Ti Taj Mahal​—Monumento iti Panagayat

Daytat’ nadeskribir kas napintas nga alahas, kas maysa a kanta iti ayat iti bato, kas lapida iti agladladingit nga asawa a lalaki maipaay iti napukaw nga asawana.

Sangagasut innem a pulo a kilometros iti daya ti Delhi, iti makin-amianan nga India, isu ti siudad iti Agra, a sadiay nakatakder daytoy a napateg nga arkitektura ti Muslim​—ti Taj Mahal. Dinisenio ti maysa nga arkitekto a Turko ken naaramid iti puraw a marmol, daytoy nagpintasan a patakder ket kasla maysa a monumento iti ayat ni Shah Jahan maipaay iti ingungotenna nga asawa, ni Mumtaz Mahal, isu a natay idi 1631. Ti tanem innalana ti 20 a tawen a panangibangon ket rinamanna iti agarup 20,000 a trabahador.

Ti impluensia a Muslim ket nalawag a makita kadagiti nakukuttong a torre nga agtayag iti 40.5 metros ken babaen kadagiti teksto a naadaw manipud iti Qur’ān isu a nangarkos iti ruar dagiti diding. Maysa a natalinaay a libtong ti mangipaay iti romantiko a pakalaglagipan iti mausoleum, nangnangruna iti lawag ti bulan wenno iti ileleggak ken ilelennek ti init.

Ti nauneg a panagayat ti Shah iti asawana ipalagipna ti maysa kadagiti ebkas ti ayat ni Ari Salomon iti dina nagun-odan a pastor a babai a Sulamita, a masarakan iti Canta ni Salomon.