrịmị. Gbaamaba, kẹnị buburu wo gooyọbị goo siinbị, ụ gbaamị: “Fun gbaamịnị egberi mị ị mọ ẹrịmị. Tebara kị mịẹtimi fun gbaa egberi mị kọkọ kịrịemi bara ị́ mọ nimi ma o?” Ịmịnị biibịbị parụmọ bara akị angọtọlọmọgha wẹrịmị, anịduonị ị gbaamị, “Ịmịnị naa mị tịẹkiri ma parụgha fa, wo barịị tolumomịnị ifie kị ịmịnị ị́ parụmịnị.” Barịị tolumọ ifiemị ịmịnị ụ parụmị. Bịsẹ biibịbị parụ wẹrịemi Bible yọama kpọ ị mọ goo ụ pịrịmị. Bịsẹ ifie duobosẹ, Ịmịnị ebibara ye atuudọụ angọtọlọmọ dẹkị, ụ mọ mọ yetolumọmịnị. Bịsẹ yebị baratụa ị pịrịwẹrị ebi kịmị tolumọ kịmị a paamị, bá baratụa ị daụ kpọ pịrịmị. Ómịnị wó tolumọyebo akị tụa inyerin wẹrị kụraị 1952 ka benibelemị.

ỊMỊNỊ BETHEL AMÚ FỊRỊWẸNỊMỊ

Ịmịnị oi sọnọ ma kụraị ka timi warị a barasinmị. Jethaa missionary fịrị kị wẹnịmị, Don ba, Bethel ka mú fịrịwẹnịmị. Ánị maa kịmị ánị wẹnịmịnị fịrịbo tarị kụrọmọ mị. Ị kpọ Bethel mọ Gilead School mọ amú mụ bara fun tụawẹrị etipoutimi Jehovah kọrụmị. Jehovah ị parụmị. 1946 Bethel amú fịrịwẹnịmụ fomuun ị laamị.

Ịmịnị Bethel a timi ifiemị, bẹbẹ wẹnịmụ fịrịama ị laamị, anịduonị ịmịnị biin aya yeama kị tolumọmị. Gbaamaba, ịmịnị Bethel ghọ tịmị 75 kụraị kị laadẹ, Ịmịnị fun mịẹmụ bara tolumọ bá account office kpọ fịrịwẹnịmị. Ịmịnị yeama fẹị Bethel a bo bá yelaa yeama saị zịnị yọama ghọ mú mọ bara kpọ tolumọmị. Ịmịnị mọkpọ, Bethel morning worship mọ bá Bible duo pịrịmịnị ẹrẹ egberibo tarị kụrọmọmị.

Ịmịnị Karl duo biin yeama kị tolumọmị, ómịnị 1947 ka Bethel ghọ bomị. Ómịnị ebibara ka kị Bible nimi bá ebi kịmị tolumọ kịmị ka paaemi. Kẹnị ifie amabẹnịmọ ẹrẹbịbị pịrịmụ fịrị ị laabị ọ́mịnị baratụa ị pịrịmị. Ịmịnị gbaa Karl dịamị angọtọlọmọ dọụmịnị duonị biin fun-ama kị bẹnịmọdẹ anịa akị mịẹmụ bara nimigha. Ómịnị kenị biibịbị ka kị ị bii wẹrị baratụa ị pịrịmị, “Joel, teeki iné egberitịbịmị a o?” Ịmịnị wó biibịbị duo egberitịbị ma asụọtu nimiwẹrị—biingha fun-ama ka kị angọ tọlọmọmị. Ịmịnị bịsẹ erein baragha fa.

Ị́mịnị Bethel a timi pọwẹị nana dọụmịnịsẹ, angọtụa egberigbaa fịrị wẹnị, bịsẹ yọkị baratụa ị́ pịrịwẹrị paayeama akị zịnịotu kụrọmọ a paadẹ. Kẹnị buburu Bronx New York City a paaye ị mọ ukiemị. Ị mọ kẹnị bịnaowei mọ mú Watchtower mọ Awake mọ akịwẹrị ere laamị! Omịnị wo angọbo gbaa á pịrị, ba gbaamị, “Mị buburumị omịnị Bible duo kịmị kụrọmọ egberiama kị gbaa kịmịotu pịrịmịnị.” Á gbaamị, “Bible egberisẹ, sụọ bo.” Omịnị Bible duo Ọkpọnanaowei Daabụọ bá ayakpọ mọ gbelemọ egberiama kọn á mọ mọ ẹrẹteimị. Ámịnị ánị ikie otubo kpọ zụa tịịnbo barịị week mị wo sụọmọ Bible tolumọ yọbị, ine angọ duosụọmị. Á mọ á yei mọ bọ peibolou nana Jehovah Iseriotuama ka paamị.

ỊMỊNỊ Ị TAA DUO YETOLUMỌ AKỊMỊ

Ịṃịnị nanamụ ere dọụtimi oia kụraị laadẹ kị ine nana erema mọ gbelemị. Teeki baratụa ị pịrịwẹrị ebi ere dọụ ẹrị ma o? Ịmịnị tẹẹ Jehovah pịrịmị, bá ‘Omịnị zọzọ nanadaba wo ụndụbo akị teeki mịẹmịnị a biibịbị kẹrị iroromị?’

Ịmịnị 1953 bị Yankee Stadium bọọ mịẹ opubẹnịị, kẹnị bịnaraụ mọ gbelemị, anị erịmị Mary Aniol. Amọ Jetha mọ maamụkaramọ Gilead class bọọ kẹnị class ka timi paamị, Mary mọ ine bịna-araụma mọ kẹnị yọ ka timi missionary fịrị wẹnịtimi mị. Mary pọwẹị pọwẹị bara, Caribbean bọọ ánị missionary fịrị wẹnịmịnị bara mọ, bá akị bei bụọdẹị kụraịbo kịmịotu mọ Bible tolumọtimi bara gbaa ị pịrịmị. Omịnị zọzọ nimi bọlọụ amúmịnị mị, omịnị kẹnị tẹmẹ-anga mịẹmụ yeama kị nana wẹrịemi bara dọụ erịmị. Wo kọn zọzọ ghọ nana wẹrịemi tarị bị dụbadẹịnmị, anịduonị omịnị April 1955 zọzọ nanamị. Biin ụwọụama kị, Mary Jehovah bara kị duo boemi dịẹpịrịye a paa ị pịrịmị bá ámịnị ebi mịẹdịaye ka paamị. Kọn á pịrịdẹ fịrịsẹ Mary pọwẹị pọwẹị bara ka kị wẹnịmịnị. Ámịnị ebibara fịrịwẹnị, gesii tarị akị kịmịotu a nana, bá Daabụọ ka kị ifiebosẹ bọlọụ kẹrịmịnị. (Matt. 6:33) Omịnị teree dii fịrị wẹnịtimi tara kụraị baịmị, anịa 1958 laabị, ámịnị wo tịịn Bethel á múmị.

Ịmịnị ị taa duo biin yeama kị tolumọmị gbaamaba, omịnị bọlọụ zọzọ nana ifiebị, omịnị kẹnịsụọmọ Bible goomụ bara tọnpẹlẹmị, omịnị 15 verses ka kị kẹnị ifie goo timimị. Kẹnị ụbọ Bible yo goosin daba, omịnị bịsẹ Bible yọbị akị tụa inyenrinmọ bara kẹrị ẹrẹteidẹ. Ị taa Gilead school ghọ tolumọ yeama mọ bá zịnị ibe amú egberigbaa fịrịwẹnị timi ifie paayeama gbaa ị pịrị timimị. Bịsẹ yebo baratụa ị pịrịwẹrị ebibara amabẹnịmọ egberi pịrị bá bịnaotubo kpọ kụrọmọ timimị.—Prov. 25:11.

Ị taa Mary 2013 kọọ fịịmị. Ịmịnị ayakpọ mị ánị ẹrịmụ bara akị tọrụ diimịnị! Bei tịẹkiribị, Ịmịnị eti akị Jehovah atụa wẹrị yetolumọ bọlọụ a múmịnị. (Prov. 3:​5, 6) Ịmịnị Jehovah kịmịbo ayakpọ bọọ mịẹmịnị yebo kẹrị iroromịnị mị kụrọmọye mọ pọwẹị mọ kọn ị pịrịmịnị. Ịmịnị dụbadẹịn kịmị tolumọ owei kị duo aya yeama tolumọmịnị! Gẹsịị mị, Jehovah kọn ị tolumọdẹ yebo ị laamụ agbẹịgha ebiama duonị, ịmịnị akị ụ kulemụ bara kpọ nimigha.